mi(sual).com

                 Pawl sawmpakhat ka zir kum a ni a, hlaphuah leh zai tih vel lama ka tui em em lai a ni. Ngaihzawng pawh nei ngai uk si lo khan thianten tihtakngiala min ngen miau thin avangin love song te kha ka phuah kur ngiai nguai thina. Tleirawl chhoh vanglai tih takah mahni tawn ni hauh si loah khan thiante luangliam lutuk kha ka’n luanliampui ve em em thei mai zela.

Lehkhazir ai chuan alo nuam daih zawk bawk nen, insumkarna awm hauh lovin, nu leh pa ten an hriat erawh hlau tak chungin ka guitar dum  tereuhte nen khan hla siamchhuah beihpui kha ka thawk tlut tlut ta thina.

Ka classmate te lah chuan an duh duh hunah mi ngamtlak fahran hian  hla min phuah tir kha an tum ngawt zela, tawngkam chhe tleuh nan an hmang emawni tih zawk hial tur hian ami nazawng hian  ’chumi khami chu ka star a, hla min lo phuah sak teh’ ,  ’sawi ve hrim hrimah hla min lo phuahsak teh..’  te hi an ti leh thla leh ringawt thin.

Tlemin lo fingvar deuhin hla inphuahsak hlutna tak tak te kha chu lo hria ni ila, sum hnara chantir mai theih tur (hehe), a phuahtu finglo bawk, a phuahtirtu fing chuang lo bawk, hla ruahthamloh a hunlai atana mawi ve angreng fu si te kha hmuntina kan han awm darhsarh takah chuan hriatzui leh ngaihhlut pawh hlawh zui lem lovin tam tak chu an thamral vel ta mai mai chu a ni si a.

November khaw vawt raih, boruak nawm hun lai tak a ni a. Nikhat sikul ka kal chu chawlhlawk laiin lehkhathawn tetakte hi  ka dawng nawlh maia. Love letter a ni lo tih chu a awmdan atang chuan a hriat maia, phur vak lem lo chuan ka’n hawnga. Kutziak fiah vak lo, hlawm hrang hil hel hian excercise bu pawh thlak chawp tih hriat takah hian tihian alo inziaka..

“….U Cxxx,  Tei ka nia pawl riat zirlai ka nia, min hre kher lo ang, mahse ka ngaisang lutuk che a. Ih englo ania, zaktheilo pawh min ti maitheia, ka story hi ka hrilh che anga, chuan hla please takin min lo phuahsak ve la ka duha. La naupang pawh min ti maitheia mahse mipa pakhat duh leh star tawk mai ka neia, hman atang ka star tawh, mahse tun thleng hian amah chuan a hrelo ka hrilh ngam lo hrim hrima. Tunah pawh hian ka la duh lutuk ka ngai thei tawpa. Chuan hetah school lo kal daih mah ila ka theihnghilh thei chuang lo……………………khawngaihtakin a remchan veleh hla min lo phuahsak rawh aw, ka lawm viau ang…”

Ka chhiar zawh chuan mak pawh ka ti lem lova, chu lehkhathawn chuan keimahah danglamna chhete pawh a siam chuang lo. Chutiang ang hla phuah tura ‘request’ na chu a lehkha ang te, a tawngkam ang tea ka dawn zin lai tak, ka lo nin ruk em em lai tak a ni. Ngawirengin ka thlep thaa,  ka kawr hma ipteah chuan ka ak satliah ve maia.

Kan sikul hi a lian thamin sikul naupang pawh kan thahnem ve hlea, pawl sawmpakhat zirlai tan pawl riat zirlai chu kan hriatsa leh engemaw deuhte annih loh chuan chuti ngawtin hriat ngaihna a awm lo.  Te-i pawh chu tunge aniha engang hmelpu nge anih rindan ka neilo hrim hrima, tleirawl lerh ve pangai, thar hma ve tak an tih ang chi hi ni turah ka’n ngai ringawta. Ka ngaihtuah zui lem hlei lova.

Mahse ka sikul bang chu engemaw hian min mawlh tlat maia,  in ka thlen chuan lehkhathawn chu ka han chhiar tha leha, ka chhiar nawn leh thina. Pawl riat lek zirlaiin a zahtheihlohna zawng zawng sawmkhawmin min rawn ‘request’ ve rawih a ni a, a thinlungah a khatliam ve hle a niang tiin ka ngaihtuah ta a.

Tichuan a sawi mai piah lamah chuan ka han zeldin kual chhova, amah angah chuan inchanin ka han ingaihtuah lungpuam vela, ka khawngaih ta em em maia. Sawi tawh ang khan hla phuah a kal vanglai a ni bawka, guitar ka han perh hlek hian hla thluk hi a rawn lang nghal zung zung mai thina. Chhungte chaw ka ineisan tira, pindan ril lamah ka inkhung sauh sauha, note book, pen leh guitar nen chuan ka inchhawp ta rupa, karlovah he hla hi alo piang ta a ni…

Ami lengten hlimten zan mu an chhing,

Mahse chhinhar zankhua  a sei ngei e,

Ariang tan tahkhua ti sei zualtu,

Laikhum zal zai ka rel theilo..

#Thal romei ianga ral leh thin ang hian

A chuai ve lo’ng ka hmangaihna che hi;

Hlan lo mah ila i tawnah ngaihzual ,

I tan, i tan chauh tiin aw..

Ka zawng zel na’ng che.

Ni chhun lo her tuan zai an rel siauve,

Tuan a har di tawng lo rairah tan zawng,

Kumpui sul tam ka thinlai luahtu,

Ka ngai thin e awmhar ni hian.

Tlaikhua lo ngui lunglen vanzawl lo kai,

Khua tuah loh di  thaleng zun ngai reng hian,

Rual zawng laiah thinlai hnim bila’n,

Riang tur reng hian min duang em ni..?

Zep thu a chenglo, Daduhi ngaisang ta ngang hi ka nia, a thluk pawh chu Daduhi sak thiam tur ang chi (ni-a ka hriat) ngatin ka siama. A tukah chuan phur fahran hian Te-i  chu hla ka phuah tawh thu leh a copy ka pek tur thu ka thiannu Rebecca-i kaltlangin ka hrilha. Ka thiannu te nen hian khaw khat chhuak an lo ni a, Girls’ hostelah an awmho nghe nghe a. Chutia a rinloh leh beiseiphakloh tak maia hla ka phuahsak ta chu Te-i chu  a lawm khawp maia.

Tin, hla ka lo phuahsak tawh dangte ai pawhin a ngaihlu thiam zawk mah reuhva. Ka hriat leh danin an hostel ah leh a thiante zawng zawng bulah alo sawi darh char char a ni awm e. A hnu lawkah chuan a hringhranin kan inhmu taa, mite chu a ngaina der phiana. Tleirawl chhuaktir te lam deuh, hang mawi tawk, harhvang leh zakzum fahran lem lo, nui duh tak, kawm nuam leh a naupan a phu loha tawngkam fel hi alo ni reuha.

Tum khat an hostela ka kal tum pawhin a thiante a ko khawma, a hla chu sa turin min request tlat peka, “U Cxxx, please in min sak sak rawh, kan thiam chianglo hlawm lutuka, mahse nalh kan ti sia U Bec-i te ho nen hian kan sa vak vak thina, mawh please in sa rawh…” a tih chhen takah chuan an hostel guitar hruikimlo nen ngei mai chuan choka bulah uniform ha chungin warden te hriat hlau tak chung leh recess tawp dar ri ngaichang pah reng chungin ” I tan, i tan chauh tiin aw.. .ka zawng zel na’ng che” kan han ti leh vawng vawng  rih anih kha. Tun hun ang te chu nise a demo te siamin kan han inpe dim diam tur, a tu amah mah khan a nachang pawh kan lo hre lem hlei lova.

A kum leh pawl sawmpahnih ka zirlai chuan chhungkaw lam nge mimal harsatna chu ka hre loa, a chanchin ka hriat zui leh danin Te-i chu zirna lam chhunzawm thei lovin an khaw lamah a hawng a ni awm e. Khatih lai khan a nei deuh hlek fate tih loh chuan mobile phone te kha kan la nei mang hlawm lova (facebook phei chu a rim a ra pawh kan la hrelo), landline telephone kha kan inbiak pawhna ber a ni maia.

Mahse telephone nambar takngial pawh engmah kan lo inpek loh avangin ka tan chuan a chanchin hriat zui ngaihna a awm lo. Tum khat erawh chu an khuaa mi tho ka classmate Christina-i hnenah  ’min lo biak dawn nia’  alo tia. Chuan tum khat leh pawh  ’U Cxxx-i kha lo hrilh la, hla copy kha ka tibo palha, a dang khawngaihin min lo ziahchhuahsak leh hram rawh se..” a lo ti a ni awm e,  rilruah a lan tawh lemloh vang nge ka ziahchhuahsak ta lem hlei lova.

Mahse kum engemawzat a liam hnuah leh thildang tam takin min tlakbuaka khang hunlaia kan nundan leh thiltihte a luahlan fe tawh hnuah pawh lunglen a zual chang chuan ‘Zawng zel na’ng che..’  tih bawk hi ka hla sak zin pawl ala ni fana. Ka hlaphuah bu hlui tawh tak a phek thenkhat pawhthlak nual tawh, ka phur thutin ka’n keu changa pen tui duma keima kutziak ngei..

Zawng zel Nang Che

Written on 10th Nov, ‘O6

(Friday Night)

Dedicated to Te-i, class VIII, BHSS

tih ka hmuh apiang hian amah Te-i, tleirawl danglam tak, ka tawn ni miah silo chunga hla mawi tak min phuahtirtu, a awmna veng chu sawiloh a hmingpum takngial pawh ka hriatloh, lehkhathawn tawite, hlu tak leh awmze nei tak si min thawntu kha ka hrechhuak rauh rauh thin…

Similar Posts:

• Pawl hniam lam zirlai fail tir thin hi
• Zirlai Rilru
• Ka ngaihtuah mai mai a..
• Hawlh suh mai pe rawh!
• Mai leh Mai-an

Recent Posts:

• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)
• Thianpa lr hlonchhing birthday lawmnan..

This entry was posted on Wednesday, July 25th, 2012 at 7:45 pm and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.