mi(sual).com

September, a ni leh kum chu tarlang lo mai ila, _____zan a lo ni a, ka thian pa Taxi chuan Rangvamual kal pahin i service ang u ka ti a, ti chuan kan chhuak ta a. Rangvamual ah chuan hlim ve tawk tak chuan kan kal a. Ti chuan thiante ho chu ka thlah leh te te a, chumi hnu chuan service tur chuan ka tlan chhuak leh ta a. Ti chuan Bawngkawn atang chuan RV kal tur in i hman theih angem min ti a, kei chuan hnial lovin kan tlan lut thla leh nghal mai a. Ti chuan kei pawh chuan min hmangtu te nghah pah chuan zu chu kan in belh ve leh a, tichuan min hmang tu te chuan Zodin lam ah min dah thei angem min ti a, ti chuan kan kal pui ve leh mai a. Ti chuan ka service chho ta zel a, khua a chhia in service pawh chu a nuam vaklo khawp mai a. Temple bul a ka awm lai chuan ka sana ka en a dar 2 hi a lo ri dawn ta mai a. Ti chuan zanin chu haw phawt mai ang ka tia, ka taxi chu kan ti nunga, haw tur chuan ka in khalh chhuak ta a.

Civil Hospital thlanga ka tlan lai chuan Zoram Drug store chhak lawk ah hian nula pakhat huh hniang a alo thu hi ka hmu a. Tun ang hun ah te chu nula chu tilai ah te ala thut le ti in ka in ngaihtuah a, ka tlan pel ve mai a. Ka rilru ah a awm phei ta reng mai a, engemaw kha ‘KS’ kha ka rilru ah a awm reng le a hmel pawh ka hmu si lova ti in ka in ngaihtuah a. A hnu ah chuan ka ngaih tha thei lo chu Zarkawt ah chuan kan in khalh kual leh pawp a, ka tlan let leh mai a. Ka thlen phei chuan angai ah chuan a lo la awm a, ti chuan kawng chhak lam ah chuan motor chu kan dah tha te2 a, engtin nge ka zuk biak angle ti in ka in ngaihtuah a. Pawilo kan zuk bel chiang hrim hrim ange ti in motor atang chuan ka chhuak a, ka zuk pan thla ta a.

A bul ka thlen chuan thiannu ti in ka auva min chhang silo, hawi pawh chu alo hawi chhuak hauh silo. Tichuan a sam huh hniang mai, a sam atanga tui far fep fep chu ka han khawih deuh de de a. Thiannu, ti in ka han au leh a, thianpa kal rawh min be suh ti in hawipawh lo hawi chhuak lo chuan min lo ti mai a. ‘KS’ a nilo a mi le, tinge hetia min chhan le ti in ka in ngaihtuah mai mai a,KS chu nise tha takin min lo chhang nghal mai awm sia ka ti rilru leh mai mai a. Ti chuan asam huh hniang mai chu ka han khawih sak leh de de a, thiannu i van huh nasa ve idamlo anga sin engatinge he tah hian i awm reng a, harsatna neih i nei em mi ka ti a. Melh pawhchu min lo la melh chuanglo, ngawi renga a sama ka khawih de de lai chuan a hla play ri chu ka hre ta a. Engmah sawi zawm lo chuan ka ngaithla ve a, zawi te hian a ngaithla a. Chu hla chu RTC.LALDUHAWMI’n NGAWLVEITE IN HLANNA tih hla a sak hi alo ni a. A hla thu ka ngaihthlak ve chin te lo tarlang ila:

Tlang sawi leh, tih leng khai kan ni
Rel thang phurin hringnun kan hmang
Kan tan hian Khawvel a zim lua
Khawvel pawh hian hnutiang min chhawn ta.

*Muantu kan ngai, Puitu kan ngai
Chhantu kan ngai, an awm silo
Mifel rual awmkhawm hote zing ah hian
Kan tan hmuna awm ve silo.

Keini zawng, hrem zia reng kan ni
Kan thiltih man chauh hmu kan ni
Aw Isu Davida fapa, min khawngaih rawh
Min kal pel lul suh

*Sual neilo chuan, min beng rawhse
Isu I ram I thlen hun ah
Min hre reng ang che
Kei misual ber hi

I tan ka nun hlan che ka duh
I tan ka nun i tan ka hlan e.

Ti chuan ka rilru chu a hneh ve em em mai a, ka khawngaih ve hle ringawt a. Thiannu kan ti leh chu ila kal nange e nge i duh sawirawh, khawiah mah ka kal peih lo, midang sawmtur va zawng mai rawh ti ringawt chuan min lo chhang leh a. Kei chuan thiannu, i hrelo a nih chu chutiang zawng chuan kawm che ka tum lo a maw, engvanga tilai a thu reng nge maw i nih a, ruah i do char char mai ni, thlah i ngaih chuan ka thlah ang che ka ti a, Tichuan alo hawi chhuak a, chiang tawk tak chuan minlo melh a, ka phu chiang kher mai, kha tianga hmeltha kha, a biang ah mittui alo luang thla ngiai2 a, kei lah chu kan hamhaih leh deuh pek a, chet nachang pawh chu hre mai lo chuan ka melh ngai chu ka melh reng a, tinge min en renga a ti chu ka harh deuh zawk a, e tihpalh lutuk kan ti mai a, a mittui chu a tam telh2 mai bawk si,A hla ngaihthlak vela tang chuan a nun chu a tuihal ve ngawih2 tih chu ka hre ve thei mai a, mahse, kei lah zu rimnam rum2 nen, la rui deuh bawk nen chuan, tih vak ngaihna hi ka hre lo leh pek a, tichuan a bul ah chuan kan thu rem ve te2 a, thiannu min hlau miahsuh thlamuang tak khan awmrawh kan ti thla ve ngawt pek a, ti chuan, thiannu I kal thei em,? Na I nei em? Ti te in kan zawt a, a ni chuan ka tha vek alawm, ti in min chhang a, tilai chu a vawt emai ruah hi atla reng bawksia, motor ah khian lokal rawh ka ti a, a tir chuan a duh mai bik lova, tinge I duh loh a, min hlau a mi? I hlauh tur in ka lo awm a nih chuan min ngaidam dawnnia kan ti ve leh mai a(in la tawngkam thiam ve fu lo maw?), ti chuan eng tin2 emaw kan in sawm hnu chuan motor ah chuan kan in hruai lut thei ta a. (Kan CK dawn a maw ilo ti nge aw…)

I kawr hi a huh nasa emai, ka tia, ka phelh tir a, ka kawrlum hak lai chu kan pe a, in thlahrung tak chuan vawt a tih em avang chuan in thlahrun pawh sawi thei tawh lo chuan aha ve mai a, a ni chuan thianpa tunge inih a, khawi ah nge I awm? Ti in min zawt ta a, kei chuan awlsam tak chuan ka hrilh mai a, a nih thiannu thil ka zawt ve thei chengem ka ti a, ti chuan a ni chuan, nia ka chhan theih che nih chuan ka chhang ang che min tia,  a hming leh hetianga a awm tan dan te, ahun hman nuam a tih leh tih loh te, kan zawt tan ta a.

Ti hian a ni chuan min chhanga Ka tetlai hian ka nu lehpa an in then a, nupui/pasal dang an nei ve2 a, tu mah2 in min enkawl thei kan chhungte tak2 pawh nilo in ah ka seiliana, ka pi/pu te an boral tawh si a, chhungte tih tur leh belh tur pawh ka hre si lova, tih atang chuan tun hun thleng chuan min hrilh ta a, ti chuan kan inkawm rei deuh ta a, a nih tun ah hian khawnge kal leh ila tum ka tia, ti hi nimai tih zawng chuan min chhang a, Ka rilru mai2 chuan ka hruai haw mai dawn mawnile ti in ka in ngaihtuah buai ve nasa mai a, ka hruai haw chuan ka chhungte leh thian/thenawm ten nupui a ru a, chhung te pawh a nei lo, KS amaw nileh nghal hri thalo tak2 the pawh a vei ang, te min tia nga tih ka in ngaihtuah buai khawp mai a., ka sawm chin ta nghe nghe a,min lo zui haw ve mai ta che, kan in ah thawh tur tul2 I thawk ve anga, ka farnu ini mailawm ti in kan sawm der ve a, mahse a in thlahrung ve ta tlat mai, misual anih zia a in hria a, a nun kha atlawm a, ka tluk miahlo tih te ka ngaihtuah chhuak a, a nih chuan I Mb.No hi min pe la, ka No. hi la bawkla kan in be thin dawn nia, min mamawh hun2 ah min lo call dawn nia ka ti ta a, ka pawisa neih chu bei tham viau mahse, pawisa pakhat mah aneih loh avangin tukthuan a ei na tur tal ka tia, 150 vel ka la ah ve tawng2 chu ka pe a, a ni chuan athlawn in maw a ti a, mak hi a ti khawp mai a, thil athlawn in ka la ngailo asin, I duh2 dan in min chhawr in min ti thei ang, ka lawm zia hi ka sawi  thiamlo a ni a tia, ka hnuk a ti ulh khawp mai a,kei lah pek chuan vawt iti sia in tih lum nan zu tlem ka nei a in rawh aw, mahse tam chu pektur che ka neilo a ka tia, angailo, ka lawm lutuk kha chu nangma tan dah rawh I pawisa zawng2 ka laksak vek tawh che hi min ti fel ve et mai a, ti chuan anih ka hawna tur a la hla sia ka kiansan hrih phawt mai ang che aw,mi lo zui haw ve duh hrih loh chuan ka ti a, ti chuan ngaihtuah zui tak chungchuan ka kiansan ta a.

Ka haw kawng ah chuan ka ngaihtuah phei zel a, ka va han vannei tehlul em, hawna tur in ka la nei a, thlamuang takin naktuk a chawei tur ka nei tih ka hria a, chawhmeh tui tha2 ka nei tih ka hria a, ka ngaihtuah zela, ka lawm ta em2 mai a, ti chuan tunge tianga min awmtirtu hi PATHIAN a ni tih te ka ngaihtuah ve tan ta a, PATHIAN awm tak2 pawh ring ngailo khan lawmna thar kan nei chho zui ta a, mut dawn pawh a tawngtai ngailo khan, lawmthusawi tawngtai leh ka thiannu, khawngaihthlak tak tan kan tawngtai ve ta a, tawngtai chu ka beirei lo kher mai, Amen hun tur pawh hre thiamlo, mawlmang tak a tawngtai chuan chu zan chu ka hmang ral chu a ni ve ta mai a.

Ti chuan atuk chu Sunday alo nia, chaw kan ei dawn a, Cooker ah chaw tam tham tawk ka hmu a, chawhmeh Sunday te alo ni bawk a, vawksa nen, alu, Maian, hmarcha, chi, engkim mai kha ka hmuh in, ka thiannu kha ka hrechhuak leh ta a, ka hnuk a ulh tat lat mai le, ka chhungte tih ngaihna hrelo chuan min zawt ta a, engmah sawilo chuan, avan ropui in ka van vannei tak em malsawm chaw leh chawhmeh ka ti ringawt a, tichuan inkhawm pawh chu ka la inkhawm ngai chuang lo, ka thiannu thar hmuh in ring tak chung chuan atlai ah chuan chuan ka in khalh chhuak leh a.

Ti chuan tlai dar 3 vel alo ni a, Ka cell phone chu alo ri ral2 a, kan en chuan ka thiannu chu alo ni a, phur tak chuan ka la a, tun ah Zodin ah ka awm a khawnge I awm, ka van hmu duh che ve, min lo ti a, kei chu phur tak leh hreh ru tak chung chuan, awle ka lo kal ang lo kal sawn miah lo la, ka ti a, tichuan ka thianpa motor chu kan tinung leh phat a, a awmna lam pan chuan ka tlan phei ta a, chhun eng ah kan hmu mai chu kan hai pek a, a sang tha in a pian a nalh bawk si, a hmel that dan kha a chiang em2 mai bawk si, a lo ding zaih mai a, kei chu a bul ah chuan amah pawh chu hrelo chuan ka dinga kan hawi kual vel a, a ni lah chuan chiang em2 mai hian min lo au a, ka phu chiang kher mai, hman zan khan ka sawizo hman lo a, a ti a, a nih chuan motor ah khan lut la, khutah len pah in min hrilh dawn nia ka ti a, RV lam pan chuan ka phur thla ta a.

Ti chuan min hrilh thla ta niap2 a, mi inkhawm kal tur tamtak te hi tinge min thlir liam mai2 thin le? Tinge min hmuhsit hmel taka min melh vel thin le, kan Pastor leh Kohhran upa te leh thalai hruaitu te pawh hian engatinge min thlir liam mai2 thin le, henghi khristian vek chu an ni tiraw?min ti ta mai a, tichuan, a sawi zel a, inkhawm tur a min sawm chu khawi lam ah, kan hmel an chinchhiah a, an duh hun2 ah min man a, min vawhrep a, an ni mitenawm lutuk te hi chu dim reng2 loh tur min tia, kohhrana mi in hmang nasa nasa te hi kut min thlak uar an ni bawk sia, ti hian ami chanchintha an hril thin? te min ti a, ka ngawi renga, a sawi zel a, hmangaihna hi an nei miahlo ami? Biakin ah te hian kal te hi ka chak ve thin asin, mahse ka kal ngam thlawtlo a ni,ka dinhmun ang hi I dinhmun ni se I kalngam bik angem? Min ti bawk a, tichuan PATHIAN hi khawnge a awm a, engtia zawn tur nge engtin nge ka neih ve theih ang ti te in min zawt a, keichu ka sual em a ni, min duh tawh pawn ka ringlo, min duh selang chuan, atan hian ka in peih ve khawpmai, mahse Bible pawh hi khawimi nge kei hian ka neih teh lul ang, ka lei ngam I ring em? Te a tia, ka zak angreng khawp mai a, A tuihal ang em khan ka la tuihal ve silo va, mahse ka hriat ang chhun2 te chu kan hrilh ve a, mahse ka tan khan ka hrilh vak khan awmzia aneih ka ring bawk silo a, zu in tur in a PATHIAN thu han sawi thlak chiam chu ni thei in ka hre bawk si lova, tichuan, a ni chuan farkhat pawh in lo chuan ka bul ah chuan ka in lai chu min lo nghak a, ka in zawh hnu chuan enga tinge hawna tur inlehlo I nei a, nulehpa ulehnau I nei a, Zu te hi I in ve a, I rilru a hah thin viau a mi a, I in hmehlo lutuk, heng te chu keini ang tih awm tawk lek alawm, tive tawh reng2 suh, Nupui fanau te pawh ila nei anga zuin chung chuan chhungkua I enkawl tha thei dawn emni? Min ti let zawk ta thauh mai a, ka zak angreng bawk sia, a sawi zel a, ka rilru a in sual nasa khawp mai a, a hmel ka zuk en a, a hmel chu a zahawm in a hmel tha khermai bawk si, Nula hnahkhat chu ni se ka hmangaih che asin han tih phawng mai kha ka duh rum2 mai a, ka nui chho ta vur2 mai a, engatinge khatiangte I ngaihtuah a, kei pawn ka tia lawm, diktak chuan ka DUH che ni. mahse ti mai hi ka ni sia, hmangaih leh duh theih/duh tlak ka nilo tih ka in hria a, min duh mahla ka hnar tho ang che duh tak chung che in, I nun hi tih chhiatsak che hi ka duhlo, min ti ta mai a, ka phu chiang kher mai, keichuan engtin nge ka ngaihtuah na I hriat a? ka tia, a ni chuan ka rilru ah lo awm ve tawpa, zahpawh dawn lovin ka lo sawi chhuak ve tawp a nih kha atia, a dik alawm ka DUH che a ni, diktak chuan ka rilru ah hian I awmreng mai bawk si a, ka khua hi a har veng2 mai bawk si ka tia……. Tichuan lainat leh hmangaih rilru na tak chung chuan kan inhmuh na ngai ah chuan ka kalsan leh ta a.

Chumi hnu chuan vawikhatmah in hmuh zui leh in biak zui chu kan nei ta lo a, tun hnu a ka ngaihtuah hian, MISSIONARY tha tak ka tan hian alo ni reng mai tih hi ka hre chhuak ta a, khang hun lai vel kha, nimin ang vel chauh mai hian kei chuan ka hria in ka rilru ah hian a awm in a thar reng mai bawk si, ka sawi ka sawithin he thu hi, ka sawi tawp theilo, khanu kha VANRAM ah hian akal hi ka ring tlat a nih chu, a nun kha atlawm in a sual zia kha a in hre chhiang a, engmah a nih loh zia kha a iin hria a,Lal ISUA hian khangmi te kha a ni a hmangaiha a lawm thin ni tih te ka ngaihtuah a, VANRAM ah tal chuan ka hmuh ve leh hi ka la ring tlat a nih chu.

Tun hnu ah hian ka ngaihtuah chhuak thin a, ka in thiam thei ngailo a ni, ka nun hi a ti hrehawm in, puihna tur tamtak ka lak atang khan a duh a ni, mahse kei chuan ka lo pui ngai reng2 si lova, thilsual lian tak ka ti a ni. A in luahtur te ngaihtuah sak in, a bul tan na tur chawhmeh vel a zawrh natur pawisa tlem azawng tal lo hnutchhiah ve tur a nia, mahse khang hun lai khan sum engmah neih ka neih ngailoh vang a ni. Zu man tur buai khan ka la buai a, keimah pawh in enkawl theilo khan a ni ka thiannu kha engtin nge kan puih the lul ang ni ti ten ka in hnem ve hram2 thin a ni.

Duh tawk dawn mai ila, a tawp khar nan, keini hian khang mi te nun tuihal tak2 kha kan zawngin chhanchhuak tur hian ke kan pen ve dawn lawmmi? Biakin ah ringawt hian ami Krista ringtu kan nih dawn, kan fel reng dawn nge, mi tha kan ni dawn, Sualna neilo chuan heng mite hi kut thlak rawhse, mahse keichu misual tak ka nih avangin kut ka thlak ve theilo tlat, kutthak hnawihnan kan hmang dawn em ni? Heng mi te hi Lal Isuan ka mi te ati asin, chaw eitur kan pe em? tui in tur kan pe em?

MATTHAIA 25:35   Ka ril a tamin nangnin ei tur mi pe a; ka tui a halin in tur mi pe a; mikhual ka nihin mi thleng a;

25: 36  saruak ka nihin puan mi sintir a; ka dam lohvin mi kan a; tan ina ka awmin ka hnenah in lo kal si a,” a la ti ang.

25:37   “Chu mi hunah chuan mi felte chuan, ‘Lalpa, engtikah nge riltamin kan hmuh chia ei tur kan pek che? tuihalin kan hmuh chia in tur kan pek che?

25:38   Engtikah nge mikhuala kan hmuh chia kan thlen che? Saruaka kan hmuh chia puan kan sintir che?

25:39   Engtikah nge dam lovin emaw tan inah emaw kan hmuh chia i hnena kan lo kal?’

tiin an la chhang ang.

25:40   Tin, Lalber chuan an hnenah, ‘Tih tak meuhvin ka hrilh a che u, Heng ka unau te berte zinga mi pakhat chunga in tih chu ka chunga ti in ni,’ tiin a la chhang ang.

25:41   “Chu mi zawhah chuan, a vei lama mite hnenah pawh chuan, ‘Anchhe dawngte u, kumkhaw mei, diabola leh a tirhkohte tan an buatsaihah chuan mi kal bosan rawh u;

25:42   ka ril a tamin nangnin ei tur mi pe lo va; ka tui a halin in tur mi pe lo va;

25:43   mikhual ka nihin mi thleng lo va; saruak ka nihin puan mi sintir lo va; dam lo leh tan ina ka awmin mi kan si lo,’ a la ti ang.

25:44   Chu mi hunah chuan anni pawhin, ‘Lalpa, engtikah nge riltamin emaw, tuihalin emaw, mikhualin emaw, saruakin emaw, dam lovin emaw, tan inah emaw kan hmuh chia, rawng kan bawlsak loh che? Tiin an la chhang ang.

25:45   Tin, ani chuan an hnenah, ‘Tih tak meuhvin ka hrilh a che u. Heng mi te berte zinga mi pakhat chunga in ti lo chu ka chunga ti lo in ni,7’ tiin a la chhang ang.

25:46   “Tin, chung chu kumkhaw hremnaah an kal ang a; mi felte erawh chu kumkhaw nunnaah an kal ang,” a ti a.

Similar Posts:

• Zei Book – Part 2
• Fimkhur a Ngai
• “Fel” inti te nek bo ka thiannu kha – Part II
• Pathian Remruat (I duhzawng vana an tih angin leia mi’n ti rawh se- Mt 6:10)
• Ka ngai che- Lasi note IV

Recent Posts:

• How to speed up a computer
• Lunar Phase
• Chet chhiatna tlem te
• Kumhlui 2011
• SOPA and PIPA: GoDaddy an che buai nual

This entry was posted on Sunday, November 6th, 2011 at 6:30 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.