mi(sual).com

“Airport ah chuan lo kal ve ngei ngei ang che ”

Kan inhnuaia a u (cousin) te chhungkua a rawn awmchilh lai khan kei chu pawl 9 chauh ka la ni a. Ka hmuhtirh chuan thingtlang tlangval cher chhe ve tak, hmeltha em em lo ni mai khan ka hria a. Zanah hian a rawn leng zeuh zeuh a, ka pa nen hian an inkawmngeihin an titi tui thei khawp mai. Lehkha ka zir loh laia an titi ka lo ngaihthlak ve thin atang chuan ka rin ang ngawta thing a ni lo tih chu ka hre thei mai a. Pawl 12 a zo tawh a, Technical Entrance pe turin a inbuatsaih mek thu a sawi a, a hawiher leh a tawngkam fel fak mai te, a mizia cool raih te chu ka lo chik ru leh neuh neuh thin.

Zingkarah coaching a kal thin a. A awmnate hi an hausak vak loh avang leh an chhangchhiat avangin chhunah chuan a tul tul a thawk ve mai thin. Ka pa hian titipui nuam a tih em avangin zanah hian leng turin a sawm zauh zauh a, a bak chu lehkha zir nan a hmang vek ti ila ka sawisual awm lo e.

Ka thiannu u nen hian class 11 leh 12 an kalho thin a, ka thiannu hian a thiamtheihzia te, a u in a ngaihsan zia te, class 10 ah pawh Mizorama langpha hial khawpa thiam a nih thu leh, class 12 ah pawh Mizoram puma pakhatna ni tura an beisei thute a sawi thin a. Chumi hnu phei chuan ngaihsanna mit nen ka thlir tan ta a, zinga a class kal turte hi ka room tukverh atangin ka thlir liam ta fo a.

Uangpui chang suh ila, Pathian zarah hmel leh pianah thiante pawhin an awh em em ka ni ve a ka kum phu lovin ka pumrua a lian a,  kan rualpui mipa harh hma deuh, min rawn bem leh chawttu pawh an awm ve deuh reng. Mahse ani chuan naupangchhe enin min la ni hmiang, mawihnaia min be ve zeuh zeuh tih loh chu kan inbe tam lova, a hmuh turin han awm vel thin mah ila a mitmei chu sawi loh, a mitsir takngial pawh ka chang lo a ni ber mai.

Second term kan exam dawn a, Maths ka thiam loh em avangin ka pa in tuition min pe turin a lo sawm a ni tih ka hriat chuan ka room ah ka lut a, ka lawm lutuk chu ka lam vel a A zirtir thiam bawk a, man pawh ka man chak hle. Ka room-ah kan pahnihin kan inzirtir mai thin a, ka inti confi lui a, a thute ka awih lo lui vel thin a. A lai ve thei hle a, engmah chu a sawi ngai lo nain ka bula awm chu nuam a ti ve tan viauin ka hria.

Kan innel dawn chauh a, an exam a, exam zawhah an khuaah a haw zui mai bawk si a. An result a chhuah chuan a college duh ber a chan thu leh, Computer Science and Engineering a zir tur thu min rawn hrilh ve vang vang a, ka lawmpui viau chungin phaiah a awm daih dawn avangin ka lo huphurh ve em em ringawt a.

First year a nihin pawl 10 ka zir a, pawl 11 ka zo leh a. A khat tawkin kan inbe zeuh zeuh a, a rawn haw chhoh changin an khuaah a haw tlang daih zel avangin kan inhmu ngai mang lo thung. Hmel hmuh tur awm lo na na na chu ka lo vei reng bik lo a, mahni tawka luck lai a lo ni ve bawk nen, ngaihzawngte pawh ka nei chho a, mahse a text ka hmuh changte, kan inbiak changte chuan ka ngaihtuah zui veng veng fo. Fifth semester exam chawlh an neih laiin zankhat riakin a lo zin zawk a, dar 12 vel thleng kan inkawm a, ngaihzawng a nei lo tih hre mah ila ka ngaihzia te, ka duhzia te chu ka hrilh ngam lo.

Campus placement-ah software company tha takah offer a hmu a, a zir zawhah thlakhat vel a chawl hman tawk tihin a hna zawm a ngai a. A kal dawn chuan a cousin te inah a rawn riak leh a, ka bula a awmdan a dang tawh a, naupangchhe en ngawt chuan min en tawh lo tih ka hria a, a chetziain lantir mahse engmah a sawi lo a. Keimah zawkin bul ka tan a, sawina hun remchang pawh ka siamsak a, mahse min lo nghak rawh tih bak a sawi si lo. Beisei nei si, rilru kim lo deuhin min kalsan a, khami zana ka ngei zia leh ka thinrim zia kha engtikah emaw ka la hrilh ang.

A hna a zawm kum cuan krismas bawr velah chawlh hmangin karhnih vel a lo haw ve a. Krismas leh kumthar inkarah hian min hmu turin a lo zin ve vang vang a. Engmah sawi duh si lova confuse deuha min siam thin avangin ka titau thin a, ngai em em mah ila a chang chuan ka lo be tha duh lo vel thin a. Chutia ka awm chang chuan sawi tur hi a’n hre lo thei em em khawp a, a che buai ve thei hle. Keipawh ka titau rei thei bik hlei lo a.

A hna a thiam bawk a, hotute duhsakna dawngin, a la thawh rei loh ngaihtuahin a kaisang chak a, a hlawh pawh a pungchho ve zel a. Company danga offer a hmuh thute, US-a thawh a ngaih dawn avanga rilru a la siamfel loh thute min hrilh a. Kuminah pawh krismas hmang tura rawn haw ngei a tum thu leh, kumdang ang lo taka an khuaa a hman loh tur thu te, keimah nen ngei hman a duh thute min hrilh a. Thil pawimawh tak min hrilh duh a neih, an chhungkaw dinhmunin a zir loh avanga a sawi ngam loh thin chu hmaichhan ngeia  min hrilh a duh thute a sawi a. Hman hmana sawi tawh tur, hunrei tak sawi ngam lo a a awm avangin ngaihdamte min han dil leh rih a. A sawi duh chu ka hrethiam mai a, mahse phone leh skype mai ni lo, a tak taka a sawi ngei hriat ka duh zawk avangin ka la nghak hram hram a ni.

Awle, Lengpui airport-ah ka awm mek a, thlawhna pawh a rawn tum tep tawh. Blue Corn ho hla Krismas Nang nen tih ka ngaithla a, ka helhhawlhin thil ka ei theih mang loh avangin ka ril a tam viau a, mahse an rawn thlen huna kan pahniha thil han ei dun te kha ka chak ve bawk si. Pawl 9 ka nih lai atanga ka rilrua ka lo beisei thin, kum 7 chuang ka lo nghah tawh chu ka nghakchhuak dawn ta. Hei lo liama Krismas thilpek hlu a awm chuang dawn em ni…

Similar Posts:

• Krismas leh kumthar vuakvet hlimthla…
• Pu Rokunga leh Krismas..
• Krismas lo thleng tur hi…
• Krismas Nang Nen
• Krismas ah haw ka tum ve bawk a

Recent Posts:

• Rosy K Remsangpuii- Hallelujah (cover) LIVE & UNPLUGGED
• Kan vaiin Zomi vek kan ni
• Hming inkawkalh te
• Vanlalsailova for MLA
• Bra maksak + dangdai zual te

This entry was posted on Thursday, December 20th, 2012 at 11:26 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.