mi(sual).com

He khawvel ram zau ah hian ngaihtuah tur leh thawh tur hi a tam khawp mai a. Thawk peih tan chuan thawh tur a awm reng a, thawk peih lo tan lah chhuan lam tur a awm reng bawk. Mitin hian ni khatah darkar 24 theuh kan nei a, a hmang tangkai thiam apiang an vannei a ni mai. Hun awl hman that nan engemaw han ziah ka tum a. Mahse ka hre tlat lova. Economics lam ziak dawn ila hriat ka nei der si lova, Politics lam ziak dawn ila Unit level ah pawh experience ka nei bawk si lo. Sports lam ziak dawn ila ka chikatna lam a ni bawk si a. Chuvang chuan khawvel milarte dinhmun, kan va hmuh pui ve loh lam hi thlur ila a tha mai awm e.

1. Spiderman: Tuten emaw an ti mathlawn loin Tangtial Man hi chu ka naupan lai atang tawhin ka ngaisang tawh a. Mahse a awm dan ka ngaihtuah hian ka rilru a tibuai tlat. Loh theih lohin zun chhuah chang leh ek chhuah chang a nei ve ngei ang a. Engtinnge a inthiar ve ang aw ! A kua tha lo-in daikal ngai sek ta se a thawmhnaw hi phelh a har hmel sia, chet chhiat a awl awm mang e aw te ka tia. Zun tamna te hi lo in palh ta se zun a rem awm si lova, zun te cheh palh ta se a huh thui duhin a lang hma awm sia. Chu mai nilovin hritlang ilo fahran neih nikhua in a hmai kawr mawlh mai hi. Hahchhiau vak ta se hnap nen-a hmaikawr chhung kha a awm nuai ang, tenawm duh fu ang. Sinus nei a nih phei chuan a hahchhiau sek anga. A hmaikawrin a dang zel bawk si anga a hrehawm tur zia mai chu. Chuvang chuan Spiderman nih chu ka peih miah lo.

2. Superman: Superman Sign te hi naupan lai chuan ka ziak thiam thei raps. Ani aia chak tur hi chu an vang khawp ang. Tuan rang si, chak si kha a nia. Ngaihsan loh chi pawh ani lo. Mahse a ni pawh hi a costume hi a thing ve hrim hrim. Midang chuan thawmhnaw dang hnuai-a kekawrte an hak laiin Superman chuan a chung zawkah a ha tut a, a style hi a thing ru tlat. A muffler bah lah hi hman atang khan a ngai reng hi a bat a. A in bat putar thak mai dawn ni awm tak a ni.

3. Batman: Ani pawh hi a style ngai reng hian a inthuam a. A ki te lah hi eng atan nge maw a hman tih pawh hriat loh hian a awm ve vu ringawt a. Chak hmel fu si hi an hnek thal leh huang zel bawk si a, zan vak an tih chi hi ni awm tak ani. A puan bah te lah hi a hnawk lo emaw ni rin ai daih hian a lo bat peih roh a. A style hi a happening lo tlat tawh.

4. Ironman: Ani pawh hi a thing ru tlat. A thawmhnaw thuitu nih a huphurhawm tawp. Khawl la a duh hraw viau mai thei a ni. Hetiang anga inthuam reng tur chuan in fit a ngai ngawt ang le. Chirhdiakah kal ta se a hniak a lang chiang duh ngawt ang. Tin, a hnung thak ta se hiah a buaithlak duh viau anga. Hiah lai tur ber hriat a har duh khawp ang. A reh na tur khawpa hiat tur chuan thirkut tha tawk a ngai anga. Taparia Brand ngat a nih loh phei chuan a hiahna thirkut zawk chu a bil vek mai ang, chumi a nih loh pawn JCB rawih a ngai ngei ang le!!!

Hetiang hian kan milarte nun hi a ti hrehawm ve khawp anga. Ram hrang hrang leh Hnam hrang hrang zingah an lo lar ve laklawh tawh si a. An tan chuan he khawvel hi a ninawm ngawt ang le. Chutih rual chuan keini lar ve lemlo te hi chu tu khaw kha hian min hreve lova. Tumahin min sel peih bawk silova. Kan nun hi a zalen halh mai a. Lar ai chuan lar loh te pawh hi a lo tha phian zawk a ni.

Similar Posts:

• Mipa leh hmeichhe mize maksak
• Mizoram Sumdawngte leh Bangkok
• Chawhpawlh II
• Bangkok?
• Vawiinah hming ziak ang!

Recent Posts:

• ‘Silai’ by Rian B. Anderson
• Zaidawh tak a zalenna dil!
• Ngaihtuahna ṭawng (Mind language)
• Nun Tihlimtu – Naupangte -II
• Mizote leh Sex (A ruh langin)

This entry was posted on Monday, October 8th, 2012 at 10:30 pm and is filed under HAHAHA. You can follow any responses to this entry through the RSS 2.0 feed. You can leave a response, or trackback from your own site.