mi(sual).com

Ziaktu : L.Keivom (October 5, 2011, Delhi) Lettu: Lalhmuakliana (November 4, 2011, CC Pur)

Remtha/phuahmawitu (Editing): Samuel Lalrozama Hmar (November 8, 2011, Bangalore)

[Kum 20o7 khan Pu L.Keivom hi a Hmar thuziah Mizo-Lusei tawnga leta kan chanchinbua chhuah turin ka dil tawh a, a lo phal kahwp mai a, tunah hi chuan dil lem loin kan ti a, a ui lem loh ka ring. He article hi chu a tha ka ti em a, thui deuh mah se hun siama kan chhiar theuh thain ka hria, ram leh hnam chawisan duh apiang tan chuan. Lehnaah famkimlo a la awm nual maithei, in mihriatthiamna kan ngen e. – Samuel Lalrozama Hmar]

Ka la theihnghilh theih miah lo chu March ni 2, 1966 tuk kha a ni. Gauhati University-ah MA(hist.) ka zir zawh kum a ni a, University canteen-ah ka thianpa Lalhmingthanga (Kamenga tia kan koh), Aizawl Kulikawn a chèng, MA (pol. Sc.) zirlai nen zîng thingpui kan in laiin Assam Tribune a rawn thleng a, a phèk hmalam zawng zawng chu Mizo National Front (MNF) sawrkar inti te’n March 1, 1966-a India ram atanga inlakhran (Independence) thu an puan vanga Mizo Dist.-ah buaina namênlo a chhuah thu chanchinin a khat.

Keini pahnih MA (pol.sc.) leh history zirzo tep, thil chinchâng mahni tawka hre pha ve tawh; tah leh hathialnain Mizoram a tuam mek vanga an beidawng rumri pawh chhungril beng atanga hre pha tawh Kamenga nen chuan engmah sawiloin kan in en a, thusawi tur kan hamhaih a, sawiin awmzia lah a nei hek lo.

He thil hi, kum engemawzat atanga lo inchhuáng so tawh a nih vangin, he’ng hun kan tawng bua hi thilmak tia han sawi tur chu a ni lèm lo. Kan lo beisei ruk, nimahsela beiseina thlàwn maia lo chang ta hi, chempui nena thawh ât hmain kan harh chhuak hram a.

Ram leh hnam tanna chawl (dawidim) hlauhawma inchiah tho inzirtirna hmanga hrai ruih hi thil awm thei mai niloin, thil awm thin reng a ni. Amaherawhchu, politic zu tho thalo leh pentawng emawni, sakhaw zirtirna diklo ruih hi a thawh dan na tak leh hlauhawm tak a ni duh phian a; ruih ât buai lai tak hi kan huaisàr lai tak, fing intih laitak a nih avangin, duh vang maia harhchhuah theih mai pawh a ni lo.

Hitler-a (Germany) pawh khan Juda-te chungah tawrawt an chhuah poh leh an hlimna a zual mai a nih kha maw! Ram leh hnam tan thih huam leh thih ngamna hi, khawtlângah pawh mite ngaihsan leh thih hnu pawha mite chawimawi leh hriat reng an hlawh avangin, mite rilru hneh thiam leh mitdawivaihthiam an rawn chhuah meuh chuan mi tamtak lu tihaiin an mit an tivai a; hleuh/liluh tumin chhum chevêl pawh an bawh mai thin a ni. Martar anga kan sawi tamtak hi ‘Bumtar’ an ni zawk duh phian.

MIHRING DUHTHUSAM: ZALENNA

Mihring hi chhang chauhin a nung lo a; Sekhibuhchhuak eng anga tha pawh nei sela, a zalen chuan si loh chuan lungawina tak tak a nei ngai lo. Eden huana cheng hmasa te pawh kha ei leh inah ringawt lungawi chu nisela chuan, thildang dap loin an awm hle hle ang a, buaina a chhuak hauh lo ang. Amaherawhchu, khuahkhirhtu awm loa zalen taka duh duh ti thei Pathian anga awm an duh tlat a ni.

Chu chu Pathianin Ama anpui mihring a lo siam chhan pawh a ni mahna. Mahse, thuneihna leh thiltihtheihna tiang vuan tur chuan, thuneih dàn leh mawhphurhna hlen dàn zir hmasak phawt hi mihring tih hmasak tur a ni bawk si. Thuneihna leh mawhphurhna hi thil inkungkaih tlat a ni. Mawhphurhna tel lo thuneihna chu thil hlauhawm a nih ang bawkin thuneihna tel lo mawhphurhna chu eng tihna mah a ni lo.

Chu’ng thil pahnih te chu inbùktawna hmanna apiangah zalènna dik a awm thei chuah thin. He thil hi saptawnga ‘Rights & duties, power & responsiblities’ an tih hi a ni. Kan chan chuah hriaa, kan chanpual tihtur mawhphurhna hlenchhuah lamah kan duai leh si chuan, kan than dan a pélhe deuh tihna a ni. Zalen ringawt kan duh a, ei leh in tur kan neih si loh chuan, kan zalenna ringawt hian awmzia a nei lo.

President Abraham Lincoln-a khan Jan 1, 1863 khan midum nuai 40 chuang sal (bawih) atanga an chhuah thu a puang a, midum ho chu lawmin kawtthlerah nilengin an lâm a, an au dur dur a, tlailam a rawn nih chuan an ril a rawn tama; lawina tur in leh lo, leh eitur nei lo tamtak chuan tihngaihna hre loin an pu te inah bawk an lawi leh ta mai. Engmah ni si loa pawngpaw thawven hi khauphâr thawven tiin kan sawi thin.

Ka ngaihtuah a, kum 1966 khan MNF duhdan angin March ni 1 atang khan India sawrkarin min lo indan tir thut se, eng chen nge mahniin kan inenkawl theih ang? Turial changêl ringawtin em ni, kan hruaitute’n chilthli tla lek leka thu fahrah té tè min fah te kha ringin eng chen nge kan khawsak theih ang? India an huat vang ringawtin khang laia East–Pakistan khan engemaw chen chu athlawnin eitur min pe mai thei.

Mahse a man a to hle ang. Reilo té chhungin serhtan hnamah min siam anga, tunah chuan Aizawl tlângah kèlchal bekhmul aia sei seia khabe zuah bukin, chhipvir lukhum nen ‘Allah ho Akhbar’ tia chhamin mi tam tak chu kan bawkkhup ve zak zak tawh mai thei. Osama bin laden leh a hote’n bihrukna remchangah min rawn hmang anga, Arab mihausahoin bawhhla chhamna tlângah min rawn hmang bawk ang.

Kan chi fìrna pawh a dal tawh viau a rinawm. History inher sual hi hlauhawm deuh a nia. Khawvel history-ah hian hmun hrang hranga hruaitu fingin ram leh hnam tluchhe tawh an tungding leh tih thu chhiar tur a awm laiin, chawngkawr mitpu hruaitu thenkhat chuan khuarkhurumah an luhpui ve thung tih thu chhiar tur a tam em em bawk.

Heta tang hian zirtur eng nge kan neih? Zalenna kan tih hi, ei leh inah kan intodelh si loha, pawn lam atanga min rûntute laka kan inhumhim thei si loh chuan awmzia a nei tlem khawp mai. Kan pi leh pute kha an huaisenna tak pakhat chu mahni thawhchhuah ringa nung, mahni intodelh an ni a, ‘I thawhchhuah eia nung ka nilo,’ an tih ngamna kha a ni. Chawmhlawma awm chuan, chu chu an sawi ve ngam lo.

Mahni kea ding thei an nih tlat loh avangin, a huaisen theih loh a ni. Chawmhlawm ni bawk si, inti huaisena chawmtu nu leh pa vau pung pung te hi an huaisen vang niloin sualnain an nun a khalh kal vang zawk a ni. He thlìrna tukverh atang hian India hmarchhaka cheng te ke pen dan tur leh kan nationalism hi kan ennawm leh ngaiin ka hria.

ENG NATIONALISM NGE?

Nationalism tih hi ‘eng’ (light) ang deuha mi zawng zawngin a awmzia kan hriat. Mahse a enkhalh thil azira rawng chi hrang hranga inlar chhuak, sawifiah harsa deuh a ni. Ram leh hnam hmangaihna te, tanna te, thahnemngaihna te leh nunna hial chàn huamna te hi nationalism awmzia ni tura kan hriat dan leh pawmdan tlângpui chu a nih ka ring. Mahse, chuti ang maia thil tluangtlam chu a ni lo.

Purun anga kâwr thuah tam tak nei, kâwr tin han kheh a, mit ti thip thei vek, a then phei chu inhal tak tak a ni. A chak zawkin a chak lo zawk hum tuma insawiin pro–nationalist takin hupbeh an tum tlat a, pakhat lah talchhuah tumin nasa takin a tang thung. Zalenna sualtu nisi khan anti–nationalism tih a hlawh phah a, chuvangin khawlh leh khirhkhan tak a ni. Nationalist zawng zawng hi engtik hunah emaw chuan anti–nationalist an ni anga, anti–nationalist te pawh nationalist an ni bawk ang.

A nih leh, zo nationalism kan tih tak hi eng nge ni ta ang? Eng ang chi nge, khawi atanga rawn in tan nge? Kâwr thuah engzat nge a neih? Chu’ng thuah hrang hrang te chu a intuah rem em? A chhanna hmasa ber atan chu heti hian han zeldin ta ila a tha awm e. China ram atanga zawi zawia thlang kan tlak lai khan, min huitu tlâng kâwlrawn atanga kohna lam chu pan zelin, tlâng thawvengah zalen taka tu khuahkhirhna hnuaiah mah awm lo a kan khawsak theihna, zalenna ram chu um zelin; boruak nuam, ram chhengchhe tak, ramsa te tual lenna ram, túma thik leh tihbuai phak lo-ah awmhmun kan khuar a, chuta damkhawchhuak chu kan ni.

Chuvangin zalen tak leh thawveng taka khawsak kan duhna thlarau chu zo nationalism hringtu hmasaber kan ti thei awm e. Chu chu keini ang bawka tlang thawveng bawha khawsa, phaizawl China ang an hmelma Kanan mite hual vela awm Israel thlah te tawn hriat pawh kha a ni ve tho.

RELIGIOUS NATIONALISM:

A hnuah chuan, British sawrkar chuan an huan daia min hman an duh vangin min rawn awp ta a. An culture leh sakhua-in min hrêng a. Anni hi Pathian ang deuh thawa be duh pawl kan awm avangin chu’ng mite chuan zah nachang hre loin, kan ram pawh ‘Pathian zawn chhuah ram’ min tihsak ta zel a ni. Engkim siamtu leh hretu zawnchhuah ngai hial khawpa ram pilrila awm, rilru kan put duhna hi rilru piansualna a ni.

Chu chuan Pathian nihna a puang sual hle. British sipaiho dinhmun lekah a dah hniam a ni. A huat zâwngtak pawh a nih ka ring. He rilru hian zo nationalism hi thuitak a siam a, a hruai bawk a, chu chu MNF auhla ‘Pathian leh kan ram tan’ tih hrin chhuak zeltu pawh hi a ni kan ti thei ang.

He sakhaw phenah hian zo natinalism hi thanlen tir kan tum em ni? He sakhaw chawl (dawidim) hian eng chen nge min chiah hneh tawh a? Zo hnahthlak ro-hlu engzah nge a chim pil tawh le? He sakhaw thang a kan in awh hnu hian, kan hnam ro thil engemawzat hluihlawnin, a rawn paipawn tute lah chu, Pathian ang deuhthawa biain, an culture dehleuin, lemchan leh nunderna nunah eng tiang taka thukin nge Zohnahthlak te hi min hnuh luh le? Kristianna sakhua hian engchen nge min phuarkhawmin, hmasawnna kawngah min hruai tak le?

Kan ram leh hnam kal zelna’n innghahna tlakah kan ngai em? Nih leh, sakhaw thil leh hnam thil chawhpawlh hi thil hrisel lo-ah kan ruat em? Tunah chuan Zohnahthlak tam zawk chuan kan sakhua a him chuan kan hnam pawh him turah kan ring a ni. Chu chu MNF hlapui kan sawitak kha a ni. A nih leh, he an thu ‘Aupui’ hi thu leh hla him a ni em? He thu hi hnam thuthlunga kan kalpui dawn a nih chuan, sakhaw dang betu leh zuitu zawng zawng chu kan hnam hmelma, kan ram leh hnam tana hlauhawm, min tichhe theitu-ah kan pawm hmak tihna a ni ang.

Chuti ang a nih chuan, Kristian lo zawng zawng chu Zo-zia pu velo turah kan dah tihna a ni bawk ang. Lo ni ta se, Zo-nationalism kan sawi tak inthlunna chu kan chi-zâm (ethnic root) niloin kan sakhaw phun leh biak a ni zawk dawn a ni. Chu chu Talibanism nen danglamna a awmloh avangin leh nationalism inzirtirna nen a inpersan daih avangin Zo–nationalism tehna tak a hman dawn chuan Thuthlung himtawk a ni kher lo ang.

 LINGUISTIC NATIONALISM:

Kristianna tluk deuh thawa, mi tam takin zo nationalism tehnaa kan hman, tun hmaa duhlian tawng, a hnua lushei tawng, tuna Mizo tawng tia kan hriat tak hi a ni. “Mizo nisi eng vanga Mizo tawng hmang lo nge i nih?” tih zawhna hi lusei tawng hmangte zing atangin a chhuak fo mai. Mizo inti chuan lusei tawng hmang ngei tura ngaihna a awm. Kawng danga sawi chuan lusei tawng hmang chuah hi Mizo-ah an chhiar tihna a ni.

Mahse zohnahthlak hmun thuma thena hmun khat chuah hi lusei tawng hmang kan awm. A dang hmun thuma then a hmunhnih te chuan mahni hnam Mizo-tawng theuh kan hmang thung. Churachandpur (Manipur) chhungah hian Zohnahthlak tawng hrang hrang pakua aia tlemlo kan hmang a, kan in hre vek. Chu’ng zinga lâr ber chu lusei-mizo a ni. Amaherawhchu, lusei tawng hmang te’n zo nationalism tehna a an ngaih linguistic nationalism/imperialism hi zohnahthlak tam zawkin tehna ah ang hmang velo. Lusei-mizo hi min hui khawmtu ber tawng a nih thu hi sawisel rual a ni lo. Mahse in barh luih kan tum chuan min vawdarhtu talhtumah a chang mai ang.

 Hei hi han sawizau deuh ila a tha ang. Zohnahthlak kan vanneihna em em chhan pakhat chu: duhlian-lusei tawng behchhan hmanga zawi muanga Zo tawng rawn insiam chho hi a ni. Chu Zotawng luipui chawmtu hnar chu a chak poh leh Zotawng hi a thang chak anga, a chak loh chuan a thang muang ang.

A hnar a kang chuan, a tawpah a kang chat ve ang. Hnam dang tawng, entirna’n english/hindi-a chawm len a nih chuan, monosyllabic tawng atangin pollysyllabic tawngah a inlet ang. Chu chuan a chimpil ang a, Zotawng ni lo tawng dang daihin a rawn chhuak ang a, a hmangtute pawhin Zo hmel an pu therte tawh lo ang. Chu chu a thlenna’n kum 50 aia tam a ngai lo.

Zotawng hi hrisel taka a rawn thanglen kan duh chuan a chawmtu hnârte hi tih chak sauh sauh a ngai. Hei hi lusei tawng hmangte thlirdan letling chiah a ni. Lusei tawngin a chimpil vek hnuah insuikhawm pawh a chak sawt an ring zawk si a. A manto zia an hriat chian loh vang a ni.

Chu vangin Zohnahthlak damkhawchhuahna kawng him sial chhuah kan tum si chuan, khawhawi kan tih zau a ngai. Aizawl hi zawl a ni ngawt lo; zâwl nuamtak leh chènna tlaka siamtu chu a mihring chengte an ni. Kan Zo nationalism pawh awmze neia siamtu leh dinchhuahtirtu tur chu keini kan ni. Chu chu nitina kan kross put tur, kan koa innghat tlat a ni.

 (contd…)

Similar Posts:

• Mizo Nationalism leh Indian Nationalism Indona!!!
• Zohnahthlak inpumkhatna kawnga Ralteho entawn tlakzia
• Hnam damna a pawimawh
• Chhungkaw khat a tawng chi hnih hmang!!
• Thil Pakhat Chauh

Recent Posts:

• NUN THÂMRAL
• President Trump ka hmuhdan (amah thlawptu lam atangin)
• YMA LIBRARY ENKAWLTU TEN SEMINAR & TRANING KAN NEI
• February 2017, Mizo(ram) Diary
• misual.com tih tawp a ni dawn?

This entry was posted on Tuesday, November 8th, 2011 at 2:02 pm and is filed under Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.