(He article hi thangtharte zinga thu leh hla thiam ber-a chhal ngam, Dârrokima ziah a ni a. Amah rawn miah lo-in ka rawn dah tawp….Pawi a ti ngam chuang lo ang, min hlau em!!! Hmel-ah chhuan tur nei lo mah se, thu leh hla-ah erawh ka thianpa hi ka chhuang teh a nia….)
Mizotena kan thil chin tha lo deuh mai pakhat chu, mi hlawhtlingte chanchin sawi nuam kan tih em em ruala hlawhtling tura an kawng zawh kan hmuh kân tlat thin hi a ni. Hlawhtlinna hi kawng kama chhar mai tur a awm lo va, vawi leh khata neih thut chi pawh a ni lo, a thawha thawh chhuah chi a ni. Hei hi Mizo thalaiten kan hre lo fo niin a lang.
Infiamnaah te, entertainment lamah te khawvel mi ropui tam tak an piang tawh a, khawvela hming chher tura an thawhrimna te hi a namai lo. “An pianna hmunin a zir bik em a ni…,” hi kan ti liam leh puat mai thin a, an thawhrimna lam hi kan hmuh kân fo thin. Khawvel ram zau zawk thlir kher lo pawhin hemi chungchangah hian harhna kan mamawh hle niin a lang. Kan Mizo pa chhuanawm tak tak, kawng hrang hranga mi hlawhtlinga sawi tur te hi han chhui chiang ila, tu nge nuamsa taka lo seiliana, awlsam te-a ropuina tlang chhipa chuang ta? An vang angreng khawp mai. Hrehawmna leh retheihnain duhtawka a rah hrual hnu, harsatna namenlo kar atanga khaw enga lo chuang chhuak ta an ni deuh vek asin!
Harsatnain a hmeh daih zawh lohte hi an hlawhtlin hnuah ‘mi vannei’ kan ti leh mai thin a, chu vanneihna chu kan lawh ve phak lohah ngaiin, puan ven sawi chhin tum chuang miah lovin kan ral thlir ringawt mai thin niin a lang. Pathian hian kan ban phak tawkah vanneihna min hunsak vek a, chu vanneihna leh hlawhtlinna hlawh chhuak tur chuan finna te, tha leh zung te, chakna te min pe a, a bak zawng chu kan mawhphurhna liau liau a ni ve tawh. Engati nge malsawmna dila tawngtai nachang hre si hi malsawm tlaka kan thawhrim peih si loh? Hlawhtlinna thlahlel em em si hian engatinge hlawhtlinna kawng chu kan melh peih si loh? Mi thawkrimte malsawm thintu kan Pathian hi kan zah lo hle tihna a ni mai lo maw?
Han inngaihtuah chiang mah teh, hlawhtlinna nei tura Pathian hnena malsawmna dil ngam tur khawpin i thawkrim chiah em? Thuthlung hlui hunlai ang khan van atanga Manna lo tla chhar mai tur hi a vang tawh teh a nia! Pathianin nangmaha theihna a dah, malsawmna a pek che kha chhawr peih lo leh chhawr ngam lo khawpa thawhrimna i tlachham a nih chuan malsawmna dila i tawngtaina khan ui cho boh ri aiin awmzia a nei tam bik hauh lo vang. Kan Pathian hi malsawm tlakte malsawm thintu a ni si a.
Similar Posts:
- Nang Malsawmna Ni Ang Che
- Ti tlat hi kan nia
- 2008 – “Mizoram tan malsawmna kum”
- Mihring hian eng chen nge a hriat
- Thlasik Malsawmtu
(Y) 
November 5th, 2006 at 10:42 am
Darrokima thuziak hi a ngaihnawm ka ti thei thin kawp mai. Hemi thuziak kher ni lo, Lengzem magazine-a a ziah thin ho kha. A nuihzatthlak thin top.
Pu Sandman, tun hnaia YMA Chanchinbu-a 1-na a lakna article kha i han dah lang thei em aw, Plizz-in!! Tuna mi hi chu a ni lovin ka hria.
Report this comment