Thlamuanna chu rilru hahdamna, vei nei loh leh engthawl taka awm theihna hi a ni mai awm e. He thlamuan lohna khawvela awm te zingah hian mahni thlamuanna duh lo kan awm kher lovang. Thlamuang taka min awm tir thei lo tu chu thil tam tak a awm ka ring, kan chenna leh boruak tawn a zirin a danglam viau thei awm e. Mahse kan duh ber thin chu Thlamuang taka awm a ni fan.
Min ti thlamuang lo thin tam tak zingah harsatna kan tawh thin- hna lam, hrisel-lohna, huatna, awhna, huphurhna te hi a tlanglawn pawl a ni awm e. Lal Isua hnung zuitu te leh zui lo tu te kan danglamna hetah hian a lang thin.
Enge kan danglam na chu?
Upa Lalthankima sawi ka hrereng thin, vawi khat chu Bible calendar a lei a, chumi kum chuan lemziakthiam ten an lemziak, Remna leh Thlamuanna tih thupui hmanga ziah calendar ah chuan a chuang a. January thla ami ah chuan dil mawi em em mai, thing leh hnim buk mawi tak tak ten an hual, ransa leh sava chitin ten thlamuang taka chumi hmun an luah lai lem a ni. A lem en reng reng khan a thlamuan thlak ngawih ngawih a, rilru a ti hahdam sawng sawng thei a ni.
Buaina leh harsatna a lang lo. February thla ami ve thungah chuan Tuikhawhthla rapthlak tak mai, lui te khawkrawk leh lung kakkarak kara tui in hlap kual lem hi a ni. Chuta thing leh mau lang te pawh chu thli na takin a chhem lai tih hriatreng hian an kur zuk hlawm mai a. Thing pakhat zarah erawh thung chuan Thuro pakhat hi a bu chheh ah thlamuang tak mai a a bawk vang lai hi a chuang tel a, a kiang vela thli leh tui so bulh bulh te chu hlau awm reng in a lang lo.
Min hualtu boruak leh kan khawsakna ten buaina min thlen loh chuan Thlamuanna chu kan nei thin ti rawh u, chu thlamuanna chu Thlamuanna mak a ni hran lo, khawvel mi tin ten an neih ve tho a ni.
Mahse,
February thla painting a Thuro, a hual vel tu rapthlak tak tak ten an chim lai pawha thlamuang taka a awm theihna ang ‘Thlamuanna’ khi, mihring ten kan mamawh leh duh chu a ni tlat mai. Lal Isua zuitu-te chu hlauhawmna leh harsatna, hrehawmna leh tawrhna karah pawh Thlamuang taka awm theihna; kan zui Lal Isua hian a tiam a nia maw le. Chu chu he khawvel hian a hrethiam thin lo. Thihna hial tawka chatthla mek te pawh in Thlamuang takin an kawng zawh tur chu zu zawh thei a maw le. Chu thlamuanna, Thlarau Thianghlim pek chu i dawng tawh em? Kawng khat chauh a awm, Lal Isua zui tlat hi – Thlamuanna mak dawng tur chuan.
