mi(sual).com

Vawiin Atangin Aizawlah Tui Sem Chhunzawm : Governor-in Tur Hraina Lui A Tlawh
Aizawl, August 28 : Aizawl khawpui chawmtu Tlawng Lui pawhtu lui te tura hrai a nih avanga tui pump chhuahsa paih a nih avanga tui sem khaihlak chu vawiin atangin sem chhunzawm a ni dawn. PHE department-a Aizawl Water Distribution Division Executive Engineer Lalhmachhuna chuan tui sem chu vawiin atanga a pangngaia chhunzawm a nih tur thu All India Radio Aizawl a hrilh.
Ni thum dawn tui sem a lo khaihlak tawh avangin a pangngaia kal leh tur chuan hun a la duh deuh dawn tih sawiin mipuite tui ren turin a chah. Zirtawpni tlai khan Governor Lt.Gen.(Retd) M. M.Lakhera Serchhip zin hawng chuan Reiek kai bula Tlawng Lui fintu lui te tura hraina hmun a pan nghal a, PHE hnathawktuten rang taka lui te tuikawng an khar a, tui pump khawl sate an paih ruak hman vek tih a hriatin hnathawktute a fak. Governor tawiawmtu PHE Minister Tawnluia chuan a hun takah hnathawktute an che hman tiinmipuite tan chi-aina tur a awm loh thu a sawi a, tui thar leh thianghlim sem tur tan lak nghal a niin a hma thei anga a pangngaia tui sem pawh a kal a beisei thu a sawi.
Tlawng lui fintu Chengkawl/Arcadia lui hrai chungchangah hian mi 3 man an ni a, heng mite hian lui hrai nana an hman rannung thahna devisulfam 35 bur pahnih police-ten an hmu chhuak. He chanchinbua kan rawn ziak tawh ang khan Forensic Science Laboratory chuan Chengkawl lui hraituten an hman hi rannung thahna hi khat hlauhawm tak Endosulfan a ni an ti thung a, hetiang tur hi mihring leh nungchate tana hlauhawm, mihring taksaa a luh chuan a chambang reng thei nia sawi a ni. A tirah lang chhuak mai lo mah se taksaa a awm reng avangin cancer pawh a siam thei nia sawi a ni. Hetiang khawpa hlauhawm ni mah se lui tui chu a tam leh a luan chak avangin darkar hnih hnuah chuan a thianghlim leh tawha ngaih theih niin mi thiamten an sawi.
Ningania Chengkawl lui hraitu mi pathum Vanlalzawna, 30, Lalthlengkima, 21 Maubawk ve ve leh Lalmalsawma, 19, Tripura, Arcadia enitu, Bungkawn Aizawl awmpui chu inrinni khan Magistrate hmaah hruai an ni a, police-ten an dil angin darkar 24 chhung police kuta an awm a phalsak.
Governor-in Tur Hraina Lui A Tlawh
Zirtawpni tlai khan Governor Lt. Gen. (Retd) M.M.Lakhera Serchhuip zin hawng chuan Reiek kai bula Tlawng Lui fintu lui te tura hraina hmun a pan nghal a, PHE hnathawktuten rang taka lui te tuikawng an khar a, tui pump khawl sate an paih ruak hman vek tih a hriatin hnathawktute a fak. Governor tawiawmtu PHE Minister Tawnluia chuan a hun takah hnathawktute an che hman tiinmipuite tan chi-aina tur a awm loh thu a sawi a, tui thar leh thianghlim sem tur tan lak nghal a niin a hma thei anga a pangngaia tui sem pawh a kal a beisei thu a sawi.
Tlawng lui fintu Chengkawl/Arcadia lui hrai chungchangah hian mi 3 man an ni a, heng mite hian lui hrai nana an hman rannung thahna devisulfam 35 bur pahnih police-ten an hmu chhuak.

MZP in Baffacos chungchang chhuichiang dawn
Aizawl, August 28 : MZP Gen.Hqrs. chuan mautam tam tuarte chhawm-dawlna tura sawrkarin scheme a siam Baffacos tangka chu a dawng tur ni lo tam takin an dawng nia hria in an chhui mek a, vawiin chawhma dar 11:00 hian an Pisa Pui-ah Executive Meeting neiin Baffacos chungchang hi an sawi ang.
Baffacos pawisa hi Aizawl leh District Capital chhunga mite tan dawn ve theih a ni lo tih a kaih-hruaina ‘Guidelines’ ah a chuang a. Hetiang a ni chung hian sawrkar hnathawk te, mautam tam pawh lo thleng se a nghawng hauh loh turte pawhin an dawng tih an hriat avangin chhui chian tul an tih thu MZP president P.C.Laltlansanga chuan a sawi.
‘Kum 2004-2005 kha chuan department thenkhatah chuan guidelines a la awm mumal lova, hemi chhunga Baffacos tanpuina dawng zingah sawrkar hnathawk leh a dawng awm lo tak tak dawng an awm a. Kum 2005-2006 guidelines thar chuan thingtlang mi chauhin an dawn tur chu khawpui mi, mi awm thei tak tak leh sawrkar officer ngeite pawhin an dawng a ni,’ MZP president chuan a ti.
Baffacos sum hman dan hi Right to Information Act hmangin MZP hian sawrkar atangin a dil chhuak mek a. Chhanna thenkhat duhthu a sam loh avangin deptt. thenkhat chu an zawt nawn leh mek tih P.C.Laltlansanga chuan a sawi.
An hmuh chhuah tawh chin-ah ringawt pawh deptt. then-khatte’n sum an hman chhuah dan-ah sawrkar officer Baffacos tan-puina dawng te, mautam pawh lo thleng se a tuar ve lo tur, khaw khata mi awm thei takte pawh an tel a. Ruling party unit leh block hruaitute zingah dawng an tam hle niin MZP president chuan a sawi bawk.
P.C.Laltlansanga chuan, ‘Baffacos sum diklo taka hman a awm thu hi MZP chuan a vei hle a, hetih lai hian chanchinbu-ah te a lo lang chhuak ta bawk a. Deptt. hrang hrang 15, Baffacos scheme kalpui dan hi chhuiin RTI Act hmangin kan duh ang te kan lakhawm mek,’ a ti a. ‘thingtlanga MZP Branch leh Sub-Hqrs. hruaitute hmangin Baffacos dawng lo tura ngaih dawng an awm em, eng ang chhungkua nge an nih, engti anga sum lalut nge tihte thlengin enfiah (verify) vek kan tum a ni,’ a ti bawk.
Baffacos sum hman dan chungchangah hian Mizoram Pradesh Congress Committee Vigilance Cell Chairman Lalrinliana Sailo, MLA chuan kum 2 chhunga cheng nuai 5,000 lai MNF sawr-karin Baffacos sum a hmanral dan atang hi chuan mautam tuar tur miretheite tan bei tidawngtu mai a nih thu sawiin, ‘Baffacos sum hian miretheite iptepui a thleng lova; MNF hruaitu mi tlemte in an insem fai zel a. Central-a Congress kaihhruai UPA sawrkarin mautam tuar tur kut hanthawktute chu tampui tuar lova, min chhanchhuah tumin sum tam tak min rawn pe a, MNF sawrkarin a lo tichingpen zel a, kawng laih nan te, building sak nan te leh sawrkar leiba rulh nante a hmang zo vek tawh a ni,’ a ti.

Lunglei District hmasawnna tur sawiho
Zirtawpni khan Pu Lalthangmawia Vandir, I&PRO Lunglei chuan a Office Chamber-ah Lunglei Media te ko khawmin, Lunglei Dist. hmasawnna tur hrang hrang te a sawipui. Pu Lalthangmawia chuan chanchinbu-a thuziak te chu School naupang ten uluk taka chhiar in, inzir nan ber an hmang a, thudik leh rintlak tarlan fo a tul a ni a ti. Hemi ni hian chanchinbu hmanga Lunglei khawpui chhunga hmasawnna tur chi hrang hrang tarlan chu, mipui lam atanga thlawptu an tlem thin thu sawiho a ni.
Lunglei Journalist Association Pu H.Lalthansanga pawhin thu sawiin, “Tunhma atang tawhin LJA ten Issue lian tak tak kan su tlang tawh a. Tunhnaiah pawh Fly Over bridge hna chakloh thuah leh kawng dangah hmalak a ni a. Hetiang a mipui tan hma kan lak hian, chanchinbu-ah min thlawpna thu emaw, min ti chak zawnga support tu leh ziaktu tumah kan awm ngai lo hi a pawi a ni” a ti a. Mipuite chu phun phun ringawt lova, article ziak peih ve deuh tura a beisei thu a sawi bawk.

Assembly Speaker-in Hmar Zirlaite : Mahni Tawng Zahpui Lo Turin A Fuih
Inrinni khan Hmar Students Association Joint Headquarters buatsaihin Vana Pa Hall-ah Freshers Social-cum-Seminar on the Development of Hmar Literature neih a ni a, Mizoram Assembly Speaker Pu Lalchamliana’n a hmanpui. Pu Chama chuan zirlaite chu mahni pianpui tawng zahpui lo tur leh tihmsawn a, tithang zel turin a fuih a, chutih rualin mahni chhehvela cheng hnam tawng leh ziate hriatthiampui turin a chah. Assembly Speaker chuan tun lai khawvelin HIV/AIDS a buapui chu Mizoramah pawh buaipui ve mek a nih thu sawiin he natna dan kawngah tun aia inzitirna pe uar turin Hmar Students Association a chak a, zirlaite chu hna zawn kawngah an ngaihtuahna thlak a, Mizoram mai bakah Mizoram pawnah hna zawng turin a fuih a. Zirnain a tum ber chu mahni kea din a ni tiin zirlaite chu taima leh thiam tuma zir turin a chah. He Freshers Social leh Seminarah hian Sinlung Hill Development Council Chairman Pu Lalmalsawma Darngawn khual zahawm a ni a, Rev.v Hrilrokhum Thiek, President, Hmar Literature Society, Haflong leh Pu Thangnuntluong Ralsun, Chairman, MIL Monitoring Committee, Guwahati-ten paper an buatsaih ngaihthlakna leh zirhona neih a ni.

Similar Posts:

• Mizo Aw News : 27 Sept.
• Ka pu Zoramthang, hei hi Zoram mipuite hlawhtlinaah i la pawm ngam zel em le?!
• Mizo Aw :: News 30
• Mizo Aw News :: Aug 31
• Tun hi Baffacos chu sem hun a ni lawm ni?

Recent Posts:

• ‘Silai’ by Rian B. Anderson
• Zaidawh tak a zalenna dil!
• Ngaihtuahna ṭawng (Mind language)
• Nun Tihlimtu – Naupangte -II
• Mizote leh Sex (A ruh langin)

This entry was posted on Monday, August 28th, 2006 at 11:18 am and is filed under News. You can follow any responses to this entry through the RSS 2.0 feed. You can leave a response, or trackback from your own site.