Vawiin chu, Fapa Tlanbote pafa za ho nung chang hi I han chhui zau mai mai dawn teh ang. Hmuh dan dang leh sawi belh tur nei pawhin kan hmuh dan leh sawibelh duh te inthlahrung lovin sawi hlawm ta bawk I la.
Pa: Pa ber hi a zau khawp mai. A fate duhthlanna a dah Lal hle a, ama duh dan angin nung se a duh em em laiin, zuk tihluih emaw tharum hmanga an duh dan kalh tlat pawh a tum lem lo. An duhthlanna ngeiin a bulah khawsain amah nen an lengdun thei a, a faten a bula awm aia mahnia tal hran an duh pawhin, tihluihnaa dan tlat a tum lem lo a ni. Tunlai tawng takin a patling(Gentleman) khawp mai.
Fapa naupang zawk: He tlangval(Rawlthar) hi a tunlai ve khawp mai. “It’s my Life” a ti pawr ve hle thin awm e. Rawlthar ni ve tawh si Pa te thlazar hnuaia tawm sen reng ai chuan, a bul tanna tur a chanai tlem lak a, mahni tal tal a, thununtu awm lova mahni duh ang ang leh, tha tih ang anga khawvel han chhek arbawm vel kha a thlahlel tlat mai a, Apa hmangaihna a hrethiam phak lova, a nawmzia leh a him zia leh a thlamunathlak zia a hmuthiam phak tak tak lo.
Fapa upa zawk hi a felin a fing khawp mai. A pa tan lah a rinawm a, a pa thu a awihlo ngai lova, ama duh dan danin a tal ngai lova, apa rilru tina zawngin sual rawng a bawl ngai hek lo. Tleirawl sual kan tih ang pawh a nei ngai lo niin a lang. Hetiang mi ngei hi Apa pawhin a duh leh a beisei a ni ngei ang. A chhuan pawh a chhuang ang a, a rilru nawmna leh a thlamuanpui pawh a ni thin ang.
Amaherawhchu, a pain a nau khawvel chena sual tupuia pilbo ta, apa phei chuan thi ang deuh thawa a ngaih tawh kha, apa pawh khan a hmangaih reng peih a ring phalo a, a vei rengin, inchhira a lokir leh chuan, englai pawhin lo ngaidam turin a inkau reng tih reng a hre pha lo tlat mai. Khatia inchhira alo kir leh khan anau rilru ang tho khan apa khan khatia a chanai la tawh a, chen zo vek tawh kha chu chanai dang a lo pek leh phal a ring tawhlo niin a lang.
A rin loh dan lutuka apain a lo ngaidam mai pawh nilova, hau pawh hau eih lova, a lo pawm a, a ir chuktuah ngawih ngawih chunga a lo fawp ngawih ngawih mai te kha alo rindan nen a inpersan ta hle mai. Puan tha ber ber leh pheikhawk tha ber ber a lak tir chuk chuk a, a lo thuam a, amah lawm nana Sebawng no thau tha ber mai talh a, an ri ta hut hut mai kha ‘Over’ a ti a, ani rinawm taka apa bula khawsa reng mai leh, apa duhloh zawng ti ve ngai reng reng lo tuin, engmah thil special a hlawh ve ngai silo kha a hrethiam thei ta lova, a thik titih deuh ta tlat mai a, a unaupa a nau ngawih ngawih suala pil bo a, bawlhhlawh leh tenawm tinreng kai kha lo tih hliau hliau kha tul a tilo a ni.
Pathian hmangaihna thukzia, zau zia leh san zia hi mihringte tan hian hriat phak ava har dawn tehlul mai em!! He khawvela a fapa Isua Krista a rawn tirh chhan leh an sual thawi nana a tirh phal hial nachhan te hi kan hrethiam phak tak tak ngai hian a rinawm loh ve. Mifel a neih tawhsa teah a lungawi mai ngai lova, misual dum tenawm ber tawhte pawh a hmangaihin a nghak reng a, an sual sima alam an rawn pan hun nghakhlel takin a lo nghak reng si. Chutiangmi ten inchhira sima, inphahhnuai taka hlau leh khur chung leh inthlahrung taka an rawn pan chuan, a thinlung chhung a nghawr che thin a, chu chu amah tilawmtu ber ani si.
He khawvela kan awm chhung hian, Pathian ngaihdam theihloh khawp tur sual tiin I inhre thin em le? He khawvela tisaa I la awm chhung chuan Isua Krista thihna leh thawhlehna kha I tan ani reng a, He khawvela Pathian fapa lokal chhan kha misualte an sual sim tir tur leh chhandam turin a ni. Mi an sual zawh poh leh beisei a awmloh zawh poh leh chutiang mi rin phakloh lutuka an rawn hawikir leh hian Van amite an lawm thin a, Keini Fapa U zawk dinhmuna lo dingte pawh hian kan lo thik mai tur a ni lova, kan lo tuamhlawmin kan lo lawmpui thin tur ani dawn lawm ni?
Naupang tha leh sawiselbo deuh thaw, Tleirawl sual pawh nei mang lo, khawvel sual kailo leh nungchang mawi takte hi Pathian hian a lawm takzet a, ata nisa an ni. Rawngbawlna kawngah pawh hian, tluk leh chetsual leh hmingchhiat te pawh an neilo nge nge a, Hruaitu lian dinhmun pawh an chelh nge nge a, an thihhnu thleng pawha hriatreng hlawh pawh anni nge nge thin a, Pa ro luah rengtu, a neitu an ni. Chutih laiin, Pa Pathianin a hmangaihte leh a Fapa Isua Krista thisen leihbuaka a awm chhan an sual silfai ngai leh ngaihdam ngaite, sual tuipuiin a lenbo leh Khawtlangin an endawng leh misuala an ngaih, anmahni pawh inthlahrung leh sual nih inhriate hi Pa hnena an lokir leh theihna tur hian bei hram hram tur kan ni a, an lo kir chang a, Kohhran leh khawtlang a nghawr nghin dur dur te hian, lo thik mai tur kanni lo va, Fa U nih thiam taka lo lawmtu tur kan ni.
Hetiang mite hi, an tan thlemna pawh a hautak bik em em a, tluk leh pawh a awlsam a, Setana lahin a siruk lain lak let leh a tum ngei dawn si a, thu leh hla leh tawngtaina nena chhawmdawl hram hram thin tur leh, an lo tluk leh palh pawhin endawng mai lova, Pa hmangaihna hriatpuia khai chhuah leh hram hram hi kan tum thin tur a ni.
“In sualte chu sen lar angin awm tawh mah sela, Vur angin a var ang; sen duk angin sen tawh mah sela, beram hmul angin a awm ang” (Isaia 1:8)
“Hmuh awla a awm lai hian Lalpa chu zawng ula, a hnaih lai hian ko rawh u; mi suak sual chuan a awm dan chu bansan sela, mi fel lo chuan a ngaihtuahte chu bansan bawk rawh se; Lalpa hnenah kir leh rawh se, tichuan anin a lo khawngaih ang; kan Pathian hnenah kir leh rawh se, anin a ngaidam nasa khawp dawn si a” (Isaia 55:6&7).
Vawiin chu NERIST Christian Fellowship(NCF)-ah thu ka sawi dawn a, he thu hi story dang tlem belhin ka sawi ka ring, min lo tawngtai pui dawn nia. North East a tlangmi hnam hrang hrang bakah India ram hmun hrang hrang ami an tam ve thin khawp mai. Kristian nilote pawh an rawn inkhawm ve nual thin bawk.
Sunday hman nuam vek u le.
Similar Posts:
- Help!
- Chutin Fak Che Thla-in A Nuam Lalpa! {Sunday Pual}
- Tunlai ka mutmawh hnarmawh.
- Cheng za min pai tu ka pi te kha
- Pawisa bag(purse) chhunga Isua thla.(Sunday pual)
September 23rd, 2012 at 6:16 am
Report this comment
September 23rd, 2012 at 6:26 am
Pu Pk, a tha lutuk tlat. Vawiin i thusawina turah duhsakna ka hlan chia, Lalpan mal a sawm ngei ang che. Lo tawngtaipui ang che
Report this comment
September 23rd, 2012 at 8:39 am
hei chuh ruk ngei chu a neitupa phalna dil lem lovin.hehe
a thlawna hmuh chu a thlawna pek chhuah leh tur an ti emi kha?
Report this comment
September 23rd, 2012 at 9:20 am
E khai va khawih tha deuh ve ae. Tha khawp mai…
Fapa tlanbo hi Isua Krista tehkhinthu turu ber a ni. A u zawk character hi pharisai dinhmun lantirna a ni a, ngaihtuah tel a tha khawp mai. Isua Krista thil tehkhin thiamzia hi aw…a hunlai phei chuan a chiang kek kawk viau ng le.
Pu Hva awmna rama Bible teacher tha tak Pu Dr John Mc ARthur… A tale of two sons tih ziaktu min tihrechhuak thut mai. A lehkhabuah khan historical bacground, context, etc ding taka zirin tunlai hun mil tur ang chi zawngin a ziak a, tha khawp mai. Lei ve nghe nghe la i tangkaipui viau ang. Consistent tak leh methodical exposition tha tak pein a ziak a ni. A tawp lama EPILOGUE a telah phei chuan a fapa upa zawk kha a Pa hnenah a tihdikloh hriain a inlamlet ve a. Mahse simna tello inlamletna chuan a Pa duhtak chu a tawp lamah an that ta hial a ni. Isua Krista chanchin hi TRAGIC deuh mai asin!
NERIST lamah chuan hun tha tak hmang dawn nia. Pharisai dinhmun sawi tumna a fapa upa zawk chanchin hi lo sawi tel ve hram dawn nia…
Report this comment
September 23rd, 2012 at 9:51 am
Chhangteval leh Awmtea te chu in tho zing awm hle mai. Nellmaiden, nia a thlawna hmuh chu a thlawna pe chhuak zel tur kan nia lawm. Ignatia, nia, Isua khan a context kha a hriain a hmangthiam em em mai a, i sawidan pawh hi a dik reng mai. Ka in buk, ka inbuk hnuah, an context ngaìhtuahin, ‘Thlarauva khatin awm rawh u’ tih lam sawi ka tum leh ta zawk a, misuala ka post tawh tho, ‘Kuang chhunga darthlalang’ tih hmang khan fuih ka’n tum zawk ang e. Inkhawm kal a hun ta tlat mai.
Report this comment
September 23rd, 2012 at 10:04 am
A ngaihnawm hle mai
Report this comment
September 23rd, 2012 at 10:09 am
Chhiar a va manhla em
Report this comment
September 23rd, 2012 at 10:12 am
Ropui hle mai. Fapa tlanbo dinhmun ah hian a haw leh thu, ngaihdam ani a, lawm taka lak luh anih leh lai hi sawi nuam kan ti ber tlang pui sermon ka ngaihthlak tawh ah chuan. Post tupa pawh hian a pa hmangaihna ropui zia leh sual a ngaihdam theih zia chinah chiah min la tawp pui leh tho.
Pathian hian a lawm ber chu, mahni dinhmun, misual nih in hre chianga, a mah pantu te hi ani..Chutah tak chuan sual simna tak tak piantharna a lo lang thin. Fapa tlanbo ngei pawh hi tuma fuih leh pianthar tir tum a ngai hran lo.A ma din hmun a hre chiang a, chuvangin simna tak tak nen a let a vangin lawm a lo hlawh mai ani.
Khawnge sawi zel law law ang ‘Bo’ a lar rih bawk a. Chanchintha la hre ngai miah lo, Isua Krista hi tunge anih pawh la hre lo te hi chu ‘ bo tih pawh in hre lo’ duli bo va bo te an ni. Chuvangin a nei tupa tan chuan zawn loh theih a ni lo. Hmunphiah a in chhung zawng zawng hawl chhuah vek ani mai. Chuvangin Keini a hre tawh te hi ‘Krista hmunphiahna’ chu kan ni..kan hawl chhuah a ngai.
Kristian hi enge a nih a, Isua rin ve duh si, kal dan thiam si lo te hi Beram bo va bo’ te an ni. Hetah pawh hian a neitu pa tan chuan a hmanrua te hmanga zawn chhuah tho a la ngai.
Fapa tlanbo ah kher kher hi chuan, a bo ta hi pa ang chhuga awm sa, chumi duh lova tlan bo ani. Chuvangin a let lehna tur ah hian’PA’ hi a in rawlh tawh lo reng reng..Kristian nih in hre tawh, Krista zui tura in pe tawh, mi piangthar tawh, nawmsakna um a zu leh sa a tlan te leh ruihhlo thlahlel a tlan te, hurna leh nawm chenna lama tlan te hi.. an tlanna hmunah vawk chaw hial va ei mah se, buaipui buai pui an ngai lo..An dinhmun dik tak an inhriat chhuah a, an let leh anih loh chuan an tlanbo leh tho ang.
‘Bo’ pathum hi han chhiar rual ila, a fiah kuar mai ni.
Mizoram, chanchintha lo thlen a tanga kum 118 na hmang mek tawh tan hi chuan, Duli bovin a bo theih tawh lo. Beram bovin a bo theih tawh hek loh. Fapa tlanbo din hmun ang erawh chuan kan la bo thei khawp. Chu erawh chu Kohhran in camping emaw Crusade tih vela, thlem ti tih vau ti tih a nawr luh a tih pian thar tum lam chi a ni tawh lo.
A hmangaihna leh misual ngaidam thei anihna hi chu kan hre tawk tawh viau. Tunah chuan kum 118 na hmel kan hmuh a vangin, “Thikthu chhia Pathian, Kan ral hmang mei, Pa te sual vanga Fate pawh hrem thintu Pathian” a nih zia kan in zirtir a hun tawh.
Engpawh nise kan thlen chin a tang hian hma i sawn zel ang u.
Report this comment
September 23rd, 2012 at 11:01 am
He thu hi chu a ropui thlawt a ni. I rawn ziak fiahin Comment pawh a ngaihnawm khawp mai.
Ka nun atanga sawi belh ve ka duh chu..
1. Pathian hian inchhira sima a hnen ka pan hian min lo la pawm duh,min lo pawm mai bakah, lei malsawmna thlengin min la’rizap’ sak. A va’n ropui em!
2. Pathian hnena ka kir leh hian ‘Ka sualnate hi min la ngaidam duh dawn em ni?” tiin ka rilru tak takin, ka sual zia ka inhmu a. ‘Kir leh tlak pawh ka ni lovang a’, ti hial khawpa nun tlawm tan lo chuan ‘kir leh hi’ Pathian a lawm chuang lo. Keini pawh kan lawm chuang lo.
3. Kohhran nghawr nghing dawt khawpa, mibote an rawn kir leh hian FA U zia hi mi thenkhatte thinlungah, kohhran rawngbawltu inti te zingah ngei pawh a lang thin. A takin ka tawng!
4.A ropui ber chu Vana ka hming ziak hi a ni. Ka chanchin a thara Min ziah sak hi ka lawm em em a ni. Lalpa ka lawm e.!
Report this comment
September 23rd, 2012 at 11:21 am
A va han tha em em! Fa u nihdan thiam i tih lai hi a pawimawh ka ti. Chutih rual chuan Fapa Tlanbo chungchangah hian a u zawk rilru atang a zirtur pawimawh ka tih ka lo sawi ve chhin aw.
A pa fapa nisi hi, fapa anga inngai lo a, chhiahhlawh anga a inngai leh lawmman (reward) beisei a a pa hna thuawih taka a lo thawk thin hi (all these years I have been slaving for you, never disobeyed you yet you have never given me a young goat), mi tamtakin Pathian rawng kan bawlna-a kan attitude a ni em aw? Lungawi lohna tawh a awlsam bik ka ring hetiang rilru pu chunga ringtu nun neih chu. Pathian fate kan nihna-ah, tling lo chung pawha, a rawngbawl ve thei tura min phalsak ringawt pawh hi lawm tur kan ni ka ti ve tlat. Luka 15:31 na te hi ka duh hlei hlei rilru a vawn reng a tan. (Ka sawifiah ve thiam lo e
)
Report this comment
September 23rd, 2012 at 11:36 am
#10
Thu thar i rawn chhawp chhuak, a fiah lutuk tlat
He post chu a post tupa lo vil sak teh ang.
Report this comment
September 23rd, 2012 at 11:50 am
#11, Evergreen, ka lawm lutuk. I lo hrefuh ve thei a ka ziak buai nuaih a ka ngaih laiin
P.S. Misual.com hi a rukin ka lo chhiar ve char char thin a reitawh tak atang khan. Ka bengvar phah thin khawp mai. Member pakhatin (a hming sawi kher lo mai ila) rawn tel ve tura min fuihna bawhzuiin inthlahrung vak loin ka rawn comment ve pawp pawp a mahni inzirna ni pahin..hehe
Report this comment
September 23rd, 2012 at 12:04 pm
@Manuni Tlau,
I rawn sawi ang khian A malsawmna hi dawng lo mah ila, a Fa-a min lo pawm leh tling lo chung pawh tlinga min lo pawm hi a ropui, lawm hle tur kan ni. Kel patuai( young goat) min pe ve lo mahse..
Rawn ti zel rawh, ‘Fa u’ thinlung ang pu mi kan awm lo a nia.
Report this comment
September 23rd, 2012 at 12:18 pm
#Evergreen, haha! Ni e, mahse rawn tih zel tur chu ka hre ve vak lo maithei
Report this comment
September 23rd, 2012 at 1:11 pm
Isua tehkhinthu rilber te zinga mi i rawn luhchilh a, a tha hle mai
He tehkhinthu hi a zau em em mai a, entirna leh awmzia hrang hrang nei a nihna hi a ropuina lai tak a ni awm e.
A central theme hi chu a chiang em em mai. PA hmangaihna leh khawngaihna sanzia leh misual sim, a hnena kir leh te chunga A thinlung diktak tarlanna a ni. Hemi piah lamah hian PA angchhung atang hian ringtute hi kan vakbo thei a ni tih a lang bawk a. Mahni hmasial tak leh mahni thu duh tak kan ni vek. Mahse Pa angchhungah lo hi chuan hlimna tak khawiah mah a awm lo. Pa hlata awm reng reng ringtu nun a hlim thei tawh lo. Pathian pawhin a thunun ngei ngei thin. Thunun loh fa tak an awm ngai lo.
Fapa tlanbo kha a tlanbo nawn leh thu kan hmu lova, mahse ‘tlanbo nawn leh ta se ngaihdam a ni ang em’ tih zawhna a awm fo thin. He zawhna hi chu a tehkhinthu neitu Lal Isua hi chhantir mai ila: “.. i chungah vawi sarih thil tisualin, vawi sarih, ‘Ka inchhir e,’ tia i lama a lo hawi leh chuan i ngaidam tur a ni” [Lk 17:4]
A pawimawh ber tia sawi ngam chiah chu ni lo mahse he tehkhinthu zirtirna pawimawh em em mai chu fa U zawk chungchang hi a ni. Ignatia sawi ang khian a historical bacground leh context-a Lal Isua’n a tinzawn chu Pharisai-te kha an ni. Fel leh tha em ema inngai tlat, mahni sualna hmu thiam lo, midangte sual langsar lai hmu lian em em te an ni. Fa U zawk pawh kha a nau angin tlanbo lem lo mahse tha famkim a ni hauh lo. Hemi tichiang em em tu chu a nau lo haw leh chunga a rilru put hmang chiah hi a ni. A PA thinlung ang a pu ve hauh lova, lo lawm ahnekin a thinur tlat zawk a ni. A sual kha langsar lovin fel tak ang pawn hun rei tak a lo lang tawh.. mahse fiahna hun a lo thlen meuh chuan sim tur leh insiamthatna tur lian tham tak a nei ve tho a ni.
Hei chiah hi tun generation-ah pawh pawimawh em em chu a ni. Ringtu U zawk chan changin, sual langsar em em kan ti lo a ni thei; tleirawl sual pawh hre lo Kristian chhungkua tha tak atanga seilian kan ni ang. A ropuiin a tha em em a, Pathian khawngaihna leh malsawmna a ni. Mahse kan unaute, sual nasa tak leh langsar tak atanga chhanchhuah mekte, an thilchin tha lo leh sualte kalsan a, chung lak atanga fihlim tura kan beisei ang bawk hian, keimahni theuha sual hi hneha kalsan zel tura zirtir kan ni ve tho a ni. A langsar loin a te tham a ni maithei mahse sual a ni tho tho. Sual kan tehna hi kan mihring pui teah nilovin Pathian Thianghlimna eng atangin kan teh tur a ni. Pathian Thianghlimna engah meuh chuan mithianghlim Paula te meuh paw’n misual ber angah an in hmu tlat zel a ni.
Fa U zawk dinhmun hi kan sawisel a ni hauh lova, a Pa leh Lal Isua pawh khan an dem lo. Pawimawh ta chu fa U zawk, fel leh Pa thuawih thin tak, dinhmun atang khan hmasawn zelna tur kawng a awm tih hi a ni. Ringtu nun chu hmasawn loh chuan hnutawlh a ni tlat si a. PA thinlung tawmpui thei tu dinhmun hi kan goal ni theuh rawh se.
Report this comment
September 23rd, 2012 at 1:21 pm
fapa tlan bo chungchang hi chawhma inkhawmna ah ka lo zirtir hrep a sin, nangin I lo ziak ve teuh bawk a…. a tha khawp mai
Report this comment
September 23rd, 2012 at 1:43 pm
Pu Donald.
I va han sawi tha em em ve! A chiang lutuk…I reh hle mai. Pathian thu lam postah hi chuan lo inrawlh zel teh a, i hman phawt chuan… Awmtea postah pawh sawn Isua mihrinna leh Pathianna chhandamna atana pawimawhzia han sawi leh hram teh a. Nge Pu Vakula emaw Pu Art-a emawin an sawi zawk dawn?
Pu evergreen, Pu doctea, Pi Manuni, ldt., in comment a ngaihnawm hle mai.
Report this comment
September 23rd, 2012 at 1:52 pm
Ignatia nangman sawi rawh.. Vakul leh Art misuala chu an awm lo a niang.. i sawi ka ngaithla chak ber reng reng.
Report this comment
September 23rd, 2012 at 2:03 pm
A u zawk hi ka lo khawngaih tlat zel, a fa u a nihnaah a pa rawngbawl kha a duty ah a ngai nghet ve tlat tho chung khan a pa ta chu a ta a ni a, a enjoy thei a ni tih pawh ngaihtuah lo lekin hah takin hna a thawk kurh kurh ringawt a, a tan hlimna leh lawmna tur a vang awm e
Report this comment
September 23rd, 2012 at 2:15 pm
Ngaihnawm ve…………..Mihring nih phunga perfection zawn tlat mai hi thil hahthlak ve tak tur chu ni, a u pawh nise a nau pawh ni ta ang se Pathian an zawn dan kawng in ang lo leh hmuhdan kawng in ang lova hi chu thu hran ni deuh mai ah kei ka ngai ve tawp……
Report this comment
September 23rd, 2012 at 2:37 pm
Misual Pasitawr pa a han chet meuh hi chuan, kan var ta uaruar mai.
He tehkhinthu kan hriatthiam tawkloh fo a vanghian a lawm, mi tamtakin
tleirawl sual nei map lova, piangthar tha taka taksa leh thlarau
tih puitlin kan hreh fo thin ni. He tehkhinthu kanhriat thiam tawklon
a vang leh, Puala’n rinna chauh chhandamna ni a a sawi kan man fuhloh
a vang hi a ni ang, takna neilo kristian lemchang kan tam viau tak ni.
Ka thian pakhatin ti hian minhrilh take. Pathian thu a vanga, Felna kawng
kazawhin mi in, vanram kailotur pharisai min ti a, Sualkawng ka zawh lahin, mi sual mi sual, hremhmun thingfak tur min ti leh si a ti a lawm.
Lal Isua tehkhin thusawi khi han en thuakchuan, suahsual rawngbawl phawta chu mi hnu a, a hnen a kir leh tur tihna a ang em a lawm.
He teh khin thu a fapa tlan bo chu, Adama leh a thlahte keimahni ngei hi kanni. Fapa u zawk chu, thuthlunghlui hunlai mahni theihna ringa, Pathian tana rim awmtaka awma, mi in vawngthianghlim te kha an ni.
Chu tah an rinloh lai takin Lal Isua a lokal thut si a, an buai chi chawm zo ta a nih kha. Chu tah, sual ngaih damna thu a han zirtira, a mah rin kha chhan dam na a nih zia a han zirtir ta deuhdeuh kha chu, an hrethiamlo lehzual a nihkha. I sua an rin avanga, Isua tana mi in vawng thianghlim te hi,
fa u zawk, pharisai nihna kan bel fo mai hi, kansim a hun tawhviau ni in a lang. Puala’n, Krista a ka u naute ti in, an hming a vuahzawk.
Sakhua na a vanga kristian lemchang tu te hi chu, pharisai fa u zawk
nihna i pe ang u.
Report this comment
September 23rd, 2012 at 2:38 pm
Ku Ignatia chu ‘Pu’ title min rawn pek ngawt le..Ka lawm hlek lo ania..kei ni zawng lai, Kum 30 pawh la pumhlum lo te hi chu ‘Pu’ title min pek rih loh tur.. NUla min bum tiau sak vek ang
Khawnge fapa tlanbo ang deuhin, ka zirlai a ka hriatthiam theih loh pakhata in hmuh chhuah tum hian kan in sawr bing lawk teh ang ( OT lo chiah chiah
)
Report this comment
September 23rd, 2012 at 2:45 pm
khuarkhum mawngneiah an lo ‘tla’ emaw ni le..!
Report this comment
September 23rd, 2012 at 3:16 pm
Kristaa, mithianghlimte fa u zawk nihna kanpek fo chuan,
tu mah in felna kawngzawh an duhlovang.
Pathian lawmzawng chu suahsual rawngbawl phawta,
a hnu a pianthar hi ni a, kan in zir tir vang te pawh a ni ang.
Mizoram ah a mi chengte ai a, piangthar an tamzawk ni.
Report this comment
September 23rd, 2012 at 3:32 pm
#17,
‘Pu evergreen’…hmm, kan inawm ve tawh tho e.
Coment a ngaihnawm khawp mai, ka hawp bawrh bawrh a ni ber mai.
Pu donald coment, “……mahse fiahna hun a lo thlen meuh chuan sim tur leh insiamthatna tur lian tham tak a nei ve tho a ni” . A va han fiah tak em! Ka Amen mawlh mawlh e.
Report this comment
September 23rd, 2012 at 3:36 pm
In comment ho ka han chhiar thla zar zar a, a dik ka ti hlawm hle mai , hnial tur leh sawibelh tur vak pawh ka hre lem lo. Sihtea comment leh Doc_tea te comment te hi an pawimawh khawp mai. Pharisai-te dinhmun kha tunlaia mi piangthar tha tak te, Pathian tìh dek leh a duh anga nungte nen hian hmehbel ngawt chi ani lovang, chuvang ania ka han sawi tel hram hram ni. Amaherawhchu, Pa hmangaihte erawh kan hmangaìh pui ve a, Pa hnena hruai kir leh hna theih tawpa kan thawh tang tang erawh chu, Pa lawm zawng leh kan laka a beisei pawh ani ngei ang. (Computer atangin sei deuh hlekin rawn comment leh ka tum ang).
Report this comment
September 23rd, 2012 at 4:06 pm
Fapa Tlanbo tehkhin thu hi Luka ziak bung 15 ah khan a awm a. Lal Isua khan Sakhaw hotute leh mi challang tak takte pawl lovin, mi hnuaihnung leh vantlangin misual leh tenawma an ngaihte khan amah an rawn pan miau avangin, an hnenah khawsain, a eiin a in a, chu chu pharisaite khan an hmuhin mak an ti a, an lung ani ta lo va. Chumi chhan nan chuan Lal Isua khan heng tehkhin thute hi a hrilh ta hlawm a ni.(Lal Isua hian a tehkhinthu hovah hian Pharisaite hi a condemn lem miah lova, misualte an hmuh dan diklo kha a hrilhfiah a, Pa Pathianin a ngaipawimawh em em a, anmahni zawnhmuh leh kha a thupui a ni tih hrilh hriat a tum mai niin a lang a).
Doc-tea sawi ang khian Lal Isua hian a hmain ‘BO’ tehkhin thu dang 2 Beram bo leh Duli bo chung chang alo sawi tawh bawk a, Fapa tlanbo nen hian bo dan chi hrang hrang chi 3 kan hmu a ni.
Beram bo chu, hriatlohna avanga mahni vah vaha vak bo, bo tih pawh inhre lem lo, va zawnchhuah ngaite (Ramthim mite kan tih ang hi) an niin a lang a. Tin, Duli bo erawh chu, mahnia bo pawh ni lemlo, midangin an tih bo anni a, midang titlutu(tlukna siamtute Pathianin a huat em em zia pawh Isuan a sawi kha). Fapa tlanbo erawh hi chu, hre reng chunga mahni duh thu ngeia bo te sawina niin a lang.
Mak leh Ropui ta m em mai chu, an bo dan chu engpawh lo ni ta se, a neitupa hian a vei em em mai a, theih tawp chhuahin a zawng a, hmuh annih veleh a lawm em em mai a, midangte pawh amah lawmpui turin a sawm ruai mai a ni (Doc-tea sawi angin Fapa tlanbo hi chu a zawn thu kan hmu lemlo na a, hla taka ala awm laia alo hmu hmasa daih hian, a thlir reng thin a, a zawng reng ani tih a tilang ve tlat a ni).
- An bo dan category leh a neituin mutmawh-hnar mawha a neih zia phawt-
Report this comment
September 23rd, 2012 at 4:24 pm
Lal Isua khan mifelte kawng nilovin misualte kawng a ni a thih thleng khan a rawn zawh ni…
Report this comment
September 23rd, 2012 at 4:29 pm
Biblical exposition neih reng reng a pawimawh em em chu interpretive consistency hi a ni a. Mimal ngaihdan leh emotion hian Bible kan hrilhfiah dan a kaihruai tur a ni lo. Bible hi a hrilhfiahtu tur a ni. He tehkhinthuah hian a changtute chu misual (chhiahkhawntute) leh mifel (Farisai) an nih zia hi chu chapter tir lamah kan hmu a:
“Tin, chhiahkhawntute leh mi sualte zawng zawngin a thu hre turin a kiang an rawn pan a. Tin, Pharisaite leh lehkhaziaktute chuan, “He mi hian mi sualte a pawl a, an hnenahte chaw a ei ve thin,” tiin an phunnawi ve ve a” – Lk 15:1-2
Fapa tlanbo hi misual (chhiahkhawntute) aiawh tu a nih laiin a u hi mifel (Farisaite) aiawh a ni. Hei hi tunlai context-ah kan seng lut a nih rau ruaa, fapa tlanbo hi misual (addict etc) aiawhtua kan hman chuan, a u zawk hi tu nge ni vak chuang ang ..? A tlan bo ve lova, a addict ve lo tih bak chu danglamna a awm tehchiam lo. Sim tur a nei ve chiang khawp… chutiang bawkin tunlaiah mifel eng ang pawh hian sim tur an nei vek.
‘“Sual ka nei lo,” kan tih chuan mahni leh mahni kan inbum a, thutak chu keimahniah a awm lo a ni’ IJh 1:8
Helaia Farisaite dinhmun leh nihna a sawi avang hian a chhelama ngaih ngawt tur a ni lo. Tunlai mi piangtharte sawina a ni lo tih tur pawh a ni lo – a ni tlat. Mahse tamtakin an ngaih anga a chhe lam ni si lo a ni. Mi fel takte pawh hian fel lohna an ngahzia leh Pathian thinlung an tawmpui phak loh thinzia inhmuhchhuah nan leh midangte fel lohna hmuh len viau hi mahni fel lohna kan hmuh theih loh fo nachhan a nihzia hriatfiah nan a tha khawp mai.
Report this comment
September 23rd, 2012 at 5:37 pm
Hman nichu lu ka meh tir na ah, ka lu met tu pa thian te hovin,
an zu in tur an rawn khai bawr luk a, chu ta an thu sawi chu.
Lal Isua kha mi fel tak te lam tura lo kal a ni lova, kei ni ang mi sual leh
mi awm tha duhlo te lam tura, lo kal a nih kha. Kan fel te chuan,
Lal Isuan min lam duh lovang an ti muah mai mawle.
Kei ta pek chuan ni e, hmanah chuan misual te lam turin a lo kal ngei a lawm, tun ah chuan kan chungah zah a ngai rih a nih hi.
A lo kal leh hun ah chuan, mi sual leh mi awm herhho te mei dil a paih tur in a sin a lo kal dawn ni, ti in ka lo chhang fak tawh.
Heng hre chunga ti sual lui tlat tu te, campinga vawi tamtak piangthar tawh te
hi chu, Fapa tlanbo nguna te, Fa nu tlanbo nguni te an nih zawk hmel.
Kan Lal Isua’n, fapa tlanbo a rawn teh khin leh ui re an den hlum turi te khan, vawi tam tak an tih sual nawn tak chiam chiam thu lah
tun thlengin, chhiar tur ka la hmu rih tlat lo mai.
Han sawi zau zel teh u’n.
Report this comment
September 23rd, 2012 at 5:46 pm
chhiar a hlawkthlak mang e.. comment te pawh chhiar a nuam
Report this comment
September 23rd, 2012 at 5:55 pm
#30
Kan subject hi inchhira sima Lalpa lam hawite chungchang a ni a, sual lui reng chungchang a ni hleinem.
“vawi tam tak an tih sual nawn tak chiam chiam thu lah
? aaa chu aia awlsam deuh.. i pianthar hnuah thil i tisual tawh miah lo em? nge i chhiar seng lo zawk i tihsual zat?
tun thlengin, chhiar tur ka la hmu rih tlat lo mai” … hahahah.. i sawi tha e, a dik ang dik pawh. A nih an tih sual nawn tak MIAH LOH THU tun thlengin chhiar tur i hmu meuh em
Pathian thu chuan AWT SUH a ti a, i awt ngai tawh reng reng lo em ni?
Awhna suala i tluk ve fo si chuan.. awt nguna i ni ve tho tihna a nia, Fapa tlanbo nguna te, Fa nu tlanbo nguni te aia eng nge i that bikna ni ta ang..? ‘tlanbo suh’ tih te phei chu a awmlo zawk lehnghal a 
Report this comment
September 23rd, 2012 at 7:12 pm
30.Sihtea, an fiamthu ve vel mai mai anih chu, chaw tak khuka khuk pui chi anih loh chu. Fapa tlanbo pawh kha a inlamlet a, apa hnen a pan chiah khan a lawm apa angchhunga a awm leh theih chauh ni. Sual sim duh lo leh Pathian fapa thisen nuih zat tu te hi hrem lohvin an chhuak hauh lo vang. Post a ka sawi ang khian, ‘misualte an sual sim tir a, chhandam tura lokal a ni’.
Report this comment
September 23rd, 2012 at 11:14 pm
@32 donald, ui re an denhlum turi ka tih kha,
rin awm taka I sua rawn zui tu a ni tlat a sin.
A hnung zuitu te raurau ah pawh a huaisen ber bawk.
Isua thawh leh tuka, hmu hma sa bertu a ni bawk.
A phat santak thu lam phei chu, kan bible ah e maw,
hrilhfiah na lam ah pawh hmuhtur a awm rihlo a ni ang.
Fa pa tlanbo e rawh kha chu a taka thilthleng ni lovin,
teh khin thu a ni tih chu kan hre tlangin a rin awm.
Tin, mi hring te rilru ah hian that na leh sual na hi,
an in do thin. Ni tinin tai sa lam duhdan chu,
thla rau lam duh danin kan hneh tur a ni. Kan rilru
ngaih tuah na te hi, a thianhlim tawk loh fo a vangin
ni tin sual thu pha kan chawi a ngai reng a ni.
Kan ril ru ngaih tuahna a thlemna chi hrang hrang te leh,
kan hmun leh kan hriat thil te a vanga, a lang a pauva
thil sual kan tih chuan, Pathian thu kan awih lo tih na a ni mai.
Lal Isua thihna leh a thawh lehna kan tawmpuilo tawp tihna a ni ang.
Ni tin a, sual thihsana Pathian duhdan ang a nung tur kan ni zawke.
Sual thu pha chawi tur neilo khawpa mi famkim, kanla nih rih loh a vangin
a lawm, bawih tha hnemlo ka ni e, ti a tlin loh na leh sual thu pha chawi
tur a, Lal Isua’n min zir tir reng ni. Sual thu pha pawh chawi duh lova,
cha po taka kan sualzual sauh a nihchuan, kan Lal Isua leh a zirtirna
kan ngainepin kan hmusit tihna a ni ang.
Nangni’n min hmangaih chuan, ka thupek te in zawmang.
Chu mi ah chuan, mi in ka zir tirte in nih an hria anga,
in Pa vana mi an chawimawi thei ang a tihkha. Kei ni a hming mai a
kristian in ti te hian, Lal Isua thupek zawm lam hi chu,
a kristian te tih chi ah kan ruatlo te pawh a ni ang
hah dam taka, kristian lem chanhi kan la tlintawk rih a ni ber e.
Report this comment
September 24th, 2012 at 7:57 am
34
Sihtea,
I thu lak dan mai mai chu. Lal Isua thupek zawm duh lo, thupha pawh chawi duh lo lam tuma’n kan sawi mawi hleinem mawle. A thuhrimin nangmah ang tho khan midangte hian Isua ngaihdamna an mamawh ve tho a, phatsantu tia nanga lo judge tur an ni lo ve. In addiction a inang lo mai mai a ni zawk. Drug addict emaw zu ngawlvei te’n an pianthar hnua an han ti leh hi kan sawimawi a ni hauh lova, ‘marawhchu hengte aia tha bika i inngai a, nang aia sual bik leh ngaihdam pawh tul ve lova i ngai a nih erawh chuan i farisai hle tihna a ni. Midang mita hmawlhte hmu lian viau mahni mita khanchhuk awm ngaihmawh nachang hre lo te kan ni palh ang e.
Ka sawi tum i man tawh em aw? Camping vawitam tak lutte hi simna thinlung nen Lalpa hnena an kir phawt chuan vawi engzat pawh ni rawh se, nang leh kei ang thovin ngaihdamna an chang dawn tihna a ni
I ngaihdan a ni chiah lo a nih paw’n thudik a ni tlat a, Pathian nen in ngaihdan a inang lo deuh tihna a ni mai e.
Report this comment
September 24th, 2012 at 8:04 am
He tehkhin thua hriat tur pawimawh thenkhat te:
i) Puan tha ber hian, chawimawina a entir a, Zungbun hian ‘fapa nihna leh fapa thuneihna a entir bawk a, Pheikhawk hian, fapa tlanbovina apa dil ava tum chhiahhlawh/sal nihna letling chiah, zalen nihna a entir a ni.
ii) He tehkhin thuin sawilan a tum ber chu, fapa sual zia lam aiin Pa Pathian hmangaihna thuk zia, san zia, ril zia leh ropui zia lam zawk hi a ni.
iii) Pathian ngaihdamna mak danglam zia leh, tunhma nun lama sual an lo tih tawh thinte hre reng lova a theihnghilh zia a lang bawk.
Fapa upa zawk hian, Pharisaite a entir a, direct takin Lal Isua hian va condemn lo (a hnena awm reng leh, a neih zawng zawng pawh a ta vek anih zia a sawi lang tlat) mahse, Fapa upa zawk tawngkam hi ngun takin han zirchiang ta ila, Lal Isua hian thiam taka an dik lohna a thailan thiam zia hi chhinchhiah tlak tak a ni. Khai mah aw:-
i) A Pa hnena alo thawh tawh zawng zawngte kha, Fa a nihna anga a duty ve reng, lawm taka ti nilovin, harsa ti tak leh phurrita la chung leh lawmman phut ran chunga thawk a ang.(Jack-a pi comment ang khian)
ii) A nau laka a chet dan hi a mak khawp mai. “Ka nau/unaupa” pawh a ti duh lova, “I fapa” ti ngatin a sawi a ni. Mahni fel leh tha inti em em, misualte chu an sual simtir tura va beih leh va chhanchhuah lam aiin, a na thei ang bera hrem leh dah nil duh chi a ni tih a lang.
iii) A chhe thei angbera zeldin ching a ni bawk. He thawnthuah hian Nawhchizuarte hnena a sum a chen ral thu a inziah loh laiin, a U hian, nawhchizuarte hnena a sum khawhral vek angin a sawi duh tlat mai. Amah ngeiin tih a chak ruk, a tih ngam chiah siloh kha a nau khan duhtawka chen angin a puh/sawi hmiah hmiah mai niin a lang.
Engpawhnise, mihringte inngaihdam theihna aia Pathian ngaihdamna thuk leh san zia a lang chiang em em a ni. Pathian Hmangaihna chuan, Beram bo anga mahni bo boa bo ve mawp mawp, bo tih pawh inhre lem lo te, midangin sual kawng zawh tura an hruai bo leh an tih thluk te, Mahni duh thu renga vak bo te pawh a a huap pha reng a, a hneh theiin, a chhandam thei a ni tih hi a ti lang chiang em em a ni.
- Commentary thenkhat ami Ka rawn dah belh leh mai mai anih hi -
Report this comment
September 24th, 2012 at 8:21 am
36
PKfanai
He tehkhin thuah kher hi chuan farisaite hi a thalama picture an ni ve tlat hi a danglam ve tlat. Pathian finna ril zia hi amak a ni. Fa u case hi buaithlak tak a ni. Rinawm taka Pa angchhunga awm mah nise insiamthatna tur a nei ve tlat bawk si. A han ang tun tun a, i sawi angin a dik lohna a thailan thiam zia hi chhinchhiah tlak tak a ni. ‘Nangpawh sualna lai leh fel lohna i nei ve tho’ tih a rem der si lo a, chutih rualin a nei ve kur bawk si.. hriattir a ngai bawk. A nalh tawp
Ka ngaihdan phei chuan heng hi Fa U-a tan ai mah hian kan tana ziak a ni tih hi ka pawmdan a ni.
Report this comment
September 24th, 2012 at 8:27 am
post a ngaihnawm, comment a bengvarthlak bawk si, kava han nihlawhin kava han hlawk tehreng em ve aw
Report this comment
September 24th, 2012 at 8:56 am
37. Ni chiah mai. Mahni nuna lak luh/in hmehbel ngam thlap a ngai.
Report this comment
September 24th, 2012 at 12:13 pm
E khai Pathianni chuan kan misual tha hman vak thin lo a ni e! In kal thui tawh hle mai, a lawmawm lutuk!
Comment a va ngaihnawm em! Pu Donald-a leh Pu Sihte-a inchhanna khi a hlawkthlak lutuk… Pu Pka comment pawh. Pu Sihte-a’n hla thu emaw poem emaw anga comment a hnutchhiah tawh hi chu chhiar loh chi a ni hauh lo.
Fa u zawk charcacter kan chei vak a, a lawm khawp mai. Tunlaia kan mamawh pawh a niin ka hria. Pu Donald-a ang khian a tlanbo zawk ni lovin fa u zawk nihna khi ka tana sawi ni hialin ka ngai thin zawk a ni… Kan hlawkpui tlang viau ang le, he post chu.
P.S: Pu tih hi ka tan chuan term of reverence a ni. Upat avanga Pu lam a kawk lutuk lo, docte…
Report this comment
September 24th, 2012 at 12:36 pm
Thuziak tha tak leh belhchiandawl tak a ni..
Report this comment
September 27th, 2012 at 10:05 pm
Report this comment