mi(sual).com

College chawlhlai a ni bawk nen tihtur em em ka neihloh avang chuan kan kawmthlanga dawrah chuan ka thu mai mai a. Ka kuhva leina dawra meizial zuk paha ka thut lai chuan ka thutna dawr kawta awm Zira Carpentry tih chu ka enin, a kawta a dawr neitupa Pa Zira kan tih mai ina a thuthleng siam uluk taka a hru chu ka en in amah Pu Zira chanchin a hma a min hrilh te ka ngaihtuah chho a. Pa Zira kan ti ngawt a, kum lamah chuan ka Pa aia upa, Putar tia chhiar theih tawh, nupui pawh neilo, a nau fate pahnih awmpui leh eizawn nana Carpentry dawr siam a ni a. Amah lah chu a bula awm a nuam in, tawng duah chi nilo mahse rualkawm a thiam bakah a thil siam a uluk nen kan veng leh a chhehvel ah chuan a thilsiam te chuan ngaihhlut an hlawhin mi 3 a chhawr chung chuan an buai theiin, a hlawk bawk aniang a nau fate 2 a chawm bakah In tha taka sa in, 207 motor pakhat a nei bawk a. Kohhran leh vengchhung thawhlawm ah pawh a thawhhlawk thei hle thin.

Pachang Nupui nei lova hetia a awm ngawt hi mitin mak tih aniin, amah lah hmelchhe uchuak anilo nen, sawi dan hrang hrang tam mahse tumkhat chu a dawra ka len laiin ka zawt tawh a, a chhanna leh a chanchin min hrilh te chu ka theihnghilh thei lo. Mi tam takin zawt thlawn thin mahse hmana a dawr signboard ka design sak hnu khan kan innelin mi duhsak ta phian a, chuvang te pawh chu aniange a chanchin mi hrilh ni. Ka la hrereng MNF returnee tih takah a sam sei chhap mai chu huih kiang pahin a meizial a tan a, amah a palian in a sa a tha bawk nen a pawisawi hlauhawm chi tak ani. Muangchanga a thuthleng siam ngei, nghet charh mai a thutpah chuan, “Puia, Nupui nei rawh hi min tithlazen hlawm a, kan sawi ange aw” ti a a chanchin min hrilh te kha.

Kum 50 dawn ani ta, Kum 1966 a MNF ina independent suala India sawrkar an beih na kha. Khami hunlai khan tlangval kum 18 mi Zirsangliana chu Shillong ah pawl 8 zirin a awm a, khatia ram a han buai ta kha a rilru a buaiin an khua chhingchhip lam a rilru ah a awmin a chhungte a ngaihtuah hle a. Sum leh pai a harsa nen, a zirna chawlhsan a, an khaw lama haw a rilrukin a pa hnenah lehkha a thawn nghe nghe a. Mahse a pa sipai bang Subedar Vanruma ngaihdan a ni hauh lo. Pu.Vanruma hi Pachuau niin, mi rilru lian tak leh luhlul tak, mi pawi erawh sawi em em lo leh rilru tha tak mi niin Kum 1943 khan sipai ah a lut a, Roman Father te kaihhruaina hnuaia pass lem lo mahse matric lo zir thleng anih bakah pa taima leh huaisen ani bawk nen an hotu te duhsak a hlawhin, kum 1957 a pumpui thatloh a neih avanga a rawn pension kha chuan Subedar lai a kai tawhin, Mualpui tuna Chhingchhip kan tih mai ah awmin dawr a kai a. An khaw pa rawn, zahkai leh neinung pawl tak ani.

Khatia ram a rawn buai a Zirsangliana’n a zirna chawlhsan mai a rilruk thu lehkhathawn hmanga a han hrilh kha Subedar Vanruma, kum 14 anih atanga Sap Father te hnuaia inzir leh Father te pawh ina an kaihhruai leh zirna ngaisang tak ngaihdan ani hauhlo, a rang lamin a phalloh thu a zu hrilh nghal a. Zirsangliana haw chu a phallo a “I zirna khawp chu ka nei” tiin a tang khawh tlat bawk a. Tin khatih laia an khua a Canadian Father awm khan an school principal a hrilhsakin, an Principal chuan sum leh paia harsatna a neih chuan a puih hrehloh tur thlengin a tiamsak nen a haw ta lo a. India ram ropui khan a ramchung mi ni a a ngaih ten an han do kha a ngaitheilo in siruk lain a thawk ta reng a. Sapui chhaih kawlh an sawi ang maiin a tha thawh chu a hlauhawmin ram mipui pawhin an tuar hle a ni. Sipai an rawn chhuak a, an nun a rawngin a hunlaia piang velo thangtharte tan chuan hriatthiam pawh a har awm e, rorel awlsam nan tiin khua an han khawm a, mahni inlum leh khua, an kutzia ang maia an hriatchian ram leilung te chu kalsana khaw danga kai angaiin a pui a nawi pawh an bang silo, ram mipui te tan khan a hunlai rapthlak turzia kha suangtuah thiam pawh a tawng velo tan chuan a har awm e.

India sawrkarin thapui a rawn thawh kha a na in mi tamtakin Burma, Assam, Manipur leh Shillong lamah te pemin an hmangaih an ram, Mizoram chu sahimna zawngin an chhuahsan bawk a. Tu tan mah a ralmuang loin, zin dawn pawhin Convoy zuiloh chuan zin ngam chi pawh a ni lo. Shillong, Guwahati lama zirlai tamtak awmte tan pawh khan haw ngaihna a awmlo a, Zira pawh chuan kum 3 dawn lai a hawloh hnuaah boruak tlemin a zia ta deuh nen matric a exam zawh hnu chuan Shillong lama Aizawl sumdawng chhungkua rawn tlan te rualin an khaw lamah haw a tum ve ta a. Kum tam a haw tawhlo nen a phurin a ke pen a zangkhai hle a, chutih rualin a rilru ah erawh thil tamtak awmin a Nu leh Pa te a ngaihtuah a. Mikhual thu lengvel atangin Sipai ho sual zia leh nunrawng te a lo hria in, tun thlenga chanchin chhia a la hre lo erawh a lawm hle a, chutih rualin an khua a, a thiante leh thenrualte hmel erawh a rawn chhuksan ang kha anni dawn lo tih a hai silo, tute nge him anga tute nge him lo ang tih ngaihtuahin a thianpa Muana te a ngaihtuah chuak a, ani kha MNA a zawm nite khan an sawi alo hria a, tin an khaw nula hmeltha Roliani te kha a him angem tihte ngaihtuahin a han haw dawn meuh chuan a ngaihtuah ngailoh dawnin Aizawl a thlena an khaw lama a chhuah dawn zan phei chuan mutmu a hmu meuhlo.

A tuk zingkara Convoy bawk zuia an khaw lam a han thlen chuan, ‘Kan Khua’ alo tih ve thin chu alo danglam nasa tawhin a lung te pawh ati chhia a. Tin, Chhingchhip chu khawkhawmna hmun atana ruat alo ni bawk nen mitin mitang an tamin an buai nuai hi ani ber, Zira te chhung pawh a Pate ate Hualtu ami ten an rawn fin nen an ri laih laih reng a. Tin, an kawmthlang a an Sertawk kung awmna bul zawl, anin fiamna thin ah khan In thar alo awm a, a Pa in a thianpa leh a Sipai tanpui Havildar Chawngkhuma Khawbel khua, hmana a pa nena an zin pawh a an thlenna kha In a lo saktir ani awm e. Amah Pu Chawnga phei hi chu an ina pawh a rawn thleng foin, Zira pawhin a nel hle a. A thlen zana a zu lengthla chu Pu Chawnga chuan a lo be liam a, Hindi leh Saptawng te alo biain an nui nasa hle a. Shillong Boruak te, politics te sawipuiin a ngaihdan te chu Zira pawh chuan fing atiin Pu Chawnga chu ami ngainat zawng tak niin a hria a. An titi lai chuan a lenna te fanu Puitei an tih chuan thingpui rawn siamsakin, Zira pawh chuan a hmain hmu fo tawh mahse alo nulat ve tawh vang nge Puitei chu hmeltha a ti ru hle a. Pu Chawnga leng tura a chhuah hnu pawh chuan a tum ni hauh loin chu tleirawl kawm chuan a thu ta reng a.

Tleirawl kan han ti ngawt a Puite ti a an koh Roluahpuii hi Havilder Chawngkunga leh Sialsuk nula hmeltha Tlangkungi fa 5 zinga a 3 na leh an fanu Upa zawk niin kum 17 na a hmang mek a. Hmeltha ti a han sawi hluai tur chi nilo mahse hmaibial lampang, meng bial kak mai leh duhawm leh hmeltha tak aniin, thau ti a sawitur nilo mahse Nula ria leh cher antih ang chu ani hauh silo. A vun rawng erawh a unau te dang anglo takin a pa a chhun vang nge tlemin a hang deuh a. A hang deuh e tih avang hian, vun thim, Furpui ruah keng chhum anga thim nguih erawh ani hauh silo. A Nu Sailo Lal tunu Tlangkungi vun rawng chhun a unau te anga vun bahra no ianga var hlai mai anilo tih mai chauh ani. A ngaihnobei tawkin a hang ti ila, kan uar mah mah awm e. A taksa peng hrang hrang te chu la hrang ta ila darbel an man angem tihtur nimahse ain remkhawm erawh a fuh a, a sakhmel leh pianzia chu rangkachak belpui 7 pawhin a leizo hian ka ring silo. A pianzia lah sanzawng vantlang tak, hmaifang tha tak, ria chum bat mai aniin a mitmeng lah chu Keipui huai pawh a nem ang tih tur khawpa nalh leh favang arsi an sawi ang maia fiah kak leh mawi ani. Chu aimaha Zira thinlung titui nghal tu chu a mize nunnem takmai, zaktheilo ni hauhlo tawngduh tak, Hnapkhawn pachang hmu an sawi anga khi vur ni hauh silo, a hmel hlim reng leh chumi ti mawizual tura a nui mawi te chuan a thatna leh Zira’n a duhna chu ati zual si.

Nitam a awm hmanlo Zira chu Puitei lakah a luangliam nghal derin a huat pawh an in haw lo dun hle a, an khua rambuai in a tih danglam, a chhunga chengte tawrhna leh rumna ina a bawm na hmunah hian a tan chuan havilder Chawngkunga fanu Roluahpuii hi hlimna bupui anisi. Ani taka, an khua hian rambuai a tuar in khawkhawmna hmun ani bawk nen, mitam tak an rawn luh belh a. Sipai lah an nun a rawngin an sual em em a, mitam takin sipai kut an tuar a, nula pawh an khawih thin ani awm e. Sipai bang annih vang leh belkai anlo ni bawk nen Subedar Vanruma te leh Havildar Chawngkung te chhung erawh chuan sipai kut an tuar an lova, chu achhapah an khua a sipai lal awm chu an pension hmain Havildar Vanruma te nen an inhrawn hman avangin an chhung hnih chu an vanneiin an him a, chutih ni suhse nula duhawm leh hmeltha Roluahpuii chu a him bik hauhlo ang le..

(A sei tawh emai, Part-2 siam mai ang, to be continued…)
OT: Ka post 25 na alo ni ve ta reng mai

Similar Posts:

• Roluahpuii Part-2
• Roluahpuii (Part 1,2,3)
• Khawvela mi a ber pahnih
• Fiara tui
• Pu Zira thusawi tawi te

Recent Posts:

• Ti fuh lemlo angreng!!
• India ramah Kakuk tih ngona an zuar
• A Funeral and a Journey by Anup Kutty
• Thaikawi Palai
• India ram hmun hran hrana Petrol man thar tur

This entry was posted on Sunday, February 5th, 2012 at 6:30 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.