mi(sual).com

Nu leh pa tamtak chuan fate phaiah lehkha zir turin an dah a, a thenin hnathawk turte pawhin an tirchhuak a. Amaherawhchu a tamzawk hi chuan an beisei ang thil hi an thlenpui lo fo thin.

Sum leh pai tam tak sengin an fate phaiah an dah a, sum leh pai mai ni lovin an fate thlengin engkim an hloh vek fo mai. An fate chhanchhuah nana sum leh pai tamtak sen huamte khan sum leh pai tamtakin an fate an tiboral thung lawi si.

Chutiang tehnuaih anih avang chuan i fa phaiah i thawnchhuak anih chuan heng ahnuaia thu tlem ka sawi tur hi lo ngaihtuah ve mai mai chhin teh.

1) A pawimawh hmasa ber chu hei hi a ni. Mizo thiltihnaah a tel duhloh thu leh Mizo hruaitute pawh a ei lemlohzia a fah fo thin che em?? Chutiang a lo nih chuan i fa khan Mizo zinga awm hreh chhan tak a nei tih ring nghal tawp mai rawh. 99% in a dik tih inhrilh nawn nghal ang che.

2) Zan dar 10 velah han be thin la, nidanga a tawngkam ang khan a awm em.? A tawng phelh deuh niaih nge, a tawng a inpawtmar tha hle, nge a mood a danglam thin hle. Hetiang hunlai(Dar 10) vel hi thianzahova zu/ruihtheihthil tihna hun bawr chho tak a ni tih theihnghilh hauh suh ang che.

3) Zan dar 2 velah han be thut thin teh le, a bikin weekend bawr chho velah. Rimawi thum dut dut i hre fo thin em, emaw mi tawng deuh nuai nuai i hre fo thin em? I fa chu party leh night club kal a ching ve hle tihna a ni mai. Night club kal hi thil tha lo ni hran lo mahsela, a hrisel lem lo tih hriat hi a tha. Tin, i fa chuan lam khawthawn vel paha mahni in refresh te a sawimawi fo chuan ngaiah nei hauh suh ang che.

A music ri thum dup dup chu enge tia i zawh changa, ka computer woofer anih chu a tih chuan dawt a hrilh che ah ngai la, i tifuh tam zawk ang. Vai inluaha awmte hian zanah bengchheng siam hi an phal lo tlangpui.

4) Engemaw changa a rawn haw chang hian a thawmhnaw hi lo en sak thin teh. A thawmhnaw hak duhzawk leh inchei duhzawng atang khan i fa danglamna chu i hmuthiam mai theiin ka ring. Han inkhawmpui mai theih tur thawmhnaw sawi tur a nei lo em?? A kal ngailohna hmun chu i hre mai ang chu.

5) English broken pui pui, entirnan- Don’t tell story, you buy me this, adt a hmang khoh khoh zel em? A thian kawp thinte anpai lengdang, changkang lem lo tak a ni tih hre nghal mai rawh. Thian kawm satliah mai hian an tawng kalphung hi kan la mai lo tih pawh hriat a tha.

6) I fa chu a rawn haw changin a thilneih leh thawmhnaw en la, i pawisa thawn/ a sum dehchhuah atanga a leiphak a ni em tih chik fo thin ang che.

7) Mizo chawhmeh a rawn ngaina ta lo riau em? Hnamdang chawhmeh a eiin a bar nasa ah ngai hmiah rawh. Chawhmeh hel deuh leh sa hel deuh deuh te pawh a ei thei viau anih chuan MIDUM ho nen chaw an kil tlang fo ah ngai mai la, a dik lo mawh viau.

8 ) Chawhma lama i fa chu a biak theihloh khawpa a mu fo anih a, zana hnathawk a ni bawk si lo anih chuan, ngaihtuahawm chu ni lo mahse ngaihthah ringawt chi ah ngai suh ang che.

9) I fa chu phone a biak i tum apiang deuh thaw hian a ring ral thak thak a, ahnu deuhah a hmuhloh thu emaw hmun pawimawha a awm avanga a pick-up theihloh thu leh aman a rawn biak thu a sawi fo em. Ngaih ti tha duh lem suh, nangmah be tur khan a environment leh amah kha in adjust a mamawh fo thinah ngai rawh.

I fa kha i rohlu a ni tih hrereng la, nangman i hmangaih loh chuan tumahin an hmangaih sak che ring suh ang che. Van i thlenpui theih tur i rohlu a ni tih hrereng la, pawr takin thlen suh ang che. Lalpa laka i rochan a ni tih hrerengin  Lei leh Van Lalber rohlu i kawl chu uluk takin enkawl ang che.

Similar Posts:

• Airtel Mizo customer care
• In duat dan dik
• Fa enkawl
• Keipawn ka thei ve!
• Mizoram Sumdawngte leh Bangkok

Recent Posts:

• Tun lai Dubai titi
• Mizo Lal Hrangvunga Sailo leh Kristianna
• Min hruai reng a lo ni…!
• Guaranteed Delivery of Public Services Act.
• Ropui takin he Vawk In hi ka hawng e

This entry was posted on Friday, December 23rd, 2011 at 12:20 am and is filed under Advice, Opinion. You can follow any responses to this entry through the RSS 2.0 feed. You can leave a response, or trackback from your own site.