mi(sual).com

“Sawlaia mi sawn min lo biak rawh, a ti”

“A hnap a nih mai chu a!”

Mi angin ‘ngei ngei tlang’ te nei ve lem lo mah i la, ,Mualpui tlang leh Suankual tlangah khan kan che ve hle thin; Sunday tlaiah phei chuan kan kal ngei ngei.

Thianzaho kan inzui tham tham a, hausak deuh tlai chuan wai wai bawm kan ak lang tat thin. Chutah keimahni ang rual vel bawk tleirawl thianzaho an lo kal ve dal dal bawk a.Kan han melh kual dan dan a, duhzawng kan hmuh fuh chuan, ‘zui ang’ tih kha a ni leh tawp mai.

Khatih lai khan keini ang rual leh keini aia upa deuh tawhte ah pawh khan inchhai tan dan style dang tehchiam kha awm hek lo, Mualpui tlang atanga Suankual tlang thleng kan zui chuan Thiani te ho pawhin engemaw  ‘awm’ a awm a ni tih an lo hre ve thuai a, ralrelin an inhrilhru tan sep sep mai. Keini lam pawh kan awm mai mai bik lo, eng ralthuam nge kan hman ang, kan sipai zingah hian tu’nge ral do tura kan tirhchhuah ang, tih relin kan inrawnkhawm ve mam mam reng bawk a. Hetianga mahni buai buaia buai chung hian mit lam indawrna chu nasa takin a kal mup mup reng bawk a, nuam thei mup mup ngei.

Kan lo rel lawk tawh angin thianite zinga a hmeltha ber chu tu emaw ber tan kan va ‘biak’ ta ngei a. An thianzaho an han inhrilhru leh sap sap a, a thenin ‘aw ti rawh, aw ti rawh’ an tih ri te pawh kan hre thei hial thin.Kan nghahthap laiin an thianzaho zinga a thu hmel ber chuan, ‘aw’ a ti a nih chu, a rawn ti ta. Nuam ve thei tak a ni.

Khatiang nikhua khan Rampanthanga kha a luck thei bik riau mai a, tun hnua ka ngaihtuah let leh chiam pawh hian achhan ber ka hre hleithei lo.Kan zinga a len deuh ber vang emaw, biangsum nei miah si lo biangsum nei ang deuha a nuih thiam vangte kha a nih ngawt loh chuan.

Kan thianzaho kan han kal, hmeichhiain min lo chhaih a, ‘ehem a laia mi kha’ an lo tih chuan Rampanthanga(Pana) a laiah a kal tihna a ni a, ‘a hnungber ami kha chhaste’ an lo tih chuan Pana a hnung berah a kal tihna a ni leh mai. Luck thei vet vet tak a ni.

Chawlhni tlai khat chu kan tleh leh dal dal a, keini aia tam daih hi Suankual tlang chhim lampang sunhlu buk hnuaiah hmeichhe rual an lo dingkhawm laih a,kan kalpelh lai takin, ‘kawr pawl ha kha chhass’ an lo ti ta tlat mai- kawr pawl ka ha si!

Khami tuma ka thin phu ri dup dup kha theihnghilh har ka va ti em. Sunday tlai tin tlangah ka leng ve ziah a, min rawn ngaihsak hmasatu chu sawi loh ka han inbiak tir ve te pawhin hmaisen min hmuh lo chauh a ni thin si a; Mahse vawiin tlai chu a fuh dawn e, a khawi ber saw nge ni ang aw, ti chungin ka va melh ru dak dak hlawm a, an rawn phei zui!

Chawlhni hmasa khan Bj-a khan, ‘khulai deuhah khuan hnimbuk  phenah zawl fai deuh a awm a, a remchang lutuk’ a tia, ka zawng hmu zo ang em aw, ‘awh khaih’ KAN zawng hmu zo ang em aw?

Ka ‘pan swat’ lei kha ka lo hmuam zo hman thawt thawt a, ka ngei hle mai, han pe ve vel i la tha tur;  Mahse a pawi lo e, ka hmui hi ka’n lo liak huh lawk deuh teh ang, tih vel ka rilruah a rawn insulpel zut zut mai.

Hetianga mahni buai buaia ka lo buai lai hian ka thiante pawh chu ralrelin an lo buai ve hle bawk a. Saw saw hemi hi an rawn biak chuan hemi hi chuan an thiannu, saw zawk saw a ni ang a, chuan, hei hian kawr eng ha saw, tih vel an lo rel mup mup thawm ah chuan ka harhchhuak a, ka thiante lam chu hlim zauthau, phur leh nghakhlel, inthup tum deuh bawk siin ka’n en a. Ka thil hmuh hmasak ber chuan min va tihnual chiang em-Rampanthanga’n kawr pawl a lo ha ve chu niin!

Khatiang vel khan Sunday tlai boruak kha nuamti tak leh hlim takin kan lo hmang ve thin. Achang chuan kan che fuh lo ve hle thin bawk. ‘Anu te’n ngaihzawng neih an la phal leuh’, an lo tih hian a zahthlak  duh fu a, tihngaihna tak a awm si lo.Hmeichhe nasa deuh leh min duh lo chiang deuh tawn tum, kan thian va tirh te pawh lo hrilh tha mai lo a ring lenglawng, mi hriat theih vek tur a, ‘ve hnap, i hmelchhiat chhiat nen’ an rawn tih chiam mai kha chuan a hmaa inmelh no tak tak te kha kan han inkawk in kan han inhau ta siah siah thin a, hringnun boruak inlumlet chakzia a lo lang leh thin.

Khati khan Sunday tlai apiangin kan zu taptal a, duh aia rei kan awm ziah a, chhungte’n chaw min lo eisan chuan min hau ang a, min vaw hial maithei tih hre reng chung khan kan sim chuang si lo. A nuam a ni- pan lai kan hringnun kha chu!

Similar Posts:

• Sunday Dress
• Traffic police chungchang
• Thinlaia’n a thar leh thin
• Favang Ni Eng
• KTP ve hi !!!!

Recent Posts:

• JUSTICE for Sarah
• Mampui
• TUKTIN PAR
• Zabula Champhai Ramhuai hmuh dan
• Thianpa Sawmtea Hriatrengnan

This entry was posted on Sunday, April 22nd, 2012 at 6:00 am and is filed under HAHAHA, Lifestyle, Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.