mi(sual).com

Phone a lo ri a, “Airtel-ho tak hi aw… ka va’n ning!” tih leh a hmehna sen hmeh ka rual a. (ka bawihi ani reng sia…) Engah nge ka bulah kan nu a awm kuk laia min rawn call vei! A rawn ri leh, a hmehna sen hmeh rualin “Hellooo… tunge in biak duuuh?… Helloo… an tawng chu ka hria maw le…” (ka bawihi bawk kha a ni reng sia…) Hmmmm… tiang reng reng chuan ka nupui hian awi loh chin a la nei ang a, min la man chhuak nge nge ang. Khawnge, silent mode-ah dah law law ila a hahdamthlak zawk ang.

Mahse, kan nu hian hmun pawimawh pawh ni lova silent mode a phone dah hi a’n haw mai mai khawp a. Pa lerhzia… a ti, a hre ve tlat. Silent man-in silent mode ka mamawh ta! Thluak vawrh a ngai!! Tichuan, ringtone ka’n tiri kual vel a. Hei hi a ri chheng chhenga a nalh reuh hi, tunlaiah tone ri bur bur chu a thing tawh… a hriat tur siin keimah leh keimah ka inbe vel a.

A changin ringtone ka’n play zeuh a –

“pu sawm, enge ni ta?
A va lawmawm dawn ve…
Aw… Mangtha le… Kan lawm lutuk”

“Tuisem pu sawma maw? Eng nge a rawn sawi a?”

“Naktukah tui min rawn pe dawn a nih chu” (bazar-a kan inhmuha a sawi a ni reng sia… bum nalh thei tiah tiah)

Buaithlak ve deuh thin chu nupaa thutdun laia – U Pianga te, Nu Madawngi te, Pu Kapa te hnen atanga call lo lut, pawimawh bawk si, ringtone ri chhuak bawk si lova “Hello” tih ngai thin mawlh mai kha! La duh lovin ring ral tir ila… landline-ah an rawn tinawn ang a, kan nuin a lo chhang ang a, “In pain phone a va la thei lo ve” an rawn tih vaih chuan…

Kan nu hi ama tawka fing ve zet mai a nia, ka pheikhawkhrui suih dan atang ringawta ka len hlat zawng chhut chhuak vek thei a ni. Chutiang nu chuan, a pasalin a phone silent-ah a dah tih a hriat vaih chuan vawkpui biru ang maia lu chauh thukru, mawng lang kung ka ni dawn si.

“Pu Biaka khan a rawn phone che nge i phone?”

“Min rawn phone”

“I phone a va in-ring si lo ve, silent-ah i dah em ni?”

“Tone volume hi amahin a lo down leh thin, ka phone hi check tir a ngai… ka ning tlat!”

Nupui te bulah thinphu de de a Msg. ka type thin lai te, zahzelah games khelh phaha bawihi nen text kan inthawn mial mial lai te, Msg. a rawn luh apianga ka phut zuk thin lai te, chhiar nawn leh atana ka it ngawih ngawihte pawh dahtha ngam loa ka delete nghal zung zung thin lai te, ka nupui bula phone ka kalsan ngam miah loh lai te, bual in leh ek in-ah pawh ka ken luh trut trut thin lai te, “Games ka lo khel ve…” ti a, a kut phone ka hlan dawn apianga 0ffline a ka dah keuh thin lai te kha… Tunah, tumawng hial benga ‘tar’ ka nih hnu hian ka nuih a va za e.

Tum khat, Message sei tawk ka type lai a, ka inrin hman hmaa ka phone a rawn en tum a -

“misual.com an tih fo hi i chhiar ve duh em? kha chhiar ve chhin teh, an thu a ngaihnawm thin viau a nia” ti a, chi-ai miah lova chhiar tir ka’n tum vel te kha ka lo va fing em! Khawi maw… tiin han chhiar ta tak tak se, a rapthlak tur zia hi aw, ka sawi thei lo. A nih loh paw’n phone kha lo hup vatin ah bo nghal emaw lo tum ta ila, a rawn hmuhman tawh si a, ka chetsual phah zawk ngei ang. Nun hluiah kir leh ta ila, ka va lerh leh dawn rua e. A nawm dan a hreawm a, a hlimawm dan a hahthlak si. Nuam dangdai ve reuh mai mai…

Similar Posts:

• “I âw-ah a âw ka hre thei asin!”
• Awmdan Mawi Sawm
• An zalh ta!
• Haihawt!
• Phone thar ka lei ve a

Recent Posts:

• Ka chhun mumang…………..
• Skin cell atangin lungphu!
• Kan nun hlui
• Ti fuh lemlo angreng!!
• India ramah Kakuk tih ngona an zuar

This entry was posted on Tuesday, November 8th, 2011 at 12:00 pm and is filed under Fiction, Lifestyle. You can follow any responses to this entry through the RSS 2.0 feed. You can leave a response, or trackback from your own site.