mi(sual).com

Zankhat chu lehkhabu eng eng emaw ka bih kual tui lai tak hian nula hmeltha tak mai hi ka bulah chuan a rawn lang thut mai a! Eng dang sawi lo hian ‘Ka hmangaih asin mawle’ a rawn ti ringawt mai a, mi tiphu chiang kher mai! A hmel chu ka’n en a, sawiselbo a ni thlawt. A sam tle siau karah chuan pangpar sendang hi a tawn va bawk a. A hmel enchian leh zual ka tum lai tak chuan ka kut a rawn vuan ta tlat mai! ”Tunge i nih?” han tih mai chu ka duh a. Mahse, nula vawikhat hmuhna a chutiang han zawh mai chu ka zak ve deuh bawk si! Kuah te chu min la rawn kuah ta deuh deuh a! Engtinnge ka tih tak ang?

A hmangaih ber niawm tak hian min rawn chul ta heuh heuh mai a. Chutah le…”Keimah maw min hmangaih?” ka’n ti ta chawih mai a. Min chhang lem lo chuan ka hmui chu a rawn hup a, ”I chau a nih kha, awm hahdam rawh. Hei en teh”, tih pah chuan a sama pangpar a tawn lai chu a la thla a, ”He pangpar hi a nalh tiraw?”, a rawn ti sep a, kei lah chu ka bo telh telh mai si! Tawng chhuah ka tum lai tak chuan, ”He pangpar hi i hmu tawh ngai em?”, a rawn ti leh a. Bo deuh chung chuan, ”Ka hmuh awm reng reng ka la hre lo”, tiin ka chhang a.

Pangpar chu ka’n en a, par parh pathum hi a nei a, a rawng chu a sen dang, de va mai hi a ni bawk a. Pangpar dang ang lo riau hian ka hria a. Nula-i chuan, ”Heng pangpar hi keimah chauhin ka nei a, thliah theih par a nih hi”, a ti reuh a. Bo he haw chung chuan, ”A hming a mak hle mai!”, ka lo ti ringawt a. Nula-i chu ka vawikhat hmuhna mah nise ka nel nghal riau mai a. ”Pangpar danglam bik a nia, a parte hian awmzia an nei a”, nui seih chung chuan a ti leh a.

Pangpar awmze nei chu a va mak awm ve ka ti rilru rauh rauh a. Min vawnna kut chu a la sawn a, pangpar parhte chu a mal mal a phihthlak nghauh nghauh pah chuan, ”Hei hi a nunna, hei hi a mawina, hei hi chu a chi kengtu a nih hi”, a rawn ti ta reuh a. Pangpar parh laiin a chi tur ken thu va awm suh ka ti rilru a. A thaw ri deuh hak a, ”Ka hmangaih asin”, a’n ti leh ringawt a. A hmel chu ka enchiang deuh hlek a, hlimloh hmel riau hian ka hria a.

Ka rilruah zawhna hlir a rawn lut leh pek a; min hmangaih tihna a va ang ve! Nge niang pangpar chuan a hmangaih ber boral tawh a hriatchhuahtir zawk!. ”Ka la hriat ngailoh mi i ni si a, kei hi min hmangaih maw?”, ka ti ta tawp mai a. Min rawn en a, nui ver ver chung chuan, ”Hmangaih e, nang lo pawh hmangaih chu ka nei tam alawm”, a rawn ti ta! Ka buai ta vek mai. Dik tak chuan ka hrilhhai a ni. He hmeltha-i hian min hmangaih, kei lo pawh hmangaih tam tak a nei. A va mak awm ve!

Nula-i chu a tho thut a, ka bana kaih pah chuan, ”Lo kal teh, ka ti hrilhhai lutuk dawn che, thil ka entir ang che”, a ti a. Ka banah chuan min la kai reng a, thui vaklo kan kal hnu chuan ‘THLIAHTHEIH PAR’ hlir mai chu hmun zawl dap maiah hian a lo par vul chheng mai a. Ring fahran hian, ”E he! A va mawi ve!”, ka’n ti leh ringawt a. Thliahtheih par hmun kiangah chuan rilru buai ru tak chuan ka ding ve ringawt mai a ni.

”Pangpar awmze nei, dangdai tak alawm a nih, hei hian mihring nun a entir asin”, tih pah chuan pangpar kung khat chu lei atangin a pawt phawi a. Val hi ka buai! Nula, hmangaihna, pangpar, mihring nun! Thil engemaw chu min hrilh a tum chiang a ni. Chutia rilru buai taka ka inngaihtuah lai chuan hmeltha-i chu a rawn tawng chhuak leh a, ”Zingtin tlaitin hian tui leh lei tha hmangin ka chawm reng a. Ni a rawn tlangsan hunah ni eng lam min hawisan leh dial thin a.

Nimahsela, ni eng lam hawi chin tawk hi an hrelo thin a; an hawi rei lutuk chuan an lo ro a, an par hi a mal te te in a til a, reiloteah an chuai leh mai a, ka thinlung a na thin. Hei vang hi a nia THLIAHTHEIH PAR ka vuah tak. An parvul nalh tak mai ka hmuh hian keimahah hlimna leh lungawina tak tak min siamsak a, min hawisan reng lo hian ka lam hi rawn hawilet vat thin sela aw…” a ti chuai raih a.

Rilru buai tak chunga a thusawi ka ngaihtuah vung vung lai chuan, ”Hei khua a tlai mai dawn, an nunna tui ka’n pe leh lawk teh ang”, tih leh kal chu a rual ta mai a. E! A hming ka la zawt miah lo. A kal liam hma chuan, ”Nula, i hming min hrilh thei em?”, ka’n ti leh talh a. A rawn hawilet a, min rawn pan hnai leh a, a pangpar ken lai min pek pah chuan, ”Ka hming chu i hre lutuk ang, hrilh ngaiah ka dah lo che. Kha pangpar khan danglam deuhna dang ala nei a, an mawilohna an hriatphaka sawi vak vak chuan an lungngai ve a, mawi lo tlatin an inhria a, an uai phah thin a.

Chuvangin, nang chuan kha kha i phun hunah ka sawi hi i hre reng dawn nia. An lo thanglian zel ang a, ni eng lamah hawisan thin che mah sela i lam an rawn hawi hunah hlimna an pe thin dawn che nia”, a ti a, a kal liam ta daih mai a…

Similar Posts:

• A ngai em em che a sin
• Zawhna sawm………..
• Par lai a par rual ta silo!! Lenlai a ruallo hi a sawi rem theih??
• Bird of Paradise
• Ka thianpa virgin

Recent Posts:

• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)
• Thianpa lr hlonchhing birthday lawmnan..

This entry was posted on Wednesday, August 25th, 2010 at 10:35 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.