mi(sual).com

Khawnvartui pawl hma, Information Technology in heti taka kan nunphung a la khawih danglam hma kha chuan Ram leh Hnam humhalh hi Kumpuan ah nei kher lo mahila him tawk hle rihin kan la inhria a. Khatih lai, Kawl Ar ringawt atchilh pawl pawh khaw khata khawte run tham zet kan la awm fer fur lai kha chuan Bin Laden-a hming pawh kan la hre lova, Chakma Issue pawh chuti takin kan la buaipui lova, HPC helpawl ten kan mut an la tih tui loh phah chuang lova, Bru raltlan leh Hmar raltlan tih te phei chu buaipui an la ngai lo hrim hrim.

Tunah erawh chuan Khawvel hi a vir takzet a ni tih a thu mai nilo, a tak ngeiin Zoram Khawvel a Zofate pawhin kan lo nunpui ve ta a, he Khawvel hi Information Technology thiamna in Global Village a a chantir hnu, Paleolithic Age atanga Neolithic Age, Computer Age leh Space Age thlenga min hlankai hnu hi chuan kan kawtkai ngeia Vai zing nilum ai tam ta lutuk te pawh ngaimawh nachang kan lo hre ta a, dan lova Mizoram rawn lutru atanga Raltlan te thlengin kan buaipui a lo ngai ta. Tichuan… “Hnamdang hmusit mai lovin, thianah i siam zawk ang u” tih hla te pawh a ki dang deuhva sak a lo ngai ta a, hnunglama mit nei reng chunga thiana kan siam loh avangin Chakma District te hial pawh a lo piang a, Wayne Cole-a’n “Muan ah muan luat a awm a, engkim hi virpilh theih a ni” a lo tih ang deuh khan kan thla a lo muang thui lutuk lek lek tawh a ni.

Kum Sangbi thar, 2000AD a lo herchhuah meuh chuan ram pum huapin kan thangharh tan a, kan chanvo leh dikna te pawh humhalh duh nachang kan lo hre ta a, a pawng a puia hnamdangin min rawn chimral huk lohnana British hovin min awp laia Inner Line Regulation min lo siamsak te pawh hmachhuan nachang kan lo hre tan a, YMA leh MZP anga Inner Line Permit Check nachang te kan lo hria a, sorkar thlengin kan tithangharh… a ni ber. Chuvangin tun tumah chuan Inner Line Permit(IL) chungchang hi chiang deuh zawkin lo chhui ila:

Inner Line Permit History…

Sap hovin Mizote min rawn run a, min awp hnu khan Mizo te chu hnam tlem te, Culture hrang daih nei leh hnamdang te pawhin an la pawlh dal loh nia min hriat avangin kan ral thum mai hlauvin Bengal Eastern Frontier Regulation 1873 chuan Mizote chenna chin chu Excluded Area(Humhalh bik ram, phalna nei lova tlawhpawh theih loh ram) ah min lo puang a. Hei hi 11th Oct. 1875 atang khan hman tan(Practised) a ni. Hetih rual hian Nagaland leh Arunachal Pradesh te pawh Excluded Area a puan an ni ve a. 1930 khan Mizote chenna bika Excluded Area in a huamchin ramri siamthat a ni a, 1933 ah Chakna ho vangin siamthat a ni leh a(Vide Notification No.2106 AP/9.3.1933). Heng Excluded Area a puanna hmunah te hian Inner Line Permit tel lo chuan luh theih a ni lova, sorkar hnathawk te tan erawh ILP hi a ngai ve lo a ni(Vide Notification No.PLA 393/70-PT/1 Dated 7.9.1970). Sorkar hnathawk te tan hian ILP ngai ve lo mahse Identity Card, an thlalak chuanna ngei an neih a ngai ve thung(Vide No.F.22015/54/94-HMP Dated 21st Sept.’95).

Tunge ILP pechhuak a, Renew thei?

Bengal Eastern Frontier Regulation 1873 Section 2 in a sawi angin Aizawl, Kolasib leh Mamit Dist. a Deputy Commissioner te emaw, an hnuaia thawk officer, an aiawha an ruat tupawhin ILP hi an pechhuak(Issue) thei a, an Renew thei bawk. An ni bakah hian Lunglei, Saiha, Lawngtlai/ Serchhip leh Champhai Deputy Commissioner ten emaw, an hnuaia thawk Officer an ruat tupawhin ILP hi an Renew/Extend thei bawk a, amaherawhchu ILP pakhat hi vawi 2(hnih) aia tam Renew/Extend theih a ni lo(Vide No.22015/54/94-HMP Dated 31st Aug.’99).

Vai chahchhuak/Sponsor-tu mawhphurhna

Phai Vai chahluttu te reng reng hian Mizoram sorkar lakah intiamkamna fel tak an neih vek a ngai a, chung zingah chuan a mi chahchhuah, ILP neitu chu Mizorama a cham chhunga a khawsakdan that leh that lovah te, ILP a thih huna Renew sak kawngah te, a mi chah chhuah chu a ma hna chauh thawhtir tur leh a chhawr duh tawh loh hnu a a ILP, Deputy Commissioner hnen a thehlut a, a mah pawh thawn haw nghal tur te, a ma hna nilo, midang hna thawhtir lo tur leh heng a intiamkamna zawng zawng te hi a khawi emaw ber pawh a zawm loh chuan Bengal Eastern Frontier Regulation Section 4-na in a sawi anga hremna tawrh ngei a inhuamna te hi a pawimawh zual te chu an ni(Vide No.2215/54/94-HMP Dated 30th Nov.’95 FORM hnungah he intiamkamna thu hi tarlan a ni).

ILP nihphung(Conditions & Restrictions)

1)    ILP neitu Mizorama a chen chhunga a khawsak that leh that lovah a Sponsor tu chuan mawh a phur anga, a mamawh tawh loh hnu a Mizoram atanga thawn haw te, thuneitute thu anga thiltih leh a ILP, DC hnena pek let leh te a Sponsor tu mawhphurhna vek a ni.
2)    ILP neitu chu a ILP in a phalsan hna chauh atan chhawr a nih ngei loh chuan Sponsor tu mawhphurhna a ni.
3)    Sponsorship hi tu hnenah mah Transfer theih a ni lo. Sponsor tu ngeiin ILP chu a Renew sak tur a ni.
4)    Concerned DC in ILP neitu awmna hriat a duh hun huna Information pek chu Sponsor tu mawhphurhna a ni.
5)    ILP neitu chuan a Sponsor tu hna chauh a thawk tur a ni.
6)    ILP Renew turin ILP Valid tawp hma ni 7 ah dilna thehluh tur a ni.
7)    ILP neitu chuan a ILP chu thuneitu ten an dil chuan a pechhuak/entir tur a ni. Tin, sorkar hnathawk tupawh Concerned DC in a ruat ten en turin an dil thei bawk.
8)    ILP thuneitu in emaw, Sponsor tu in emaw thuneitute hnena Information diklo a pek chuan BEFR 1873(As amended in 1930) dan angin emaw, dan ang dinglai angin emaw thubuai siamsak theih a ni.
9)    ILP pekchhuah a nih hnu karkhat chhungin ILP neitu chu a hnaih ber Police Station ah amah ngei a in report tur a ni(Vide No.F.22015/54/94-HMP Dated 30th Nov.’95 FORM ‘B’ hnungah Conditions & Restrictions chungchang hi tarlan a ni).

Tute nge ILP check thei?

MZP leh YMA te hian an thei ve em?
A chhanna tawi ber chu “Thei tehreng mai” tih a ni! Vairengte Check Gate bum a Mizorama rawn lut leh ILP dam hunchhung(Validity) tawp tawh, a ruk arala Zorama la chambang engemawzat an awm thei tih hria in Mizoram sorkar chuan thuneitute nen mi tupawhin ILP Surprise Checking an neih a phal a. Amaherawhchu, an ILP Check Result te reng reng Mizoram sorkar Home Deptt. leh Police Hqrs. lama report turin a hriattir thung(Vide No.22015/54/94-HMP Dated 21st Sept. ‘95).

I dawt ngam leh dawt rawh!

Bengal Eastern Frontier Regulation 1873 in Excluded Area a a puan rama ILP nei lova lut leh ILP dam hunchhung tawp tawh, a ruk arala Mizorama la chambang si te chu  Inner Line Regulation Section 3-na in a sawi anga kum 1 chhung lungin tan emaw, Rs.5,000/- chawitir emaw, a pahnih a hrem kawp emaw theih a ni a. Mahse, he dan hi paih chuang si lova siamthat(Amended) a ni leh tawh a, tahchuan thla 3 chhung lungin tan emaw, Rs.500/- chawitir emaw, a pahnih emaw a hrem kawp theih a ni a. Dan bawhchhiatdan Case a zirin he Dan siamthat hma a hremna na zawk pawh hi hman theih tho a ni.

Inner Line Permit nihphung tlangpui kan sawi ta a, kimchang rih lo hle mahse heti chin chauh hmang pawh hian Dan lova Mizorama awm te lakah huai takin hma kan la ngam turah ngai ila. Tu ten emaw hlawkna beitham te te beisei vanga Vai tawngpawng tan tlut ho thin te pawhin an dinhmun dik tak an hriat phah ngei i beisei phawt teh ang. Sawi tur tam tak a la awm anga, engpawhnise, ILP hi a nihdan tur ang taka hmana, kalpui nise chuan ngaimawhawm thamin heti tak hian Zoramah Phai Vai an puang lovang tih a chiang reng a. Chuvangin kan kalphung dik lo te, dan lova Mizorama chambang te ngaimawha YMA an ni emaw, MZP an ni emaw, khawii Pol. Party pawh nise ILP, a nihdan tur anga kenkawh a nih theihnana hma latu apiang te thlawp ve mai thin hi a Mizo a, a Kristian a, Ram leh Hnam humhalh duh tak tak te mawhphurhna leh tih makmawh a ni.

He kan ram zim te hi Chakma Pa sawn min rawn humhalhsak dawn hauh lova, Khawvel ram ropui ber a nih vang ngawtin US sorkar khu a rawn inrawlh ringawt dawn hauh lo bawka, Bengali pachal phei chuan min humhalhsak lo chiang ngawt ang! Chuvangin keimahnin kan humhalh a, kan enkawl a ngai a. A bik takin zirlai te phei chuan ram leh hnam nghahfak an nih hre renga Ram leh Hnam hmangaihna rilru leh humhalh duhna rilru an thanhnan a pawimawh hle a ni

THELH LOH HMUITAWK also submitted:

ILP (Indian)kan state dangte rawn luhphalna hi a siam man a tlawm lutuk state dang hotan pawh .R.A.P (Foreigners)ho rawn luh phalna pawh hi a siam man a tlawm lutuk an ram pawisa nen a ngaihtuah chuan chuvangin khawih danglam ngai ka hmu lo he mi chungchangah hi chuan a buaithlak ta ber chu heng phalna siam nan leh tihnun leh na tur a tan te hian hun tam tak an paih pha thin a a rei thei viau mai khual khua a mi te tan chuan a nghah chhung.He mi atan hian a rang thei ang bera siam sak dan hi awm thei se ..chu chuan an (problem ) harsatna an chhuanlam ber tihkianna kawng tha tak a ni thei ang….enge in ngaihve dan le….

Related:
HC order duh loh lantir nan Protest Day

Similar Posts:

• ILP Chungchang
• Vai mistiri bawk : A thawn haw lam ve thung !
• ILP hlih dilna PIL hnawl a ni
• Khampat.com is back
• Domain renew hi kan ngai pawimawh lo em ni?

Recent Posts:

• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)

This entry was posted on Wednesday, June 25th, 2008 at 10:39 am and is filed under Ask | Help | Suggest, More than words. You can follow any responses to this entry through the RSS 2.0 feed. You can leave a response, or trackback from your own site.