mi(sual).com

Mama,

Vawiin i pianchamphaphak a lo thlen hian mi pa te angin thilpek tha pek tur che ka nei lo a, pawi ka ti hle. He khawvel eng hi tap chungin i rawn chhim tan a, keini erawhin nui chungin kan lo hmuak thung che  a ni. Hei hi hre reng la ka duhpui takzet che a ni. He khawvel-a i vahvaih chhung hian i hlimna  leh lawmna te kha mi zawng zawng  in an tawmpui ngai dawn lo che a, i lungngaihna leh hrehawmna kha mi zawng zawngin  an hriatsak che in, an hriatthiampui ngai hek lo ang che tih hi theihnghilh ngai suh ang che. Chutih hunah chuan nangmah hmangaihtu tak tak che pawh chiang takin i  hrethei bawk ang.

Hringnun hi tluang taka zawh i duh chuan ruihhlo lakah in thiarfihlim  hram hram thin ang che. Ruihhlo, zu leh drugs te hi kan Bible hian “Sual a ni” ti fak lo mahse ruihhlo hnathawh chu ‘Luhai chial, danglam deuh chiai’ a ni.’Lu hai chial, danglam deuh chiai’ hi thil tha leh dik  leh a nihdan tur nise chu Pathianin Adama a siam khan ‘ Lu hai chial, danglam deuh chiai sain a siam ngei ang. A nihdan tur ni lo aia dik lo, i hria a ni si loh chuan ruihhlo lak atang hian inthiarfihlim hram hram ang che. A dawt lehah chuan pawisaah hian rinawm tlat la, thil danga rinawm i harsat loh phah sawt dawn nia.

Mama, ‘Mifing’ nih i duh chuan a sawituah tang lovin a ngaithlatuah leh zawhna zawttuah tang zawk thin la. Ngun taka i ngaihtuah tawh hnua i ngaihdanah chuan  huai takin ding tlat la, i ngaihdan chu a lo dik  lo anih erawh chuan i dik lohna chu huai tak bawkin pawm ngam la, thu chu sut let hreh ngai suh ang che. Mi nunah leh thil tihah inrawlh loh hram hram tum la, i tel lohna thilah chuan hre lo nih hreh ngai suh la. I nun a chhe zawngin a nghawng dawn te a nih si loh chuan i  thian hnai leh thian tha ber pawhin thil dik lo takin a ti a nih pawhin a  theih chhung chu i tanpuina a dil che a nih si loh chuan inrawlh lo hram hram la. I tanpuina a dil che a nih  erawh chuan i theihna zawng zawngin tanpui hnial ngai suh ang che. Eng emaw vanga kei ang tho a lehkhathiam lo i lo nih palh hlauh a nih pawhin ka sawi ang tak hian i awm thei a nih ngat chuan ‘Mi a’ tih i hlawh ngai bik lo vang.

Amaherawhchu, eng ang pawhin zir sang mahla i  finna khan khawvel finna hi a umpha ngai dawn lova. Vawiin a tha, mawi leh nalh i tih kha naktuk maiah hian a aia tha, mawi leh nalh a lo chhuak dawn tih hria la, engah mah i rilru zawng zawng dah suh ang che. Nang aia fing leh remhria ah midang dah zawk la, mi mawl ber ngaihtuahna atangin thil thlir thin la, mifing ber hnathawh danin  thawk zawk thin la. Thawhrimna kawngah erawh chuan mi a nih hreh suh ang che.

Tin, vanneihna leh vanduaina hi a tawpna a ni vek kher lova, ni a lo chhuak a, a tla a, a lo chhuak leh thin ang hian  thil reng reng hi a in thlak kual reng thei a ni. Hlawhchhamna  pawh hian mifing thinlungah chuan hmun a chang ve lo a, kawng dang kawhhmuhtu a ni zawk thin.

A tawp berah chuan mi hriatthiamna nei mi nih tum thin ang che. Chaw i ei chhan chu i riltam vang leh i taksain a mamawh vang a nih ang khan mi zawng zawng hian an thiltihah tih chhan an nei vek a ni tih hria la. Chutichuan mi hriatthiam theihna leh khawngaih theihna i lo neih phah thin ang. Mi hriatthiam theihna  leh khawngaih theihna hi hmui ngilna leh i mamawh hun taka ‘ Khawngaih leh hriatthiam ‘ i hlawh theihna kawng tha ber a ni. Chu chu hmangaihna hmangin neih tum tlat bawk ang che. Ka fapa, ka hmangaih che.

I pianchampha hlim taka  i hman theihnan duhsakna ka hlan a che.

I pa

XXXX

Similar Posts:

• Rawngbawlna- ruihhlo ngaite ah
• Ruihhlo do… Heti zawng hian…
• Misual.com hnen atanga lehkhathawn
• Hmangaih Lehkhathawn
• TESTIMONY

Recent Posts:

• EIZAWNNA
• Pherh Fesawn
• Nupui neih nawmna
• VDS (Valentines Day Special)
• Valentine’s Day Vangin i buai a mi?

This entry was posted on Sunday, February 19th, 2012 at 4:30 pm and is filed under Advice, More than words. You can follow any responses to this entry through the RSS 2.0 feed. You can leave a response, or trackback from your own site.