(Kan rualpuite chuan an hlimpui viau loh pawn an lungleng ve ngei ang)
Black and White TV en pha, khawnvartui pawl hma leh nawalh bawk sen hmaa C-Rice ei hman, Cable TV, Internet leh tunlai IT lama hmasawnna hian thopazuana zuan a tum laia a insangphek velin a nek thluk. Tlu chunga thei leh thei lova a mei hmawra chaih ve hman si – Kum 1980 bawr vela Aizawl veng hmawr deuha piang leh sei liante hian eng chiah nge kan lo tawn ve a, engtinnge hun kan lo hman ve thin tih hi zêp lovin ka’n zep ve leh mai mai ang e.
Rual u deuhte chuan an naupan lai chanchin leh an hun hman thin dan hlimawmzia te, an lunglen thu leh nunhlui an ngaihziate an ziak kur ngei nguai thin. A ni tak a, mitin hian kan naupan lai huna kan thil tawn leh kan hun hman dante han chhuikir chang hi chuan nunhlui ngaih leh lunglen, he khawvela awm ve ta lote avanga khawharna thlarau hian min manin nunhlui ramah min thlawhkir pui vawn vawn thin zawng a nih hi.
A hnuhnung ber kan ni
Fate school bag, patling nileng hlawhin a lei phâk tak meuh loh hnu leh kan faten iptepui pawh an hriat tawh loh hnu hian, keini kha Ipte thui chawp koki atanga khel bawr thlenga a paivat zawnga uai thla zar thin ngei mai kha school kalna a ak hnuhnung ber kan ni mai awm mang e.. ka ti thin. Ruah do haw a ngaih chang leh tute emaw hlauh vanga hmanhmawh taka tlan haw a ngaih chang kha chuan kan iptein min tihbuai loh nan ipte kha hnung lamah dahin a hrui kha zak hnuai tangin tukhum lamah kan kan la let a, tunlai Rack sack/Back pack ang deuh hian kan ak a, banrekah Silipar kan bun sauh sauh hniak pherh vungin kan tlan thin. Kan upa ber hian high School a kal tan kumah ‘Green Bag’a nei a, ka van awt thin tak. Khatiang Ipte thui chawp kha a ak hnuhnung ber kan nih loh pawhin kan tu leh fate bulah Zan College nuam kan tih thinzia leh P.U. kan zir lai chuan… ti thei hnuhnung ber pawl chu kan ni chiang mai.
Krismas Bawng thlah leh hnah lak te kha a van nuam thei tak. Veng thenawmte nen mual khata bawng kan thlah fuh changte khan Kawl bawng chhawr fe vek tawh insik nachang pawh hre mang lo kha insik tir talh kan tum a. Ruai theh dawnah fatu hovin bawng thlah leh hnah late tan hlui hran midang aia danglam chuang miah lo min buatsaih sak a, kan lawm ve em em a. Thlangra leh hnah kan hnawl a, thleng kan hmanga, chu pawh chu duh tawh lovin a aia awlsam Disposable kan tih leh tawh hnu hian keini kha krismas bawng thlah leh hnah la hnuhnung pawl kan ni mai awm mang e.. ka ti thin, kan nih chiah loh pawhin Saphing ham puara Krismas thlenin tuala inkhel khu rum rum thin hi ka hmu ngai ta lo.
Kan faten TV leh Computer games ringawt an buaipui tak hnu hian, keini rual kha Pawisa thir nawi hmanga in ‘Boli’ thin leh tual chara in ‘Marble’ thinah chuan a hnuhnung ber pawl kan nih ka ring. Motor Ball Bearing hmangin Tawlailir kan siam a, veng sang lamah kan inzui chho dam dam thin. Puitling intih ve tawh hnu leh rual kan pawl zau ve fe tawh hnua han sawi khawm nikhua pawh hian veng inthenawm naupang leh rawltharte hi kan lo inngeih duh vak lo hi a lo nia. Ral atangin kan in au ela, lai leh laiah intawk ang kan han ti ngei a, ram ri-ah a incho tawk pahnih khat an han insual a, a tawpah chuan Sairawkherha indo khan a zui deuh ngei ngei. Keini hnu lamah hi chuan sairawkherh hmanga veng leh veng indo duh pawh an awm tawh lo.
Tunlai thangtharte hi chuan Tape cassette leh Pencil inlaichinna pawh an hre tawh lo, Cassette reel inherh siam buaithlakzia te leh reel chat zawm nan Nail Polish thatzia te kha sawi sawi mah ila an nui mai a. Walkman Battery down tawh kan seh sawih nasat theihzia te, Internet atanga download mai tur awm hmaa sap hla thu kan lakchhawn sual nasat theihzia te kha a hun lai chuan nuihzatthlak miah lo mahse tunah zawng ngaihtuah chhuah chang apiangin ka nui leh vur vur thin. Keini ho kha Cassette rewind leh forward nana Pencil hmang hnuhnung ber kan ni ta.
Lui dunga kan hlim nui ri leh kan ke hniak pherh veng vung thin te kha tawihral hleithei lo Polythene leh hnawmhnawk dangin a chhilh bo zawk tak hnu hi chuan Lui kal nawmzia leh theirah chi hrang hrangte hi Bazar ami lei ai chuan lawh ruk ngei kha a tui zawkzia sawi sawi mah ila, an awih chuang hlei lova. Thian zohava vai thingpui dawr ‘Risk’ leh vai chhang zuar ti buai peih pawh an awm tawh lo a nih hi. Tihtur nei chuang miah lova Town Bus ‘Round’ te kha a van nuam thei tak. Conductor sual deuh tawn fuh chuan min pen ang fawk fawk a. Town Bus a chuang hnuhnung pawl kan nih loh pawn Taxi dum, a chung enga chuang hnuhnung pawl chu kan ni hrim hrim.
A hmasa ber kan ni
Bangladesh TV-a MacGyver leh Osin en tuma ‘A fiah em?’ ti lauh lauh chunga Antena her thin kha Cable TV-in min han run thut mai a, M-TV leh Chanel V tih velin kan incheina, kan Hair Style leh kan khawsak phung, kan nundan thlenga a sawisak hmasak ber kan ni. Keini ho kha Video Game khel hmasa ber kan ni bawk ang. Mortal Kombat, Super Mario, nintendo..te kha tlaivarpui hmasa ber kan ni chiang. Tunlai angin Cheat book te hmuh mai tur la awm ve hek lo, a khelh chu sawi loh, ‘cheat’ zawng ringawt pawhin kan hmet kual zan khua peih. Hmeichhe tennis khel thiam hmingthang Martina Narvatilova hi patil a nih leh nih lova inhnial hmasa pawl kan ni a, Manchester United kawr hmaa sharp tih inziak hmu hmasa pawl kan ni bawk. British Bulldog leh Hitman te hi tang dun se, Undertaker leh Hulk Hogan hi tang dun bawk se a hmuhnawm viau ang ti pawl te pawh kan awm bawk.
Computer room-a kan luh dawn apianga pheikhawk leh Silipar kan phelh thlap thlap hunlai kha la rei lo viau mahse tunah zawng hawina apiangah computer hmuh tur a awm ta. Keini ho hi Windows version hrang hrangte kha a hmang hmasaah kan tang a, Xp thlengin a khawih hmasa ber kan ni. Rual u deuh ten 3.5 flopy, 1.44MB an nawr luh rik khap khap thin laiin kei ni chu Cd leh DVD te kha a hmang hmasa ber kan ni. Xerox hmang hmasatu kan nih thu leh Digital Camera hmanga thla la hmasa kan nih thu te chu sawi lo law law mai ang. Cyclostyle atanga Offset a zuan kaipui tu pawh kei ni bawk.
Internet te hi a taka hmang tangkaitu leh atchilh hmasa ber kan ni. Dial-up conection nena cyber cafe luhchilh hmasa ber kan ni bawk. mIRC hunlai leh kan vanglai a in nang chho te kha kan va nihlawh tak em. Kutzungchal chauh hmanga computer keyboard chuka kan han ‘chat’ chat chat mai thin te kha a lunglenthlak ta hle mai. Zing lam dar hnih velah pawh kan la ‘Hi’… ‘Hello’ … pap pap mai thin kha a nia, Dalnet, Cyber Army.. tih vel kha kan ti ti tui ber kha a ni miau mai a, kei phei chuan Cyber Army tih kha en lova ka chhut thiam hmasak ber a ni. LoL tih te leh Asl tih te kha a awmzia hriat tumin senior deuh te kan han zawt ru dek dek a, dik chiah lovin min han hrilh ngei mai a. mIRC lamah kan han inkawm tlang nel hmasa phawt a, Yahoo messenger, RediffBol tih velah ‘id’ in dilin kan han in ‘add’ chho vel ta thin kha a nia. Web Cam awmna-a thut fuh tumin chaw ei kham kam pawh thuah tha hman lovin kan tlan chhuak dawr dawr thin.
Keini rual ho kha Mobile phone hmang hmasa leh Sim Card neih tuma zan khuaa intlar peih hmasa ber kan ni bawk. Nokia Handset Black and White atanga Camera leh Mp3 support te hi a hmang hmasa kan ni zel.
A tha lo lamah pawh hmahruaitu kan nihna a tam mai. Ruih nana khuh damdawi ti lartu leh Proxyvon-a inchiu hmasaber kan ni bawk. Mizo sex video hmuh tur tam ber pawh hi kan rualpui deuh vek an ni. A tha lo lam hi chu sawi a nuam thin lo, chuvangin No-4 lar tak hluai nachhan pawh kha keini bawk tih hian kan thu hi a hmawr i bawk mai teh ang.
A tawp berah chuan, engtik hunah pawh piang la, khawi hmunah pawh seilian la, nuam leh hlimawm kan tehna hi min hualveltu, kan chhehvel leh kan thil neihte ni lovin, damchhung khawsak lungkham buaina leh rual elna khawvelin min bawh beh hma, rilru leh taksaa phuartu leh delhtu awm miah lova ‘Zalen’ kan nih lai, kan naupan lai hi a lo nuamin a lo hlimawm ber zel a lo ni.
Similar Posts:
- Lily Veng atanga hnawhchhuah-in chhuahsan duh lo
- Zawngtah Hi
- In ral chungchang
- Ka fiamthu pahnih…OT theih
- Dawn tisei
October 6th, 2012 at 12:18 am
Mizorama personal computer hmasa ber chu Pu Vanneihtluanga(Monochrome) leh George Lalzuia (VGA) ten 1992 kum tawp lamah an neiin ka hria. 5 1/4″ FDD hman hun lai a la ni a. 386 motherboard, math coprocessor nei lo a la ni zui.
Internet hi Mizorama a lo luh tirh hian connection hmasa 5 username leh pwd kha kan hman ruk sak thin :in tithei deuh: Cal1 server hman lai khan.
Cal2 server kha lushai_er user name hmangin 200hr ka la ve a…! Tunlai ang hian file size zawngin an la ti lova, user time zawng khan a la ni vek a. Mail leh news te hi a page kan dl teuh a, offline-in kan chhiar leh mai thin.
Internet browser pawh Netscape kha a lar ber a, ie te chu a hnu deuhvah a rawn lar ve chauh a ni. A…..sawi tur a tam mai, “Kei ni zawng kan chan bik hi kan vannei hle…” a ni ringawt.
Report this comment
October 6th, 2012 at 12:19 am
Ka first em aw ?
Report this comment
October 6th, 2012 at 12:26 am
Kan HS kal tawp lam ’84 vel khan niin ka hria, kan school, GHS-ah khan pin ball khelhna, in lem sak theihna, hawrawp mawi thlan theihna kan tih mai kha tunlaia computer kan tih hi a ni ta berin ka hria.
Report this comment
October 6th, 2012 at 12:34 am
Lushai_er, hman zan kha i “Gangnam Style” topzz…
Report this comment
October 6th, 2012 at 5:01 am
Lunglen thlak mange. Post tha takzet leh namailo tak a ni. Ka lawm e, min tih hlim avang leh nunhlui min hriatchhuah tir avangten.
Report this comment
October 6th, 2012 at 7:42 am
1980 te chuan ka pa pawh a in ti tlangval tan chauh….
Report this comment
October 6th, 2012 at 7:50 am
Tukchhuah nuam vek u le…
nizan ka lu a na deuh a ka mut san che u a nih kha… in lo ti ti liam ² a ni maw…
Report this comment
October 6th, 2012 at 8:33 am
Report this comment
October 6th, 2012 at 10:43 am
BMX te la awm ve ta lo chu Ramhnuaia pipu uai te a nuam pawl a la ni a……!
“Pi-pu kan suih ram tinah kan suih,
Ka ngai a che ka zui zel ang che;
Pi-pu leng leng Darchhungphum mi pe,
Se en naupang min han biak ang che;
Biak tak tak chuan min han biak suh la,
Biak der te khan min han biak ang che.” kan ti thin
Report this comment
October 6th, 2012 at 10:57 am
Mai a lum e huiah…..kha in zir ve hman em aw……?
Mai a lum e huiah,
Thangsira pa’n mai a lum e huiah;
A zuan e huiah, inpui sakawl a zuan e huiah.
Khup sukin aw le, Dar khup sukin aw le,
Thopa zuanin aw le.
Tlang a lal lal herawt-ah,
Herawt lal lal herawtah;
Kinga lu thlelek-ah,
Laikinga lu thlelekah;
Darkawl chhun chhekah,
Amah Darkawl chhun chhekah.
Zawnga leihlawn dim dim,
Chhimzawng leihlawn zawngchal leihlawn;
Zawnga leihlawn dim dim,
A indawt dan khi a dik tawh lo mai thei, mahse thlarau thawh dan a ni tlat. Kan sa rual thup thup thin kha a nia
Report this comment
October 6th, 2012 at 10:58 am
First leh teh ang, kan mithianghlim-pa hi rilru a chawk tho tlat mai
A tawp nan khan…..
“Tin dialah, tin dialah,
Naktukah khua var se la;
Inkawm leh dial dial ang u,
Mahni in lam hawi theuhvah.” ti khan kan in tin thin zawng kha a nia..!
Report this comment
October 6th, 2012 at 11:08 am
Ka tel ve pha hram hram e
Report this comment
October 6th, 2012 at 11:12 am
Pang aw inzial inzial, pangpui par aw pang par aw, pang aw inzial inzial…..
Report this comment
October 6th, 2012 at 11:14 am
Naupangte u, sikul kal r’u sikul kal r’u. Ngai teh dar a ri e, ngai teh dar a ri e- vu vu vu, vu vu vu
Report this comment
October 6th, 2012 at 11:18 am
BMX sawi takah chuan aizawl south lamah chuan a nei hmasa ber dawttu ka niin ka hria..
Tunlai aizawl thunder ang deuh hian children park velah khian kan kal khawm ve thin…
Liam tura duan
Pan lai kan nun
Ngaiin ka au zel dawn….
Report this comment
October 6th, 2012 at 11:22 am
bazar a cheng hnih dawr te kha hre ve pha in awm em..haha..
Hushler dawr kha sticker kan trick sak nasa..haha.. A neitute in lo awm chuan min ngaidam dawn nia..haha..
Report this comment
October 6th, 2012 at 11:27 am
Rs. 2/- dawr kha Assam Police Pensioner Pu Kapdenga siam a ni ta in ka hria. Ball par Rs. 2/- man kha kan lei ve ngei …lol
Ball-par tournament te pawh a awm thin kha maw le (Veng thenkhatah)
Report this comment
October 6th, 2012 at 12:39 pm
Zoro pistol kep hmang, a cheng bung duh deuh te, pistol lem rs 2 man kep hmang a in ral lem chan te kha nuam ve deuh sin, AR cinema hall ah TORA TORA TORA bang awng atang bih thlak te kha nuam ve phian, 36th chamber of shoalin Zodin cinema hall ah kan en ngei mai kha hei ka download tha leh a, a la hmuhnawm leh phian mai.
Report this comment
October 6th, 2012 at 2:03 pm
hulk hogan, undertaker…i sawi tunlai mah mah! Khang ho lar lai khan kan nula uaih tawh
Report this comment
October 6th, 2012 at 2:34 pm
he post hian lung a ti leng
green bag-a luhruhro lem ziahte, jean kekawr khur ti thlerte, mario game khelh te…adt… aww ka hnuk..
Report this comment
October 6th, 2012 at 2:41 pm
Vawiin inbual ni
Tuihawk khuap ang uuu
Report this comment
October 6th, 2012 at 3:00 pm
Leilung mawi leh thangvan sanga thil nung tin reng te,
chung pathian chuan a han thlir a,
A va lawm em a thil siam te a venghimin a chawm fo thin
Muang leh hlima an len ve nan
Rannung thing leh hnim tinreng te
An natuar hringmi iangin
Sawi lo mahse an lan tir thin
An hram ri leh an hnah uaiin
Keini hringmi thilsiam hluber
Pathian anpui ngeia siam ten
Kan duat thiam lo siamtu duhlai
Kan ti ral thin nun rawng takin
I sim ang u naupang tha ten
Kut hlei leh nunchhiat tin reng
pawisawi lo nungcha sawisak hi
Kan pa duh zawng ani lo ve
Class a kan sawi rual dal dal lai te kha aw
Report this comment
October 6th, 2012 at 3:14 pm
Kan naupan lai chuan India aiin Pakistan kan tan zawk thin.
Report this comment
October 6th, 2012 at 4:52 pm
misual ka hmelhriat tantirh hian member pui te hi an kum zat ka hre chak thei khawp mai. fb te alo lara,member puite propic han en hian ka nau tur an tam zawk mah in ka hria.
Report this comment
October 6th, 2012 at 5:33 pm
Report this comment
October 6th, 2012 at 5:53 pm
vai thingpui dawr ‘Risk’ mawlh mai kha ka la chak reng..haha..
Report this comment
October 6th, 2012 at 11:12 pm
Sweet artui/chatuan sweet leh NP chewing gum kan va ngaisang thei thin tak. TV a la awm lo, puan milem kan en ve thin. Information deptt-in khawlaiah an rawn chhuah thin a, a khaw nawtin kan en zel. A hma bera thut kan inchuh thin:)
Report this comment
October 6th, 2012 at 11:48 pm
Haha..Osin mawlh mai khi..vur tla chum chum kar a a insu hret hret lai ka mitthla in a hmu..kan tahpui nasat theih zia kha..
Report this comment
October 7th, 2012 at 6:00 pm
Nichin khan ka fanu kum 3 mi Tense-i’n, “Apa, i naupan laiin Scooby-Doo hi i hlau ve thin em?” a tia. “Kan naupan laiin Scooby-Doo en tur a awm ve lo a, TV en tur pawh a awm lo” tiin ka chhang a. TV en tur a awm lo tih lai tak hi a hrethiam miah lo. Ka hrilhfiah zo ngang lo a ni ber!
Report this comment
October 7th, 2012 at 7:48 pm
Tv en naah puitling hovin, “Uite rim in nam”, “Naupang ho kha vawih loh tur aw” tia min han vau khar khar thin te kha a lo rei leh tawh hle mai. GI-Joe (toy) leh The Ultimate Worrior-a poster lian te pawh khawii maw laiah a la awm tha kiau maithei. “To be number one” hla a rawn lar tirh phat lai te kha chuan rual u zawk te khan sudden-a bu pawh an la chhiar zak zak lai a ni a. K’u Muanga leh Tumsangi ten “Tiam tlat e” an tih hma a ni.
Report this comment
October 7th, 2012 at 7:54 pm
Uite rim ilo nam tak tak ania’ng e!
(pil leh daih)
Report this comment
October 7th, 2012 at 8:42 pm
@81 Uite rim nam velo ho kha chu uipui rim nam turah khan ka lo ngai mai…
Report this comment
October 8th, 2012 at 3:02 am
Ka pa Mizoram zin hawng hian chithlum artui min hawn thin…Pa te zin haw hian thenawm khawveng naupang zawng zawng an rawn leng lut a chithlum artui kan han sem thin a…avin nuam thei tak..
Report this comment
October 8th, 2012 at 11:37 am
80′s hnulam in lo va tam ve rin aiin
.
Report this comment
October 8th, 2012 at 11:57 am
Tape casatte leh pensil inlaichinna tih lai khi ka duh lutuk….
Report this comment
October 8th, 2012 at 12:27 pm
uiiii…ka post ang ka tia,min post khalh daih
thla 2 ka ziak tawh a, ka la khawr pum thei lova, episode ang in ka post mai dawn mi ang ka lo tih vel tak a nia 
80′s hnu lam hret tan ka ziak a, remchangah ka rawn post ve ang..Zawl khawpui ‘Panlai Nun’ tren tren 
Post tha lutukkk
Report this comment
October 8th, 2012 at 6:35 pm
Hemi Generation-ah hian keipawh ka awm e …
A va lunglengthlek tak emm …
Hla thu chungchang khi : Tape Player atanga ngaithla-in, kan tinawn deuh chhen a, RAW tak maia hlathu kan han ziak thin te kha.
Nail Polish leh Cassette reel inlaichinna khiiii
Kei pawhin ka hmang nasa viau hman e.
Lehkhachaih …. SaaGoo + TubeLight Keh !!!
Pawisa neih tlem deuhin, Alu Leh Papawr Cheng Khat man ..
Alu Duli man leh Papawr Duli man
Sairawkherh X ang chi kha, Japan hlo nen, indona mawlh kha !!!
etc etc etc ….
Report this comment