mi(sual).com

Sum leh pai hi kan chelekin kan hmang uar hle mai a; kan nitin mamawh lam nana sum kan mamawh rualin kan mamawh phuhrukna turte chu sumdawng ho hi an ni a. Dawrtu awm lo chuan sumdawng chu a sumdawng thlawn a, sumdawng awm lo chuan sum leh paiin hlutna a nei lo thung. Sumdawng leh a dawrtu hi kan inmamawh tawn takzet a ni.

Sumdawngtu i nih chuan nangmah dawr thintu chein dawr nuam an ti che em? Midang aiin i ti to bik em? Nangmah dawrtu che hawihhawm takin i lo chhawn thin em? Bum awlsam hmel deuh nia i hriat hnenah i dawr thil i fak uchuak ngai em?

Sumdawng chuan a dawr bungrua hlep neiin a zuar ngei tur a ni a, chu chu a sumdawn chhan leh a eizawnna a ni. Hlawk tum luat avanga midangte aia tih to hi mipui zahlohna a ni. Hausak hmel deuh leh rethei hmel deuh hnena inang tlanga dawr thil hralh hi sumdawng tan thil mawi tak a ni. Sumdawngin a dawrtute hawihhawm taka a lo dawnsawn hian a dawrtu tan a nuam bawk

Sumdawngtuin a dawrtu hnena a thilzawrhte a thatna piah lama fak uchuak hi inbumna a ni. Dawr bungrua tlawm indil hi tihphungah kan nei tawh a, tlawm indil hisapin a man pawh chhiar a ni tlangpui tawh. Sumdawng lian leh te pawh ni ila, min dawrtute hawihhawm taka lo dawnsawn hi mipui rawngbawlna leh hnam changkang zia a ni.

Sumdawng dinhmun kan sawi rualin a dawrtu (customer) lam pawhin hriat tur tam tak kan nei. Kan mamawh lamna chu sumdawngte an ni tih hriata hawihhawm taka dawr hi kan tih tur a ni. A pawng ataka thil man a to tih leh tlawm dil ngawt hi a tha ber lo. Sumdawngte tha taka dawr tur chuan thil man (rate) tlangpui hriat hmasak a pawimawh hle.

Thil man to nia kan hriat hi a lo kalna senso hisapa man chhiar a ni ber a. Tlawm leh hisapa aman chhiar chi tam tak a awm a, hengah pawh hian tlawm indil dan tawk leh chin tawk hriat a tha hle. Kan ram economy dinhmun mil zela thilo ma hi to-a tlawm a ni thin a, sumdawngtu leh a dawrtu mipui kan thawhho zel a pawimawh tih i hria ang u. Tumah mahni kea ding thei kan awm loh hi.

Testimony tlinglo hmanga tlangkawmna : Tum khat chu chawlhni kekawr thui tir ka tum ve a, Aizawl-a puanthui dawr lar ve tak pakhat panin a man te ka han zawt a, a thuina tur nen Rs. 2500/- chunglam vek a complete theihte a lo ni vek mai a, ka budget-in a daih lo…

A karlehah a puanthan zinga mawi tih bik ka neih tlat avangin chu dawrah bawk chuan pawisa pai belh deuhvin ka kal leh a, a hma a ka zawh ho kha a man ka han zawt leh a, Rs. 800 – 1200 inkar vek a complete theih a lo ni leh tawh a. Kar khat pawh a tla fumfe hman silo a, a mak ka ti hle a …

Ka inngaihtuah chhuak : Mak tia ka hawi he hu lai chuan ka inhmuchhuak ta thut mai a, karkhat chhunga a man chhiar dan inthlau lutuk kha kei mi(sual) vang hi a lo ni. Ka kal hmasak tumah kha chuan ka lo inchei nalh ve deuh tlat a, sang tak pawhin a thil zawrh kha a man chhiar ta sela lei thei hmelin min hmu a ni mahna …

Ka kal hnuhnung zawk kha chuan ka nihdan phung panngaiin ka pawr (nalh lo) ve ngang mai ka lan dan a pawr deuh avanga min khawngaih vangin a chhiar hniam (Rs. 1000/- chuangin) ta fe em ni ang le? Ni si lo ! Kha dawr a puanthan te khan man bik an nei lo em ni ? A nei si ! A chhanna keimaha ka inhrilhfiah chawp chu a dawrtu a zirin a man chhiar a ni ang e tih hi !! Ka pawisa chu ka phawrh ta lova, ka kal zela, kekawr lei tum khan ka P.C upgrade na turin 2GB RAM ka lei ta ringawt a, hak a har ngei mai.

Similar Posts:

• Mizo vs Vai Sumdawng
• It’s Life…wateva
• MVI Road TAX pekna counter a changkang!
• Sumdawnna in
• Khawnge pawisa nawi?

Recent Posts:

• WELCOME TO THE 21TH CENTURY!!!
• Lumettu Nen(Sunday pual)
• Tu nge/Eng nge?
• KAN HLIAM CHHAR KHA AW!!!
• January 2013, Mizo(ram) Diary

This entry was posted on Wednesday, August 4th, 2010 at 7:20 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.