mi(sual).com

HRANGA IN…. 

Tin, atirin heti hi a ni a. Ka khualzinna khawvela ka mikhualna hmun champhaiah chuan Awmpui hringnun tlansanin ka thla kip hlawh tlem leh sawrkar ni 100 inhlawhna hmachhuanin hahdam taka ka lu ka nghahna tur hmun ka zawng ve a. In luahtur lah chu zawn hmuh mai a thal tui har phian lehnghal a, ka pi kan pun ta ngawt a. Ani pawh chuan tihdan mai a hriat loh avangin lungsi lo taka hmun hnih ngawt kan rauhsan leh hnuah “HRANGA IN” ah hian kan lungawi ta a, lungawi lo tak chungin!

Tin, atirin heti hi a ni a. Chu In “Hranga In”-ah chuan mi reng reng an lo cheng tawh lo a.  Kawngka atanga thlirin a lang tur zawng zawng chu sawi loh a awm zawng zawng, thuhruk reng awm lo in a lang vek a. Tukverhte pakhat hi kil khatah chuan a awm ve ngei a mahse a thenawm In chuan a hliah vang nimaw eng pawn luh nan a hmang tha duh miah lo mai a, thlarau thianghlim phei chuan a ngainat ka ring lo thin.

Tin, atirin heti hi a ni a. Chu In “Hranga In”-ah chuan thutthleng sei hlui tawh tak, hmana kan naupan laia Biak In thutthleng an duh tawh loh ang tak kha a in hung ve ngat a. Khum hlui tawh tak, a chhuat phahte pawh pa-remhre pakhatin a thiam thil nena a rem khawm tawh hi a bawk ve zan bawk a. Thawmhnaw dahna ni ngeia mawi, a ke pali tangrual tawh lo tak chu kil khatah inthlahrung tak hian a lo ding sawi ve bai bawk a. Tin, thirrem oh thirthingrem hlui tawh lam pahnih hian an belh leh a.

Chu chu “Hranga In” chu a ni.

A HRANG A…..

Ka thlarau Nun ram chu tuia chawm loh pangpar ang maia vuai anih lai chuan zan lai pelh tawh lam, khawvar a la hlat si hun lai vel hian thawm maksak tak, kal ri niawm tak hria hian ka thangharh zan tin zan thum ta mai a.  Ka naupan huai pawn min kalsan ta aniang ka thlan fim hian min bual leh hliam hliam thin. Chutianga ka awm tak fo hnu chuan he “Hranga In” hi a hrang ngei ni a hriatna ka nei tan ta a, zana mahnite chauha riahte chu zah riau chang ka nei ta fo a, ka inthlahrung leh deuh tlat thin, zahzum vang pawh ni lo hian.

UNAU PATHUM INKHAI HLUMNA MAW?

Khatia duh pawh thlang thei lova kan in vawm luh ve tak rawih hnu khan “Hranga In” chanchin chu kan hre tan dawn chauh a lo ni.

“Kum pawh vawi duailo a lo thar nawn leh tawh a. He In khawhar tak hi unau a zawnga in ang lo berte hian an lo nghak thin tawh a. Kum lama a nuapang ber chu a cher em em a, a che vel pawh a harhvangin a rang hle a, a thophang hi a tha at mai a ni. An unau zingah chuan a hna lak pawh a chak bik em em a, a unaute thawh let eng emaw zat tak meuh meuh hi a thawk a, mahse lungawi tak in.

Chung unau pathum zinga a lai a mi chu a taksa mil tawk vela cher sang nalh tak mai hi a ni a. Mahse a nau ai chuan a hna lak a muangin a rang lo zawk a, a thothang pawh a zawi zawk a ni.

An unau zinga upa ber chu taksa lamah chuan a hrang nalh a. A pian phung pawh a unaute ai chuan a thau zawk daih a, a che chu satel ang tuah tuah hi a ni a. Hmanhmawhna reng a nei lo amaw tih mai tur hi a ni.

Heng unau pathumte hian an piangphung mil tak hian hna an thawk theuh a, an hna chu pawimawh bik leh pawimawh lo bik reng reng a awm lo.

Mahse engvang leh engtik lai khan nge tih hriat hauh loh hian an unau zingah chuan in nghir nghona lian tak mai a lo chhuak a. Thikna sual chuan a run a, mahni hna theuha lungawi ta lo chuan mi chan chu an iksik a, mahni chan chu hmuhsitin an hna chu harsa leh hreawm bik niin an hria a, lungawi lohna kawr chuan a tuam vel a,a tawp thihna chu an unau za chuan an chan a lo ngai ta si a, he run khawharah hian an lo inkhai hlum ta thiap mai anih chu” tiin mite chuan an sawi ta fo a.

HRANGA A HRANG!

Chutia zak hmul nen lama kan hmuh ve chhun “Hranga In” chu ka hlauh tak hnu chuan zan khat chu…..

Kal ri chhet chhet ri bawk chuan a hun ngaiah chuan min kai harh leh a. Ka chawngkawrh mit leh ka bak beng a ngaithla in ri awmna lam chu ka zawng ta a. Ani thei lo ka thil hmuh leh hriat chu. Zan tam mipa thankin zet tawhin ka lo hlauh chu banga kan sana hlui, a battery awm loh vanga a thi khaia an khai vel mai mai, a battery thar thlaka kan tih nun tak kal ri lek maw lo ni a!?

Ni e, kan thil hlauh tam tak hi chu keimahni thinlung hi a ni asin. Kan ngaihtuahna a a hrang miau chuan thil hrang kan zawng a, arbawm in hung mai mai pawh kan ramhuai hmuh vel mai mai tawh thin a nih kha. Kan thinlung, rilru leh ngaihtuahna hi a lo ni mai zawk thin e. Bete buk pawh phung emaw kan tih tlat chuan kan hlau a, phung pawh bête buk emaw kan tih tlat chuan kan hlau lo leh mai a. A ni lawm ni Pu Roluah?

Similar Posts:

• Post Ho Ber Of The Week!
• Ka hmangaih che, ka hmangaih fo ang che.
• Thu fahrah pali
• Mihausa chu!
• Thih Hnu Awmdan Mawi

Recent Posts:

• Paula Pawla
• Hmangaih CFL
• MIZO SAKHAW BIAK DÂN LEH A TOBUL ~ 2
• Burma-ah ka zin Part – III
• Mizo Technical Graduates (Architects)

This entry was posted on Thursday, June 14th, 2012 at 3:00 pm and is filed under Fiction.