mi(sual).com

Khawvêla chêng mihring, hnam tinte hian mawl lai hun an nei theuh a, chuti anga an mawl lai hunah chuan an pem kual an pem kualin, an awm hmun an sawn an sawn hlawm a ni tih kan hre thei a, khawsak harsatna chhan hrang hrang an chunga lo thleng thin avângin khawsak awlsamna hmun a pan thin a, eitûr vânna hmun atangin eitûr tamna hmunah te, tui intûr vânna hmun atangin tui intûr tamna lamah te, chuti ang zêla hmasâwnna kawng an zawh thin laia, kan pi leh pute’n phaizawl ram tha, eibar zawn awlsamna hmun atanga tlâng rama an lo khawsak takna chhan leh thlang tlâk chhan hrim hrim hi mi tam takin an lo chhui tawh a; an fak awm hle mai. Hetihrualin mi thenkhat, Mizote chu dawih vanga thlang tla zêla tûna kan awmna hmun Tlângrama inbengbel ta anga sawi tawk lah bo lo. Heti anga sawi lo awm chhan hi engvang nge ni ta ang le? High School Zirlai-ah Shan-ho hlauh vanga Kabaw Valley chhuah san taa inzirtir a lo ni tawh vei nên, hêngte hi a chhan a ni thei mai a ngem?

Pu B Lalthangliana chuan Meichher thla kip chhuak, Febuary 2005-a “Mizo chanchin ziak thenkhat siamthat ngaite,” tih thupui hmanga a thu ziakah chuan, “Mizote hi Kabaw phaiah kum 400 emaw lai lo khawsa tawh chu, Shan hovin Assam ram pana an kalna kawng ber a nih avângin an nawr chhuak ve taah dah ila, a sual awm lo ve. Tichuan Mizo chu Kabaw phai (Kawl phai) atang hian kum 1200 AD vêlah an chhuak felah dah ila, a pawm a nuam tawk awm e,” tiin a ziak a.

Heti anga a ziah lai hian Meichher Chanchin bu, August 2004 chhuaka, “Ziak dik loh palhte” tih thupui hmanga a thu ziakah chuan ti ang hian a ziak bawk a. “Mithiam rintlâk leh lehkhabu pawmawmte rinchhana kan chhui ve dân chuan, kum zabi 4-na (AD) vêlah Burma ramah hian Mizo hnahthlâkte hi an tawlh lût a. Chuti a nih chuan Mizote aiin kum 800 emaw lai a hnuhnungah an thleng ve chauh a lo ni ang a. Kan pi pute khân tûna Shan ram hi rawn pal tlang pawh ni se, Shan hnam hi an la thlen loh avângin a ram pawhin hming a la pu thei lo hrim hrim a ni,” tiin a ziak bawk a.

Mizo pi pute thlang tlâk thuah hian a chhan kan ziaktu hmasate hian an dapin an zawng nasa êm êm a ni tih chu an thu ziak atangin kan hre thei a, tiang hian chhuiin ziak bawk mah se, Rûn lui chhak lam thu hi Thlifim lo tleh, Mit lawnga chu Thlifima chu hmuh theih si loh, a chhem nghin Thing hnah chevel erawh chiang taka hmuh theih ni si ang hi a ni ber awm e.

Mizo pi pute thlang tlâk chhan leh Kabaw Valley chhuah san chhan hi eng dang vang ni lovin, “Leia mi zawng zawng chu tawng hmun khat leh thu sawi dân hmun khat an ni vek a.” Tin, “Leia mi zawng zawng tawng chu a tihhransak tak avângin chuta tang chuan Lalpan anni ho chu lei chung zawng zawngah chuan a ti darh ta bawk a,” (Gen 11 : 1, 9 )   tih thu kan hmuh ang hian min thlahtu, kan pi leh pute kha khawi hmun atang ber emaw hian lo chhuakin tûna kan awmna hmun hi an lo pan chu a ni ngei mai. He hmun an lo pan chhan hi eng dang vang ni lovin Siamtu Pathianin “Tin, lei chung zawng zawnga awm tûrin bul hmun khat vekin hnam tin mi a siam a, an tan hun bite a ruat a, an awmna rite a kham sak a, Pathian an zawn a, an dap an dap a, an hmuh mial theih nân,”  (Tirh 17 : 26,27).a tih ang hian amah Pathian kan zawn a, kan dap a, kan hmuh theih nân tiang hian kan chenna hmun tûra a lo ruat ram pan hian min thlahtute kha an lo vâk vela, chu an vah vêlna kalkawngah chuan chanchin sawi tûr kawng chi hrang hrang an lo nei ve lek fang a ni zâwk, tih hi pawm ngam mai ila a hah dam thlâk mai awm e.

Pastor Liangkhaia chuan  Rûn leh Tiau inkâra an awm lai hian Sakhaw thuah “Biak tûr an zawng chawp zêl a” a ti a, Heti anga biak tûr an zawn zêlna lamah hian nasa takin Lêntlânga an chen lai hian Sakhaw thuah an thang chho zêl a ni tih chhuitu hmasate ziak atangin kan hre thei a,  tin, mihring hian a thih hnuah Thlarau neiin, chu thlarau chuan chênna hmun neiin an ring a ni tih te pawh kan hre thei bawk a.
Kum 1700 hnu lama Tiau lui an kan hnu chuan an Sakhaw kawng kal Vawrtawp, ‘Pialral’ thu hial kan lo hre ta zêl bawk a. “Thu chuan a hnaih a che, i kâ leh i thinlungah pawh a awm,”tih  (Rom 10 : 8)-a kan hmuh angin, thih hnu chungchânga an thlarau awm dân tûr an dapa, an zawn a, an ngaihtuahna lamah Pialral thu hi an lo duang chhuak ta hial a. Kum 1894-ah Krista chanchin chuan Mizo Pi pute chênna hmun chu lo thlengin, mi tam tak chu Kristianah an inpe a. Kum 1906-ah Thlarau thianghlim harhna a lo thleng leh a, mi tam takin Thlarau thianghlim pawlna leh tihharhna an chang a, heti ang hian an Sakhaw hlui thu leh Sakhaw thar thu chu a insualin, a invuak thuah ta mup mup mai a. Heti ang hi nimah se, an Sakhaw hlui thuah chuan mi tam tak chu an la lungleng tlat bawk a, an Sakhaw hlui thu hlaa la lungleng tlatte chu hruai chhuak tûrin kan Pathian chuan an lunglenna thu ngei mai chu hman ruaah hmangin, a mite hmang chuan heti ang hian hla a lo pe leh ta a:

“Pialral ka ngai ka lal lenna,” (Rev V.T Kâppua)

“Ka thlir ngam lo Hawilopâr thliak a;
Lunglohtui an dâwn tûr ka ngai ngam lo ve” (Rev Chhawna)

Han chuang ilang Hringlang tlângah
Lunglohtui siktui thiang an dâwn e,
Hawilopâr vullai an thliak e;
Min ngai lovin mual an liam ta,
An hmangaih chhandamtu hnên an thleng ta.” (Ralngama)

“Nunna lunglohtui leh hawilopâr chawiin,
Aw nem takin, lokai rawh min ti” (Rev Lianruma)

Heti ang hian an Sakhaw hlui thua lungleng tlatte chu an lunglenna hmunah chuan luhpuiin an han vel tap tê tê a, chu tah Chhandamtu, Krista hnênah an hruai lût thin a.

Heti anga Pathian an hnêna Thlarau Thianghlim hmanga a inpuan tak zêlah chuan Mizoram chu Kristian ram tih a lo ni ta hial a.  “Hnam siama lo la awm tûr chuan Lalpa chu an fak ang” tih thu (Sam 102 : kan hmuh angin hetih hun hi chuan Lusei, Duhlian leh Zohnahthlâk peng hrang hrangte  chu ‘Mizo’ tih kan lo ni tain ‘Mizo hnam’ a lo piang ta a, hnam siama lo la awm tûr a tih hi Mizo hnam hi kan ni ngei mai le! a ropui hle mai. A Hnam thlan Israel te’n Kaisara lo chu lal dang kan nei lo tiin, Pilata hnênah, “An zain, ‘Ani chu Kros-ah khenbeh tir rawh,’ an ti a.” (Mt 27 : 22.) Israel ten an hnawla an paih hnu chu kei ni, Mizo hnam lo piang tate hian hnam pum huapin Lalah kan lo thlang ta a,  “Ka mite ni ngai lo chu, ‘Ka mite,’ ka ti ang; Tin, hmangaih ngai lohvi chu, ‘Hmangaihi,’ ka ti ang” (Rom 9 : 25) tih chu Mizote chungah a lo thleng tain ‘Pathian hnam thlan’ kan lo ni ta a nih hi. A va lawmawm teh lul êm!  “ Chi a sawi tham lohte chu hmangin ka thiktir ang che u a; Chi fing lo te chu hmangin ka tithinur ang che u,” (Rom 10 : 19) a tih pawh hi khawvêl hnam dangte chungah hian kan thlen tir mêk zawng a nih hi.

“Pathian thu fing thurûk chu kan sawi zâwk thin a ni, thu fing inthup, kan ropuina tûra Pathianin khawvêl awm hmaa a ruat lâwk tawh chu,” (1Kor 2 : 7) tia Tirhkoh Paula’n a lo sawi angin, Kristian kan nih hmaa kan pi pute thurin, ‘Pialral’ thu hi thu fing inthup, kan ropuina tûra Pathianin Kristian kan nih hmaa a lo ruat lâwk thu chu a lo ni reng mai, hei vang hian ‘Pialral’ thua chêng thinte nunmawi leh zia rang, chin dân thate hi chhawm zêlin kan Lalpa hi kan fak tûr a ni dâwn lawm ni. Israel fate hnêna, “In va luah tûr ram chu, tlâng te leh ruam leh vân ruahtui dawng ram a ni zâwk a.” (Deu 11 : 11) tia a lo hrilh lâwk hi kan hnam (Mizo hnam) chênna hmun tûr alo ni ve tlat mai. Dawih vang ni lo vin, Pathian remruatna avâng zâwkin he hmun, kan Zoram, tlângte leh ruam vân ruahtui dawng ram hi kan lo pan zâwk a lo ni e.
Ziaktu C. Lalthanmawia, Mualkawi.

Similar Posts:

• Hmeichhia leh chakaiin sakhua an nei lo
• Chungkhuanu (Pathian)
• “Hnam Sakhua bihchianna” chhanna
• Mang Rama Cheng Mizo-te
• Hnam Sakhua: Ka chhiar ve e!

Recent Posts:

• Tawng tih hausak a pawimawh!
• MIZO HNAM SAKHAW DIK PHOCHHUAHNA – IIby. Rorelliana
• MIZO HNAM SAKHAW DIK PHOCHHUAHNA ~ Iby- Rorelliana
• Ngaihtuahna
• ‘Remna’ Palai Bâwngte

This entry was posted on Sunday, November 6th, 2011 at 8:30 pm and is filed under Mizo Society & Culture, Mizoram, Opinion. You can follow any responses to this entry through the RSS 2.0 feed. You can leave a response, or trackback from your own site.