mi(sual).com

Chu zan reh takah chuan ka kal thinna lui kam thing buk hnuaiah chuan ka thu kerh kerh a. Thla chu a eng nuam em em mai a, luitui che vel chuan thla eng chu a rawn en a, a tle suar bawk a. A boruak chu hahdamin a hmun chu nuam hle mahse chung hmun nuam leh lui luang ri her herte chuan zanina ka lungngaih zia leh rilru hah zia hi an hrethiam si lo. Hei hi a lo ni maw nun beidawnna ruam an tih chu tiin ka indawm kun ngawih ngawih a.

Heng ka chunga thil thleng zawng zawng hi ka thiam loh chu ni bawk mahse, ka thiante leh ka chhungte kha ka dem khawp mai. Pawisa lakluh dan ka hria a, thian ka ngah a, thian khawm pawh ka thiam khawp mai. Kei aiin ka thiante ka dah pawimawh a, an harsatnaah theih tawkin sum sengin ka chhawm dawl thin. Mahse hei tunah chuan ka lo tlachhe ta a, khang ka thiante khan min chhawm dawl chu sawi loh, diriam takin min kalsan zo ta chu a ni a.

Ka hmangaih em em, a hming pawha ka koh phal loh Duati pawh khan engvangin nge min kalsan? Ka ring ngai lo, tunah pawh hian ka la awih lo a ni. Ka hmangaih a, ani pawhin min hmangaih, hun duhawm tak tak kan tawng dun a, harsatna leh buaina pawh, khang hun zawng zawgah te khan ka kiangah a ding tlat a, engmah ka neih loh lai pawh khan a ni ka kianga a awm chuan ka hlim em em thin. Mahse tunah hian engatinge min kalsan tak? A hmangaih ber hi engati nge mipa dang min pansan tak le. A na ka ti a ni.

Ka nu leh pate pawh ka dem khawp mai, kan unau zingah Black Sheep ka nihna bik ka hre lo. Kan unau hi inang khat vekin min en selang chuan hetiang hun hi ka tleng bik lovang. Duhsak bik neihna hmunah hian a hlim theih loh a ni e.

Mahse heng thil zawng zawng ka chunga a thlen a, min tuithlar tak hlawm nachhan hi chu keimah vang a ni. Zu leh nula in ka nun ka chen a, mite tan chuan ka hnawk khawp ang. Ka nungchang ka uluk loh avangin sum lamah pawh ka tlachhe ta a ni a, mahse ka thiante zawng zawngin heti taka min hawisan ta hi chu a mak ka la ti reng, na ka ti thlawt a ni.

Chutia thingbuk hnuaia ka phun mawlh mawlh lai chuan ka kiangah hian mi pakhat a rawn kal a, “I va mal ve mawle, zanin hi a mawi tiraw, i ril atam em, hei chhangthawp leh thei tui ka nei asin,” a rawn ti a. Ka ril atam love, hei lui ka lo thlir mai mai a, tiin ka chhang a, a ni chuan, “Kha ei la,” tiin min pe ta hram a, ka ril a tam tawngkhawng tawh avangin ka hnar phal ta thlawt lova, ka ei ta nghal bawrh bawrh mai a.

Chutia ka ei bawrh bawrh lai chuan a ti ti malh malh a, helai hmun nuam a tih thu te leh len vei vah nana a hman thin thute chu a sawi a. A bekin min chhawn a, ka hriat hnu ang ka ti khawp mai a, mahse ka chiang thei mai lo. a rawn hawi chiang a, ka hmuh tawh hnu a ni tih ka hre thei. Mahse tunge a nih ka hre lo. Tunge a nih ka zawt ta phawng mai a.

“Kei chuan ka hrechiang che a,mahse nang erawh chuan min hre chiang lovang, amaherawh chu min hmu ve zauh zauh tawh ngei ang. College sport a Basket ball a in champion te, College Prompt Night te, office a i thawh hnua i buai em em laia ka rawn dawr che te kha i la hria ang ka ring,” a ti a. Chu veleh ka harh ta nghal uar mai.

Kan College Basketball a ka champion pui tum khan min fuih tu ber a ni a, mahse kan champion ta chiah kha ka be zui tawh lo, tactic zawng zawng kha min hrilh kha ani si a, kan superstar ta lutuk khan biak enah pawh ka en tawh lo kha a ni a. Tin, College Prompt night ah khan a rawn kal ve a, mahse kan college mi leh sa a nih loh avangin ka hnar haw a, hrehawm a ti teh a nih kha. Office a sum tam tham tak ziahbo ka tum mek laiin a rawn lut a, min rawn be buai a, thinrim takin ka hnar haw ta kha a ni a. A lungawi lohna a sawi chhuak ngei dawn a nih hi ka ti rauh rauhva.

Chutia ka ngawih reng lai chuan ,” Ka ngaina che a, mi fel tak i ni a, i kianga awm ve hi ka chak em em thin a ni. Amaherawh chu i khawvel a nuam a, thian i nei hnem a, kawm che chak ve em em mah ila keini michhe fa tan hi chuan kan kawm phak i ni lo alawm. Mahse , i chanchin ka lo hria a, i harsatna tawh zawng zawngte pawh ka lo hria alawm. Tin, hetah hian hun i hmang ngei ang tih ka ring tlat a, i hnenah ka rawn kal a nih hi,” a ti ta mai a. Mak ka ti ti lutuk.

Thuk taka ka harsatna min hriatpuitu awmchhun a ni tih ka hre thiam ta nghal a, ka inveng zo tawh lo, ka thinlung chhung a tawt up up tawh avangin ka hrehawmna leh ka vuina chu ka hrilh ta nghal bawrh bawrh a. Lungngaihna leh harsatna hi tuma hnenah ka thlen ngai lo, mahni hian ka tuar chhuak mai a, mi dang bulah hian ka inleih baw ngai lo. Amaherawh chu tun tum chu ka tlin ta ngang lo a ni, chutia ka sawi ta bawrh bawrh chu ka inthiamlo leh hnuhnawh a. Tin, tunge a nih, tunge a hming tih ka la hre lo tih ka ngaihtuah chhuak hlawl mai a.

Inthlahrung tak chuan tunge a nih ka zawt ta a, a ni chuan,”Min hre em em ang. Hmanah i tleirawl chhuah hlimin i bialnu nen in intithiamlova, helai hmunah hian Valentines Day zanah tun ang hunah hian i lo thu kerh kerh a, i kiangah ka rawn kal a, kan ti ti a, hlim takin kan inkawm a, i bialnu chunga i thil tihsualah ngaihdam dil tur leh, chutia i tih chuan in inrem leh ngei tur thu te ka hrilh che a nih kha,” tiin a sawi a. chutah chiah chuan tunge a nih ka hrechhuak ta hlawl mai.

Lal Isua Krista, ka tleirawl chhuah hlima ka thian atana ka sawm kha a lo ni a, ka kianga awm a duh em em laia ka lo hnar thin ngei kha a ni. Hrehawm ka ti a, a hmel en pawh kha hrehawm ka ti. Amaherawh chu chhungril takah hlimna leh lawmna ka nei. A chhan chu mi zawng zawng, ka thiante, chhungte leh ka hmangaih ten min hnuchhawn hnuah pawh ka kianga awm la duh tlat chu a ni chauh hi a ni a, hrehawm ka tih rualin ka hlim em em. Ngaihdam ka dil a, lawmthu ka hrilh bawk a. A ni aia thian tha leh rintlak hi lei leh vanah ka tawng tawh dawn lo tih ka hria, tichuan hlim takin a kiangah nun bul ka tan thar leh ta a.

Similar Posts:

• Mysore a Zirlai Tv. N. Ezekiela a awmna chin hriatlohvin a bo
• Rukru man
• Chhandamna-II (Sunday Pual)
• Kan thawnthu-I
• Theihnghilh phal loh

Recent Posts:

• Church Denomination leh Mizo Kristiante
• Chhungkaw tan thusawm pek.
• MILADY
• Mizo League (EPL)
• Niuh neuh!

This entry was posted on Sunday, February 19th, 2012 at 2:30 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.