mi(sual).com

Hman deuh tawh khan College-ah, ‘Forest of Happy Dreams’ tih thawnthu hi kan zir thin a. Stephen Hall-a mizo awmho khan kan inlehsiak laih laih thin a. A tawp atawpah khan, ‘Tawnmang mawl manna buannel ram’ tih khan pawm a hlawh ta ber a. Hei tun tum pawh hi, ‘The Happy Suit’ tih a ni leh mauh mai a.

Saptawng zir ve deuh eih eih tan chuan ‘happy’ tih leh ‘suit’ tihte zotawnga han leh chu, tet deuh laia ‘a aw b’ insawisiak ang maia “awl lutuk !” han tih liam leh puat mai awm tak hi a nih vei nen ka let thiam mang thak lo mai nia. ‘Hlimna Suit’ han tingawt ila, a fuh meuh si lova, ‘Hlimna Kawrchung’ han tih dawn lahin ‘kekawr’ a tel bawk si ! I bei buai lo law law zawk teh ang. ‘The Happy Suit’ chu le.

Tokyo khawpui sir khata dawr pakhat kawngka chungah chuan kutziak ning nel ang reng zet hian, ‘K.WATANABE, CUSTOM TAILOR’ tih hi fiah ang reng fu hian a inziak a. Chumi hnuai chiahah chuan “We make happy clothes” tih hi a inziak bawk a. A zotawng chuan ‘Hlimna thawmhnaw kan thui thei reng e’ tihna ang a ni ber ang chu.

‘Hlimna Thawmhnaw ?! Mak dangdai tak hi a ni ringawt. Kum thum chhung teh meuh chu ‘he dawr hi ka la bihchiang ngat ang maw le’ tiin ka rilru ka siam thin a. Mahse, ka hun neih danin a zir loh avangin ka lut hman lo leh thin a. Kum 1960 nipui lai a ni a, US Air Force-in min tirh avanga helai hmuna rawn chuangchhuak hi ka ni a. US lama ka haw leh hma ngeia chu ‘hlimna thawmhnaw’ thuina dawr chu enfiah ngei tumin hei vawiin hian an dawr kawtah ka ding mek a nih hi.

Dawr chhunga ka pen luh rual chuan kawngka-a an thil khai chu a inkhawng ri rial rial a. Ka lut thawm hria chuan dawr chhung kil lam deuh atang chuan an Japan kawrtungsei (kimono) ha chung hian putar tetakte hi a lo penchhuak a. A lu-ah chuan kelsam a to nasa tawh hle a. A mit zim san mai chuan ngun fe hian min han melh a. Ka taksa lian leh hrawl zet mai chuan puanthan engzat chauh nge a mamawh dawn tih hriat tum niawm fahran hian min en ngun a. Chutah, chibai min buk ta chauh a.

Min chibaina chhangleta ka kun ve zawh chuan, kawngka luchung lam kawh pahin, “Papasan, ‘happy clothes’ tih hi eng nge ni a awmzia ?” tiin ka’n zawt a. Ka tawng thawm hria chuan inchhungril lam atangin nula hmel ngaihawm zet mai hi a lo chhuak a, hlim hmel pu sarh chunga, “Captain San, Midori ka nia,” han tih pah chuan nalh fahran hian min han nuih saih a. Chutah, “Ka pa thawmhnaw thui apiang hian a hatute hnenah hlimna leh vanneihna a thlen theih nan ka pa hian duat leh uluk takin a thui thin a. I ta tur ‘happy suit’ thuitir ve i duh em ni?” tiin min han zawt a. Tu mihringin nge chutiang khawpa suit tha chu neih duh lo tehlul ang le?

Ka sipai boot hrawl zet mai leh kawrchung hak lai te chu ka phelh a. Putara chuan stool-a chuang meuhvin min han teh vel ta a. Chutia kan inteh lai chuan Midori chuan puanthan tel chi hrang hrang hi a rawn lachhuak bawk a. Chutia min teh lai chuan chu dawr chhung chu ka lo melh kual vel a. Kawngkhar kianga hal rimtui an hal atang chuan Jasmine rim a nam cham cham a. In kil khatah chuan bang nghengin dawhkan sei tak hi an hung bawk a. Dawhkan chungah chuan Putara sumdawnna hmanraw chi hrang hrang pawnthem te, rin ngilna leh sakawrbakcheh te a let phang a. Chumi kiangah chuan ke hmanga puanthuina khawl tar tawh hmel zet hi a inhung bawk a. Midori puan tel rawn chhawpchhuah atang chuan vutbuak rawng tle zak mai hi ka thlang a. Ninga hnua ka suit lam tura lokir leh tur chuan kan intiam a.

Ka suit lam tura kan intiam ni chuan ka va kal leh ta a. Ka han ha chhin vel a, an pafa chuan hlim hmel pu sarh chung hian min buaipui a. Mahse, a kawrchung chuan han chet vel zawngin ka zak leh awm bawrah min phuar tlat mai a. A kekawr lah chu a chhing mah mah bawk a. Putara chuan an tawngin eng eng emaw a sawi luam a. Midori chuan min han lehsak a, “ Lungngai duh reng reng suh, i duh dan ang thlap ni turin kan lo siamtha dawn nia a ti a nih chu,” tiin. Chumi ni atanga kar khat a vei hnu, Tokyo chhuahsan tura kan insiam buai vel lai takin Midori chu ka suit thar keng chung chuan kawngka-ah a rawn lang hlawl a. Kan hmanhmawh em avangin suit chu ka han inthawlh chhin thuak thuak a, “Hmm..tha lutuk,” ti chungin Midori chu a man ka pe a. Midori chuan chibai min buk nana kun pah hian, “Captain San , mangtha le. I happy suit chuan hlimna leh vanneihna rawn thlen mawlh che rawh se”, tiin duhsakna min hlan a.

‘Hlimna leh vanneihna’ chu khawi lamah! Chu suit ka hak leh hmasak ber tum chuan a thui chu ka pian nen a inmil thlawt lo tih ka hrechhuak ta a. A kekawr chuan ka han thut zawngin ka mawngah a phuar mar tlat a. Ka kawrchung lah chu a darah ka tawt tlat mai bawk a. Japan-ho sumdawn thiamna tawngkam nalah ka tawlhthlu a, a lo thlawnin sum ka khawhral mai mai ni hian ka hre ta a. Ka suit chu ka hlip a, chhuatah ka thehthla thlawp a, kan nu chuan rum nghat pah hian a chhar a, almaira-ah a khai tha ta a. Chutah chuan, kum sawm chuang teh meuh chu hak lohvin a inkhai ta a.

Kum 1970-a ka hna atanga ka chawlh hnu chuan Albuquerque (al-ba-khar-ki tia lam tur a ni – J), New Mexico-ah kan nupain awmhmun kan bengbel ve ta a. In thar kan luah hlim chuan kan thil neih zinga kan hman vak loh leh tangkai vak lo te, kan thawmhnaw hlui neih ang angte chu miretheite tana a thlawna ei leh in leh riahna hmunte an buatsaihna hmun, Albuquerque Rescue Mission tan kan vawm khawm a. Chumi hmun enkawltupa Rev. Seaman Krup-a Truck-a kan load lai chuan ka rilru-ah ‘Happy Suit’ kha a lo lang a.

Thawmhnaw khaina ata va lachuakin Rev. Krup-a chu ka hlan a. Ani chuan, “Ngawiteh hei hi zawng a la thar tha em mai,” tiin a la hreh deuh a. Kei chuan, “Vawikhat chauh ka la ha a, mahse i kutah ka hlan duh a ni,” tiin la mai turin ka nawr a, a la tel ta nge nge a. Chumi tum chu ‘Happy Suit’ ka hmuh hnuhnun berna tur leh a chanchin ka hriat tawpna tur ni ngeia ka ngaih avangin eng emawti tak hian ka thawveng huai a. Mahse, a tawpna a la ni ta lo cheu mai.

Happy Suit ka tihral kum- kum leh nipui laiin Rev.Krup-a chu ka hmu leh ta hlawl mai. A truck hlui tawh tak khalha kawtthlera a lo tlan phei bap bap chu ka lo vai ding a. Inhmelhriat nawntir pahin, “Min hre tawh meuh lovang a,” ka han ti a. Ani chuan nui sang chung hian, “Hre teh reng mai. Suit min petu kha i ni lawm ni ?” tiin min han zawtlet a. ‘Suit min petu’ tia min la hriatna chu mak ka ti letling a. “Aw ni e, a ha tawk tu emaw i hmuh ngei ka beisei ngawt a..” ka ti a. “Hmu teh reng e a,” tih pahin tihian min hrilh ta a. “Kha suit min pek atanga thla hnih-thum emaw liam hnu khan kan mission-ah pa pakhat, sang leh pian thiam tak mai, khaki kawr chung leh kekawr bal zet mai ha hi a rawn teilut hlawl mai a. A hming chu Paul-a a ni a.

Car hralhna hmuna thawk thin a ni a; In nuam tak leh ngaihzawng pawh duhawm tak a nei thin a. Tunlai thalai tam tak duhaisam ang hian a khawsa a ni ber mai. Mahse kum 1969 khan a sumdawnna-ah harsatna a rawn herchhuahpui ta tlat mai a. A sumdawnna tlakchhiat rual chuan a rilru hah tihreh nan zu inah a tuan ta a. A zu in chuan a nun a khawih chhe chho ta a, kum khat chauh a vei ang tihah chuan neih reng a nei tawh lova. Zu hmunah a hun tam zawk a hman miau avangin engtitiha Albuquerque rawn vak thleng nge a nih pawh a inhre lo.

“Hun rei tak kan ti ti a. Min kalsan dawn chuan ngun taka inngaihtuah hmel pu chung hian ral hla tak thlirin a ding vang vang a. A kekawr leh khaki kawrchung hak bal zet mai ka thlir lai chuan i suit min pek kha ka hrechhuak ta zawk mai a. Ka va la chhuak a, ka pek hnu chuan ani chu rang takin bual inah a lut a, a va inthlak nghal a. Suit chu atan renga thuitir ni awm tak hian a inhmehin a ha tawk a. Lawmthu pawh sawi lem lova chibai min buk hnu chuan min kalsan ta a. Lawmthu sawi lo mah se a hlimzia chu a hmelah a langchhuak thung a.

“Ni tam tak a liam hnua ka Office-a Paul-a a rawn teiluh leh hlawl tum chuan mak tiin ka meng rang fe ta ve ang. A in met fai vang a; a sam bawrchhawr zet pawh kha a khuih mam zaih mai a. Chutah kan mission a rawn vah luh ni atanga a khawsak chhoh dan chu min hrilh ta a. Khatia suit ha-a kawtthlera a vakchhuak kha darthlalangah a inhmu fuh hlauh mai a. A suit hak chuan tunhma lama nalh leh zahawm taka a inchei thin lai leh sumdawnnaa a hlawhtlin em em thin lai kha a hriatchhuahtir a.

Zu pawh in ta lo chuan kawtthlerah chuan a vak vel a, chutah chuan a inngaihtuah harh ta a, duhthlanna a siam ta. ‘Sumdawngmi a ni a, Car hralh dan a hre bel em em a, sumdawng hlawhtling tak a ni thin a ni’ tiin amah leh amah chu a infuih sauh sauh a. Tichuan, a sum neih chhun hmanga a lu metin, a inziatfai a, hna a zawng ta a. Rei tak hna zawnga a vah kual hnuah, car zawrhna lian tak pakhatah hna a hmu ta hlauh a. Car pakhat hralha, a hlawh a lak hmasak ber ni chuan lawmthu sawi turin min rawn pan leh vang vang hi a lo ni a.

Khami ni a Paul-a hlim hmel ang tluka mihring hlim hmel kha hmuh tur a vang kher ang. Lawmthu sawiin Pathian hmaah kan thingthi dun a. ‘Hlimna leh vanneihna’ a dawn avang chuan lawmthu kan sawi a. Mihring ka hmuh tawh zawng zawng zingah chuan a la hlim ber hial awm e,” tiin Paul-a chanchin chu min hrilh a.

‘Hlimna leh vanneihna!’ Chu tawngkam ngei mai chu ka bengah a lo ri nawn a. Kum tam tak liamtaa Midori’n a sawi lai hmel ngei mai kha ka mitthlaah chuan a rawn lang iarh iarh a.

Note : Thawnthu chhiar hi a nuam ve mai mai a. Hunawl nei deuh hlek te kan lo awm tak hlauhvin tih thu-ah ka han post a ni e. Buchanan-a te thuziak keini’n kan han sawisa ve ngawt hi chu ngaih a tha duh vak lova, duh ang zat zawngin a mam hauh lovang tih chu hriatsa a ni. A ngaihnawmna a bo em lovang chu maw.

Similar Posts:

• Coat suit
• Dawr luah man
• It’s Life…wateva
• Dress Codes for Men
• Mi ngo/vâr advantage!

Recent Posts:

• Hmangaih CFL
• MIZO SAKHAW BIAK DÂN LEH A TOBUL ~ 2
• Burma-ah ka zin Part – III
• Mizo Technical Graduates (Architects)
• Hmangaihna 131

This entry was posted on Saturday, May 1st, 2010 at 2:56 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.