mi(sual).com

A birthday vawi 21 na anih avang chuan Sangtei chu a hlimin a bialpa, kum 3 chuang alo kawp tawh Lawma a rawn len bakah present a rawn kensak nen nuam ati hle a. Mahse, a bialpa ina a present thlalak frame an 2 thlalak intar sa a pek chu chu nalh ti hle mahse a ruk tak chuan a present chu ho a ti hle a. A thiannu Jeneti birthday ah kha chuan a bialpa Punjabi Vicky a khan moonlight dinner a neihpui bakah resort ah a lawmsak a, a thiannu in a romantic zia leh a nawmzia a sawi te kha ala hrereng in a haw lai ani nen Aizawlah chuan resort awm velo mahse “David’s Kitchen” ah tal lunch a eipui alo beisei ru si. A thiannu Jeneti SMS a dawn chu a han en a,

“Thiannu, happy birthday.. Have a bash Chuan, a changtupa chuan enge a pek che a”

“Awi, engmah frame min pe mawle.. zeilo liana hi.. thinks I’m a teenage girl.. grr”

“Lolz.. romantic khawp alawm, ha2, Mizo mipa chu an zeilo an caring lo si ka tih kha.. ha3”

A thiannu Mgs chu a en a, “Mizo mipa chu an caring lo, mi an duat thiamlo si a tihte kha a rilru ah a rawn lang a”

MAHSE SANGTEI CHUAN…

# An in ngeia a bialpa a rawn len a, present tur keng chunga a sawmna anga a birthday chawhlui a rawn kil thei te chu a hlutna a hre silo. Hnamdang nula nise, a ngaihzawng in a rawn rim theilo anga, zalen takin an inkawm theilo ang tihte leh Mizo te culture a “inrim” a lo awm hi a hlutna A NGAIHTUAH PHA SI LO.

# Hnamdang nula nise a duhzawng te chu a ruk chuan a ngaizawng mai thei, mahse pasal atan a duhzawng a thlang theiloin a kumin a pha ta maw tihah a duhzawng chu sawiloh, a hmelhriat pawh ani kherlo thei, a nu leh pa te thiantha fapa IIT vel atanga zir chhuak company a hlawh tha tak neia thawk, eng mizia nge ani tih pawh hriatloh a chhungten an thlansak anga, a tan duhthlan a remlo in duhthlang theilo a awm chu thil nihdanphung a ngaiin rilru nat nachang pawh a hre kherlo ang tih A NGAIHTUAH PHA SILO.

# Hnamdang mipa ngaizawng ta se an caring zawk ang, hmeichhe duhzawng leh tihlawm dan an hria a, tihlawm tumin an hmanhlel a, hmeichhe hnena gift pek te leh treat pawh an uarin sum pawh an ui lo. Mahse, hnamdang mipa Mizo ngaizawng 99% te hian an kawppui te hi “time pass” atan mai an tiin nupui atan an duh taktak lo a, hmeichhe tilawm tura an mizia an thup a, an hmanhlelh te, sum tam an sen te chu “SEX” kawngkapui luhpui an tumna hmanrua ani tlangpui tih reng A NGAIHTUAH PHA SILO.

# Vai leh Black ngaizawnga pasal a neite Mizo ten kan hmuhsit viau laiin kan chung en Sap pachal ngei pasalah neiin London milian vengah chengin Hyde Park te chu a tlai lenna thin niin, a club tan Arsenal inkhel enna tur season ticket te nei mahse “Pa-a, ka thi neih a mumal lo tlat, ka tai te hi ana thum mai” tihte mahni hnam tawng ngeia sawi theihloh chu a hreawmna chin a awm a, kum a tam tual tual a, mahni ram leh chhungte ngaih ana tual tual thin tih reng A NGAIHTUAH PHA SILO.

—————-

Mapuia chuan HSSLC (Science) first division ah a pass hnuah AIEEE ah pawh rank tha tak neiin a chak thin engineer zir turin seat tha tak a chang hlauh mai a, a Pa chu a lawmin ruai nen a lawmsak a, mi hrang hrang sawmin present pawh a dawng hnem hle. Ruaitheh zawh te chuan chibai tu a dawng hnem hle a, mahse an kohhran KTP leader in a chibai erawh a chhang tha vak peihlo. Chhun a lawmna inkhawma thu a sawi a, “Mapuia hi zawng zirlai anih anga a rawngbawlna number 1 lehkha zirah ti tha thin mahse kristian anih anga a rawngbawlna kohhran leh khawtlanga inhman lamah erawh tlema tanlak a ngai ani” tia a sawi kha a ngei em ani. Ani taka a ngaihdanah chuan zirlai nih chuan kohhran leh khawtlanga inhman hi a tullo in zirlai ati buai a, tin a hrim hrimah Zu in ngailo mahse ani chuan MLTP te hi a tullo a, a duh tan chuan a awmtho tih hi a ngaihdan a ni.

MAHSE MAPUIA CHUAN…

# Zirlai tibuai khawpa kohhran leh khawtlanga inhman te hi hi a thalo a, mahse mahni incontrol chunga inhman hi mahni development atan pawh atha a, tin a zirlai tha taka a zir chauh hi Education ani loin, a zirlai tha taka a zir chunga theihtawka kohhran leh khawtlanga inhman khan allround development a zirtir dawn tih a hre pha si lo. Tin, lehkha zirlai a tha taka zirlai bak ngaihtuahlo leh a bik taka Kohhran a inhmang ngailo te tan chuan pianthar that a har a, zir chhuakin mi hlawhtling ni mahse hna tha an hmuh a, sum an hmuh khan thlemna a tluk an awlsam bik tih leh, zirlai annih laia tha taka an zirlai zo thin te, piantharna em em nei lemlo leh Kohhrana inhmang ngailo te tan an dinhmun a san hnuah tluk a awl a, heihi ANI KAN ZORAM EIRUKNA LEH SUM DUHNA AVANGA A CHHIAT MEKNA CHHAN PAKHAT TIH RENG A NGAIHTUAH PHA SI LO.

# Mizote culture ah chuan Zu hi a bet, mahse tribal hian Zu in kan thiam hlawl lova, kan bul mai a khasi leh Garo hnamte Zu avanga an ram a thuanawpzia te leh, chhungkaw tamtak a an pa ber Zu kaihhnawih avanga boral an tamzia en te leh kan thalai tena tun an khaplo chung pawha Zu/grep wine kan inmai theihzia en hi chuan kan ram tan chuan MLTP hi chu thatna ala nei tih reng a hre phalo a. Hlip tase, thalai kan fing tawha Zu a duh ina an ina, a duhloin an inloh hun a rawn thlen hun chu ala awm ang, mahse kan excise te pawhina rui chunga zu an check a officer tam takin dry state a Sap zu tha intur an tlakchham lohna kan Zoram khawvel ah hi chuan MLTP hlih hi hun tawh viau mahse ala ngamawmloh TIH RENG A NGAIHTUAH PHA SI LO.

—————-

Marini chuan a thawmhnaw ha tha mawlh mawlh chung chuan a bialpa, a hmangaih em em kima chu a en a, a lung a awi ani. Hei, tuna pawh Reiek road ah Kima Motor chhungah Sex an hmang zoin vawi tam an hmandunna ani ta a. A tirah kha chuan duhlo hle mahse, hmangaih te tan a thianghlimna hlan tluka hlu a awmlo in, mi tihdan anilo biklo tiin Kima a hmangaih em avang chuan a inpe ta a, a inchhir lemlo.

MAHSE MARINI CHUAN…

# A rualpui tunlai thangthar, a bikin kum 20 bawr velho angin mipat hmeichhiatna a ngaiho tan der tih reng a hre lova, Mipat hmeichhiatna hi Pathian pek aniin a hlu em em a. A hmangaih ber chu a pasal ala nihloh avangin engpawh a thleng thei a, lo inthen ta palh se nataka a rilru hliama awmin mipa reng reng a ring tawh lo anga ngaihzawng neih pawh a peih tawh lo ang. Mahse, chu zawng thil theih anih loh avangin ngaihzawng a neih leh hunah a rilru tak tak a pe tawh lo anga, Mipa tam tak rilru a tina in , amah ngei pawhin pawisak a neilo tial tial anga, a ngaihzawng neihleh huna pawh amah inhlutna a neih tawh dawnloh avangin Hmeichhiat mipat a tluk a awl anga, a nun a ro in inchhirte ngaidamtu Pathian laka tlukluh nachang a hriatloh phei chuan a nunah tuihalna a lian anga, a nunah harsatna leh beidawmna rawn thleng se a thalai pui tamtak te angin mahni INTIHHLUM A AWLSAM ANG TIH RENG A NGAIHTUAH PHA SI LO.

Similar Posts:

• Nupui/pasal virgin in i nei dawn em?
• Zirlaite leh Sex!!
• Ngaihtuah ti tam – Pro-Pastor lerh!!
• Ka sawisel pawh a ni lo, ka khawngaih ve tawp
• Nunkhua an chèn

Recent Posts:

• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)

This entry was posted on Saturday, May 19th, 2012 at 10:30 am and is filed under Fiction, Lifestyle, Luangliam, Mizo Society & Culture, Opinion. You can follow any responses to this entry through the RSS 2.0 feed. You can leave a response, or trackback from your own site.