mi(sual).com

Zo pi leh pute hla hlui tak pakhatah chuan,
” A fam po po mual an liam, Thlanpial kawtah Rihlipui an dâwn hmasa, Pathian an chang”
an lo ti tawh a ni.

Sakhaw Lama Mi Pawimawhte-
Sakhaw thila an Pathian biakna bawlhlo vel khawih leh sawngbawltu mi pawimawh tak tak an awm ve a, heng ang mi pawimawh chi hi Lusei leh Ralte hnam ho hian an nei ngei a, chungte chu: Puithiam te, Sadawt te leh Tlahpawi te hi an ni. A then chuan Puithiam leh Sadawt an nei hrang chuang lova, Sadawt hi Puithiam tiin an lam ve tho a ni. Zohnahthlak hnam dangte zingah eng hnam hnamin nge nei kan sawi thei lova, Pawih hnam hi chuan an neilo niin a lang a, an lalte khan Puithiam/ Sadawt hna an thawk mai niin a hriat a ni.

PUITHIAM- Puithiam hi sawi tawh angin khaw ▶henkhatah Sadawt nen a hranin an nei ve ve a, khaw tam takah chuan Sadawt hian Puithiam hna nen a kawp vek thung a ni. Inthawina emaw, Pathian biakna emaw atana thil ▶ul leh pawimawh puangchhuaktua ni a, sakhaw thilah chuan chanvo sang ber chelhtu a ni.

SADÂWT- A hrana Puithiam dang awmlohna khuaah chuan Sadawt hi Puithiam chanvo leh mawhphurhna zawng zawng changtu a ni a, Tlahpawi a awm loh pawha Tlahpawi tih tur nena ti thei vektu a ni. A hming hi hetiang hian a awmzia han sawi ila. Luseiho chuan an Pathian zinga chi khat, ‘Sa’ an tih mai biakna tura vawk an talh reng reng dáwt(vit) hlumtu a ni a, ‘Sadâwt’ tia lam a lo ni ta a ni.

TLAHPAWI- Hei hi chawngchen zana tlah hrût hna thawktu a ni a, a tulna hmun apianga Sadawt hnungzuitu niin Sadawt a awmlohpawha a aiawh theihna hmun leh huna a aiawhtu ber a nibawk a, adinhmun hi sakhaw lam thilah chuan a pawimawh hle a ni.

In Lama Thangchhuahna Rahbite-
In lama thangchhuah hi a hautak hle a, thawk thei chhungkua nih angai hle a, chutiang ni tur pawhin hrisel leh hmuingil a ngai a ni. Buhleh bal bakah ran lama hmuingil a ngaiin taimak pawh a ngaih avangin mi nazawng tih theih ruala ni lova, an neihin a tlin lo thin a ni. Chuti anga in lama thangchhuah ni tur chuan heng a hnuaia sakhaw kawngkal rahbi indawt chhawngte hi zawm chhuah chhoh parh a tul a ni.

Tin, Zofate’n Sakhua an hmana an Pathian biakna ran reng reng hi ran hrisel tha leh ser awmlo, sawisel bo ngat lo chu an duh lova, Pawih hnam ngat phei chuana var a niha var hlang hlak; a dum a nih leh dum hlang hlak kher an duh thin a ni. A dum hlang chu ‘A dotla’ an ti a, hmun thimah chuan thil engmah kan hmu thei lova, chu ti ang chuan Pathian chu hmuh theih a ni lova, hmuh theihloh Pathian hnena hlan tur chu a dum hlang an duh thin.

Arnak Hman-
Hei hi Pawih hovin chhungkuaa an sakhaw biaknaah chuan a hmasa ber a ni a, nupa tuak tharinan nei thin. Anni hi chuan Puithiam emaw, Sadawt emaw a hranin an nei ve ngai lova, chhungkhat pa ber kha puithiam hna thawktu chu a ni mai awm e. An inthawina hmanraw pawimawhte chu a hun dawnah an lo buatsaih lawk diam a, ‘Khuarel’ an tih, bawm a bik taka tahah chuan an lo dah sa diam a. Ar an talh a, a serh chu an pe ▶hin a ni. Heta anni Pawih hovin an biak ber chu Khawzing Pathian a ni.

Pathian biakna atana hman tur ran reng reng hi eng ran pawh ni se, a dotla(a puma hang) a ni tur ani an ti. Hei hian entir ropui tak anei a ni. Khawzing Pathian chu thiltithei tak leh chakna(power) nei, mita hmuh theih loh, mahse a taka awm ngei si a ni. Thil dum chu thim zingah kan hmu thei ngai lova, chumi rawng ngei chuan Khawzing Pathian chu biak tur a ni an ti a ni. A rilin a thûk hle mai!

SAKUNG PHUN-
A bikin Lusei leh Ralte ho hian In lama Thangchhuahna rahbi indawt danah chuan Sakung an phun phawt loh chuan Pialral luh theihna tura In lama Thangchhuah nan an sakhaw kawng kal rahbi indawt hi an zawh thei lo a ni. Tichuan Sakung an phun tawh hnu chuan In lama Thangchhuahna tur rahbi indawt hi an zawh thei ta a. Inpui atanga fapa indang chuan ama puala sakhua a biakna hmasa ber atan hian Sakung a phun a, chu mi tur chuan a vawkpa vulh len ber emaw, a vawkpa vulh len hmasak ber chu ‘Vawkpa Sûtnghak’ an vuah a, chu chu sakhaw hmanna turin an talh thin a ni. ‘Sa’ chu Pathian anga an biak zinga pakhat a ni a, mihring mimal leh chhungkua dintu leh hualhimtu a ni. An Sa biakna vawksa serh pek chu kawmchar lam sut banah an tar a ni. An vawkpa talh lu leh a vun kha char lam sut nghenga an dah avang khan sut a nghak a, ‘Vawkpa sutnghak’ a lo ni ta a ni. Chuti ang zelin fapa indang khan anmahni chhungkaw puala sakhua a hmanna hmasa ber a nih avangin ama puala sakhua a phun chu ‘Sakung phun’ a lo ni ta a ni. Heta an Pathian biak ber chu ‘SA’ kha a ni. Hei hi, ‘In ka sa’ tia ‘sa’ kan lam ang hian lam rik tur a ni.

Similar Posts:

• MIZO SAKHAW BIAK DAN LEH A TOBUL~4
• MIZO SAKHAW BIAK DÂN LEH A TOBUL ~ 3
• Hmanlai Mizo Hnam Sakhua
• Mizo leh sakung phun
• Hnam Sakhua-in ‘Kawngpui Siam’ kan hmang

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Saturday, October 20th, 2012 at 12:51 am and is filed under Books, Mizo Society & Culture, Religion. You can follow any responses to this entry through the RSS 2.0 feed. You can leave a response, or trackback from your own site.