(Lei hringnun hi, a ho leh beidawng zawnga thlirtu tan engmah-lo-mai a nih laiin; Lalpa ringa nghaktu te tan erawh, thlemna leh harsatna, beidawnna leh tahna te hi chakna min siamtu, prialral nawmna min tem tirtu a ni lawi si! Engtinnge hringnun i hman ve thin?)
Turnipui sensa hnuaia’n
Chawhnuthlangher hret a ni tawh a, nisa vawl vawl hnuaiah, inkhawm turin hmahmawh ang reng takin ka kal hlawk hlawk a. ‘Uih zawn ang mai’ tih ka thiante hnen atang in hlawh fo thin; kal hlawk hlawk mi hi ka ni a. ‘Garden City ti hiala hriat, boruak nuam leh thiang a an sawi thin: Bangalore pawh ka tan zawng eng-teh-ual a lo nih loh hi a…’, ti rirlu rauh rauh chung in kawng sira thil awm chu ka thlir pah zel a.
An kawngpui zau tak KL Liana’n, ‘Rulngan pa ang zar’, a tih ai pawh a ngil leh hnum tha ah chuan ka awm ve tih pawh hre map loin chak zet zetin in lirthei changkang tak tak te chuan min tlan pel ang fua fua a. Lirthei heti zat awm si ah hian ka ta pakhat mah a la awm lo zui!!! Ka kal thui deuh hnu phei chuan ka thlan a tla ta hial…
Hringnun hi a fair lo…
‘Fair lo tak a ni’, a tih theih dawn dawn thin. Kawngpui zau leh mam tha em em sir khatah Lal in (palace) ni awm tak tak (ka tan chuan) In tha leh ropui tak tak a ding thulh a, vengtu nei hran hial te an ni! Ngai teh! Kawngsir lehlam ka han hawi ve thung chuan, khualzin phur tam thei tak, rel tlanna kawng a inphah zui thung.
Kan naupan lai (ti ve khanglang ila) min ti hre chhuak… ‘Rel chu a sei em em a, kawng kual ah a tlan thei miah lo, tin a kalkawng (track) a duli tlang pakhat pawh lo awm palh se a accident a ni mai’ an ti kan pu te’n. La hmu bik miah silo khan confi em em khan min hrilh thin kha a ni a, keini lahin mak tiin kan ka ho ringawt thin.
Tin heti hi a ni a, chung thil ropui tak tak thlir a ka ngaihtuah na ka sen lai chuan thil dang daih in ka rilru ngaihtuahna leh ka mit a la peng daih mai le…Engdang a ni law.., saptawng a Slum dwellers an tih te ka hmu… Hei vang hian a lom hringnun hi a fair lo ka tih dawn dawn chu ni. Vawi duailo Rel tlan lai atangin ka hmu ve thin in, ka thlir liam mai mai thin a, khawvel nundan pakhat ni ve hrim hrim tur ah ka ngai thin a, mahse tun tum ah erawh hi chuan ka rilru an dek/khawih tlat.
Chauhthubarawh a’n, ‘Retheih hi Pathian malsawmna a ni’ ka tih chang a awm thin tiraw? Kan la rethei tak tak lo a ni lo maw? Pawisa neilo, pawisak pawh neilo dinhmun ah hian kan la ding lo a nih ka ring thin. Heng mite hi, an bul hnai a cheng te ngei ngei pawhin an ran vulh ai pawhin an ngainep zawk hial ang chu. Mahse mihring an ni ve miau si a, riltam an hria a, hmangaihna pawh an hre ve vek. An tih theih tawk mi hnawmhnawk paih hai a bawlhlawh zing a a tha thlan chhuah, a nih loh vek leh tih tur hriat tawh loh hnu a kutdawh a ni mai. Mi kut an dawh lahin thenkhatin pek chu sawi loh, an la hau hrep zui.
Mahse maw… heng mite hian sum an neih loh leh chaw ei tur an neih loh vangin lungngai in an kun reng bik lem lo asin. Hlim tak a nuih bawk bawk chang te an nei tho a, tin vawiin puar khawp a hmuh hnu phei chuan lungmuang takin an mu siai siai thin. Chu hlimna erawh chu rosum a lei zawh theih a ni lo thung.
Rethei te’n duhthu kan sam ve thin a…
A chhanna erawh mi hausa ten an chen thung si. Kan hma hun kan han ngaihtuah a, ‘Ka zirlai ka zawha hna ka hmuh theih hun chuan, Car chumi khami Company siam chu ka lei thei ang a, in chutiang a lian chu ka sa ang a…’ tiin boruak ah in ka’n sa a. Mahse heng ka duhthusam zawng zawng hi mi hausa ten an neih hnu ka hmuh a ka hriat, ka tih ve theih dawn leh dawn loh pawh la chiang miah lo an ni.
Car lei ka tum, ka awh em em thin kha mi hausa pa chuan thing a ti a, a duhthu a sam lo a, hralhna tur a lo zawng sek a. Pawisa puk chawp a in sak ka tum ang lah chu, luah peih loin a tha dang leh lian zawk a sa mek a, a chhuahsan tep thung. A nupui ngat phei chu ka duhthusam ve thin aia hmeltha leh an hausakna nen in hmeh a duhawm leh changkang a ni!
Chutiang zelin, thil dang ka ngaihtuah kal zel a, rilru a lo lang a tam tual tual a, lawmna leh beiseina reng neih a har. Tih theih loh leh mumang a ka duhthusam thin zawng zawng te kha midang te tan a siam a lo ni a, chu mai a nilo, an duh tawh lo a, an hluihlawn hial.
Lal Solomon-a nun ka en a…
Ka thla a muang sawng sawng. Tin he rilru (awhna leh itna) ka neih a ka ngaituahna ka lo kal thui pui lutuk ka inhriatchhuah phei chuan ka inthiam lo lehling. Ngatinge thil tul lo ah ka rilru ka lo sen vak mai le? Mi hausa awm ta lo se, rethei an awm thei lo ang a, chutiang bawkin mitin hrisel in natna reng reng vei ngai lo vek ni ila, damna hian hlutna pakhat mah a nei hek lo ang.
Lei ah thihna leh lungngaihna te awm ta lo se, kan beisei Vanram pawh hian awmzia a nei bawk hek lo ang a, kan biak Pathian ngei pawh hian kan nun ah awmzia a nei dawn miah lo. Kei ai a hausa awm avang in an neih leh an nun ang a nun ve beiseiin lehkha ka zir a, ka theihtawp chhuah in hna tha hmu turin ka theihtawp chhuahin ka inbuatsaih ve mek a lo ni zawk a.
Lal Solomon-a, a lalna leh a neih engkim leh ropuina zawng zawng nena a inthuam a a inchhek-arbawm lai paw’n tuktin par mai pawh a tluk zo lo. Khawvel mihring piang tawh zawng zawng zing a lal fing leh ropui ber pawh pangpar pakhat tluklo a nih si chuan ka lo it leh awh thin mihausa (ka tan) te hi eng ang tak ni ve ang maw?
Ka ngaituahna kal zel in, Pathian nei tu ka nih ka in hre chiang thar a, ka thla a muang. Chu mai a la ni lo: Mihausa a piangin pawisa leh ro sum an duh tam a, a aia tam neih belh tumin an hmanhlel a, rilru muang taka a awm an nei tlem thung tih te ka ngaihtuah thlen hnu phei chuan thil tullo ah ka rilru ka lo hmang thui hret niin ka in hria.
Hei vang hian hausak ka sawisel lo a, in ropui neih hi sualna kawng a ni ka ti miah lo; ka sawi tum erawh kan dinhmun Pathian in min dah na theuh ah hian lungawi zel hi a lo tha ber a ni ka tihna zawk a ni. Pathian hre chung a hausak leh in ropui neih te, mi dangte tanpui thei a awm theih lek phei chu duhthusam a tha leh ropui a ni zawk.
Tirhkoh Paul-a’n Philippi 4:11-12 a a nun min hrilh hi a ropui thlawt. ‘…Kei zawng eng ang pawhin awm mah ila, lungawi zel ka ching tawh si. Tlawm taka awm dan ka thiam a, hausaa awm dan pawh ka thiam bawk a; thil tinreng ah leh thil zawng zawng ah tlai leh riltam a awm dan, hausa leh tlachham a awmdan thuruk chu ka hre chhuak tawh’.a ti. Amen…!!!
Lal Solomona thurawn
Khawvel hlimna zawng zawng nei thei tluk a ngaih Lal Solomon-a meuhin ‘Engkim mai hi engmah lo mai a lo ni’ a lo ti thlawt a. Hei hi ka ngaihtuah nawn a, a dik ka ti tial tial. Engkim Pathian hnena kan dah chauh hian kan nunah hlimna leh lawmna a awm thin, mahse hei hi mihring tan nunpui a harsa thung.
Nunpuitu te erawh an inchhir ngai lo. Amaha rinna kan nghah a, a hnen a kan in pumpek ngam hian rilru hah a kiam thin. Lalpa tihna nun leh Amah a in nghat ngam te nun hian belhchian a dawl fo a. Harsatna tawk thin mah se, an rin Pathian an hriatchian avang in thlemna lakah an sihhnip lo a, harsatna karah tlu mai loin an nghak fan fan a, tanpui var tu hnai reng chuan a hun tak ah a khai chhuak fo thin.
Chuvangin Pathian kan tih a, a thupek te zawm a kan nunpui zel a, midangte tana malsawmna kan nih theih zel hi a tul tak zet. Chu nun chu I nei ngai em? I nei ngailo a nih hlauh chuan neih tum la, I tana tawngtai thin in nu leh pa, chhungte leh kohhran te tawngtai hlawhtlinna chu nangmah I ni tih hre nawn fo la. I hringnun par ang a lo vul ngei ang.
Similar Posts:
- Mihausa chu!
- Belhtlak Pathian.
- Pathiana mihringte dinhmun;
- Chun leh Zua te
- Hmangaihna.. Beiseina.. Rinna..
February 17th, 2012 at 8:06 pm
Han chhiar tan dawn ila.
Report this comment
February 17th, 2012 at 8:14 pm
Amen!
Hringnun hi ‘fair’ tih a har viau reng a ni. Ṭhenkhat rethei ngawih ngawih, hmelchhe em em, pian nalh lo, fing lo ve tak, hrisel lo em em sa lehnghal-a piang an awm laiin ṭhenkhat thung chu hmelṭha bawk, pian nalh bawk, fing bawk, hrisel leh hausa em em lehnghalin an piang bik si te hi…ngaituah chang chuan kan Pathian meuh pawh hian duhsak bik a nei a ni lo’m ni tih a awl khawp mai.
Report this comment
February 17th, 2012 at 8:17 pm
Ka kawmthlangpa Pu KL Liana hi an ngaisang phian a, kei pawhin ka ngaisang. Kan rilru number erawh a inanglo thei khawp mai. A fel, hriatthiamna pawh a ngah e.
Report this comment
February 17th, 2012 at 8:35 pm
Hausakna: Khawvelah hian a awm a, retheite hian hausate hi hlim turah kan ngai chawk bawk. Mi hi engtin nge alo hausak le? A chhan a tam hle, chhan tum lo law law ang.
Retheihna: Hei pawh khawvelah hian a tam. Retheite hi lungngai fo turah kan ngai chawk bawk. Engvangin nge kan retheih le? A chhan a tam hle, hei pawh chhang lo law law ang.
Hlimna: Mi lungawite ta a ni.
Mihringin hausakna hi Pathian malsawmna kan ti thin. Kristiante Pathian chuan hausakna a ngaipawimawh lo hle tih biblea Thuthlung Tharah a lang. Thuthlung Hlui lamah chuan mal a sawmte an hausa. Thuthlung Tharah erawh chuan Lal Isuan, ‘Mi hausa Pathian ram luh ai chuan sanghawngsei hriau benga a luhtlang a awl zawk’, a ti. Hausaknain Pathian leh mihring inkarah inzawmna a nei tawh lo a niang.
‘Hausa mah se Pathian thu a awih tho chuan,’ kan ti thin. Isua sawi dan erawh chu a chunga mi khi a ni. ‘Hausa mah se’ tih hi a hre turah ngai ang. A sawi tel lo luiah ngai bawk ang. ‘Hausa mah se Pathian thu a awih tho chuan,’ tih hi ngai pawimawh se chuan a sawi tel em em ang.
Khawvel hi a fair thei tak tak dawn lo alo ni e.
Report this comment
February 17th, 2012 at 8:35 pm
Hringnun hi ‘fair’ se khawvel a ni nang!! Pathian ah lo chuan lungawina hi a awmlo reng ani. A nei tam in neih belh an duh a, nei tlem in neih tam, chuti vel chu a ni hringnun hi. ‘Dream’ neih te chu mihring dan a nia, a lutuk erawh a awm thei ang chu. Duhthusamah a thamral ve theih ania. Post thatak a ni ka ti
Report this comment
February 17th, 2012 at 9:32 pm
A van tha tehreng em ve aw… Hringnun hi Pathian nen lo chuan a hringnun theih tak2 loh reng a ni. Mite chuan chenin nuamsa takin khawsa mah se, Van Lal fate angin hlimna an nei ngai hek lo. Hringnun ti hringnuntu ber chu nundan thiam mai hi a lo ni e.
Report this comment
February 17th, 2012 at 9:38 pm
Enge maw chang te chuan thenawmpa te nen a “Aw Lalpa i malsawmna hlu kan engkim chungah a lang” tih hla rilru taka sak harsa tih chang chu a awm ve ngei a lawm..
A ziaktu ka chiang ta chiah lo ‘Lungawina’ tih article kha tha ka ti khawp mai hetiang lam pang a tan chuan. Mi lungawina ah lungawi ve kan tum hian kan buai thin ni te’n ka hria.
Post tha tak a ni e
Report this comment
February 17th, 2012 at 9:44 pm
Ka tui loh lai takin post a lo chhuak. Dam phawt chuan ka rawn chhiar tha leh ang a, ka la rawn comment leh ang.
Report this comment
February 17th, 2012 at 9:46 pm
Thuziak thiam tak i ni.
Hringnun hi…a fair lo ti tu tan erawh, a fair lo ang a. Chantawka lungawite atan erawh a fair lohna tur a awm lem lovang. Keini angte tan hmelchhiat pawh hi a lo tha, hmeltha an awm phah alawm. Ni e, retheih pawh a tha, mi hausa an awm phah alawm. Ka tan chuan, lungawi lohna reng reng a awm lo.
Ka hria…lei anchhe dawng leh vana lallukhum a inzawm, lei eden leh salem thar nen inkara lungawina YAHWEH hian; fair takin min lo enkawl hi a lo nia le.
Report this comment
February 17th, 2012 at 9:46 pm
Comment a va’n tha hlawm em!…
Kei hi Pathiana ka innghah lutuk avang hian ka vui lek lek fo, mahse a hun takah a remruat min hriattir thin a, ka va’n lawm tak.
Report this comment
February 17th, 2012 at 10:53 pm
Mahminga sermon chu a va tha em…(Scooty khalh chauh i lo thiam lo anih hi! fth)
Fair lo zawnga ngaihtuah chuan rilru a hah reng ang. John Lennon hla “Imagine” te pawh ka hriat chhuah chu..Mahse khawvel chu heti hi a ni si a.
Pathian “Min au la, Ka chhang ang che” ti tu hi a thutiamah a ding nghet a, life hi fair lo viau a kan hrait lai pawh in tawngtaiin thlen ila, hahdamna min pe fo..Pathian ringtlata Amaha in nghattlat tu te nih tum theuh ang u.
Report this comment
February 17th, 2012 at 11:00 pm
Tha ker mai.
#10, ka inghat ngamlo fo hi kei ka buaina
Report this comment
February 17th, 2012 at 11:22 pm
Inspiring Post
(…Lalpa ringa nghaktu te tan erawh, thlemna leh harsatna, beidawnna leh tahna te hi (EI TUR) Chakna min siamtu, pialral nawmna min tem tirtu a ni…) tih-te mai hian min hneh khawp mai! Thanks! 
Report this comment
February 17th, 2012 at 11:23 pm
Josepha nun te kha mihring taka ngaih chuan a fair lo a nia. A chanchin tawp lam ngaihtuah lo in ka chanah ka’n dah chin a,Pathian atih avangin sual a kal san a,lungin a tan phah zui. A lakah Pathian a ngawi vung vung a…ka ngaihtuah thin a harsa awm mange aw ka thin.
Pathian kan hriat ai,Pathian mi hriat nih hi ahlu zawk tih ka hriat phah khawp mai.
Report this comment
February 17th, 2012 at 11:35 pm
#14, Levi
Report this comment
February 17th, 2012 at 11:48 pm
@ mamboihi.. Ka lawm e. Scooty kha chu theihnghilh a har a ni ti raw…
@ levi.. Dik chiah. Pathian hian chet hun a nei si a, Josepha khan a nghak rem em mai..
@ Dr Jon.. Nia, Lalpa nghaktute chuanin, an chakna te an siamtharin.. Tih te hian kan hringnunah awmzia nei thar zel se ti raw.
@ lamea.. Bus ka nghah rei hlek te hian ka tawngtai chung zel. Ka tlai viau a ka hriat pawh hian ka kal hun tur dik tak a nih zawk si zia hi ka hre leh fo thin.
Report this comment
February 18th, 2012 at 12:06 am
Mahming kei pawh tawngtai hi ka uar khawp mai. Hman deuh khan kan nau pakhat in zingah phone in kaitho turin min ti a, a hunah hnathawhna a thlen ngei ngei angai a, vawi 15 vel ka call pawhin a tho thei si lo a, ka tawngtai a, “Aw Lalpa khawngaihtakin min kaihthawh sak rawh” ka ti a, ka phone leh chu a lo chhang ta!! Pathian chu fakin awm rawh se.. Kei chu ho leh te lua awm lo hian ka tawngtai mai thin.
Report this comment
February 18th, 2012 at 12:12 am
Report this comment
February 18th, 2012 at 12:23 am
A scooty aia hmangaih a nei tih ka hre ve chiah. A scooty thairan a hlauh avangin Dr tih a dah duh leh tawk kha chu a scooty hlutzia ka hrethiam ve chauh.
Report this comment
February 18th, 2012 at 1:00 am
@mamboihi.. Ringtu tih tur dik tak i ti e..
tunlai hian Selthuama hi a reh riau… 
@ Chemtatrawta…
Report this comment
February 18th, 2012 at 9:11 am
A tha hle mai, ‘thilthlawn pek ngun takin chhiar fo la’ tih hla that zia leh dik zia min hriat thar tir leh bawk.
Tin, mizo tawng ziah dan kalphungah ‘Tin’ tih te ‘Ngaiteh’ tih zawhah te hian comma an dah thin tlangpui thinin ka hria (kan naupanlaia kan zir dan), dik tak maw!
tren tren
Report this comment
February 18th, 2012 at 10:10 am
# 21…
Report this comment
February 18th, 2012 at 7:00 pm
Thuziak tha tak a ni e.
Hringnun chhut ril lote hian he khawvela inchhekarbawm leh hringnun chen hi an thupui thin. Ngun taka hringnun chhiar a, a petu leh neitu tak tak hretute chuan he khawvela kan neih hlu ber pawh hi chhum rei lo te lo lang a, ral leh ang hi a ni tih an hriat avangin an hringnun chu a neitu chawimawina leh atana thawh nan an hmang zawk thin.
Report this comment