mi(sual).com

Pu Arro-Khuanga hi a tam zawk chuan kan hre lo maithei a, a kum upa lam erawh chuan in hre ngeiin ka ring. Pathian thu hriltu ropui tak a ni. A chanchin kimchang rawn post ka tum lo va, a ngaihnawm lai ṭhenkhat ka rawn dah mai zawk a ni.

Pu Arro-Khuanga hi a hming diktak (lai ah hming) chu Khuangringvunga a ni a, kum 1888 July ni 21-ah Khuangleng khuaah a piang a, a pa chu Sellaia a ni a, Tlau hnam a ni. Kum 1911 (?) khan Tawii nen an innei a, fapa hlir pathum an nei. Kum 1960 August ni 15 khan Lailak khuaah a boral.

* A khaw pakhat, Arro hi tuna a hming kan hriat tâk a put phahna chhan a ni. Mizote chu hming bunga inkoh kan chîng a, ani pawh hi Pu Khuanga ti-a koh ṭhin a ni a; (zeldin thuin) Arro khuaah hian Pu Khuanga dang an awm ve avangin a hriat awlsam nan Arro-Khuanga tiin an ko ṭhin ni awm tak a ni.

Kum 1935 (?) khan Lailak khuaah an pêm a. Lailak-a an awm hnu pawh hian Arro-Khuanga ti-a koh a la ni reng mai a, “Lailak khuaa awm ka ni tawh a, Arro-Khuanga ka ni tawh lo ve; ‘Lailak-Khuanga’ min ti tawh rawh u,” a ti ṭhin!

* A hun tawp dawn lamah khan Tuichangral-ah Pathian thu hrilin a vak a. Bawktlang khuaa a awm laiin khua aṭanga mel khat dawn laiah fianrial ṭawngṭaina hmun bik a nei a. Chu hmun chu hmun rem lo tak, awih tak a nih avangin khua aṭanga a hnaih ngaihtuahin mihring leh ran pawhin an tlawhpawh zen zen loh khawpa hmun fianrial a ni. He lai hmunah hian thingphur leh dai vakte’n ṭawngṭai thâwm leh zai ri an hre ṭhin a, a ruka an han en nâk chuan Pu Khuangrivunga a lo ni reng mai a. Keifang kung ṭha tak tlukar khamphei dú maiah hian a lo awm a. A changin a ṭhu a, a changin a ding a; maimitchhing chungin a ṭawngṭai a, hla a sa thùl a. A hmutute’n mak an ti hle. Chuta ṭang chuan chu Keifang kung chu ‘Pu Khuanga Keifang’ an ti ṭhin.

* Pa hmelṭha tak a ni bik lo va, pumruaah chuan pà tâwk tak, ti deuh terh turh lam hi a ni a, pa pian nalh a ni lo. A hmai pawh Mizo hmai ve tak, hnar lian ṭawk deuh hlur nei a ni. A hmel chungchangah heti hian a ti.

“Darthlalangah ka han inen ve a, ka hmel chu lasai ang pûn hi a lo ni mai a. Ka hmel chhiatzia ka han hmu chu ka lawm a, ka ṭap ka ṭap ta mai a,” a ti! A lawm chhan an han zawh chuan, “Ka hmel chhiat hi ka himna, ka kulhpui a ni. He thil avang hian nuthlawi lakah ka him a, mipat hmeichhiatna sual thlemna lakah ka him phah a ni. Lalpa chuan himna kulhin min hual a lo ni reng a, him takin vanah min paw kai dawn a ni,” tiin a lo chhang et!

* A awr hi a puar deuh va, chu pawh chu, “Pathian malsawmna ka dawn a nih hi,” a ti mai! A beng pawh tlemin a chhêt deuh a ni awm e.  Hemi chungchangah pawh, “Ka bengchhet hi ka lawm a ni,” a ti a, a chhan an han zawh chuan, “Ka bengchhet hi ka zaidam phah a ni. Bengvar pangngai ni ila mite thusawi zawng zawng ka hre pha vek ang a, thinurna tur  a tam ang. Ka bengchhet avang hian tam tak ka hriat loh a awm a, ka zaidam phah a ni,” a ti ve tlat!

* A nupui a sûn a, mitthi ngaih leh lunglen chungchang an sawipui thei miah lo! Ni khat chu khualkhuaa a ṭhian pakhatin a nupui thih chungchangah a rawn tlawh a, “I nupui lah i sûn ta mai a, a pawi ngei mai,” a han ti ṭan chauh va, “Kan duhtakte’n thihna luipui an kai chuan a lawmawm e,” tiin a lo chhang daih. A ṭhianpa chuan, “Teh daih a!” a han ti a, ani chuan, “E, teh daih nang le.. ‘Chu in mawi takah chuan ṭhenna thu reng kan sawi tawh lovang’ kan la ti dawn alawm le,” tiin dam duai hian a lo chhang zui leh a, a ṭhianpa chu a hrilhhai letling hial!

* Thuhrila a vahnaah vawi khat chu UPC baptisma changin a lo inhnîm ve mai a, kohhran pawhin a rawngbawlna an chawlhtir lailawk hial a. Chutih lai chuan inhnimphuma baptisma a chan mai chhan an zawt a, “Thlarau Thianghlim channa a ni e an ti a, Thlarau Thianghlim hmuh beiseiin ka inhnimtir ve mai alawm le. Engmah pawh chu a lo ni chuang hlei lo va, kohhranin a ngaihua ang tih pawh ka lo ngaihtuah lo atin ni,” tiin a lo chhang!

* Haflong tlâng a pan ṭumin Silchar-ah thu sawi a tum a, “Vai ṭawng i thiam si lo va, Silchar-ah chaw eina i hre dawn em ni?” an ti a. Ani chuan, “Kan hla sak ṭhin pakhatah ‘Nitin ruai ropui a ṭheh’ tih a nih kha. Engah nge chaw ei turte chu ka hmuh loh vang ni?” tiin a chhang a. “A nih leh, ṭawng pawh i thiam si lo va, engtin nge thu i sawi theih ang?” tiin an zawt leh a, “E, Lalpa’n ṭawng tinreng a thiam alawm,” a lo ti leh mai a ni. A sawi ang ngeiin a kalna apianga chaw eina turah a buai lo va, ṭawng lehlin a ṭul hunah letlingtu a hmu zel bawk.

* Vawi khat chu an ṭhenawmpain a buh a lo ru a. Chu chu Pu Khuanga’n a han hriat chuan amah zawk kha a inthiam lo em em mai a. Kho lian khatin a zêma mi buhhum a rût lawk a, a ṭhenawmpa inah chuan a chawi lut a. “Ṭhenawmte ei tur nei lo, buh rûk ngai khawpa manganga in awm ka lo hre lo chu, ka thiam lo lai let der a ni,” ti-a ngaihdam dilin a buhhum chawi luh chu a pe ta a ni.

* Sawma pakhat chauh Pathian-in a hauh hi chu pek loh aiin pek a awl zawk a ti ṭhin! Mi ṭhenkhat chuan, “Buh a thar tlem em a, a pe ṭhin a nih hi; han thar tam ve se pek harzia a hre mai ang,” an ti a. Buh a thar tam kum a lo thleng a, a lo pe thei na meuh mai! Ṭîn thum dawng êm-in a teh a, teh sawm zelah teh khat chu Pathian tan a dah hrang a. Êm-a teh tham a nih loh hnuin kho-in a teh leh a, kho sawmah kho khat zel a dah hrang leh a; kho pangngaia teh tham a nih loh hnuin faikhiat (kho-tê)-in a teh leh a, faikhiat sawm zelah faikhiat khat a dah hrang leh a, chutiang chuan a teh ral raih ṭhin! “Lei ram ka hual bawk ang, van ram ka hual bawk ang,” a ti veng veng ṭhin.

Thubelh: He thu hi ‘Hranghlui Pahnih’ lehkhabu, C. Sangzuala ziaha mi lawr den den a ni a, a tam tham deuh em avangin ka dah vek ta lo mai. Part 2 anga ṭhen dawnin a hnuhnung zawk hian hlut a hlawh mawh ṭhin si a, hmun dangah a ngaihnawm lai lai ka lakkhawm zawng zawng chu a vaiin ka dah a. A chhiar zawm duh chuan hetah in chhiar zawm mai dawn nia. Khi post zat deuhthaw khi a dang a awm ang.

Similar Posts:

• Pathian Remruat (I duhzawng vana an tih angin leia mi’n ti rawh se- Mt 6:10)
• Hlimna thuruk
• Mumang
• Hnamte chanchin – 1
• Tawngtaina chhangtu Pathian

Recent Posts:

• Chhungkaw tan thusawm pek.
• MILADY
• Mizo League (EPL)
• Niuh neuh!
• Fapa Sual

This entry was posted on Saturday, February 25th, 2012 at 2:32 pm and is filed under Mizoram, Religion. You can follow any responses to this entry through the RSS 2.0 feed. You can leave a response, or trackback from your own site.