mi(sual).com

Khatia ka haw ta kha, ka sawi tawh ang khan ka fapa ka han pawm kha chaw ei a hun tak mai avangin ka nghat a, tichuan kan nu chuan chaw ei a han siam saw sawk a, chawhmeh lam erawh chu a tha fahran lo.

Kei erawh chu a hma lama ‘chaw ei tuina’ ka lo tih tawh avang khan kan chawhmeh chu a tui leh tui loh lam pawh ka hre chang meuh lo. Ka ei buan buan a ni deuh ber mai. Mi dang min lo hmutu chuan sawi chhawngleh sela chu vawk, chaw ei tui tak ei buan buan te pawh ka ang zawmah mai thei a ni.

Chaw ei kham chuan thutthlenga thu mu chungin TV kan en a, ka lo thumu hman hmawh pek a niang chu, kan nu-in mi rawn kai harh a, “Hey rawn mu ve tawh ta che, naupang pawh ka muttir vek tawh a nia” a rawn ti a. Tichuan ka han tho tual tuala, khum lam pan chuan ka phei ta a. Khumah chuan ka lawna, ka mu hlawm tawpa, ka muhilleh nghal mai ni tain ka hria.

Ka mumangah chuan thlaler ram ro tak maiah hian ka lo vak kual ruaia, tui zawngin. Ka hmuh phak chin zawng mai chu thlaler ram ro, ro em em mai hi a lo ni a, ka tui a hal em avang chuan ka lei te chu a ro a, ka dang te chu a lo char zo ta a, tui in chakin ka lo thi lo chauh hi a lo ni a.

Ka han harh hlawl mai chu, ka lo thaw huam huam maia, ka tui han hal zia hal zia mai chuh….

Ka han inbeng kanga, ka sirah chuan ka nupui leh ka fate chu an lo muhil bela. Tihthawh hlau takin ka tho them thema, ka rilru-ah chuan kan fridge a tui vawt ngei mai duh tawka han khiat tluka chak dang reng ka nei lo.

Khum atang ka han chhuk chu engtin emawni awm deuh huih hian ka inhria a, hetiang hian ni dangah ka awm ngai ka inhre lo. Ka ngaihtha chiah lo chuan thla hmasa lama doctor ka inentir a a thusawite kha ka han hre chhuak zawka. Thisen sang ka neia, ka inenkawl uluk viau a ngai a ni tih min hrilh te kha. Kei erawh chuan eng hu-ah mah ka lo ngai lem hlei lova. Ka chawhmeh duh ber, sa ka nghei ngai lova, a man ka neih loh pawhin ka ba hram thin. Tlai lama chaw ei tuina ka thlah lo mai ni lovin, ‘ngei ngei’ hi a ni ringawt mai a ni.

Khum atanga ka han chhuk dawn pawh khan thawm pawk ka dim ve ngang mai. Kan fa sen, thla tam pawh la ni lo chu tihharh hlau takin ka che a, thawm dim tak chuan ka han che ve thum thuma, thosilen kan zar chu ka han keu a, khum tiche lo thei ang ber chuan ka chhuk ta a. Kan khum dap phah lah chu chet zawngin a ri ang tuarh tuarh a. Kan khum atang chuan kan choka, fridge kan dahna chu a hla hran lova, kan room kawngka chu kal pel ila, common room kan lut anga, chumi dawt leh chiah chu choka, fridge awmna, tui vawt, ka in chak em em awmna chu a ni mai.

Kan khum sir chiahah chuan steele almirah, kan inneih laia ka nupuiin a chhawm chu kan hung a, kan room hi a len loh avngin duh reng vang pawh nilovin he almirah hi kan khawih chhen thin reng a, tun tuma ka thawh pawh hian duh lo mah ila a pang hi khawih hrim hrim a ngai. Ka insiamrem tur chuan ka han vuan leh ngei reng bawka.

Ka bata sleeper, kum tam tak ka bun tawh, A chhuat phah var pawh pawl chhuak vek lek lek tawh, chhuih palh deuh hlek pawha a ke kak kar zek thlawn chhen mai chu ka han bun chawt chawt a. Chu almirah ka han vuana, kal ka han tum leh chiah chuan ka hmalam chu thim deuh mup hian ka hria a, eng chen nge a thim ka hre lo.

Ka han hriat leh hnu chuan ka han inthing harha, choka lam pan chuan ka phei ta a. Ka tui a hal bawka fridge chu hawngin duhthawh takin tui vawt tui tak mai chu ka in ta khawlh khawlh a. Ka kham hleithei lo chu a ni ber e.

Duh tawka tui vawt ka han in hnu chuan mu turin room lam chu ka pan phei leh ta a. Ka tu hal erawh chu a reh phah pawh chu ka hre lem hlei lova.
Kan room kawngkhar ka han hawn chuan ka phu zawk mai. ka nupui chuan tlangval pakhat hi chhuat laiah chuan a lo kuah ngawi ngawih hi ka han hmu a. Ka thirim chu ka ter nghal zak mai. Han khang den phei mai ka tum lai tak chuan ka nupui chu a trap ni tlata hriatna ka nei a, ka han insum leh deuha. Ka han en chian chuan ka nupui chu lungchhe takin a lo tap rawi rawi a ni tih ka hre ta a.

Chhuatia lungchim taka a pawma a thahpui chu tunge ni ta ang. A pasal, kei lah chu an bulah ka ding reng bawk si a. Ka nupuiin a kuah chu chiang takin ka hmu thei lova, duh takin a fawp mawlh mawlh ni berin ka hria. A thawmhnaw hak erawh chu ka hmu thei. Ka night dress ang chiah a ni.

Ka nupui chu lungchhe takin a tap a. A tap han tih hian a hrilh fiah zo lo hial ang, a au in a au ni zawk hial in ka hria. “Bawiha pa harh teh harh teh” tiin a sawi nawk nawk a. Tunge bawiha pa a tih chu ni ta ang. Keimah hi ‘Bawiha pa’ tia min koh thin kha ka ni si a. Bawiha pa mi dang hi an lo awm reng emaw ni chu le.

Chuti a nih si chuan kei hi tunge ka nih ve. Finfiah ngei chu ka tum ta a.

Ka awmna chu ka han sawn kuala, kan nuin a pawm lai chu chiang deuh hleka hmuh theihna turin. Ka han hmuh theih chuan ka hmel ang chiah chiah niin ka hria.

Ka nupuiin a kuah ngawih ngawih chu keimah ngei chu ka ni, chutih laiin keimah ngei chuan an bula dingin ka thlir reng bawk si. Eng thil nge lo thleng ta le.

Ka han ngaihtuah chian chuan ka thi nia rinna ka nei ta tlat a. Ni e, ka thi a ni. Ka hmuh hi ka ruang a ni a, a hmutu hi thlarau mai ka ni.

Kan nu tap thawmah chuan thenawm khawvengte an rawn pung khawma, chanchin rawn thlithlai turin. An nu tap thawm avang chuan
ka fate pawh an rawn harh a, an tap ve vak vak ringawta. Hlauthawng thlabar takin, an nu ber a tah avang chuan.

Kei erawh chuan engmah ti thei si lovin, bangbo takin ka lo thlir renga. Ka rilru ka siama hma lak dan tur ka ngaihtuah a. “Heti hian ka ti ang….” tiin.



Similar Posts:

• Thlahrang hi a awm tak tak em ?
• Zovi Vrs. Sangi (Part I)
• Guwahati Mizoram House – Girls Dormitory
• I pasal duhzawng i hriat sak em? (Hmeichhe pual)
• Mumang hrang

Recent Posts:

• Breaking News: Lungdai Nu Vai bawngchaw zawngin pawngsualin a sat hlum
• Comedian Search 2012 Fiamthu-2 (Link dik leh thei thei tawh lo veeeee!)
• Ka Mit Laa, Ka Rilru Khawihtute
• mi(sual) member piancham!
• Kal dem dem.

This entry was posted on Friday, December 2nd, 2011 at 11:00 am and is filed under Luangliam, Zu. You can follow any responses to this entry through the RSS 2.0 feed. You can leave a response, or trackback from your own site.