2012 Mizoram

January 8th, 2013 10:13 am by chhana

Mizoram leh Assam in kal pawhna tur Serkhan to Bagha road siam mekah sum hmang dik loa puh annih avangin heng Lianchungnunga, E-in-C s/o Hranga Chaltlang Dawrkawn ( a pisaa man), B Lalthanpuia, Accountant s/o B Lalnghaka (L), Upper Republic ( a in sak mek naa man) leh Liansanga, E-in-C hlui s/o Suakkunga (L), Khatla, ( an ina man) te hi man an nia; mahse, an hriselna a that tawk loh hlauh avangin tan in an thleng lo.

Thu dawn danin, Serkhan-Bagha kawng, km. 75-a thui hi BRTF-in lâiin, blacktopping an tih vek hnuah kum 2004-ah Mizoram PWD kutah an hlan a ni. PWD chuan kawng enkawl nan 12th. Finance Commission atangin kum 2006-09 chhungin Rs. 6,00,50,000/- an hmu a, kum 2004-07 chhungin Mizoram Plan sum atangin Rs. 1,00,86,000/-, March 14, 2006-ah NEC atangin Rs. 30,00,000/- leh September 21, 2006-ah Rs. 45,00,000/- an hmu leh bawk.

Mizoram PWD chuan Serkhan-Bagha kawng siamthat nan hian Rs. 6,00,50,000/- hmang angin an insawi a; mahse Hmarphei Zirlai Pawl leh PRISM ten an enfiah hnuah PWD-in km. 12.80 chauh an siam tih an hmuchhuak a ni.

Heng an mi man pathumte hian an hriselna that tawk loh avangin hetiang hian doctor lehkha an neih avangin interim bail a chhuah tir anni. Aizawl Civil Hospital-a doctor lehkhaa a lan dan chuan, Er Liansanga (Retd) chu Dr Zothantluanga, MD (Medicine specialist)-in lehkha a ziahsak a, thisen sang nei, damdawi lama mithiamte enkawl reng ngai, châwlh hahdam reng mamawh angin a ziak a, Er Lianchungnunga chu Dr K Lalbiakzuala, MS (General surgeon)-in medical certificate pein, hriatna thazâm (nerve) tha lo a ti a, mithiam enkawlna hnuaia bed-rest turin ziah a ni a, B Thanpuia chu Aizawl Hospital & Research Centre-a Medical Officer, Dr H Lalrinmawia’n medical certificate pein, zunthlum leh thisen-sang nei angin a ziak a, medical certificate pek chhuah (August 16, 2012) atanga ni 30 chhung leave la turin a ti a ni.

Hetianga damlo anga mipuiina kan hriat si loh natna phuahchawp ang deuha kan doctor-te an chet avang hian CM pawh na takin a tawngchhuak nghe nghe a; chuvangin, doctor lam pawh nasa takin an infuih thar phah a ni. An mi mante hian thil diklo an ti a nih tak tak leh tak tak loh a hriat loh a; an ti sual a nih chuan na taka hrem tur an ni anga; chutih rualin an ti sual lo a nih erawh chuan a puhtu lam kan in enfiah pawh a tul ngei ang.

Saiha khawpui lûn lai taka bazar a kâng a, in 29 a kâng fai vek a, a kan kai hlauhthawnna vangin in sawm dang thiah a ni. Heng in kâng leh in thiah taka khawsa hi chhungkaw 57 a ni a, bungruate bâkah, dawr bungraw eng emaw zat a kâng ral a, mihring thi an awm lo a, mi pathum hliamin, vawk pahnih an thi. He kangmei rapthlak tak hi kângmei chhuah tanna in luahtu, Vanlaltlinga s/o. Zahlira, Saikhamakawn, Aizawl amiin in luah man a pek theih loh vanga a in a hal aṭanga lo pakai a ni.

Fire Deptt. leh mipuiten theihtawp chhuaha an thelh hnuah thelh mih a ni a. Kangmei chhuak vang hian Fire Deptt. a thawk Pu Zonunsanga, Pu Hrongia, New Coloney leh mipa naupang Dennis, Saiha Bazar venga mite an hliam a, Kangmei chhuak a awm tih hriat a nih veleh khatih hunlaia DC Pu Kunal leh a Subordinate Officer te chu a hmunah kal nghalin chhawmdawlna leh tanpuina awm thei turte an ngaihtuah nghal a, tlawmngai pawl hrang hrang hruaitute nen chhiat tawhna hmun hi an vil nghal a. Chhawmdawl hna ngawrh takin an thawk zui bawk a ni.

Saiha-a kangmei chhuak vang hian Chief Minister Pu Lal Thanhawla hovin Finance Minister Pu H. Liansailova; UD&PA Minister Pu Zodintluanga; Disaster Minister Pu N.K. Chakma leh Chief Secretary Pu Vanhela Pachuau bakah MADC, CEM Pu S. Khipo te pawh an thukhawm nghal a, chhawmdawlna awm thei ang ang an ngaihtuah nghal a. Bialtu MLA, Industries Minister Pu S.Hiato, UD & PA Minister Pu Zodintluanga leh DM & R Minister Pu Nihar Kanti Chakma ten Saiha hi an tlawh nghal bawk a ni.

Hetih lai hian Lengpuiah pawh in hal a ni a; Pu Lalnuntluanga In leh an thenawm Pi Lalngeni In chhawng thumte chu bungraw chuh hman lovin a kang ral vek. An ṭhenawm lehchhawnga Pu Lalthlamuana In a kan kai leh bawk avangin a bang ṭhenkhat tih chhiat a ni bawk. Hetianga pawikhawihtu hi hi Pu Lalnuntluanga In luah tu Zakapa’n an mutbu hal chunga a kalsan vanga chhuak a ni. Zakapa hi zu in mi niin Mizo mipui zu in ṭhin tam zawk tena an chin dan ang bawka zu sual nana hmangtu a ni.

Saiha in kang hi a harsat em avanga a tih niin a lang a; hetianga a chenna in a kang a nih chuan in luah man pek chu sawi loh tanpuina pawh a dawn phah thei maithei a; pawikhawihtu thinlung atanga ngaihtuah chuan sual lian tak mah nise hriathiam theih dan a awm. Thenawm in thleng thlenga a kang hi erawh a hisap bak a nih hmel a.

Sawi tak angina Lengpuia in kang khi erawh chu zu in sual nana hmangtu mi tamtak zinga mi a ni a; hriatthiam ngaihna a awm lo. Zu in pawi zia ngaihtuah phah nachang hrelo erawh Zofa inti fing pui pui te zingah kan la tam hle tho mai.

Hemi hnu lawk hian Mamit leh Darlawnahte in tam tak a kang leh a; Aizawl bazaar puia sa zawrhna hmun nasa takin a kang bawk.

Mizoram district paruka village council leh Aizawl Municipal Council huam chhunga local council inthlan chu ram pumah (chu chu Mizoram tihna, invauna leh intihthaihna a awm avanga Aizawl leh Kolasib district-a khaw 15 leh Tripura lamin an ram chan nia an sawi avanga ṭhulh Mamit district-a Phuldungsei Jampui khua te tiam lovin ) neih a nia; Aizawl khawpuia local council (LC) inthlanah vote nei mi 1,73,757 awm zinga mi 1,18,736 (68.33%) in vote thlakin LC 82 zinga 42-ah MNF-in hnehna changin, seat 522 awm zinga 263 an la a; Congress-in seat 225 lain, veng 29-ah hnehna an chang thung. MPC party-in seat 17, ZNP-in seat 14, PC party-in seat pakhat leh Independent-in seat pahnih an la bawk. Hetih lai hian, party anga chak bik awm lohna veng 11 a awm bawk .

Village Council inthlanah vote 3,90,983 awmin, 2,99,286 (76.54%) a tla a; Congress party chuan VC 285-ah hnehna an chang a; MNF-in VC 132, ZNP-in VC pahnih, HPC-in VC pakhat lain, independent candidate-te chakna khua/veng 20 leh party chak bik awm lohna 53 a awm bawk. He inthlana vote thlaktu upa ber chu Aizawl district-a Daido khaw pitar kum 105 mi, Thawlvungi a ni. Tun ṭum inthlanah hian khua/veng pali-ah vote inzat avangin ṭhumvâwr na a awm. Tin, ṭhalai, kum 25-45 inkar candidate an tam hle a, candidate tling zingah Raymond Vanlalruata (INC),kum 24 mi chu a naupang ber a ni.

Aizawl khawpui chhung Local Council inthlanna-ah hian eptu pawl MNF in hnehna an chang a, District 6-a VC inthlanna ah erawh rorellai pawl Congress an chak thung. Aizawl khawpui chhung Local Council 82-a inthlanna ah hian Rorellai pawl Congress chuan Local Council 29 chiah an chang a, Eptu pawl lian ber MNF chuan 42 ah hnehna an chang a, Party mal chak bik awm lohna Local Council 11 a awm bawk.

Aizawl, Lunglei, Serchhip, Champhai, Mamit leh Kolasib District-a VC 493-a Inthlanna neihah chuan Congress in VC 285 ah hnehna an chang a, MNF chuan VC 132 ah hnehna an chang thung a, ZNP in VC pahnih lain HPC in VC pakhat an la bawk a, Party chak ber awmlohna VC 53 a awm laiin Independent te chakna VC 20 a awm bawk.

Khawpui chhungah MNF chakin thingtlang lamah Congress an chak tihna a ni deuh ber a; hemi atanga a lan dan chuan khawpuiah mipui tam avangin khawpui mite duh zawng na na na chu ram pum ang pawhin an tling tlangpui a; hetih lai hian thingtlangah khawi ramah pawh mi cheng an la tam zawk zel tho avang erawh chuan inthlan leha tling tur awm hriat thiam an har ta hle mai a; hei hian inthlan lehpek chu a ti nghahhleh phah hle.

North East Games 2012 chu Chief Minister Lal Thanhawla’n Rajiv Gandhi Stadium, Mualpui-ah flag pawt pharhin a hawng. Games hawnna inkhawmah hian Assam Minister for Sports & Youth Welfare, Ajit Singh pawh rawn telin thu pawh a sawi ve nghe nghe. NE Games 2012-ah hian hmarchhak state-te an rawn tel kim theia; tihian infiammi 1,006 leh official 180 an awm ta a ni.

Hmarchhak pum huap infiamna kutpui ah hian Point 77 hmu in Mizoram chu pakhatna a ni.

Mizoram hnaih bertu Manipur chuan point 47 an hmu a, Assam in point 38, Tripura in 27, Arunachal Pradesh in 18, Nagaland in 16 leh Meghalaya in point 8 an hmu a, Sikkim in point an hmu lo thung. Mizoram hi Mipa Football-a a champion bakah Mipa Badminton, Mipa leh hmeichhe boxing, Mipa leh hmeichhe hockey, mipa Judo, Mipa Taekwando mipa table tennis, mipa leh hmeichhe wrestling, hmeichhe volleyball leh March Pass ah te team champion a ni bawk.

Hetih lai hian mi thenkhat chuan Mizoram champion kan lawm hle lai khan mi state in he games hi an hlut lutuk loh avangin participant an tir tlem a; chuvanga pakhatna ni mai mai ang ten min chhuah a; an ngeiawm duh khawp mai. Mahse, hetianga thil sawisel ching tak ho hian khawvel an ti famkim ve reng reng e.

NLUP hnuaia Bawng chi tha mi semchhuahte chu tam tak a thih bakah engemawzatin ke na hri an vei a, hei hi May thla bawr chhovah khan titi ti tamtu leh Politics-a inbeihna hmanraw lar tak a ni a; bawng kena hri vei leh rinhlehte chu a thlawnin AH & Vety Dept chuan damdawi a pe nghe nghe a ni.

Mizorama Bawng kena hri (Foot & Mouth Disease) leng, NLUP hnuaia bawng tha chi Haryana leh Punjab State atanga lak luhte atanga darh nia sawi chungchangah hian NLUP Implementing board chuan Regional Disease Diagnostic Centre, Guwahati-ah a endik tir a. Tunlaia bawng natna FMD hi phai atang bawng lak luhte rawn chhawm nilovin Mizoram a awmsa FMD Type ‘O’ vang ani an ti.

NLUP bawng chungchang hi July thla Assembly Sesison ah pawh sawichhuah a ni a, Calling Attention Motion hun hmangin Congress Member Pu R Lalrinawma chuan NLUP bawng thenkhat zingah thi silo, vulh zui tlak loh engemawzat a awm tih a sawi a. Pu R Lalrinawma chuan Sihphir khuaah NLUP hmasa-a bawngvulh thlangtute chuan an hlawhtlinpui hle tih sawiin chhungkaw 100 hnenah bawngpui 2 theuh pek leh a ni a, a tha engemawzat a awm laiin hnute sawr atana beisei awmloh te a tel a, hri leh thil dang avangin 41 lai a thi a, NLUP bawng bakah hian bawng dang 67 a thi tawh bawk a, hetianga bawngvulhtute vanduaina tawh mekah hian inpuhtawnna lam aiin engtinge harsatna tawk mekte kan chhawmdawl ang tih chu rang taka ngaihtuah a ngai a ni a ti. He thil chhui chiang tur hian Enquiry Committee pawh sorkar in a din zui ta hial a ni.

He thil thleng avang hian eptu lamte chuan rorel lai Congress chu nasa takin an dem nghe nghe. Congress lam tan inthlan lo awm turah an vote a heu dawn tih a chiang a; tan an lak nasat hle a ngai dawn hle a ni.

Bawngte hi talh/hralh phal a ni lova; nimahsela; an vulh chuan a dang a kaichhawn a hlauhawm si avangin Kolasib khaw pa pawn a hralh a; an man phah nghe nghe a nih kha.

Mizoram Bamboo Day hmasa ber chu Aizawlah hman a ni a, he hun hmanpuitu Chief Minister Pu Lal Thanhawla chuan Mizoram hmun za-a 44 vel mau hmun nimahse mau atanga hlawkna tel lamah thenawm state te kan la pha lo hle tih a sawi.

Bamboo Seminar cum Interactive Meet on Bamboo Technology, Livelihood, Export Potential & Prospects tia vuah he hun ah hian mithiam ten India hmarchhak state te tana mau leh rua hlawkpui theih dan tur an sawiho a. Seminar-ah hian Industries Minister Pu S.Hiato leh Forest Minister Pu H.Rohluna te pawhin thu an sawi a, he ni puala Exhibitionah buatsaih ah stall 20 chuang a awm a, Mizoram pawn atangin Sikkim Bamboo Mission leh Nagaland Bamboo Development Agency te pawhin stall an hawng a ni.

He hun hi kumtin Chapchar Kut zawh tuka hman zel tura ruahman a ni nghal.

Kum 1974 May ni 2 chawhnu lama Theiva khawhlui thlanmual atanga bo, NC.Chhaidy chu July ni 12 zan khan Theiva khuaah hmuah thlen a ni.

Amah hmuahna inkhawmah hian Theiva Branch MTP hruaitu Pu Vabei Khochhi chuan a chanchin tlangpui sawiin, Pu NC Khaila leh Pi V.Ngola te fa 3-na, NC Chhaidy chu, kum 4 mi a nih laiin, a khuangcher bo a, a bo atanga kum 38 zet a liam hnuah Myanmar ram Aru khua-ah a awm tih thuthang an dawn bawhzuiin a chhungte chuan an han zawng chhuak leh a ni.

An khua a thlen hnu hian mipuiin an lo lawm hle a; hetianga nasa tak maia an lo lawm tak siah hian amah rawn hruaitu chuan rilru thalo tak duhamna pu in Aizawl lama kalpuite a tum ut ut a; an phalloh avangin hruai kir leh phawtte a tum hial. Hetiang a nih avang hian a lo enkawltu mah nise a hnawhin an hnawt haw tawp mai a ni.

Champhai Night Bus Aizawl lam pan chu Keifang dai, BRTF quarry chimin kawng thlangah hnawlin mi 18 an thi a, thite zinga pathum chu naupang an ni.

Quarry chim hian bus hi kawngthlang metre 300 chuang zetah hnawl thlain, a hmunah mi 17 an thi a, hliam zinga pakhat chu damdawi in thlenpui a nih hnuah a thi ve leh a, hliam tuar mi 19 an awm bawk. He thil thleng hriat anih veleh Keifang khawtlang bakah Saitual, Rulchawm, Ruallung leh khaw thenawm a hria apiangten bus chetsualna lam hi pan nghalin chhanchhuah hna an thawk a, zing dar 3 vel khan accident a thi te leh hliamte buaipui hna chu an zo fel thei a, ruangte hi Keifang Community Hall ah dah khawmin, an kuang turte nen an buaipui a, hliamte hi Saitual Sub Dist. Hospital ah dahluh nghal vek an ni a, an zinga na zual 11 te chu Aizawl Civil Hospital ah phurh thlak nghal an ni.

Naupang kum 8 mi, a nu nena he bus a chuang Daniel Bawihthawnga chu he chetsualna ah hian a nu Siamchawipari’n a boralsan a, Lalthlengkima, Khawzawl Vengthar chu a fanu B.Sc zir tum interview tura a hruai Lalramthari kum 18 mi chuan a boral san bawk. Bus hi a chhe hneh hle a. Keifang daia quarry chim hian kawng a hnawhpin avangin a thenfai hna thawh chhunzawm nghal a ni a. chhiat tawh thu an hriat veleh bialtu MLA, Home Minister Pu R. Lalzirliana, Transport Minister Pu PC Zoramsangliana, Revenue Minister Pu JH Rothuama, Health Minister Pu Lalrinliana Sailo leh Pu TT Zothansanga MLA te bakah DGP Pu Kunal Singh leh mipawimawh dang thahnem takin chhiat tawhna hmun hi pan nghalin chhanchhuah hna thawktute an tawiawm a, Aizawl atanga tirh ambulance 3 hmangin hliam na zualte chu Aizawl Civil Hospital panpui nghal an ni. Bung Bangla bula thing tlu-in kawng thlangah taxi tlan lai a hnawl liam a, a chhung chuang mi 3 an thi a ni.

Hetih lai hian Bung Bangla quarry bulah taxi tlan lai chu an chhak lung tlain a den avanga thing tlu in a delh a; mi 6 chuanna Taxi chu kawngthlangah a hnawl liam.Taxi-a chuang zinga Pu Zorammuana, Serchhip khua chu a hmunah a thi a. He vanduaina thleng hi hriat a nih veleh Bawngkawn Police leh Zemabawk YMA te chuan a hmun an thleng nghal a. Hliam te hi la chhuakin Aizawl Civil Hospital an panpui nghal a, an thlen hnu rei loteah Zosangliana, kum 40, Serchhip khua leh Vansangzuali, kum 50, Thingsulthliah khua te chu an thi ve leh ta a ni.

Quarry chim chu sawi loh, a vela lung tla avanga hetiang pawi lian tham a thleng hi a pawi a; quarry vel reng reng han thlir hian an hnathawhna hi a hlauhawm em em a; fimkhur a ngai hle mai.

Zawlnuam BDO Office atangin cheng nuai 198 sing 4 sang 7 vel rukchhuah a ni a; a rutute hi Police te chuan man vek mahse tangkafai ruk chhuah erawh engemawzat hmuh let lohin a awm thung.

Pawisa hi BDO room a chest 2 chherchhuan chungnung zawka awm a ni a, chest hi chahbi hmanga hawn a ni a, a rutute zingah hian he office-a thawktute leh Bru hnam Tripura lama chengte pawh an tel a ni.

August ni 11 tlai lama leng chhuak Zothansanga kum 20 Zotlang leh a thiannu Ruth Lalawmpuii kum 18 Ramhlun North te chu an chin hriatlohin an bo a, an bo danah hian zeldin thubawl leh mumang neite an awm tak zel avangin titi a ti tam a. Vanduaina tawk chhungte pawh an khawngaihthlak tak zet a. An chanchin atang hian Zoram mipuiten zir tur kan la ngah hle tih a lang thei awm e.

Zothansanga leh a thiannu Ruth Lalawmpuii te bo tan ni hian ruah bawhawk nasa tak a sur a, ruahsur hma hian Dinthar leh New Capital inkar kawngah an leng a, ruahsur nasat avangin an dinna bulhnai culvert hlui hnuaiah an tawm hul lai hmu an awm nia sawi a ni. Mipuiten nasa taka an zawn hnu ah beidawngin thlahna hun hman a ni a, Mumang lama hmu te leh zeldin thubawla an chanchin sawizui a tam avangin mi tam tak rilru a buai a, Police ten August ni 27-a thuchhuah an siam-ah an bo hnu hian an cell phone atangin sms thawnchhuah niawma an tarlan te chuan mipui rilru a ti buai zual hle a ni. Hemi hnu August ni 31 khan Zonthansanga ruang hi Tlawng lui, Lengte kaiah hmuh a ni a, Ruth Lalawmpuii ruang erawh vawiin thlenga hmuh a la ni ta lo a ni.

Supreme Court in motor a sun control bel tihtawp tur tih thupek bawhzuiin, Lunglei DTO leh MVI enforcement staff-te leh traffic police ten Lunglei khawpuiah lirtheia sun control vuah khapna thupek zawm a nih dan an endik a; mi tamtak manin pawisa an chawitir.

Hetih lai hian, Tuipang atanga Aizawl lam pana haw MLA pakhat (Law Commission Chairman) motor, Bolero MZ-01 E-5353 chu a motor hma lam darthlalang chung lamah sun control a bel avang leh a sir darthlalang leh a hnung lamah puan a inzâr avangin traffic police-te’n Lungleiah lo tidingin, dan kalh a nih thu an lo sawi a; MLA chuan (chu chu R.Lalrinawma, Aizawl East 1 bialtu tihna) dan siamtute an nih thu sawiin, “Dan siamtu kan ni a; dante chu kan hria a, hei an phal loh chin chu kan pawtthla a lawm” tiin traffic police-te hming a laksak hnuah a tlân tlang ta mai a. Traffic lam hotute chuan mak an ti hle.

Hetianga MLA meuhin chaltlai taka kan hotute a chhang mai hi a demawm takzet a; inthlan leh lo awm turah pawh a vote a kiam phah hle in a rinawm.

Mizorama Hellicopter service tur chu mipuite leh Sorkar in tangkai taka an hman turin August ni 14 chawhma khan Thuampui helipad-ah Chief Minister Pu Lal Thanhawla’n a hawng.

Chief Minister chuan Mizoram chu ram kilkhawra awm, hmasawnna ruhrel tha neilo leh inkalpawh tawnna tha pawh duhthusamlo anih avangin helicopter service chu tul tak a ni a ti a. Mi pawimawh te chauh nilo, mi nawlpuite tan Hellicopter service hi thil tangkai tak a ni dawn a, chhiatna thlen thulha hliam leh tanpui ngaite chhanchhuahna atan te tangkai taka hman tur a ni ang a ti.

Pawan Hans Helicopter service hi Aizawl atangin khaw dang 9 ah te a service a. Helicopter hman man, kum khata cheng nuai 1308 hi Mizoram sorkarin zaa 25 a tum ang a, a bak zaa 75 chu central sorkar Ministry of Home Affairs tum tur a ni.

Tihian ka ngaihtuah mai mai; nakinah chuan thlawhnate hi taxi ang hrima hman tur a la awm hi ka ring tlat nia mawle. Tun hma pawn motor awm pawh tuman an ring bik kher awm silo a.

September ni 16 zing lam dar 8:45 khan Parliamentary Secretary Pu Chawngtinthang chu Kolkata Apollo Hospital ah thisen Cancer avangin a thi a; a ruang hi a tuk September ni 17 khan Aizawl thlenpui a ni a, ni 18 khan ropui taka vuiliam a ni.

Chalfilh bialtu, Kum 69 mi, Pu Chawngtinthanga hi August thla tawp lam atanga insawisel tan a ni a, September ni 8 ah Kolkata lamah inentir turin a kal a, Apollo Hospital-ah admit zui a ni a, thisen Cancer a ni tih hriat chhuah zui a ni. A natna a chak em avangin September ni 11 ah damlo nazual enkawlna ICU ah dahluh a ni a; September ni 16 zing lam khan a natna tuarchhuak zo lovin a thi ta a ni.

Law & Judicial, Parliamentary Affairs, School Education leh Higher and Technical Education changtu Parliamentary Secretary Pu Chawngtinthanga hi Mizoram Sorkar chuan ni hnih chhung suna hun a hmang a. Hnam puanzar inzar thinna sawrkar building zawng zawngah a ngul chanve-ah zar a ni a; hemi hun chhung hian sawrkar huaihawt intihhlimna lam chi reng reng chawlhsan a nih bakah a enkawl Department hnuaia office leh zirna in zawng zawngte chu amah sun nan hian khar vek a ni bawk.

SSA sum chungchanga Education Minister Pu Lalsawta leh MNF member Dr R Lalthanglianate thu inchuh chhui fiah tura Mizoram Assembly-in a din, Enquiry Committee Chairman Pu Lalduhoma chuan October ni 15 khan Committee Report chu Assembly Speaker Pu R.Romawia hnenah a theh lut a. Pakhat a thiama pakhat a dik ti ang deuhvin report hian a tarlang a ni.

Report hi Assembly Session December ni 11-a neih ah Enquiry Committee Chairman Pu Lalduhawma chuan a sawifiah a, SSA sum vawn danah Deptt. dang sum anga lapse a awm ve theih loh laiin, kum 2010-11 chhunga naupang uniform dawng turte chuan kumkhuaa an dawn theih dawn tawh loh avangin miin lapse a tih chuan lapse a ni thei a ni a ti a, Dr R Lalthangliana lehkha behchhan pakhat a lem nge a tak tih chungchangah chuan he lehkha hi Official Document behchhana buatsaih a ni a, a chhunga thu inziakte pawh Official Document nena inmil vek a ni a, dawt phuahchawp chu a ni bik lo a ni a ti. House Leader Pu Lal Thanhawla chuan Pu Lalduhawma thusawi hi tuihnihin, ‘Lal Solomona a lo piang nawn leh a ni ngawt a lawm le’ a ti hial a ni.

Hemi thu hi SSA sum central atanga local sunction ang pawh kan hmang zo lo in hman bante hi thawn let tur a nih si avanga hetianga lapse ta hi a ni a; a nihna takah chuan SSA sum hi a lapse ngei a; mahse, thuneitu lamin hetiang hian thu hi an rem ta mai niin a lang. MLA pahnihte hian a thiamlo zawng zawk chu MLA atanga banah an in bat a ni.

Chhungten Aizawl a Krismass thawmhnaw lei nan Rs 1,000/- min pe a; kan lei duh zawngte kha a lo tlawm phian si avangin Rs 500/- chauh ka hmang a; a dang zawng ka kir leh avangin ka pa chuan fel min tiin a lawm khawp mai. Chuvangin, SSA sum lapse pawh hi Central lam hotute chu an lawm hle ngeiin ka ring.

Durtlang Leitan veng mi pali heng: Roluaha (45), K.Pahlira (45), Thapa leh Chhetri Durtlang khua vekte chu khan Lungmuat khua atangin Tuirial luiah Sangha man turin an kal a; Roluaha leh K Pahlira hi pûmah an chuang dun a, Kanchha Bahadur leh Thapa te chu pûm dangah an chuang ve bawk a. Hetih lai tak hian sai kawlh in Rothuama leh Rohluha pûm chu a bei a, Kanchha Bahadur pawh tuiah a theh thla a, Thapa-a chu a insaseng hman a ni.

Bahadur leh Thapa hi hemi ni hian nilêng leh zan khuain thingkungah an awm a, a tukahah Ratu khuaah lutin an thil tawn chanchin an hriattir. Ratu khuaa mi tlawmngaite chuan Roluaha leh K Pahlira te chu an zawng nghal a, saiin a beihna bul lawkah Roluaha ruang hmuh a ni a, a tuk lehah Ratu khua thlenpui a ni. K Pahlira hi an hmuh nghal ve mai loh avangin a zawng hian Ratu khaw mipui bakah, Leitan atangin mi eng emaw zat an kal a; mahse sai hi a awmna chin hriat a nih loh avangin fimkhur a ngai a, mibo zawn hna pawh an thawh chak theih loh phah niin thu dawnna chuan a sawi. A tul thuta kâp mai turin police eng emaw zat Ratu lamah tirh an ni bawk. Sai kahhlum phalna hi Aizawl District Magistrate, Dr Franklin Laltinkhuma’n Cr.PC Section 133 tlawhchhanin a tichhuak a; tichuan, bo zawnna lama an kal laiin sai sual chu police-te nen intawngin, an kap hlum ta a ni. Ratu Divisional Forests Officer thupek angin, E&F Range Officer chuan sai ruang chu lâk a khap a, Ratu VCP pawhin sai ruang lak phal a nih loh thu hriattirna a tichhuak bawk. Environment & Forests department hotute chuan, mi pahnih tihlumtu sai chu Assam lam mite khawi, Mizoram E&F department-in a chhinchhiah loh a nih thu an sawi. Bo zawngtute hian hetianga an vah vel naah hian Tuirial dungah sai dang pahnih an hmu leh a, sai kawlh a nih ringin an rálkhèl hle a, mahse mihring a bei zui lo a ni.

An bo atanga ni linaah K Pahlira ruang pawh hmuh ve leh a ni. Hetianga mi pali, vai leh Mizo, pahnih ve ve a kal, a Mizo zawkten nunna an chant a mai hi a pawi a; pawi khawihtu a sai a pawh hi a ngeiawm angreng khawp mai.

An kum puan Ram leh hnam humhalh bawhzuia Central YMA rorelna sangin Autonomous District Council ten thuneihna sang an neih lohna tura hmalak nise tih leh hnam bil zirlai pawl din loh nise tih a rel chu Autonomous District Council huamchhung tlawmngai pawl hrang hrangten na takin an sawisel a. Mizoram Sorkar hotu lam erawh chuan Autonomous District Councilte’n thuneihna sang zawk an neih theihna tura hmalak zui zel a nih tur thu an sawi thung a ni.

November ni 17-a Central Young Lai Association Office Bearers, an president Pu LZ Tluanga hova thukhawm chuan an ngaihtuah a. YMA rorel dan chu pawi an tih thu sawiin, he thil hi hnam inpumkhatna tichhe thei a nih avangin hetiang thil hi thleng lo se an duh tih an sawi a. Hemi chungchang hi Central YLA, MTP leh YCA te pawhin Lawngtlaiah an sawiho zui leh bawk. November ni 16-a Hnampual-Students’ Joint Action Committee thukhawm pawhin YMA hmalak tum dan chu thalo an tih thu an sawi ve leh bawk a ni. Hetihlai hian Central YMA hruaitute chuan November ni 21 khan thuthar lakhawmtute kawmin District hrang hrang ten duh anga sum hman tur an hmuh loh lai leh kum 2008-a district pek tharte pawhin hna an la thawh theih loh laia Autonomous District Council te sawrkar laipui leh state sawrkarin sum leh pai thahnem tak a vur chung pawha UT leh Direct Funding an nawr chu tha an tih loh thu an sawi a. hetiang hmalakna hi Mizoram then darhna tura kawng hawngtu ni dawna an hriat thu an sawi thung.

Mizorama rualbanlote hamthatna tura hmalatu tur, Commissioner for Persons with Disablilities atana Sorkarin Pi B Sairengpuii a ruat chu rualbanlote tana thawktu pawl hrang hrang leh rualbanlo pawl thenkhatten na takin an dodal a. Lungawilohnate lantirin Sorkar chu a thu sut turin an ngiat a. Amaherawhchu, Sorkar chuan hei hi a kaltlangpui ta tho a ni.

Hetihlai hian Commissioner thar Pi B Sairengpuii chuan amah duh lotute hmalakna chu a tan chona nasa tak a nih thu sawiin, theih tawpa thawk tura amah turtu hmanraw tangkai a ni a ti a. Mizoram Secretariat Service Hotuten November ni 19-a Aizawl Press Cluba thuthar lakhawmtute an kawmnaah Pi Sairengpuii chuan Rualbanlote hamthatna tur hian tuna hmalak tawhna te bakah Central Sorkar atangin haichhuah belh tur leh hmalakna tur tam tak a awm a, chungte chu Mizorama rualbanlote tan theihtawp chhuaha bawhzui a tum thu a sawi a, tha taka hna a thawh theihna turin tuna thawm nei mek pawl hrang hrangte thurawn leh finchhuahna pawh a mamawh zel dawn tih a sawi.

Rualban lote hian Pi B.Sairengpuii hi a mimal takin an duhlo a ni lova; experience a neih loh vang maia duhlo an nih thu an tarlan avangin mi dem an hlawh hle. ‘A mimal taka an duhloh lemloh a hnu’ ka ti ve tlat.

Mizorama TV local channel pakhat LPS network chuan a vawi ngana atan comedian search hun an hmang a; hetah hian Lalnunsanga, Ramhlun North chu pakhatna niin lawmmanah certificate leh Rs 50,000/- a dawng a; mimal leh pawl ang pawhin lawmpuina thilpek thahnem tak a dawng bawk.

Lalnunsang a hi ruihhlo avanga ke tan ngai hial khawp ni mahse a nun hluite sima hetianga rawn invawrh leh thei hi a nih avangin mipui lawm a hlawh zual hle.

LPS network bawk hian zaithiam thlanna ‘Youth Icon’ tiin thlanna an nei leh bawk a; hei hi erawh a tum lina a ni thung. Icon a thlan tak hi H.Lalrempuia Chhiahtlang niin lawmmanah certificate leh Rs 100,000/- dawngin ani pawh hian hmun dang atangin lawmpuina thahnem tham tak a dawng bawk.

A ni hi icon ni thei tur awm khawpin a zaithiam nangiang reng a; hmeltha tak ni lo mahse mi tamtak chuan ‘a zaithiam em avangin a hmeltha tawh e’ an ti.

Hei aia la duhawm mah zawk chu LPS network bawk hian Krismass vuakvek laia mi harsate Krismass hmanna turin ‘Samari mitha’ tiin thawhlawm an dawh a; hetah hian mi thahnemngai thahnem takin pawisa fai an thawhkhawm a; heng mite hi Samari mitha tih tlak tak chu anni reng mai.

Tichuan heng pawisa tlingkhawmte hi mi harsa 200 chuang zette hnenah Rs 5,000/- leh a aia tam deuhte in an pe hlawm a; a dawngtute lawm hmel hmuh an nuamin hnuk an ti ulh zawk hle.

Hetih lai hian tunlaia thalaite internet kaltlanga inkawm khawmna lar tak facebook a group intelkhawm engemawzatte pawhin hetiang hian mi harsate tanpuina an thawh khawm hlawm a; a tihzia in hetiang mi inphalte Zoramah engemawzat kan la awm hi a thlamuan thlak takzet a ni.

Kum tam tak chhung halpuah leh halmawi chi hrang hrang nen Krismass leh kumthar kan hman thin hnuin sorkar leh mipui tangrualte duh dan angin Mizoram mipuite chuan kum 2011 chu halpuah leh halmawi lam chi tellova hmangin kum thar 2012 chu hlim tak leh thlamuang takin kan hmuak thleng leh a. A lehlam zawng taka ngaihtuah chuan hetiang thawm hriat tur awm ta reng reng lo mai chu a khawhar thlak letling a, damlo leh tar chaklote tan erawh thil lawmawm tawpkhawk a tling thung. Kum 2012 Krismass leh kumhlui thlah liam zan pawh khan boruak a muanawm a. Sorkar buatsaihin thalaite intihhlimna hun Aizawl veng hrang hrang leh District tin khawpuiah te buatsaih a ni a. An thawm pawh a ngaihnawm hle a ni.

Halpuah hal hi kumtin a hming chuan khap a ni ve ziah a; mahse, tuman sim tange kan ti tak tak lemlo niin a lang. A puak dur dur reng tho mai. Hetianga kan khap rem thei mai hi enge a chhan? kan tih chuan a khap tuten an hal loh miau vang a ni. Zu kan khap a; a rem thei silo. A chhan chu a khap tute berin an duh ve miau si alawm.

December thla kan chuangkai a, Mizorama kohhran lian ber Mizoram Presbyterian Inkhawmpuilian, Synod vawi 89-na Aizawl Chanmari Biak Ina neih a ni a, an rorel langsar zual zinga pakhat chu Mizorama chanchin tha thlen ni (Missionary Day) tih danglam chungchang hi a ni awm e. Pu Buanga leh Sap upaten Sairang an lo luh ni 11th. January 1894, kum za chuang zet kan lo pawm tawh chu 15th. March 1891 zawk pawm tura rawtna chu pawm a ni a; he ni hi Rev. William Williams-a’n Kutbul lui (Tlawng, Hortoki bul) a rawn thlen ni nia hriat a ni. Synod hian Rev. William Williams hì missionary a ni lo tih an hai lo a, ram rawn enthla (survey) a rawn kal zawk ani tih hi an hai lo. Amaherawhchu, gospel tract te a lo sem ve nual avangin, Mizorama Chanchintha rawn thlen hmasa ber tuah ngaiin, Mizorama Chanchintha thlen ni angah an pawm mai a ni. Hetianga thil a kal ta hi a buaithlak dawn chauh niin a lang. Nakinah thil intihre tak tak an lo chhuak zel anga; kan history hi an la khawih phuailuai vak ang tih a hlauhawm khawp mai. Hmasa nih duh leh hmahruaitu nih duh vang ringawta he thil hi ti an nih chuan a ropui lo khawpin kohhran neitu Isua ngeng a chhun khawp ang le.

Synod hian hetiang hian pawm ngawt pawh ni se Kohhran dangin an pawmpui rih siloh avangin a ram pum anga official taka Missionary Day a hman chi chu a nih a rinawm lo.