mi(sual).com

Chhungkaw reithei tak leh harsa tak kara fa 12 ngawt mai han neih chu Robert Lee Parton leh Avie Lee Owens te nupa tan chuan lungngaih chang a tam duh ngei ang le. Pa berin vaihlo chingin chhungkua a chawm a, in daih lo tak karah nu ber lah bawrhsawmna in a tlakbuak reng bawk si. Smokey Mountain, Tennessee khua a an chhena in chhe tak leh tawp ve tak, room pawh awm mumal lohna ah chuan chhangchhe takin an fate 12 nen chuan an khawsa ho a. An retheih avang chuan an chhungkua chu an vengte nuihzat bur mai an ni a, an fate lah chu school lama an pawlpuite chuan an hmusit em em a ni. An inchhung ah chuan sumin a leithei bungrua tha hmuhtur a awmlo a, mahse a chhunga chengte erawh chuan sumin lei theih loh hlimna thinlung an nei thung a ni.

Tum khat chu nu berin a fate 12 zinga a 4-na a duat fal bik deuh Dolly Parton chu an puanthem neihte chuan a kawrchung tur thuisak a tum ta a. Mite angin puanthan duh zawng leina tur a nei ve loh bakah, khatih hun laia an khaw puanthuithiam phei chu kum 9 mi lek Dolly Parton hian hriat ngaihna a awm lo hrim hrim a. A tan chuan a nu kha, he khawvela a mi rinber a nih bakah a kawrchung thui tur atana tlin ber a nih tih erawh hrilh a ngailo. Thil inhmeh hre tak leh a fate inhmeh tur zawng hre em em mai nu a neih chu tun thleng hian Dolly hian a la sawi bang theilo. A thiante chuan dawr ami an duh zawng thuamhnaw an lei thei a, mahse vaihlo chinga chhungkaw chawm fanu mai Dolly hi chuan naupang te anih lai atanga an chhungkaw harsatna hrethiam tak mi anih avang in a chantawk ah a lungawi thiam em em a, hausak leh retheih hi sum ngahah a innghat lova, mihring chhungril ngaihdanah a innghat zawk ani tih hrechiang em em tu a ni tlat a ni.

Nu berin mahni fa 12 zinga pakhat chauh mai thuamhnaw tur han thuisak bik tak mai chu, a nu hian Dolly Parton hi a duat bik tih a chiang a, Dolly pawh hian a nuin a duat bik zia chu councelling ngai leh tawh chuang lovin a chiang a. A kawrchung thui dan tura sawi tur pawh neilo, a inhmeh zawng tur tak ngial pawh la hrelo mah nise, a nuin a tana kawrchung a thuisak turah rinna a nghat a, mite kawrchung ang ni pha dawnlo mahse chumi hak hlan baka thlakhlelh chu he khawvel ah hian Dolly hian a nei chuanglo. Puanthem rawng chi hrang hrang mai uluk taka thlepa an zai vel lai te chuan a nu sirah chuan phur tak mai chuan alo awm ve a, a puan tlangte chu puanthem mai mai ani tih hriat miah loh tur chuan uluk taka thlep in mawitak maiin a nu chuan a thui a, puanthuina khawl an nei lova, lo nei pawh nise nu mawl ve tak leh reithei em em mai Dolly nu hian a hmang thiam chuang lo ang. Kut lawng veka a thui avangin thil awlsam a ni lova, mahse Dolly chuan nghakhlel takin zan rei tak tak thleng leh muthlu bawk bawk chung tein a nu kawrchung thui lai chu a vil ve thin a ni.

Zankhat chu a nu in a kawrchung tur a thui sak pah chuan a fanu duat em em Dolly chu Bible thu a hrilh a, Josefa chu a unau dangte aia a pa in a duat bik zia thu te leh a duat zia lantir nana kawrchung a pek bik thu te a hrilh a, A pa in Josefa chu a duhsak bik em avanga a unau ten thikin tui chhunchhuah khur a an paih thute leh sala an hralh tak daih thute an hriat chuan alo hlauthawng ve em em ringawt a ni. Dolly unate pawh hian engemaw zawng tak chuan a thik ve ngei a, kawrchung thar a neih dawn avanga thik erawh an nilo, mahse midangte aia a nu in atana hun a hman tam bik avang chuan an thik ru ve em em a ni. A ruka sih te leh kal paha a sam a han keh zeuh te chu tawk ve thin mahse, chung zawng ai chuan a kawrchung thar tur chuan a rilru ah hmun a chang lian zawk tlat a ni. Nghakhlel tak maia a kawrchung zawh hun tur a chan reng hnuah zan khat chu an chaw eikham hnua an chhungkaw kim thepthawp laiin a nu chuan puanthem rawng chi hrang hrang maia a fanu chuam tana a thui ‘coat of many colors’ ngei mai chu a inhmeh nge hmehlo tih enchhin turin Dolly Parton chu an haktir a, phur tak mai chuan a ha vat a, phelh leh nachang hre lek lo chuan an inchhung ah a vei kual pui a, a unau dangte hnenah chuan a inhmeh leh hmeh loh zawt ringawtin hun a hmang a, an darthlalang neih chhun banga an khai ami ah chuan inen tumin thuthleng te a dawh belh a. Phelh tawh tura a nu in a tih hun pawh chuan phelh phal lovin a ha lui ta tlat a, hne khawpa a unau dangte pawhin ‘i inhmeh lutuk’ an tih hnu chuan a tuk a school a kal huna a hak atan a nu chuan a dahthat sak ta a ni. Krismas urlawk zana an unau hova tlaivar an tum tuma mutchhuak hmasaber thin kha, hemi zan hi chuan a muhil thei ta tlat lo, a tuk school kal hlan chu a nghak hlel hle a, schoola a thiante zinga a kawrchung mawi tak hmuh hlan chu a nghakhlel em em a. School a kal chhung zawnga hemi zan ang em em a school a kal chak tum hi Dolly Parton nun ah hian a awm leh tawh lo a ni.

A tuk khua chu alo var ta ngei mai a, tuk dang ang bawk chuan khua chu a thiang nuam hle a. School kal hun alo ni a, phur em em maia school kal tura a insiam vel te chu a nu tan chuan hmuh hrehawm a ni hauh lovang le, khua chu kawrchung hak na tur khawpin vawt lem lo mahse a nu chuan a kawrchung thui thar sak ngei mai chu a hak tir ta a. Kawrchung thar par mawi em em mai chu ha mahse a school uniform hlui tak leh bel kai hnem ve tawh tak leh a pheikhawk tret tawh leh hlui ve tawh tak mai nena a haktel a ngai tho si a, mahse chung a uniform hlui tawh tak mai chu hmuh kanin a kawrchung mawlh mai chuan a ti phur em em a, puanthem thuikhawm mai mai ani tih chu hre mahse tunlaia dawr changkang tak tak kawrchung man to te aiin atan chuan a hlutna a nep chuanglo. School kal tura a chhuah dawn chuan a nu chuan a bianga fawp chungin a thianten khawiami nge tia an lo zawh pawh a, ka nu min thuisak ania tia chhang tur te chuan an thlah liam a, School naupang dangte motor nalh tak tak nena an chhungten an rawn thlah na kara Dolly Parton in a nu kawrchung thar a thuisak ngei ha chunga ke a school lam phur taka a pan vang vang lai chu Avie Lee Owens tan hian hmuh a va nuamin a va han hlimawm dawn em.

Tennessee khua a Canton’s Chapel School naupangte chu dan pangai angin school tan hma chuan an classroom ah te an inkhawm ho vel a, a then lo thlen belh zel lai leh naupang thenkhat an lo inkawm dar dar lai chuan Dolly Parton chu thilthar nei tih hriat fahran mai chuan a thiante bulah an vei kual a, tuin nge a kawrchung thar chu hmu hmasaber, mi in an lo en duh em, mawi ti an awm em tih vel chu a lo mithla reng a. Mi zawng zawng mai chuan amah chu mawi tise tih chu a duhthusam a ni, mahse tuman an lo chu-e-kha-e lova, mipa naupang phakhat bulah chuan “Thianpa ka kawrchung thar hi han en teh” tiin an hrilh tawp anih chu. Mahse, chu naupang lah chuan “A thar maw! pawnchhe hlawmkhawm ava ang ve” alo ti duh chauh a, naupang pakhat chauh thusawi anih avangin mahni inhnem chawpin midang chuan mawi an ti awm ngei si a tiin a kal san ta a, chu veleh le midang ho pawh chuan an kawrchung chu rawn nuihzatin aamah chu an nuih rawn ta, a kawrchung tharah te chuan rawn khawih velin a thente chuan an kawk a an nuihzat ta em em mai a ni. Dolly Parton chu hrilh hai takin a thiante bulah chuan a ding reng a, chu veleh a kawrchung an thui laia a nuin Josefa pawh a pa in a duat bik em avanga kawrchung a pek chanchin a hrilhte kha amah nuihzat tute chu hrilh an tum ve a mahse ngaithla duh reng reng an awmlo. A kawrchung thar chu kawk chungin an lo nuih dur dur a, mittui parawl hluam chung chuan a kawrchung hak lai chu an en vang vang a, company lar hming a in ziak lova, dawr changkang tak atanga lei anih loh zia chu tlangaupui ngai miah lovin a hmuna awm zawng zawngte chuan an hre vek. Puanthan mawi tak atanga puan thuithiamin a thui a ni lo. Puanthem fawmkhawm atanga thui mai mai mah nise chu kawrchung chu Dolly tan chuan a nuin a hmangaih zai a lantirna anih avangin eng ang pawhin a kawrchung chu lo nuihzat mahse chu chuan a kawrchung mawina leh a hlutna chu a tih nep pha mawlh silo. An zirtirtunu chuan rawn hmuin naupang dangte chu a han hau a, Dolly Parton hnenah chuan i kawrchung kha phelh la room dangah i va dahtha daih dawn ami tiin a han zawh chuan, a nu in hun tamtak seng leh uluk tak maia ama tan liau liau a alo thuisak chu chhuang em em in, midangte nuihzat avang mai maia a hlutna bo thei a nilo tih hrereng chung chuan a phelh duh lova, school kal chhung chuan a kawrchung chu a ha ta a ni.

School banah pawh chuan a kawrchung duh em em mai nen chuan ke bawkin a haw leh ta a, kawnga a kal laite chuan a thianten an nuihzah em em laite kha a mitthla ah chuan rawn lang nawn leh thin mahse, Josefa a pa in a hmangaih zia lant tir nana kawrchung a pek nen danglamna sawitur hrelo khawpin a kawrchung chu a vanlam hawi chungin chapo taka pharh chungin Pathian pawhin a hlutpui ve ngei a nih tih hre reng chungin inlam panin a haw ta a ni. Hun hrehawm tak lo tawng mahse chu a hun tawn atang chuan kawng lehlamah malsawmna ropui tak a dawn pha ta zawk a, Country Music a hla tha tak mai Coat Of Many Colors tih hla amah pawhin a tun hnua a duh em em mai chu a lo pian theih phah ta zawk a ni.

Source : www.zarkawt.com

Similar Posts:

• Ka coat of many colors ve chu!
• I Will Always Love You
• Coat suit
• St. Paul’s School naupangte hi
• Hmangaihna vang a lo ni

Recent Posts:

• Hmangaih CFL
• MIZO SAKHAW BIAK DÂN LEH A TOBUL ~ 2
• Burma-ah ka zin Part – III
• Mizo Technical Graduates (Architects)
• Hmangaihna 131

This entry was posted on Monday, January 22nd, 2007 at 9:49 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.