mi(sual).com

1st. Wednesday: Thenzawl khawchhunga Political Party hrang hrang te leh NGO (YMA, MHIP, MUP, MSU) ten NIT Thenzawl-a awm tura Sorkar hotu lu ten an sawi leh an puan tawh Lengpui-a dah tura tih anih leh tak chungchangah Lungawiloh lantir nan Thenzawl Field Veng, Aizawl – Lunglei (World Bank Road) kawngpui lun laiah an pungkhawm a. Motor dan an tum chu thuneitu lamin remti lovin, tum 2/3 lai an innawr a, hetia mipui leh Police innawrnaah hian Thenzawl East VCP Pu Lalropuia Sailo chuan a lu ah hliam a tuar a, Thenzawl Community Health Centre (Damdawiin)ah hruai niin, First Aid pek a ni a, a hnuah chhuah leh a ni. A ni bakah hian, midang 5 lai Dawmdawiin-ah hruai an ni a, first aid pek an ni bawk. Mipui pungkhawm te hian a tir lamah chuan kawngpui hi an dang thei lova, a hnu-a pungkhawm an tam deuh hnu chuan kawngpui dangin, kawng an zawh a, pawl hrang hrang aiawh ten thu an sawi a. An kawng zawh chhung hian darkar khat leh a chanve vel kawngpuiah hian lirthei kal tlang thei lovin an tangkhang a ni. Kawng zawhtute hi au rualin, NIT Thenzawl-a dah tura ngaih tawh, sawn ani leh an lungawiloh thu te, Thenzawl-a NIT dah let leh an duh thu te, VCP kuthlak tu an dem thu leh hrem an phut thu te an aupui a ni. Mipui kawng zawh hi an thahnem hle a, Police lam pawh PTC, Thenzawl a mi leh Serchhip atangin DSP hovin thahnem tak an duty a, buaina lian tham lutuk chhuak lovin, kawng zawh hi an zo fel a ni.Tin, kawng zawh mai bakah hian, Thenzawl khawchhunga Dawr zawng zawng khar niin, Sorkar Office pawh a tam zawk chu khar a ni bawk. In engemawzatah Puandum an zar bawk.

2nd. Thursday: Lalremruati (14) D/o Lalnithanga Champhai Zion Veng chu Champhai Leilet tuipui Vawmlengkai-ah a tla hlum. Lalremruati hi Champhai Roseland School-a Class 8 zirlai a ni a, tunlai hi School Naupang te’n School an chawlh lai a niin hemi chawlh denchhen hian a thiante 6 nen Champhai Leilet-ah Tuicheng turin an kal a, hetia an kal lai hian Lalremruati hian lui kotlang lei chu rap pialin tuiah a tawlh thla a, hetia a chetsual veleh hian a thiante zinga mi Lalchhandama chuan chhan tumin a sam ah a kek nghal a, mahse a hma zan ruahsur nasat avangin tui hi a tam hle a, Naupang tha mai chuan chhan zo lovin tuiah hian a tla mai a ni.

3rd. Friday: Aizawl Bung banglow bula quarry chimin taxi 1 a hnawl a, mi 3 heng: taxi neitute pafa Pu C.Zorammuana (64 leh a fapa Pu Robert Zosangliana 39) Serchhip P&E Veng leh Thingsulthliah khua Pi Vansangzuali (50) mi te hi an thi. Taxi hi Serchhip atanga Aizawl lam pana tlan a ni a, quarry an thlen hian lung a tla a, lung tla hian a bula thing vaw tlu in, thing hian taxi hi kawngthlangah a hnawl a, Pu C.Zorammuana hi a hmunah a thi nghal a, a fapa Zosangliana leh Pi Vansangliani Thingsulthliah te chu civil Hospital thlenpui an nih hnu ah an thi a ni. He Taxi ah hian mi 6 chuangin midang 3 te pawhin hliam an tuar vek a, hliam zingah hian naupang pakhat a tel a ni.

4th. Saturday: Ramhlun Vengthar Presbyterian Kohhran Biak In thar, Rs 89,22,935/- senga sak chu Synod Moderator Rev. Thangzauva’n a hawng a; a lawmna ruai theh nghal a ni. Biak In hi a dung feet 73, a vang feet 43 a ni a; mi 667 leng tura ruahman a ni.

5th. Sunday: Bairabi bul Meidum khuaah unau mipa pathum an intibuai a, an unau hian hliam an tuar vek a, Kolasib Damdawi in-a dah an ni. An unau zinga upa ber Pauva chuan zu a ruih bakah a bengchhen avangin a nau Lalpiangthanga chuan a khap a. Hetah hian inhnial thinrimin, zurui khaptu zawk Lalpiangthanga chuan a u chu thingzaina Ara-in a vai ta a. A u nak nemah leh a kawngah a vai fuh a, thisen a chhuak nasa hle nghe nghe. A u te pahnih intihbuaina thelh tuma ban phar tum an naupang ber K Thanga pawh chu Lalpiangthanga hian a banah ara bawk chuan a lo vai sak ve leh a. Hetih lai hian hliam tuar tawh Pauva (an upa ber) chuan thingfakin Lalpiangthanga chu a hlap ve leh a ni. An awmna hi Meidum khua, Bairabi lam hnaih, veng tawp bera awm an ni a. Lalpiangthanga In kawtah an insual a ni. Meidum khuaa intibuai te hi Assam atanga Hmar raltlan zinga tel niin an sawi a. Anmahni hi Kuki (Thado) hnam nia hriat an ni thung. A upa ber Pauva hi thla 6 vel a awm tawh a, a unau dangte hi chu kum 5 vel an awm tawh nia sawi a ni bawk. Unau hmelhai a thleng ta a ni ber mai e.

6th. Monday: Mualpheng khaw chhung inkalpawhna kawng lai mek JCB chu a chhak kopang lama lung rawn chim chuan a delh a, a chhunga chuang Lalremsanga (9) s/o Lalventluanga Mualpheng chu Saitual Damdawiin panpui a nih laiin a hliam tuar lovin a thi. Mualphengah hian an khawchhung inkalpawhna kawng VC fund atangin laih mek a ni a, kawng laih na atan hian Pu Laldanga Keifang khaw JCB an hmanga, JCB kawng lai hi naupang ten an thlir a, Operator leh Handyman bakah mipa naupang pathum JCB chhungah chuan an chuan mek laiin ko chhak lam lung hmun chu rawn chim thlain JCB hi a delh ta a ni. He chetsualna-a boral Lalremsanga hian a lu leh nakah hliam na tak a tuar a, rang takin Saitual Damdawiin lam pan pui a ni chungin damdawi in thlen hmain Lalremsanga hi a hliam tuar lovin a chatthla ta a ni. JCB operator leh handyman pawh hian hliam na vak lo an tuar bawk.

7th. Tuesday: Chief Secretary Pu Vanhela Pachuau hovin I&PR Conference Hall-ah Mizoram State Tobacco Control Society (MSTCS) buatsaih ‘Workshop on Tobacco Control for Deputy Commissioners, Superintendent of Police & Chief Medical Officers of all Districts’ neih a ni a. District tina DC, SP leh CMO te an telkim hle. Pu Vanhela Pachuau Chief Seceretary chuan, “Zuk leh hmuam chu hrisellohna hrang hrang, thihpui theih natna tam ber thlentu, sum leh paiah pawh phurrit nasa taka belhchhahtu a ni,” a ti a. “Vaihlo, tuibur leh sahdah zuara sumdawng thin te bakah vaihlo chinga eizawng te pawh mi tam tak hriselna a khawih pawizia hria a eizawnna kawng dang tha zawk dap tura zirtir a tul a ni,” a ti bawk. Workshop hi Health Secretary Pi Esther Lalruatkimi’n a kaihhruai a. Zuk leh hmuam do kawnga State titha te hnenah lawmman hlan niin Mamit District chu a titha ber an ni a, pahnihna Champhai District, pathumna Serchhip leh Lawngtlai District, palina Lunglei leh Kolasib District te an ni.

8th. Wednesday: F.Lalhmingmawia (37) S/o F. Aikhuma Champhai Kahrawt chu an leilet tuikawngah a tla hlum. F.Lalhmingmawia te hi Champhai leilet zawl, Awmpui-phai Zau a an leilet a sangha man turin an chhungkua in a kal a; an vau (Genesareth Gospel Home bula) ah tuisik intur chawi a a kal chu Minor Irrigation (Canal) tuikawng feet 5 vela zau a zuan kan a tum chu kai zo lovin tuikawng bangah a bek hemin tuiah bawkkhupin a tla lut ta a ni.

9th. Thursday: Health Minister Pu Lalrinliana Sailo office-ah Mizoram sorkar Health & Family Welfare Department leh Cure International India Trust ten kum nga (5) chhung atan thawhhona thuthlung an ziak. Heti hian Mizoramah kelek natna nuaibo a nih theih nan Cure Clubfoot Mizoram Project chu kalpui a ni dawn ta a ni. Cure International India hi 2009 a din niin India rama kelek (clubfoot) nuaibo tuma hmalatu tlawmngai pawl an ni a, kelek hi tihdam theih a nih zia mipuite hriattirin hmun kilkhawr ber a cheng mi rethei ber te pawhin kelek enkawlna a thlawna an dawn ngei theihnan hna an thawk a ni. State hrang hranga sorkar damdawi in te nen tangkawpin kelek enkawlna clinic an siam a, heng clinic pantute chu an inenkawlna senso zawng zawng an tumsak vek thin. State hrang hrang 8 (pariat) nen thawhhona thuthlung (Memorandum of Understanding) an lo ziak tawh a, Mizoram hi a 9 (pakua)-na a ni. Cure International India -ah hian Dr Belinda Bennett Chairman-na hnuaiah National Board Member paruk an awm a, chung zingah chuan Mizoram atangin Pi Zohmingthangi Sailo a tel a. Mizoramah pawh mi 11 telna Core Committee din a ni tawh bawk.

10th. Friday: Art & Culture Auditorium Lungleiah Art & Culture Department leh Mizo Academy of Letters Jt. Hqrs Lunglei te buatsaih in ‘Thu leh hla a Liandal leh CS.Zawna te sulhnu’ Seminar neih a ni. Pu Lal Thanzara Parliamentary, Secretary chu Khuallian niin Pu C.Hrangdula President MAL Jt.Hqrs chuan inkhawm hi a kaihruai a ni. Mizo fate zingah Pu Liandala leh Pu C.S.Zawna te hian sulhnu an ngah leh an chanchin thil ngaihnawm leh zir tlak tak tak a tam hle a, mi ropui chanchin leh kutchhuak zir chianna hun Art & Culture leh MAL in a buatsaih thin hi thangthar te tan a hlawk em em a ni. He Seminar ah hian Pu C.Lalnunchanga leh TC.Zonunsang a te chu Resource Person a tan hman an ni.

11th. Saturday: United States of America (USA) a thuthmun nei, Billy Graham a fapa Franklin Grahama enkawl ‘Operation Christmas Child of the Samaritan Purse’ in a Africa leh Asia a kristian naupang Sunday School kai thin te hnena an thawn thin chu OCCSP of Mizoram State kaihhruaina hnuaiah Chief Minister Pu Lal Thanhawla chuan a chenna Bungalow a Banquet Hall-ah Zarkawt Presbyterian Sunday School naupang 100 hnenah leh Mualpuia Salvation Army enkawl Muanna In naupang 27 te hnenah a sem. Heng thilthlawn pekte hi American naupang ten naupanglawm a thar diai, ramdanga kristian naupangte hnena pek tura bawma (samaritan purse) an dah, an kohhran kaltlanga an thawhkhawmte a ni a. Bawm chhungah hian inanglo thil chi hrang hrang leh a thawhtu lehkha thawnte a awm a, Samaritan Purse hian lo la khawmin an thawn darh ta thin a ni. Tun tuma sem tak te hi Kolkata thlenga lawng a rawn thlen man chu Rs. 2 Crore a ni a, Kolkata atang hian truck trip 3 a rawn thawn lehin, Rs. 8 lakhs sen leh a ni. He hunah hian Pu P.C. Lalthanliana chu sawm ve niin khualzahawm a ni a. Inkhawm hi Nl.T. Lalhmachhuani @ Mimi Faith Ministries in a kaihruai a ni.

12th. Sunday: Mizoram Synod, Home Mission South huamchhunga missionary-te puala 10th. Friday atanga Ramhlun Kohhran Biak Ina Missionary Retreat neih chu a tiak ta. He retreat-ah hian thupui chu ‘Krista sipai rinawm’ tih a ni.

13th. Monday: 11th. August. atanga chin hriat lohva bo Zothansanga (20) (Tetea) s/o Zothantluanga, Zotlang, Aizawl leh Ruth Lalawmpuii (18) c/o Lalthianghlima, Ramhlun North-te chu Chawnpui Veng mawng lamah tui lianin a la ni ngeia rin a nih avangin, CYMA hmalaknain khawtlangin zawn hna an tan. Zothansanga leh Ruth Lalawmpuii te hi August 11 chhûnah bike-in an lêng chhuak a, tlai/zanah an haw lo a ni. Hemi tum hian ruah a sur nasa hle a; ‘hmun dangah an kal bo a niang’ tih dawnin an bike lock a ni bawk si. Tin, chubakah hmutu awm niawm taka sawi a niin heta a hmutu hian a biak thu a sawi nghe nghe bawk avangin an zawng ta a ni.

14th. Tuesday: Mizorama helicopter service tum hnihna tur chu Thuampuia helipad (Red Shield Helipad)-ah Chief Minister Lal Thanhawla’n a hawng. Mahse, tunah chuan test landing-te la tih fel a nih loh avangin hun remchang hmasa berah mipui chuan theih tura service tir tum a ni. Helicopter hi Aizawl atangin Khawzawl, Champhai, Kawmzawl (Lunglei), Hnahthial, Serchhip, Lawngtlai, Saiha, Chawngte leh Kolasib-ah a service thin dawn a ni. Helicopter hman man (wet leasing) chu kum khatah cheng nuai 1,308 a ni a; Mizoram sorkarin nuai 327 (25%) a tum ang a, nuai 981 (75%) chu sorkar laipuia Ministry of Home Affairs-in a tum ang. Helicopter-a chuan man chu mi pakhat tan minute khatah Rs. 50 zel a ni. Copter service hawn inkhawm hi Chief Secretary Vanhela Pachuau-in a kaihruai a, he hunah hian Speaker R Romawia, Ministers, MLAs leh sipai hotu leh Police DGP hovin mi engemaw zat an tel. Helicopter service tur hmangin Aizawl atangin Lungleiah Home Minister, R Lalzirliana leh mi pawimawh dangte an thlâwk phei nghal a, Kawmzawl helipad-ah a hawnna inkhawm an neihpui a ni.

15th. Wednesday: Independence Day vawi 66-na a ni a; Mizorama district headquarters tin tin leh khawpui thenkhatah hman a niin State pawna Mizoram house hrang hrangahte pawh hman a ni. Hetiang hmunahte hian sorkar mi pawimawhte chu an in semdarh a ni.

16th. Thursday: Assam-a Bodo hnam leh Muslim inkara buaina chhuak kal zelah, India ram hmun thenkhatah hmarchhak mite’n beih an tawk zeuh zeuh a, Bangalore-a Mizo thenkhat pawhin harsatna an tâwk nia thu dawn a ni. Hetih lai hian, Chief Minister Lal Thanhawla’n Prime Minister Manmohan Singh leh Karnataka Chief Minister, Jagadish Shettar chu Mizote himna tur ngaihtuah turin a ngen. Prime Minister pawhin Karnataka CM hnenah, hmarchhak zirlaite himna ngaihtuah turin a hriattir tawh a ni. PM chuan, Bangalore-ah boruak tha lo thleng thei tur lakah a tul anga hmalak a nih tur thu, CM Hawla chu a hrilh a, “Tunah hian Bangalore chu hmarchhak mite tan a him a, hlauhthawn tur a awm lo,” a ti niin sorkar thuchhuah chuan a tarlang. Bangalore Mizo Welfare (BMW) hruaitute hnen atanga thu dawn danin, tunlaia Assam-a buaina awm sawhkhawk chungchangah Bangalore-a Mizote’n hun eng emaw chen harsatna an tawh loh hnuah, August 15 atang khan harsatna tawk an awm ve a, mahse harsatna lian tham tâwk erawh an la awm lo. BMW hruaitute sawi danin, August 15 khan Mizote’n sports an nei a, hmeichhe thenkhat haw lam chuan tualchhung tlangvalte hnen atangin buaina lian vak lo an tawk a, chinfel zui nghal a ni. Mizoram Lok Sabha MP, CL Ruala leh hmarchhaka MP dangte’n PM, Home Minister leh Lok Sabha-te hmuin, a rang thei ang bera hmarchhak mite venhimna tur ngaihtuah turin an ngen bawk.

17th. Friday: Aizawl Tennis Court bula Mizoram Civil Pensioners’ Association office hnuai, kawngpui àn-a eichawp dawr, PC Sangneihzuala, Upper Republic luah mekah bomb (geletine) a puak a, dâwr kawngkhâr leh a chhunga bungraw thenkhat a tichhia. Bomb puahna hmun hi Aizawl SP, LR Dingl¬iana hoin forensic mithiamte’n an tlawh a, a hmunah hian geletine fuse feet khat vela sei an hmuh bak thil dang hmuh a awm rih lo. Mizoram Civil Pensioners’ Association member-te din, PEMCOS-in dawr atan an hmang thin a, dawr chu hnam dang an luahtir nia hriat a nih avangin tun hnaiah Central YMA leh Tuikual South branch YMA ten an inremna angin, hnam dangte chuan an khâr a, August thla tir khan PC Sangneihzuala’n luah tanin, bungrua pawh an chhêkkhawm mek a ni.

18th. Saturday: Pi Zosangkimi (kum 60 vel), Saiphai khua, tuna Vairengte Sub-Post Office a a fapa ai kal mek ruang chu Saiphai a tanga Km 6 vel a hla, Buarchep hmun ah hmuh a ni. Pi Zosangkimi hi Vairengte Sub-Post Office Area Saiphai atang in ke in Phainuam a dak la thin a ni a. 17th. Friday tlai dak la a a kal chu in lam a haw thlen tak loh a vang in khawtlangin an zawn hnuah hmuh a ni ta a ni. A ruang hmuh a nih hian thawmhnaw pakhat mah a ha lova, a nghawng ah zai ni in, a chal ah hliam na tak a tuar bawk. Mi kut tuar ni ngei a rin a ni.

19th. Sunday: August 11, Inrinni atanga chin hriat loha bo, Zothansanga (20), Zotlang leh Ruth Lalawmpuii (18), Ramhlun North-te chu khawtlang huapa ni sarih chhung zawn a nih hnuah hmuh an nih loh avangin nilenga zawn leh a nih hnuah khawtlang huapa zawn hnatlang khar a ni a; an bo tanna nia hriat, Hnimtheilo luia lei leh Ramhlun North-a RSC Field-ah thlahna inkhawm neih a ni. Zothansanga leh Ruth Lalawmpuii te hi August 13, Thawhtanni atangin tui lianin a la nia rin a nih avangin hmuh hnuhnun an nihna Hnimtheilo lui kài atanga lui mawng lamah khawtlangin ngawrh takin an zawng a; Hnimtheilo luiin a fin, Tuikual lui dungah te, Tuikual luiin a fin, Tuithûm lui-ah leh Tuithum luiin a fin, Tlawng lui dungah, Bairabi lam thlengin zawn a ni. Central YMA ruahmanna angin, Zothansanga leh Ruth Lalawmpuii te ni sarih chhung zawnnaah hian Aizawl khawpui chhunga YMA branch 42 member-te bakah, khawpui páwna YMA branch eng emaw zat an thawk chhuak a, Sairang branch YMA chu tuithiam awm tamna an nih avangin an rim lehzual hle niin an sawi. Mi pahnihte thlahna hun nimin tlaia Hnimtheilo luia lei leh Ramhlun North-a neihah hian mi thahnem tak an tel. Hnimtheilo luia thlahna inkhawmah Zothansanga pa, Zothantluanga, Central YMA President T Sangkunga, Zotlang LC Chairman leh YMA President ten thu an sawi a; bialtu pastor, Rev. Lianhmingthanga Sailo-in hunserh a hmang. He hunah hian Minister PC Zoram Sangliana, Assembly Dy. Speaker John Rotluangliana, Rajya Sabha MP Lalhmingliana leh ram hruaitu thenkhatte an tel bawk.

20th. Monday: Pu Rosema (62) Lengpui Dinthar venga cheng chuan a nupui Lalawmpuii (44) chu a vawhlum. Pu Rosemate nupa hi an inhau a, Pu Rosema hian a nupui hi a bekah a hemin a duh aia nain kut a lo thlak palh a nih hmel chu a inmil vek niin thu dawnna chuan a sawi bawk. Pu Rosema hian Pi Lalawmpuii nen an inneih hma hian nupui a lo nei tawh a, fa te pawh a nei tawh a, Pi Lalawmpuii nen hi chuan fa an nei lo a, an pahnih chiahin an awmdun. Tunhma lam atangin Pu Rosema hian a nupui hi kut a thlak fo thin niin an sawi bawk.

21st. Tuesday: Serchhip District Hmuntha khua Pu K.Vanlaltluanga (32) h/o Lalzamliani chu bekang um ei sualin a thi. Pu K.Vanlaltluanga hian bekang um hi 19th. Sunday zing khan eiin, hemi ni tlai lam atang hian a pum a na tan a, khawsik, luak leh kawthalova a awm bakah a chawn a na bawk a, a natna tuar chhuak zo lovin a boral ta a ni. Pu K.Vanlaltluanga hian a nupui bakah a fate 3, kum 5 hnuai lam vek a kalsan a ni. Bekang hi Hmuntha khaw mi Lalrinkimi um niin, Hmuntha khua a mi te thar a lei chhawn niin an sawi a, um lova a dahna erawh a rei tawh niin an sawi bawk. Bekang um eisual avang hian midang 21 te khum betin an dam lo mek a, an ni pawh hi an dinhmun a tha lo hle chungin ngaihtuahawm lutuk erawh an ni lo.

22nd. Wednesday: Chief Minister Lal Thanhawla chuan Thenzawla AMFU-te’n National Bank for Agriculture and Rural Development (NABARD) atanga cheng nuai nga an hmuh hmanga thlai thar zawrhna tur, ‘Rural Haat’ an sak thar chu Mizorama a parukna ni turin a hawng. Thu sawiin CM chuan, “Kut hnathawh hi khawvela hna zahawm ber leh ropui ber a nia, khaw khata mi khawsa thei chhungkuate hi mi taima leh tumruhte an ni deuh zel,” a ti

23rd. Thursday: Mizo history-a khua leh khua inrunna rapthlak ber nia ngaih, Khawnglung khaw run behchhana Leitlang Picture in darker hnih zet awh film an siam ‘Khawnglung run’ chu mipui en theih turin Transport Minister Pu Pc Zoram Sangliana’n a tlangzarh ta. He film chan hautak zetah hian a tak thei ang ber tura thil ruahman a nih avangin Rs 1,100,000/- zet an sengral a ni. A senso a hautak tham em avang hian mipui en theih tura tlangzarh ni mahse, an la hralhchhuak lova, hmun hrang hrangah screen lian hmangin chhuah nghal a ni.

24th. Friday: Transport Minister Pu P.C. Zoram Sangliana hovin Mizoram Pollution Control Board, a office chamber-ah thu in Mizoram a motor upa lam tawh mei khu chhuah nasa in boruak a tihchhiat dante sawiin a khuahkhirhna dan an ngaihtuah a. Meeting Chairman Pu P.C. Zoram Sangliana’n Mizoram Pollution Control Board Chairman Pu R.C. Thanga sawm in hma lo lak tawh dan te a sawi a. Ministry of Environment & Forest, Govt of India a an dil ang a Vehicular Emission Testing khawl lei nan Rs. nuai 130 vel a rawn pek thu te a sawi bawk. Transport Department pawhin kum 1999 daih tawh atanga motor khu in boruak tha lo a siam khuahkhirhna kalpui a lo tum tawh dan leh staff indaihloh vanga an lo hlawhchham thin dan te sawilan a ni.Kum 2004 a sorkar thuchhuakin Mizoram Pollution Control Board a mawhphurhna a lo pek tawh dan te an thlirlet a. Board Committee chuan Mizoram Pollution Control Board chu Transport Department te leh Traffic Police lamte nen tangho a hma la nghal turin a ti. Thil tul ang zawng zawng te chak taka bawh zuiin kumin November thla chhung ngei a hawnna neih hman nise an ti a ni.

25th. Saturday: Central YMA-in ruihhlo ngaite puala August 13 atanga Berawtlanga Chhanchhuahna Camping a buatsaih chu zawh a ni a, CYMA hruaitute nen khârna inkhawm hman a ni. A tawp thlenga awm camper 181-te chu Pathianah inhmuchhuakin an hlim hle. Chhanchhuahna Camping-ah hian mi 292 an lut a, mahse a tawp thlenga awm tluan chu mipa 167 leh hmeichhia 14 an ni. A khârna inkhawm hi CYMA Vice President, Lalbiakzuala’n a kaihruaia; President, T Sangkunga pawhin thu sawiin camping chhuakte chu tawngtai tam tur te, an awmna kohhran leh khawtlang bèl tlat turtein a chah. Khârna inkhawmah hian camping-a speaker, Upa PC Lalhmachhuana’n thuchah a sawi bawk.

26th. Sunday: Thlarau bo zawngtute (TBZ) chuan Chaltlang Presbyterian Kohhran Biak Inah missionary 10 tirchhuahna hun an hmang.

27th. Monday: Tv Darhmingthanga s/o Hrangthuama, E.Lungdar chu Teizawl rama an sanghal an channah a sa chan pui Lalramliana S/o. Hrangsea chuan Sanghal emaw tiin a kap palh a, ka pawh chhawn lohin Darhmingthanga hi a hmunah a thi. Darhmingthanga te thian dun hian Sanghal puka a tawm chu an zim a, sanghal chu a lo zuang chhuak a, hetihlai hian Darhmingthanga chuan a channa a lo sawn si a, a thianpa Lalramliana chuan an Sanghal chan chu emaw tiin ulhbun silaiin a kap ta a ni. Silaimu hian Darhmingthanga nghawngah a fuh a, a hliam tuar loin a chatthla zui ta a ni. He thil hi tihpalh liau liau a nih avangin Police-ah FIR thehlut lovin Pathian hmingin an inngaidam nghal.

28th. Tuesday: Mizoram Chamber of Industries (MCI) chuan an office-ah thla thum awh tur Entrepreneurship Skill Development Programme on Computer Hardware & Networking an buatsaih tan a, Indusries Secretary, PC Lallawmsanga’n a hawng. MCI-in training hrang hrang vawi 11 a buatsaih tawh a, India ram huap leh Mizoram sorkar hnuaia pawl hrang hrang 16-ah member anniin; thawhhona thuthlung kum 2009-ah Indo-Bangladesh Chamber of Commerce & Industry nen, kum 2001-ah Syhlet Chamber of Commerce & Indstry nen, kum 2007-ah Union of Myanmar Border Trade Chamber of commerce nen an ziah tawh nghe nghe.Training hi batch hniha then niin, thla thum chhung ve ve tur a ni a, mithiam hrang hrangin thalaite training an pe dawn a ni.

29th. Wednesday: A.Vandailova (50) Tuichawngtlang, LADC a MDC lo ni tawh chu Lawngtlaia a thlen inah thi a hmuh a ni. Pu A.Vandailova hi Lawngtlaiah zinin, Pu N Zangura MDC te in, Lawngtlai Chanmary-ah a thleng a, zing chaw ei tura kaihthawh an han tum chuan thiin an hmu ta mai a ni. Pu Vandailova hi Kum 2005 khan Sekulh Bialah Independent in thlantlin a ni a, a tlin hnuah MNF Party-ah lutin a term tawp 2010 thleng khan Executive Member niin, Social Welfare Department a chang. Thisen sang nei a nih avangin hei hi a boral chhan ber a nih rin a ni. Pu Vandailova hian a Nupui leh fate 6 a kalsan.

30th. Thursday: Lalmuana (40) mi Sakawrtuichhun ram, Pu Sangkhuma ram huan thlam ek inah a in awkhlum. Pu Lalmuana hian Tanhrila nu pakhat Pi Kapliani (A naupan lai atanga hmai kang chhe vek) chu nupuiah neiin hun rei tak fa neiovin an cheng dun a, nikum kum tir lam khan a nupui hi a chhuahsan a, a nupui pawh hian a ngai thei em em thin. A nupui hi then tawh mahse Pu Lalmuana pawh hian a ngai thei em em a ni. Pi Kapliani hi nikum November thla vel khan a boral a, Pi Kapliani a boral hnu phei hi chuan Pu Lalmuana hian hlimni hmel a hmu thei ta meih lo a ni. Dam nuam a ti lova, thih a chak thu te pawh a sawi thinin inawhhlumte pawh tum foin ven ngaite pawhin a awm fo tawh a ni. Pu Lalmuana hian a nupui Pi Kapliani a chhuahsan hnu chuan a changin Kolasib lamah te a awm a, a changin a u Pu Sangkhuma huan enkawltute hnen lamah a awm bawk thin.

31st. Friday: Mizoram Chief Secretary Pu Vanhela Pachuau chu pension in a chhuak ta. Van Hela Pachuau, IAS hian Mizoram Chief Secretary hna hi January ni 21, 2009 atangin a chelh tan a, sorkar hna atanga a pension hnuah, Mizoram sorkar chuan State Finance Commission Chairman atan a ruat tawh a, he hna hi a zawm nghal ang. Mizoram Chief Secretary hna hi Pi L. Tochhawng IAS, Addl. Chief Secretary ni mek chuan a thawk zui dawn a ni.

Similar Posts:

• Mizoram sorkar leiba – “Vaibelchhe 3,611″
• CM hlawh thar tur – Rs.1,20,000
• Karimganj District khaw 56-in Mizoram chhunga rinluh an dil
• Mizo Day 2010
• MBBS seat thlang tha dawn

Recent Posts:

• Ka Mit Laa, Ka Rilru Khawihtute
• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)

This entry was posted on Wednesday, September 5th, 2012 at 6:00 am and is filed under Information, Mizoram. You can follow any responses to this entry through the RSS 2.0 feed. You can leave a response, or trackback from your own site.