Pathian leh Hun: Chatuan Pathian nihna atanga ‘Hun’, tawp chin nei leh hun bik nei, danglam thina Pathian a rawn khawsa ta mai hian Pathian chu hmangaihnaa khat a nihzia a entir. A chhan chu ‘Hun’ a Pathian a awm chhung hian a thuneihna leh thiltihtheihna chu, ‘duhthlantheihna’ hmangin a thilsiam mihringte tawmpui theih tura a rawn indahhniam vang a ni. Philosopher Danis-a chuan hemi chungchang hi ‘Mihring te tana A inngaihtlawmna thuk tak, sawi fiah hleihtheih loh a ni,’ a tiin a sawi a ni. Chatuan hmasa a awm lai khan Pathiana mi 3 nihna nei reng chungin inhmangaih khawm takin an awm a, Pathiana mi pathumte inhmangaihna chu an chen a, tawp chin nei mihringte hi an mamawh hran lo. Mahse Pathian chuan Ama hlawkna leh thatna tur ni lovin, Ama duhthu ngei leh duhthlanna ngeiin A thil siam mihringte leh leilunga thil awm zawng zawngte hian Pathian that zia leh ropui zia kan lo hriat a, kan lo tawmpui ve theihna tur zawkin hrehawm leh chhiatna lo thleng thei tur pawh dawn hlei thei lovin a thilsiamte zingah, tawp chin nei ‘Hunah’ a lo chengin kan zingah a lo khawsa ta a nih chu.
Hei vang hian Scientist ropui tak Isaac Newtona pawhin ‘Pathian chu ropui ber, lei leh vana thuneihna zawng zawng neitu a ni‘ tiin a lo sawi bawk a ni. Tin Juda 1:25 ‘Kan chhandamtu Pathian taka chauh hnenah chuan kan Lalpa Isua Krista avangin hun reng awm hmaah leh tunah leh Chatuan thlengin chawimawinate, ropuinate, rorelnate, thuneihnate awm rawh se’, Amen” tih kan hmu bawk ani.
Bul tan ni leh tawp ni nei lo, Chatuan hmasaa Pathian lo ni tawh chu bul tan ni leh tawp ni nei tur ‘Hun’ ah pawh Pathian a ni a. Hun chuan bul tan ni a nei a, tawp ni pawh a la nei dawn a. Pathian erawh chu bul tan ni nei lo, tawp ni pawh nei lo, nung reng (Alpha leh Omega) a ni. Heng Bible chang atangte hian Pathian chu leilung pian hma, hunte pawh an lo awm hma leh Chatuan hmasaah pawh Pathian a lo nih tawh zia kan hmu; 2 Tim 1:9b “Chu khawngaihna chu leilung pianhmain Krista Isuaah chuan min pek a ni tawh“. NIV Bible ah chuan leilung pian hma tih hi ‘Chatuan hmasa’ tia hrilhfiah a ni a; hunte an lo awm hmain khawngaihna avanga Chhandamna hi Kristaah pek kan lo ni tawh tihna a ni. A va ropui tak em! Tin Psalm 90:2 “Tlangte pian hma, leilung leh khawvel i din hma pawh khan Chatuan ata Chatuan thleng pawhin nang chu Pathian i ni,” tih kan hmu bawk. Tin, Thufingte 8:23 “Chatuan ata a tir renga din ka ni, Leilung awm hma rengin,”.tih kan hmu bawk.
Hun & Mihring: Chatuan Pathian ni thin ‘Hun’ a a rawn awm hian kan sawi tak ang khan Pathian chu nasa takin a thilsiamte nena cheng ho thei turin a rawn inphahhniam ta a ni. Chumi zinga pawimawh ber mai chu ‘Duhthlantheihna zalenna’ chu a siam mihringte hnena pein a thuneihna leh thiltihtheihna min tawmpui a, hei hi Pathian ropui em emna leh Mihringte dinhmun sang bera min dahna chu a ni. Duh dan hrang nei thei leh sawi thei, thlang theiin min siam a, amah kan nekchep leh kan duhthlantheihna hmanga amah dodal thei min siam duh a, a thil siama min khawsak pui duh hi Pathian ropuina leh hmangaihnaa khat a nihzia lantirtu a ni. Kan duh chuan Pathian thlawp thei, duh loh chuan dodal theiin min siam a ni. Tichuan chu duhthlanna zalenna ( kan duh thu ngei) hmang chuan Eden huana Nunna thing rah chu eia Ama lama nung chho tur leh Diabola thuneihna (Khawvel lal a nihna title) chu paihthlaa, engmahlova chantir tura a siamte kan ni.
Pathian thinlunga mihringte kan hlut zia hi Ephesi 1:3 a kan hmuh angin, a thil siam zawng zawng, thil nung leh nung lote zingah Ama ropuina tawm thei tur leh A fa ni turin, sual tel lo leh thianghlima Ama nihna tawmpui tura a ruat lawk (predestine)te kan ni. Lei leh Vana thilsiam mawi takte mawina tifamkim tura Pathianin a beiseina a nghahna awm chhun chu duh taka a siam mihringte chungah a ni. Mahse Evi leh Adama chuan chu duhthlan theihna, an zalenna chu hmang sualin a chhia leh a tha hriatna thing rah chu eiin Diabola lamah/Sualah kan lo nung ta zawk a ni. Leia thuneihna chahbi chu Pathian hnena pe loin Diabola hnenah kan lo pe leh ta zawk a, chumi avang chuan vawiin ni thlengin Diabola chu he khawvel thim chunga thuneitu lal a lo nih phah ta a ni.
Pathianin mawi tak maia a siamthat he leiah hian keimahni duhthlanna ngeia Amah chu thlanga lalna leh thuneihna neia Pathian ram din thar tura remchanna min siam chu mihringte hian kan duhthlanna hmansual avangin kan lo hloh/chan at a nih chu. Chu mai a ni lo, Pathian chu zak takin kan siam a, A thil siam ropui tak leh mawi takah hian thinlung na leh hliam nasa tak tuarin chhiatna rapthlak tak kan lo tawhtir at a ni. Chatuan, hun danglam ve ngai lo atanga danglam thei ‘Hun’a a rawn cheng/nung ta hi a va inchhir nasa dawn em! Pathian tan hian a va lungchhiat thlak tak em! Angel hmasate’n an lo hlawhchham tawh a, mihringte pawhin kan lo hlawhchham leh at a ni. Bawhchhiatna sual avanga Pathian thinlung hliam natzia leh A thinlung puakkeh vek thu Sam 90: 11 Mosia tawngtainaah chuan, “Tuin nge i thinurna thiltihtheihzia hriaa, Nangmah tih turzia anga i thinrimna chu hria le?,” tiin. Tin Sam 90:2 “Nang chuan mihring hi boralnaah i kirtir thin a; Mihring fate u kir leh rawh u,” tiin kan hmu bawk a ni.
Mihring & Chatuan: Thuhriltu 3:11 : ‘Mihring thinlungah chuan Chatuan a dah a’ tih kan hmu a, kan nun hi Chatuan atana siam leh lo piang kan ni. Taksa thihna hi kan tawpna tur a ni lo a, Chatuan hmuna kan luhna tura kan nihphung inthlak danglamna tur chauh a ni. He leiah hian kum reilo te chauh kan dam dawn a, mahse Chatuan, hun danglam theilovah chuan kan nung reng dawn. Kan nun dan tur kalphung erawh chu he khawvela kan duhtlanna leh kan nun dan azirin a ni tawh dawn a ni. Khawvela kan dam chhung tawiteah chuan duh thlan tur tam tak kan nei thei, mahse chatuan vawihnihna lo thlen hunah erawh chuan duhtlan tur pahnih chauh kan nei ang, chungte chu :Vanram nge Hremhmun? tih hi a ni ang.
A dang pumpelhna tur a awm tawh dawn lo. Chumi chungchang chinfelna chu, Eden huana Evi leh Adama ten an lo hmansual tawh ‘Duhthlanna’ bawk hmanga chinfel leh theih a ni. Pathian hnena chatuan hun hman kan duh chuan Amah chu kan thlan theih turin Pathianin a fapa Isua Krista hmangin Eden huana kan hloh tak, Nunna thingrah chu Krawsah thihna hmangin a rawn phun nawn leh ta, chu chu ringa pawm turin Pathianin i nunna hi a zuah mek a ni. Chatuan vawihnihna a kan la hman tur rei dan tur ngaihtuah chuan leia kan damchhung nun hi lehkhabu chhah taka a kawm phek khat ang chauh emaw, thil rin thui tak, kilometre khat zeta thuiah a bul lamah thil bawk te tak te (chhun han pakhat) ang chauh emaw hi an ni.
Tichuan chatuanah chuan danglam takin kan la nung/dam zel dawn a, leia thihna hi chu kan taksa kawr (taksa) thihna chauh a ni ang, keimahni tak hi kan la thi dawn lo, danglam takin chatuanah chuan Nun dan dangin kan nung tan leh dawn a, C.S Lewis a’n helai thu a ziak dan chuan ‘Keini tan chuan hei hi kan chanchin tawpna a ni a, ……. mahse anni tan chuan nundan thara nung turin bul an tan dawn chauh a ni..” tiin.
Chutichuan mihringte hian enge kan dam chhan ni a, engvanga lo piang ve mai nge kan nih tih hi zawhna pawimawh ber a lo ni ta. Mi tam takte chuan he khawvela kan lo pian chhan hi ngaihtuah lem lovin khawvel nawmsakna chenin duh dan danin kan nung a, tam takte erawh chuan ‘Engvanginnge ka lo pian ve kher kher le aw,” tiin kan inngaihtuah kun ngawih ngawih bawk thin. Naupang kan ni emaw, puitling kan ni emaw. mitinte hian phat rual lohin thinlung chhunga khawhar rukna kan nei theuh a, chu kan nun ruak hnawhkhat tur leh tifamkim tur chuan theihtawp chhuahin kan tlan theuh a, mahse kan tlan dan kawng erawh a inang lo mai zawk a ni.
Thenkhatte chuan hausakna umin, theihtawpin an thawk a, thenkhatte’n khawvela mi lar leh hmingthang nih tumin nasa takin an bei bawk a, thenkhatte’n mipat/hmeichhiatna hmangin nuam tinreng an chen a, thenkhatte’n ei leh in lam tidanglamin ruih theih thilah nasa takin an inhmang bawk a. Heng zawng zawng hi a chhan a inang vek a, kan nun chhunga ‘nun ruak’ awm tlat chu tihkhaha tihtlai hi kan tum theuh vang a ni. Mahse heng zawng zawng hi kan nun ruak tihkhahna tura ‘Chhanna diklo’ (wrong treatment) vek a ni. A chhan chu, kan nuna ‘ruak leh khawhar em emna‘ lo awm chhan chu, Pathianin mihring a siam khan mihringte awm dan tur a ruahman dik tak (Eternal plan/Original plan) kha mihring nunah khan a puitling hman ta lo ani.
Enge a tum dan chu? Mihringte hian Eden huana Nunna thingrah kha eia Amah nena nun inzawma Chatuan nunna neia Amah nen inpawla nung tura min buatsaih kan ni. Mahse chu kawng chu thlang lova sual lam kawng kan zawh tak avang hian kan thlarau, Pathian kutchhuak ngei mai hi, he lei anchhedawngah hian thih hmabak leh lungngai takin a lo rum ta a, kan thlarau chuan amah siamtu leh amah hringtu tel lova Diabola thuneihna leh enkawlna hnuaia he lei anchhedawnga a lo khawsa ta hi lungchhiat thlak a ti em em a, chumai bakah chatuah thihna a lo hmachhawn zui nen. Amah siamtu leh hringtu Van Pathian chu ngaiin a lo rum ngawih ngawih zawk a ni. Chuvang chuan he khawvel hausaknate, hmingthannate, nawmchennate leh ruihtheih thila inhmanna te hian chu kan thlarau nun tuihalna chu engtikawng mahin a tidam/titlai dawn lova, a damdawi awmchhun chu amah siamtu nena inpumkhata awm leh inlaichinna thar neia, Pathian hmangaihna hnuaia chen lehna chauh hi a mamawh awm chhun leh a tuihalna chu a ni.
Chutichuan he khawvela kan damchhung tawiteah hian Chatuan hmuna khawvel dang kan la hman leh tur hre rengin Pathian tan nun kan hman leh Lal Isua Krisa hnenah Chatuan hun hmang thei turin Chatuan nunna kan neih hi a va pawimawh dawn tak em! Psalm 90:12 “Kan dam chhung nite chhiar dan min zirtir ang che.. Finna thinlung kan neih phah hialna turin,” tia Mosia tawngtaina ang hian. Kan damchhung nun tawite hi khawvel thil ral leh mai mai thei, hausakna leh hmingthannate, nawmchennatea chhiar liam mai lovin Chatuan huna Lal Isua hnena kan awm theihna tur leh ro tha zawk chatuan hmun thleng thei tur atan thawk turin i inbuatsaih ang u. Min siamtu Pathian hnenah A fapa Isua Krista Kros-a a thihna leh thawhlehna hmanga min sawmna chu chhang letin ‘Chatuan Nunna‘ min lo hlan (offer) chu nei turin Pathian hnenah i kir leh ang u. Amah nena damchhung ni chhiar hi hlimna famkim leh lungawi thlak, chatuan daih a ni si a.
November 20th, 2011 at 7:36 am
Chhiar phawt ila..
Report this comment
November 20th, 2011 at 7:47 am
sunday hman nuam vek u le. Hei chu, Donald leh Zoho te annalyse turin an kutah ka hlan e. Sunday zinga Pathian thu chhiar tur awm hi tha ka ti e.
Report this comment
November 20th, 2011 at 8:12 am
Part 2 a i bul tanna khu, hetah hian kan sawi daih teh ang.
“Big bang a awm atanga minute khat pawh a liam hma khan, bubble te reuh te leh sak tak mai chhungah chuan, force chi li- force of gravity, electro magnetisim, strong and weak nuclear forces te in combine in super forces an siam ta a. He bubble te reuhte kan tih hi kan Universe chu a lo ni a. Kan Universe chu a lo expand zel avangin, force of gravity chu a lo splits hrang ta mai a.
Min 3 a liam meuh chuan, temperature sang lutuk chu a drop ta vak mai a. Element Hydrogen a lo piang ta a ni an ti.
1 billion after the Big bang, stars take shape producing heavier elements like -Nitrogen, oxygen and carbon are formed as predicted by scientist.
Matter leh gravity in combine chuan, perfectly typical star siamin, pressure in a core ah sa (heat) a siam a. Heats avanga nuclear fusion awm chuan, Arsi tak tak a pian tir ta a ni.
Temperature a lo lum hnu chuan, Hydrogen dioxide i.e Water te chu atmosphere ah a lo insiam ta bawk a. Under water curious chemical reaction ultimately formed LIFE an ti ta a ni.
13.7 billion years a liam hnu chuan, kan Universe chu 156 billion light year zeta lian leh planet pariat nei a lo ni ta reng mai a nih chu.”
“A tirin…lei leh van a siam a” tih chu, a chhum bul ta deuh tihna a nih chu. Heti khawpa chiang pawh la awih duh lova, ring la tikhawng lui chu bigbang hminga BEN LAWLH TLAK kan ni. A sei ta duah e.
Report this comment
November 20th, 2011 at 8:28 am
Thiamna leh finna sang ber hmanga proved thlap pawh ni se, Pathian ropuina leh finna chu tuma tihdanglam theih a ni lo. Tunlaiah Pathian aia Science dah chungnung zawk an tam ta….FIMKHUR
Report this comment
November 20th, 2011 at 8:32 am
@ vancharlova..(Temperature a lo lum hnu chuan, Hydrogen dioxide i.e Water te chu atmosphere ah a lo insiam ta bawk a. Under water curious chemical reaction ultimately formed LIFE an ti ta a ni.)
Spontaneous generation in “Life is believed to be originated from non-living objects” tih hi i pawm tihna a ni maw? Louis Pasteur khan a dik loh zia a proved kha maw le aw.
Curious chemical reaction tih rik ngawt pawh khi, a mak ka ti. Eng type of chemical reaction tak ni ang maw?
Report this comment
November 20th, 2011 at 8:51 am
@lr hlonchhing, type of reaction ah buai suh. Chemical reaction ah hian chi hrang a tam zia i hriat ka ring. Eng chemical reaction pawh ni ta ang se, Law of conservation of mass an follow vek a, an violate a nih loh chuan; a tawk.
Science hi Pathian ropuizia min hmuh tir tu ni mah se, an kal tlang thei lo fo.
Report this comment
November 20th, 2011 at 9:41 am
@vancharlova, ka zah viat na chein, ka’n ti leh lawk. Miin TUT min ti lem lovang chu maw.
Law of conservation of mass chu “Mass can neither be created nor destroyed, during a chemical rection” tihna mai a ni a. A awlsam zawng chuan, “You cannot create more no. of atoms from lesser no. of atom or vice versa” tihna ang vel a ni. Ka hrethiam thova, mahse, “Curious” tih lai tak zawk khi a ni. Curious chu anxious emaw strange emaw tihna mai a ni si a. Curious chemical reaction tihlai tak khi, a specific lo deuh ka tihna zawk a ni.
Report this comment
November 20th, 2011 at 9:56 am
Lr, tuman TUT chu an ti lovang che. Ka zahawm lem lo, i ti tha lutuk. Thil hi chik tur a ni e. Thil chikmi tak i niin ka hre bawk.
Report this comment
November 20th, 2011 at 10:46 am
Tarmit keh chuai khawpin ka’n chhiar nawn leh dap ange. A ngaihnawm ru riau.
Report this comment
November 20th, 2011 at 1:34 pm
sawmte chu tamtak thlante chu tlem tih ziak a awmsa tlat,chuvang alawm ringtu dik tak kan tlem na chhan
Report this comment
November 20th, 2011 at 7:28 pm
tha khawp mai…
Report this comment
November 21st, 2011 at 1:56 pm
Part hmasa zawkte ang thoin a tha thlawt e. I tum (target) a tha lutuk. Duhthawh thuah erawh chuan chin pawr hlek tur chu a awm ve bawk ang chu. Entir nan- Khawvela kan dam chhunga duhthlan tur tam tak kan neih thu i sawi khi a dik tho rualin, duhthlan tur pahnih chauh kan nei tih hi sawi dan tha zawkah ka ngai.
Heti hian ka’n sawi belh ve hlek teh ang- Isua hi Lal berah kan thlan loh chuan Setana hi lal berah kan thlang tho tho dawn. Isua hi ka Lalpa a nih loh chuan ka hmelmapa a ni tho tho dawn. Ka dam lai ngeia Vanram kawng ka zawh loh chuan hremhmun kawng ka zawh tho tho dawn. He ka taksa dam lai ngeia Isua duh zawnga ka nun duh si lo chuan, ka thih hnuah Isua duh zawnga ka nun thar thut theih dan a awm tawh lo. Chhia leh tha hriatna thiang tak hmanga ka duhthlanna chuan he taksa hi Isua duh danin a chet chhuah tir ngei ngei tur a ni. Lal Isua pawh khan ama duhthlan ang ngeiin, ama taksa ngei tisa sual ang puin (amahah chuan sualna reng a awm si lo) kan tan a inhlan a ni si a.
“A tirin Pathianin lei leh van a siam a” tih hi Kristiante Thurin pawimawh tak bul intanna a ni kumkhua dawn si a. Big bang theory emaw, evlution theory emaw hian kan rinna hi a khawih danglam turah ka ngai lo a ni zirisithawh mai. Thil pakhat chiah, Genesis bung 1 – 11 thu hi chu a harsa hrim hrim. Zirtu mithiamte pawhin, “Khawvel chanchin a taka hriat theih hma hun (Pre-history emaw, Primeval History)” tiin an lo sawi thin a ni.
Report this comment