mi(sual).com

SUANGTUAHNA HLIMTHLA…..NUNTHLAK DANGLAMNA ATANA THILTIHTHEIHNA CHU.

( A sei deuh nain, hei a chhunzawmna ka han post leh ange. I chai ho ang u, mit tlun lohna lai pawh sawi hmiah 2 ila, kan her rem mai dawn alawm.)

Suangtuahna hlimthlâ hian kan mitkhapkâr tin mai hi a hual vel a ; a thiltihtheihna hnuaiah hian kan lo pianchhuah dârkâr atang khan kan lo kûn tawh a. Pa chu doctor emaw ukil emaw sipai emaw a nih chuan, naupangin a hnungzui tura a duh bawk chuan, a pa suangtuahna hlimthlâin emaw duhthusâmin emaw chuan naupang lo thanlenna kawngah khan hnuhmâ a nei ngei ang. A zu khawih pawimawh lutuk lem lo pawh ani thei a, a chhan chu a tirteah chuan a pa chauh khan suangtuahna hlimthla kha a nei tlat a. Amaherawh chu, englekhawle hnuhmâ chu a nei hrim hrim ani.

Keima chungchangah hi chuan , chanchinbu reporter a kum khat zet ka thawh hnua ka bansan lehna chhan leh Pathianthu ka zir takna chhan chu ka nu suangtuahna hlimthla a ka pa ang bawka engtikah emaw chuan Pathian thu hriltu ka nih ve ngei a duhna lo hlawhtlinnna ani. Nu-ina an tihtheih nasat angberin, Pathian thuhriltu ni turin min suangtuah thin a.Chu a suangtuahna chu tawngtainain a ti chak a, ti chuan rawngbawltu ka lo ni ve ta ani.

Chutiang chuan suangtuahna hlimthla mi dang ten keimahni chunga an lo neihte hian kan nun a khawih ṭhin a.Amaherawh chu suangtuahna hlimthla min khawih nasa bertute chu keimahni ngei kan inngaihdân kum engemaw zah hnu a kan rawn neih chhuah te hi a ni.A châng chuan heng hlimthla te hi a dikin, a chak em em a, a châng erawh thung chuan a dik lozawngin a awm ve thung a, a chak lo êm êm thung ani. Khawthlang lama khawpui te reuh te te, hmun hran hrana ka tleirawl lai huna ka awmdân aangin , a chhe zawnga mahni inhriatna hi ka lo nei tawh a ni tih ka hria a, amaherawh chu chuti takin ka lo hrethiam lêm lova.’Mahni insitna’ tih thumal hi an hmuhchhuah tawh leh tawh loh chu ka hre chiah lo nain, mahni insitna tih hian tling tawk lo nia inhriatna hi a awmzia anih ngai chuan , chu chiah chu ka nihna chu a ni.

Khawi lam atanga lokal nge ni ta ang ? Ka zu hrethiam miah lo mai. Ka nu leh Pa chu mi pangai aia chak, rilru pawh chak, mi tumtlang tak an ni ve ve a.Anmahni ka han inkhaikhin khân ka tluk lo lutukin ka in hria nge ni, tumruhna nena nihtir min tumah te khan tlin lo lutukin ka inhria pawh ani mai thei ani. Anih loh pawhin ka pianphung vang pawh hi ani mai thei a, ka chêrin ka zâng êm em mai a.Ka unaupa Bob-a , football khel ṭhin, huaisen leh chak zet nena han khaikhin phei chuan ka derthâwng lutuk lam mah ani.Ka chêrna leh thil danga ka tlinlohnate kha a inzawm tlatin ka hria pawh ani mai thei bawk.

Thil dang pawh min tibuaitu ala awm a, hmânlai atang tawha Pastor fate ho lo tibuaitu ṭhin tho kha a ni a, chu chu Pathianthu hriltu fapa ka ni tlat mai hi ani.Khaw te reuh te te a kan awm thin lai khan, he thil hi ka ngei tak zet ṭhin a.Mi zawng zawng hian ṭha lutuk ni tur hian min beisei vek niin ka hre tlat mai a, ka awm ṭhat loh vaih chuan Puitling hovin thiam loh min chantir dawnin ka hria a, ka awmṭhat thung chuan ka ṭhiante ho hian min hmusit dawnin ka hre bawk si a.Hemi hian min tibuai em em a, midangte min ngaihdân turte kha ṭul miah lo thlengin ka zu ngaihtuah ta thin ani.

Keimah leh keimah mi tling lo anga min inngaih tir thintu thil dang ala awm cheu a.Mikhual kan neih apiang mai hian, piano tum emaw hlachham chi sawi emaw anih loh chuan mikhual hmaa lam emaw kha kan chhungkuaa naupangte tih ngei ngei thin ani a.He thil hian min ti thlaphang tak zet thin a.Mikhual lo thleng ka hmuh tawh phawt hi chuan bihrûk hrâm hi ka tum thin a ni.

Heng thil zawng zawng rah chhuah chu college ka han rah ve hnuah, a châng chângin class-ah ding chunga chhânte alo ngai ta thin a, tah chuan mahni insitna nasa tak nei ang chiahin ka khawsa ta ṭhin ani.

Professor pakhat, a hming Ben Arnesson-a khan ka zir zawh kum khan engthil emaw chu min lo hrilh lo sela chu mi tling lo anga mahni ka inngaihna tlat hi engtikah mah a reh kher lovang.Ni khat chu hlim lo leh ngui deuh maiin ka awm leh pek a, chutah chuan class bana amah lo nghak turin min hrilh ta a. Tichuan kan pahnih chauha kan awm hnuah chuan , dik leh sawichhuah har êm êm si, thil nih dan dik tak chu min hrilh ta a.

A sawidân chuan rilru fim leh chak ha tak mai ka nei a, amaherawh chu zahzum leh hrehna avangin anih tur angin ka hmang tâwk lo ani. “Sazupui hlauhlawp, mahni aw ri pawh hlau tur khawp ang mai hian eng tianga rei nge i awm dawn le ? I zakzum ve hrim hrim ani tiin nangmah leh nangmah chu i in thiam chawp pawh ani mai thei. Awle, Peale, nangmah leh nangmah i in ngaihdan hi i thlak a ngai ani, a tlai lutuk hma hian tunah hian thlak nghal la a ṭha ang. Nangmah maia i ti thei lo anih chuan, puih i ngai dawnte anih chuan-awle, Pastor fapa i ni alawm. Pan tur chu i hria ang chu maw. Chu zawng chu ani mai e. I kal thei tawh e.” a ti ta a.

Vawin ni thleng mai hian khami ni a class room ka chhuahsan paha ka thinlung rûm nasatzia kha ka la hrereng a, campus rehruih chhûnga ni êng hnuaiah ka chhuak phei a, ni êng chu rangkachak rawng hian a êng sut mai a. Ka thin a rim a, ka haw bawk a, ka rilru a na êm êm a, chu mai pawh la ni lovin ka hlau a ni, a chhan chu Professor thil sawi kha thudik a ni tih ka hre tlat a.Sazupui hlauhlawp maw ka lo nih a ? Keimah leh keimah hi sazupui hlauhlawp ang chauha ka inhmuh si chuan hringnunah hian enge ka beisei ve tâk ang le ?

NUN INTHLAK DANGLAMNA CHU.

Biak In panna kailâwnah chuan ka ṭhu a, tih tak zetin ka dam chhûnga a vawikhatna atan ka ṭawngṭai ta a. “ Khawngaih takin min ṭanpui rawh. Khawngaihin min ti danglam rawh. Nang chuan i thei ani tih ka hria e, a chhan chu ka mit ngeiin zungawlvei i simtir tawhte leh rûkrûk chingte mi rinawma i siamte pawh ka lo hmu ve tawh a.Khawngaih takin he thil min ti buaitu, zahzumna rapthlak tak mai leh mahni inngaihhniamna hi min lak bosak lul rawh.Keimah hi sazupui hlau hlawp ang chauh ni lovin, mi pakhat thil ropui tak ti thei tu angin min hmuhtir rawh aw. Chakna leh inrintawkna ka mamawh êm êm te hi min pe ang che, “ tiin.

Engtia rei nge kailâwnah chuan ka ṭhut pawh ka hre lo, amaherawh chu ka han thawh chuan engemaw inthlâk danglam chu alo awm ta ani. Ka insitna ṭhin zawng zawng chu a bo vek nghal hran lo, a ṭhente phei chu vawin ni thleng pawh hian ka la nei ve ani. Amaherawh chu keimah leh keimah ka inhmuhdan hlimthla kha alo inthlâk ta a, chu chuan ka nun pumpui hi alo ti danglam ta thung ani.

Kum engemawzât a liam hnuah chuan, suangtuahna hlimthla dân hmang chu thil engemaw tih puitlin ka duh chuan ka hmang ve ṭan ta a.Ka kohhran enkawl pahnihna , New York khawpuia awm Brooklyn ami chu inkhâwm kan ṭha lo hle mai a ; nikhat chu kan Biak in enkawltu chawkidar chuan tlar hnung ber ṭhuthleng chu alo hnûk chhuak lai ka va hmu a. Engtizia ta mai nge tia kan zawh chuan , thingtuah atan a ekphel dawn ani tih min hrilh a. “ Tumah an ṭhu ngai chuang lova, “ tiin a sawi zui a.

Chang fal hian, “ Dah kir leh nghâl rawh. Tuemaw chu khatah khan an la ṭhu dawn asin, “ ka va ti a. Chu ṭhuthlengah chuan mi ṭhukhat tlat angin ka va mitthla a, ṭhutthleng dangte pawh chu khat tlatin leh Biak in leng tâwk a khat tlatin ka mitthlâ zui a. Chu suangtuahna hlimthla chu ka rilruah chuan ka vawng reng a. Ka theih anga nasa in tih puitlin tumin ka thawk char char bawk a. Ka ngaihtuahna thar pakhatah ka hmang a. Tichuan, chu suangtuahna hlimthlâ chu a tak taka alo chan ni chu alo thleng ta mai ani.

Hêng hunlai pawh hian mi tling lo nia ka inhriatna kha alo kir leh ṭhin a, amaherawh chu hlawhtlinna tûra suangtuahna hlimthla hi hlawhchhamna suangtuahna hlimthlâ ai chuan a chak zâwk daih ani tih ka lo hre hman chu ka vannei tak zet ani. Memorial Day vawikhat chu ka la hrereng mai, American sipai hovin an buatsaih vantlang inkhâwm a awm a. Brooklyn kawtthler zaulaiah chuan mipui singnga teh meuh mai an pungkhawm a, General Theodore Roosevelt, Jr chu khual lian ani a. Chu inkhâwmah chuan ṭawngṭaina hmanga ṭan mai turin min sawm ve niah ka lo ngai mai a. Amaherawh chu, a hmun ka va thlen chuan kei chu thusawitu ber mai tur ka ni tih Programme atangin ka va hmu ta a.

Hlauhthâwnna in min rawn man ta a, thusawi tur engmah ka lo inbuatsaih miah si lo. Mipui singnga zet mai hmâa va dina, ti lunghnûr tûra ka han ngaihtuah phei chuan râpthlak hi ka tilutuk a. Inkhâwm buatsaihtute hnenah chuan ka va kal a, ka tihtheihloh tur thu ka va hrilh ta ngawt a.Ka ti miah lo ang. Tuemaw zawng sela ani mai.

General Roosevelt-a chuan ka vuivaina thu chu alo ngaithlâ ve reng hi alo ni a, “Mâma, Hlawhchhamna lam kha chu ngaihtuah mah ta che. Pastor i ni a, ani lawm ni ? Hetah hian nu tam tak lusûnte hnênah rawngbâwlna remchâng tak i nei a.Anmahni an inphatna leh an tawrhna avanga kan hmangaihzia te hi i hrilh ang a. An fapate leh an Pasalte an hloh avanga he ramina a chhuanziate hi i hrilh bawk anga. Chuvang chuan , tho la, va sawi mai rawh. I hnung chiahah hian ka lo ṭhu dawn a, heng mite i hmangaihziate, i tanpui nasatziate leh ngun tak maia an ngaithla tur che hi ka lo mitthla sak dawn che alawm.Heng thil hi ka ngaihtuahnain mi tur nasat dânah hian a dik dawn a ni tih ka hria alawm,” a ti a.

Tah chuan, amah chu ka zah bawk si a, a sawi ang chuan tih ka tum ta a.Hlawhtling ngei tura min lo riruatna hlimthla chu keimâ hlawhchhamna lam riruatna ai chuan a chak zâwk ngei ani tur ani, a chhan chu thusawi pawh chu a tluang ṭha viau mai a. Chumi hnûah chuan, General Roosevelt-a chuan , “ Tunah chuan i hre thiam tawh ang chu, Tithei nia i inhriat chuan emaw tuinemaw tithei nia a rin che chuan i ti thei mai ani,” min ti ta a.

A ṭha lam zâwnga thil ngaihtuah dân chakna kha , khatih lai khan min rawn pe pawh ani mai thei ani.Amaherawh chu he mi ngaihdân phena thil la awm leh a piah lama thil awm chu , suangtuahna hlimthla ani – hlawhtlinna i duhna hmunah chuan nangmah ngei hlawhtlinga zu inngaihna leh a tak ang chiaha zu mitthlâna kha a ni ta a, hetah hian i rilrua thil lo awm tawh daih kha rawn thangkhâwkin a takah alo chang ta mai niin a lang .

Chutihlai chuan, he ngaihdan hi a zavai chuan ka zu man vek chuang lova, amaherawh chu ka hmang zel thova. Kum 1927 khan, New York ah tho, Syracuse hmuna kohhran lian tak mai enkawl turin sâwm ka ni a, Brooklyn kohhrana ka lo tawn tawh tho harsatna kha ka hmachhawn leh ta a. Kohhranin nasa takin leiba a nei a. Inkhawm ṭhin an tlêm êm êm mai bawk a.

Kohhran leibat chungchâng kan chinfelnaah pawh hian Suangtuahna hlimthla bawk hi a in rawlh thûk leh pek khawp mai.Leiba chu Dollar singnga leh sângnga a ni a. Tunlai hun atanga teh chuan a tlem mai thei a, amaherawh chu chutih hunlai atan chuan sum tamtham zet mai ani a.Kan ba zawng zawng chu engang pawhin tuak ila kan rulh zawh vek theih ka ring miah lova; rulh zawh vek tih lam kha chu duhthusam mah mah ani. Amaherawh chu Dollar singhnih emaw chu kan tuak ngah theih mai ka han ring deuh a. Rilrua hemi vawng reng chung hian, kan kohhrana member pakhat, putar zahawm deuh mai, Harlowe B. Andrews-a hmu turin ka va kal ta a.

Unaupa Andrews-a tia kan koh thin chu, nitin mamawh thil a hlâwma zuar thin a ni a,Syracuse a sumdâwn thiam ber nia mi hriat ani.Kut rangkachak a nei emaw tih mai tûr hian, thil a han tih ve tawh hi chuan pawisa a rawn lut ruih ruih mai ṭhin ani. Ka beisei dan mai mai chuan Unaupa Andrews-a chuan engemawzat chu a rawn thawh ve anga, a dang neih belh leh dân pawh min hrilh theih mai kan ring deuh a.

Unaupa Andrews-a chu daifem lama hmânlai insak dâna sakah hian mahni chauhin a khawsa a.Tichuan ka va inkhalh chhuak a, kan ba tih tlêm nân dollar singhnih tuak kan tum tih thu ka va hrilh ta a.Beisei tak chungin engzat nge a thawh ve theih ang tih ka zâwt nghal bawk a.

Unaupa Andrews-a chuan a tarmit a hnâr hmâwr lama a vuah chung lam atang chuan min han melh a.” Chûngte chu thil awlsam lutuk alawm. Ba zawng zawng daih tur i tuak dâwn loh avangin engmah ka pe dâwn lo che.Naia khat mah, pawisa pakhat mah, “ a ti a.Tah chuan, ka hmêl chu engemaw chen an thlek vang vang a., “ Amaherawh chu ka tihtûr ka hrilh ang che.Ka ṭawngṭaipui ang che, “ a ti ta a.

Chu chuan min chawk phûr hran lo khawp mai. |awngṭaina kha ka duh ani lova. Pawisa tak tak kha a ni si a.Amaherawh chu kan thingthi dûn a, Unaupa Andrews-a chuan Lalpa hnenah chuan tlangnêl tak mai hian a thlen ta a.

SUANGTUAHNA HLIMTHLA PAWIMAWHNA

Hetiang hian a ṭawngṭai a : Lalpa, i hmaah kan lo kûn a. Pawisa tuak kan ngai a. Lalpa, he Pastor naupang tak thil tum hi a ṭha khawp mai, amaherawh chu sumtuakna lam kawng hmang engmah a hre lova, chu lovah thil pui tham taka tih dan hmang a hre miah lo bawk. Rinna chhete a nei a. Amahah emaw a rawngbawlnaah pawh hian a in ring tawk lo ani. Lalpa, tunah hian Dollar singhnih chauh tuak a tum anih chuan, pawisa sen pakhatmah ka pe dawn lo, amaherawh chu dollar singnga leh sangngâ hi a zavaia tuakchhuah theih a in rin phawt chuan , sangngâ hmasaber chu ka pe thung ang. Amen.”

A’n ṭawngṭai zo chiah chu ka phûr nasa mai a. Unaupa Andrews-a hnenah chuan ,” A bâk zawng hi khawi atangin nge kan hmuh ang le?” ka han ti a.

Ani chuan,” Sangngâ hmasa ber i hmuhna hmunah chiah khan ani mai. |awngṭaiin i dil a, i hmu tawh a ni.Tunah chuan sumtuak lam i han ṭan dawn teh ang. Khawpui chuanhnuai lamah khuan Doctor pakhat a awm a, pawisa engmah a nei lo tiin a lo hrilh ngei ang che, amaherawh chu Bank-ah hian Finance committee-ah ka tel ve a, a neihzat chu ka hria a lawm. Tichuan Dollar sangnga dang leh hi lo pe ngei tur chein kan ṭawngṭai dawn ani. Kan ṭawngṭai satliah mai ni lovin, a pêklai che kha kan mitthla nghâl dawn ani. Bible chuan anṭam mu fangkhat ang lek pawh rinna in neih chuan, in tân tihtheihloh engmah a awm lovang a tih kha. Khawpui chuanhnuai lamah chuan zu kal la, doctor ka sawi chu zu hmu la, pawisa chu zu dil la, dawng ngei ang che,” a ti ta a.

Khawpui chuanhnuai lamah chuan rinhlelhna a khat tlat chung hian ka zu chhuk a, doctor a sawi chu ka zu hmu a, dollar sangngâ chu rawn thawh ve turin ka zu ngen a.Mi a rawn en a, “ Thil i hriatchian loh vang anih chu. A âwm ang lo lutuk ! “. A ti ta chiam mai a.Tichuan a han ngawi deuh vang vang a. A tâwp a tâwpah chuan, “ Awle, ka zu sawifiah thiam lo mai pawh a, hetia kan ṭhut dun lai hian engemaw tak mai ka chungah alo awm tlat mai. Dollar sangngâ chu ka pe ang che ,” a ti ta a.

Ka carah chuan ka zuang lut nghal a, Unaupa Andrews-a in lam panin ka inkhalh kir leh nghal a, ka zu tlân lut nghal a. “ A pe e ! A pe e!, “ tiin ka râk chul a.

“ A pe ngei ang che chu, “ Unaupa Andrews-a chuan a ti hmiah a.”Lo ngaithla teh, mâma, Khawpui chuanhnuai lama a pêk ring lo chunga i in khalh thlak lai khan hetah hian ka lo ṭhu reng a, a lo pe ngei tur ani tih ngaihtuahna kha ka rawn thawn a, chu ngaihtuahna chuan a mit leh mit inkârah tak a rawn fuh ta a nih chu, “ a ti a.

Kei chuan, “ Ka hria alawm. A rawn fuh lai tak mai kha ka lo hmu alawm ,” ka lo ti a.

A ni chuan, “ A thluak a zu pawh a, chu chuan a ngaihtuahna kha a thlâktir ta ani. Amaherawh chu, he thil hian nang pawh i ngaihtuahnate hi a a thlâk danglam ve tûr ani. Hei hi hrereng rawh, engemaw tih puitlin i duh chuan i tipuitling lai tak lem kha i rilruah khan vawng reng la. A kip a kawiin chhinchiah vek la. A tak ang chiahin zu ngaihtuah bawk la. Tin, hei hi hrereng bawk ang che : I rilruah nangmah ngeiin hnehin i awm ani tih hi i pawm phawt loh chuan engmahin a hneh thei ngai lovang che.Hnehin i awm ani tih zu inngaihbelna kha i neih hmâ loh chuan hnehin i awm ngai lovang, “ a ti ta a.

I hmuh ang hian Unaupa Andrews-a hi chuan Suangtuahna dik hlimthla leh dik lo hlimthla danglamna hi a zu hrethiam a.Hnehna chang tûrin ka zu in ngaihruat emaw tlâwm turin ka zu inngaihruat thei ani tih kha min hrilh mai a. Nangmah leh nangmah kha kawng ha zâwngin emaw a ha lo zâwngin emaw ilo in rel lawk thei anih chu.
Hun kal tawh lamahte pawh khan, mi tlêmte chuan suangtuahna hlimthlâ chungchang hi an lo man thiam tawh a, a chanchin hi an sawiin an ziak bawk a, amaherawh chu tumahin he hming hi an hmang ngai thung lo. French Psychologist pakhat, Coue-a chuan mite chu kawng engkim maiah hian nitinin ka ṭha zâwk telh telh ani tih sawi nawn sawi nawn turin a râwn ṭhin a. Mi ṭhenkhat chuan he thil hi rilru sawizawina atthlâk takah an ngai a. Mahni leh mahni indahsanna mai mai, engmah a bak dang a awm lo an ti a. Amaherawh chu engemaw zawng a awm ani. Keimah ngei hian ṭumkhat chu Coue-a thusawi hi ka ngaithla a. Thil zeldinna chakzia entirna atan, a thusawi ngaithlatu mipuite chu chhuat zawlah thingphek inches ruk a hlai, feet sawmhniha sei mitthla turin a han ngên a.Tupawhin chu chu awlsam tein, mahni inrintawkna nên an zawh vek thei a..Amaherawh chu , thingphêk pangai chiah chu Building feet za a sâng pahnih inkarah dah tur angin a han ngên leh ta a. Zeldinna tak taka zu hman chuan , tlakthlâk palh zu ngaihruatna khan han zawh pawh kha tihtheih chi lohah a chhuah titih der mai ani.

Hmeichhe pakhat , Dorothea Brande-i chuan lehkhabu hralhchhuah hnem ber pakhat “Harh la, nung rawh” tih bu a ziak a. Chu lehkhabuah chuan hlawhtling taka nun dân,
tihpalh thilthu avâng liau liau a, a hmuhchhuah chu a ziak a.Chumi chu hei hi ani : I thil tih tum a piangah khan, hlawhchham hi a theihloh tawp ani ti khawpin bei ang che.He thil hi kawng danga sawi chuan hlawhtling ngei turin nangmah kha zu inruat chiah ang che.

Syracuse, New York atanga Marble collegiate church, New York City a ka in sawn ṭum hian , he Pathian Biakna hmun upa tawh tak mai hi, kum 1628 vellai daiha lo awm an tawh mahnise harsatna a tâwk nasa hle mai a. Inkhawm thin chu uihum lek tak tak hi an ni a. Kohhran nung tak mai, mi tui tak tak a khat tlat mai ni tura zu mitthla ngawt pawh thil awlai a ni lo tawp. Amaherawh chu, chu ngei chu ka tihtur ani tih ka zu hre tlat si a.

Pastor ni tura lawmluh ka nih zan chuan , inkhawm chu ropui leh urhsun tak maia neih ani a. Ka nu leh pate pawh an rawn inkhâwm ve a. Inkhâwm ban hnua, pawnlam khawchhe tak hnuaia kan han chhuah pah chuan, ka nu chu a ding thut a, a kut chuan Biak in hmalama marble a siam, ban lian zet mai chu a chelh a, a ṭap ta a. “ He Biak in upa tawh tak mai hi a nghetin a chak em em mai. Norman, chutiang tak chuan kaihhruai ang che aw. Zaninah khân mipui hmangaihna a rilṭâmte leh kaihhruaina mamawhtute hlirin a khat a. Chûng ang thilte chu i pein, i phuhrûksak a ngai ani. I tihtheih phawt chuan, i Biak in hi chu in khat tlat reng mai ang, “ a ti ta a.

Mi a khawih ril hle mai a, a thusawite hi ka theihnghilh ngai leh tawh lo ani. Ka mawhphurhna min hriatchhuahtirtuah ka ngai a, chutiang ang tak chuan ka hmang thin ani. Amaherawh chu, ka nu thiltih pakhat chu hemi hmang hian keimahah mite biak ina an rawn inkhawm lai zu mitthlana chak tak mai kha min lo phumsak reng mai ani. Kohhran nung , nuam leh hlim , luangchhuak reng mai zu suangtuahna nung zet mai kha min pe a.Chu tak mai chu ka chhûngrilin a ka hmuh chu a ni a, chutak mai chu a taka chantir ka tum chu alo ni ta bawk ani.

Han phûr loh chângte hi chu a awm ve ngei mai. Amaherawh chu, a mak khawp mai, khatianga ka’n han phûrloh châng apiang mai khan tuemaw tal hi suangtuahna hlimthla ti ṭha zawng hian a rawn penchhuak ta ṭhin a. Ka hriatreng ṭhin pakhat chu, zan khat chu Sermon chhe zet mai ka sawi a. Tumah lah chuan a ṭha lo ani tih min hrilh duh hauh bawk si lova, mahse min hrilh hran ka ngai lo, ka hlawhchham ani tih chu ka hre tho tho a. Biak in aṭang chuan zak tak chung leh mi hmuh hlau zet mai hian ka chhuak a, Fifth Avenue lampanin beidawng leh hrehawmti zet chungin ka kal ta a.

SODA CHAWHPAWLH SIAM LAM HI TI VE TA ZAWK ILA…

Fifth Avenue hnuailam Twelfth Street bul maiah chuan , damdawi dawr pakhat hi A.E.Russ-a chuan a nghâk a, amah hi kan kohhran member anih bakah ka ṭhianṭha tak mai a ni bawk a. Alo la inhawng reng a, tukverh atang chuan ka ṭhianpa chu soda tuibawm hnung lama a awm chu ka va hmu a. Tichuan ka zu lût a, rilru hnual em em chung chuan stool pakhatah chuan ka ṭhu hnawk a.Russ-a chuan enge dik lo awm tia min lo zawh chuan, kei chuan, “ Ka eizawnna hi a dik lo ani,” tiin ka chhang a. “ Pastor zahawm tak hi ka ni thei ngai dawn lo anih hi. Soda chawhpawlhtu hna hi min thawhtir ve mai dawn em ni le ? “ ka ti zui a.

A.E-a chuan nui deuh pah hian ,” Strawberry soda min han siam sak phawt la. Hna chu ka pe maithei che ani, “ a ti a.

Tah chuan, ka rilru tihzangkhai nan, dawhsan hnung lamah chuan ka phei a, a tihdan ka hmuh fo thin angin strawberry tui leh chini chawhpawlh chu glass no ah chuan ka thli lut a, ice cream leh soda ka pawlh a, amah chu ka pe a. An in chhin a, a ner ta nung mai a, “ Chanchintha hrilh zel hi a tha zawk ang, “ a ti zui a.

Amaherawh chu, a rawn thutak ta thut a, “ inkhar a hun ta tlat mai, In lamah rawn phei ve la, kan titi dawn nia, “ a ti a.

Ka zui haw ve ta a, a chhan chu amah hi a nelawm em avang leh mi a ngaihsak hrim hrim avang hian tun hunah hian ka mamawh tlat a. Sermon vawikhat sawichhiat emaw vawihnih emaw vawi thum emaw vawi li lai sawi chhiat pawh nise engahmah ngai lo turin min hrilh a. “ A chang chuan a lo awm ve thin ang. Amaherawh chu lunghnur nan hmang duh suh. Kha lam kha chu ngaihtuah a ngai lo. Mipui lam zawk kha, enge an mamawh tih lam kha ngaihtuah la.Chu chu ani mai, Norman. Mi mamawh phuhrukte. Mi tanpuite. Tum tlat reng rawh. Sermon engemaw changa a that loh vang mai maiin inngaihtuah buai duh suh.Mi tanpui nan i ban phar tak tak la, Biak in hi chu in khat tlat reng mai ang ,” a ti ta a.

Chutiang ang chuan kohhran ropui tak mai hlimthla chu amah leh amah arawn in din chho ta a. Mipui, nun kawng duhawm tak hmuh tumte hmangin a rawn khat chho ta a ni.

Tumkhat dang suangtuahna hlimthla kalhmangin nalh danglam tak maia hna a thawh ka la hriat reng thin pakhat a awm a. Manhattan-ah chuan Chawlhni zan ani a, thli a tleh nasa mai a. Inchhawng sâng kil velte chu a chhêm nasa mai a, ruah leh vur te chu kawtthlerahte chuan a sur ngiai nguai mai a.Ka thusawi hun ani a, zân lam inkhawm anih avangin. Ruth-i leh kei chu muangchangin Twenty-ninth street lamah chuan kan in khalh thla a, ṭhutthleng ruak hma maia thusawi tur nia ka in rin avang chuan ka awm a nuam thei lo reng reng mai a.

Ruth-i hnenah chuan, “Hei hi chu a vanduaithlak ngawt mai. Thil rapthlak ani. Tumah hetiang ang khawchhe hnuaiah hi chuan an lo vakchhuak awm tawp si lova,”Ka ti a. A chhe zawnga thil thlirna chu kawitin maiah chuan ka hmang reng mai a. A tawp a tawpah chuan Ruth-i chuan a tuar ta lova.Car chu kawngsirah a tlanpui a, ruahsur hnuaiah chuan a dintir a.” Enge i awmzia hi ni ta ? A tha lam zawnga thil thlirna leh a tha lam chauh ngaihtuahna lam hlir hi i sawi thin a. Tunah hi chuan nangmah chauh i in ngaihtuah a, ngaithlatu i nei tam dawn nge dawn lo tih vel mai mai i ngaihtuah a.” Mi luah mek in chhawng sang pui pui chu a kawk a, ruah hnuaiah chuan a uk deuh hian a lang hlawm a, tukverh atanga eng lo chhuak te chu fiah lo riai hian a eng a. “Engatinge khing ina chengte khi i ngaihtuah loh a ? Mi khawharte, rilru nâte, i thuchah mamawh ngawih ngawih tute an ni asin.Engvangin nge tunah hian an mamawhte an harsatnate chinfel sak turin thutna luah khat vek khawpa, Biak ina an lo inkhawm lai ilo mitthla zawk loh le ? Tunah hian he thil hi tawngtaiin Pathian hnenah i thlennghal ang, tunah mai hian. Biak in hi khat ṭhapa inkhawm an awm theihna turin i dil ang.A khatin lo hmu lawk ila, a khah dawn avangin Pathian hnenah lâwmthu i sawi ang, “ a ti ta a.

Ka zak deuh roh va, ka lu ka bu ringawt a.Tichuan kan ṭhu a, kut invuanin ṭawngṭaiin, kan mitthla bawka, kan va ngaihruat ta bawk ani. Chumi hnuah chuan Biakin lam pan chuan kan tlan leh ta a…..mak deuh mai chu maw, motor han dahna tur tak ngial pawh hmun awl kan hmu zo ta hauh lo mai chu ani. Ruth-i hnenah chuan, “ Pastorte chuan motor dahna bik hi neih awm tak ania, “ tiin ka phun ta mai mai a.

Ruahsur hnuaiah chuan kawihnih kan va let leh a, a dahna tur chu kan va hmu ve ta a, Biak in chu a khat tlat mai a ni, bang leh bang inkar chu an khat vek a, chutichung pawh chuan an lo la kal zel bawk a, Ka nu leh A.E.Russ-a’n kum tam tak kal taa an lo suangtuah ang chiah khan alo thleng ta ani-kan suangtuah a, kan suangtuahna hlimthla chu ṭawngṭainain kan thuamchak ṭhin ani.

Khami zan khan Biak in kha a khat hrim hrim tho tur alawm ti zawng pawhin a hnial theih mai thei ani. Awle, a theih lutuk ringawt.Amaherawh chu mipui ringhlel leh inkhâwm duh ngailo engzat chiahin nge inkhawm chakna chawplehchilha an rawn neih avanga lo inkhawm ta ang le ? Putar Harlowe.B.Andrews-an Syracuse a doctor chungchang a sawinaah khan, “ Ngaihdan thlawk lut ka hmu a, a luah a fu a, a thinlungah a cheng ta ani,” a tih kha hrereng ang che.

Sawisel duhtu chuan ringhlel rawhse. Kei erawh hi chuan ngaihdante hian thla an nei ani tih hi ka ring a ni.

Similar Posts:

• Positive Imaging.
• Tui Mal Farkhat
• Hringnun hlimthla
• Beidawnna Piahah Pawh
• Zirtirtu hna

Recent Posts:

• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)

This entry was posted on Saturday, January 8th, 2011 at 11:00 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.