mi(sual).com

Janis-i hi kum 6 mi lek a ni a, a nu leh pate fa neih chhun niin USA-ah an chhûngkuain an awm a. Tun nipui chawlh hmangin an chhûngkuain Mizoram-ah an lo haw a. An ṭhianṭha leh chhûngkhatte tlawhin khaw hrang hrangah an zinkual a. An motor, gypsy hlui tawh lam chu a pa chuan a khalh a, an chhûngkaw të chuan khaw hrang hrang tlawhin an zin a.

Janis-i hi naupang hrisel lo tak a ni a, ngo var mai, mitmeng fiah kãk mai niin a fimin hmuh a hahdam em em a. A hmui a sen siah a, a hahmai a bal sau mai chu a nuih zâwnga a biangsum khuar këk mai chuan a cheimawi em em tho a ni. A nu’n a dar chenin a sam a zuahsak a, a inhmeh tâwk hle.

USA-a awm an nih avangin Mizo ṭawng hi a pai deuh va. A nu chuan theihtawpin a zirtir a, chaw ei dawn leh mut dawn ṭawngṭaina a thiamtir vek a, Mizo ṭawng a hrethiam vek a, a hmang thei bawk a, a ṭawng karah sapṭawng tlém tlêm a telh zauh zauh va. An sikul lamah sapṭawng vek a nih avangin, Mizo ṭawng a thiam loh hlauvin a pa chuan in chhûngah Mizo ṭawng lo chu hman a phal lo va. A nu leh pate avang liau liauvin Mizoram a hmuh vawi khatnaah Mizo ṭawngin a ṭawng zat zat thei a ni.

Champhai khua ka hmuh châk vang hrim hrim leh Rihdil hmuh theihna hun a inhawn dawn avangin ka hman remchàn lai chuhin ruahmanna fel tak neiin Champhai khuaah ka zin a. Ka ṭhiannu pakhat pawh a rawn tel ve nghe nghe a. Ka thlen tûkah Rihdil kan tlawh a, Pathianni a ni nâin midang tlawhtu pawh an lo awm nual a, kan hlim hle. Hetih lai hian Janis-i te chhûngkua chu Halkha, Burma ramah a nu chhûngte tlawhin an thang mêk a ni.

Rihdil kan tlawh tûkah chuan Janis-i te chhûngkua khawchhak zin chu an lo haw a. Champhai-a ka thlenna chu a pa ṭhian ṭha tak a nih avangin an lo innghat ve a. A tûka Aizawl lama chhuk leh nghal an tum nghe nghe a. Keini ṭhiandun pawh chu remchànna leiin an motor kenah haw tumin kan intintuah a. An chhûngkaw pathum të chauh an nih avangin a lo remchâng hle kher tak a.

A tûkah chuan motor a chiang vak lo na chungin kan chhuak lui ta a. Janis-i pa chuan motor a khalh a, a sirah a nu chuan Janis-i chu a pawm bawk a. Ni a sain boruak a lum em em a, kawng a chhe bawk si a. Janis-i lum ti chu a biang a tai tãk a, a chal sam ṭona bulah te chuan a thlan a bawl ṭiam a. Chuti chung chuan a Mizo ṭawng thiam ang tâwkin a ṭawng siam siam reng a. A nui leh hak hak ṭhin a, a ngainatawm reuh kher mai.

Kei chu an ṭhutna hnungah ka ṭhu a, ka bulah a ṭhiannu chu a ṭhu bawk a. An chhûngkaw inchhawnchhaih dan leh inbiak dan ngun takin ka ngaithla a, an inrêlbâwl leh inzirtirna ṭhatzia ka ngaihtuah rauh rauh a. Motor kan chuang rei telh telh a, Janis-i chu ruih leh chauh ahnêkin a hlim telh telh emaw tih mai tur a ni a. A titi siam siam reng a. A ṭawngkamah kan nui leh hak ṭhin.

Kawng laklawhah kan motor a chhia a. Kan han ding leh vang vang a. Janis-i chuan, “Âpa, kan motor hi a chhe sia, a khawngaihthlâk tiraw?” a ti reuh va. A rilru thianghlimzia ka ngaihtuah a, ka rilru a tihlim em em mai a. Kan tlàn leh hnua kan chhiat deuh chânga a pa’n kan chuanna motor chhiat thu a sawi rîk hlek chuan, “Âpa, kan motor hi a khawngaihthlâk tiraw? Tina lovang aw…” a lo ti zel a. A hnua a pa’n motor chungchang a sawi dawn pawhin, “Âpa, kan motor hi a khawngaihthlâk tiraw?” a lo ti zel a, a pa pawh chuan motor chungchang a sawi lang ngam ta lo va.

Kawng sira bawlhhlawh awm paihna hnu leh tenawm tak tak a hmu a. A pa hnênah, “Âpa, he’ng hi ngati nge?” a ti a. A pa chuan, “Bawihte, he’ng bawlhhlawhte hi a mi chêngte paih a nih hi,” tiin a lo hrilhfiah a. Janis-i chuan, “Âpa, ka naupan lai chuan bawlhhlawh ka paih mai mai ṭhin a, ka lo â thei e. Tunah chuan ka lian tawh a, ka paih tawh lo va, mahse, hetah puitlingin an paih sia…” tiin hriatthiam loh hmêl takin a han sawi leh siam siam a. Ka ngaihtuahna a kal thui hle a, ka zak ta em em a.

A pa chuan lawm takin, “Bawihte, ka hmangaih lutuk che. I love you,” a han ti a, Janis-i chuan, “Âpa, me too, Ânu pawh,” a han ti leh zat a. An chhûngkaw inhmangaih dan chu pui tak a ni.

A pa chu a lo hawi lêt zauh va. “A nu hian a zirtir ṭha asin. A nu a chhûn a, a fel a nih hi,” a han ti zauh va. An nu a en a, an nu pawh chu hlim takin a lo nui sëih a. An inchawimawi tawn ngawih ngawih.

Khaw pakhat kan thleng a, thingpui dawrah kan châwl hahdam a. Janis-i chuan alergy a neih avangin midang ei pawh a ei ngam lo va, a ei turte chu an han zawng chawp chúk chûk a. Chu’ngte chu tui tih hmêl takin a han ei a. Ngawi renga a thil ei lai chu hmuhnawm tak a ni, a ei hnem lo mai pawh a.

Janis-i’n ice-cream a ngaina tih hriain ka ṭhiannu chuan a leisak a, a pe a, lawm takin a la a. A pa chuan, “Mate, mi’n thil an pêk chein engtia tih tur nge khah?” a lo ti nghal vat a, Janis-i chuan nui sak chungin ka ṭhiannu a en a, “Ka lawm e,” a ti sap a. A pa chuan, “Mate, mi’n thil an pêk che chuan ‘ka lawm e’ tih zel tur aw…” a ti leh a, Janis-i chu a lo bu nghat a. Ice-cream petu ka ni lo chu pawi ka ti kher mai.

Kan kal leh ta a. A nu chuan a pawm reng a. A chauh deuh tawh a rin avangin ka bula ṭhu, ka ṭhiannu chuan, “Janis, ka lo pawm ang che, lo kal rawh le,” a han ti a. A duh tlat lo. A pa pawh chuan, “Mate, Ânu kha a hah tawh ang, inpawmtir rawh le,” a tih pawhin a duh tlat lo. A nu a ngai em em a, a nu pawhin pawm chhâwk kan tum pawhin a phal lo. Chuti khawpa ngaitu a fanu Janis-i chu a hlat phal lo.

Darkar eng emaw zat kan tlàn leh hnu chuan kawng thlang lamah nauban par mawi tak a hmuh avangin a pa chuan a thla lâk a duh a, kan ding a. A thla a lak zuai zuai hnuin a pa chu motor chhûngah a lo lut leh ta a. A ṭhut ṭhat velna lamah Janis-i ke a ṭhut palh a. Janis-i na ti chu râwl chhuah lovin a ṭap feih feih a. A nu chuan, “A ke i ṭhut a, nâ a ti a nih kha…” a han ti a. A pa chuan ṭhut ṭhat pahin, “Mate, ka lo hmu lo alawm. Mate, min ngaidam rawh aw…” a han ti a, Janis-i chu a bu nghat a. Na ti miah lo ang maiin a titi leh nghal siam siam a.

Janis-i nungchang chuan ka rilru a hneh em em a, a rilru thianghlim tak mai chu mawi ka ti hle bawk a. Ka bula ṭhu ka ṭhiannu phei chuan, “Janis-i ṭap chu a bengchheng ve ngai lo a ni maw…” a ti hial a. Naupang danglam tak a ni.

Tuirial-ah kan châwl a, luia inchiah tumin kan chhukthla a, mahse, tui inchiahna tlâk a lo awm hauh lo va. Kan hawi ta vel mai mai a. Janis-i chuan tuia ulawng leh uchang te reuh të të-te chu a lawm em em a, a bulah awmin a ri chèl chûl a. Tuiah chuan lung te reuh të të a vawm lut zauh zauh bawk a, a hlim tâwk em em a.

A pa chuan, “Tui a nu em a, inchiahna tlâk pawh a nih loh hi, i kal leh mai ang u,” a han ti a. Janis-i chuan, “Âpa, engati nge tui a nut a?” tiin a pa a han zawt a. A pa chuan, “Mate, luiah mite’n bawlhhlawh an paih a, tui a tithianghlim lo a nih hi,” tiin a chhâng a. Janis-i chuan mak tih hmêl deuhvin, “Luiah bawlhhlawh an paih maw?” a ti a ti ta mai a. Chu a zawhna chuan mi dêng ṭêk sawk sawk a.

Kan kal leh ta a. Ka lehkhabu tlângzarh tur chungchâng chu kan sawi chhuak ta a. A nu chuan ka lehkhabu ziah chungchang a hriat duh avangin ka hrilh malh malh a. Chutih lai chuan a pa chuan, “Mate, Âpa Tsa khan lehkhabu a ziak a, a ropui tiraw?” a han ti a, Janis-i, “Âpa, kei pawhin ka ziak thiam asin,” a ti ta reuh va. A pa chuan, “Mate, i ziak thiam ve maw? Engtikah nge i ziah dawn?” a han ti a, Janis-i chuan, “Âpa, naktukah ka ziak ang a, zanah ka zo nghal ang,” a ti ta mai a. Kan nui hak hak a.

Kan tlàn leh vang vang lai chuan a pa chuan, “Mate, ‘I love you’ tih hi Mizo ṭawngin Âpa Tsa hrilh rawh le,” a ti a, Janis-i chuan mi en zak zak a, a ngawi reng a. “Mate, Âpa Tsa khan ‘I love you’ tihna kha a hre lo va, han hrilh teh le,” a ti leh a. Janis-i chuan mi en chungin, “Ka hmangaih che,” a ti a. Ka zak lek lek zawk a.

A pa chuan, “Mate, mi’n thil an pêk chein engtia tih tur nge? Âpa Tsa kha hrilh leh rawh le,” a han ti a. Janis-i chuan mi en chungin, “Ka lawm e,” a ti nghal var a. Keimah zawka chu ka lawm lutuk a, ka hnuk a ulh lek lek a.

Zemabawk kan thlen chhoh dawnah chuan kan motor a nuar leh ta tlat mai a. A engine vel a lo sa lutuk hi a lo ni a, Aizawl lama kan ṭhiante chu phone-in kan be kual a, motor chanchin kan hrilh a. An lo kal nghal vat a. Kawng bulah kan ṭhu châwl a, phone-a mi kan biak apiangin Janis-i të chuan, “Kan motor engine a over-heat a…” a lo ti fiah kâk zel mai a. Kan lawm lutuk chu kan nui kan nui a.

Kan ṭhiante an lo thlen meuh chuan khua a thim ṭan tawh a. Anni’n tui an lo keng a, a engine kan leih dai a. Rei lo të kan chawlh hnuah kan kal leh ta a. Zemabawk kan lût a, electric lo êng tuarh a hmuh chuan Janis-i chuan, “Âpa, lightning a tam e. Mahse, ka hlau,” a ti a, a ṭawng leh zet zet a, a titi nghal siam siam a.

Thla khat dawn lai chu zin rëng rëngin hun an hmang a, motor-an chuang nileng zak zak a. Tunah pawh nilengin motor-ah a chuang tawh a, a sira ṭhu an nih avangin nisain a em hrep tawh bawk a; chuti chung chuan chau hmel a pu map si lo.

A pa chuan a fanu duhawm lutuk chu a tuar zo leh ta lo.

“Mate, I love you.”
“Âpa, me too. Ânu pawh?”
“I love her.”

Ka awmna veng kan thleng a. Ka chhuk a. Janis-i chuan mi en a, nui sáng chungin mi bye-bye a. Hlim takin ka haw ta a.

Similar Posts:

• Hmangaihna lamtluang
• Misualho felzia!
• Bawlhhlawh paih motor
• Traffic police an thu ber?
• Motor ke!

Recent Posts:

• Home HIV test kits
• World Council of Churches(WCC) Lam I Hawi Ang aw!
• Panlai Nun: Ennawm Leh Kan Nun
• Gas emergency quota titawp a ni dawn
• Hnamte chanchin – 2

This entry was posted on Friday, May 4th, 2012 at 9:05 am and is filed under Advice, Lifestyle, Luangliam, Mizoram. You can follow any responses to this entry through the RSS 2.0 feed. You can leave a response, or trackback from your own site.