mi(sual).com

Kekawr hi a puan leh thui dan azirin hming hran a nei awm e. Chutiang lam chu ka hriatzawng a ni lem lo. Hmanlai kan Pi leh Pu te khan kekawr an neih a rinawm lem loh. Hun engemaw lai khan hmuin an ching chho ve ta chu ni ngei tur a ni. Kekawr tih hming hrim hrim hi tu han phuah nge ni ang aw ?

A phuah thiam riau a ni, a thlakna tur hming dang han hman mai tur a vang khawp mai, tuna kan sawi tur “Kekawr Special” pawh hian chanchin a nei nual a, a neitu pawh ka Pu a ni nghe nghe. Hetiang ang kekawr nei pha chin chu mi vantlang chung hrat an ni thin(An hun laiah) kei phei chuan ka hmu phak hauh lova. Ka Pu kekawr lo pian dan erawh tlem azawng ka hre ve a. Chu chu sawi kan tum dawn a ni.

Ni e, he kekawr ber kher hi chu a dangdai ve a ni. Dawrkai leh sumdawng hnen atanga lei tur a vang khawp mai a, ka Pu hnen a lo thlen hma hian mi tamtakin an lo khai kual tawh thin a. Khawi hmun leh khawilai khawl atanga siam chhuah nge anih pawh chhui a harsa em em a ni. Kekawr a thui a nih hma hian Zoram dung leh vang a fang chhuak hial awm e. Awmze nei lova tei kawi a ni lova, tangkai takin hna a lo thawk tawh thin a ni. Mi lian leh mite a thliar lova, ni sa leh ruah sur hian harsatna a siam hek lo. A rawngbawlnaah rinawm leh chhel takin a thawk mai thin a ni.

Ka Pu kekawr ang hi chu a thana hleh thlaka lei tur a vang hle a, dawr kai zingah pawh zawng ila hmeithai zinga englo zawn ang mai a ni. Mi naran leh naran lo pawhin an nei zen zen lova, duh hun huna neih ngawt theih pawh a ni lo. A thui te lah hi an har na laileng a, kekawr tura an duan leh zai chhung ngawt pawh hian sakawrbakcheh an humna hi a sen tan tan mai a ni. Ka Pu te khuaa an puanthui thiam ber pawhin a chai rei khawp mai a, a thuitu pawh Pu Darawta a ni. He kekawr ang kher hi chu a dang a thui zui tawh loh niin an sawi. A puan thuikhawl hi Singer-ah pawh “A parsen” an tih chi ngat kha a ni. Hetiang khawl kher lo hi chuan ka pu kekawr ang hi a thui theih loh an ti bawk, khawl la pawh a ti chat ngun ngiang a ni awm e. A thuina lai tur pawh hi Mombatiin a zut hmasa vek nghe nghe a ni.

Pu Darawta Puanthuikhawl hi a tha em em mai a, ka pute khuaah a tluk tur a awm lo. He puanthui khawl vang hian tawngkam lar tak an nei a, chu chu “Kei mah a par sen” tih a ni. A khawl lu khawimaw laiah hian pangpar lem a sen a  inbel a, chu chuan khawl dang lakah a danglam zia a entir a ni.

Leilet Veng tlangval ho hian he tawngkam “Keimah a par sen” tih hi an uar zual a, leiletah Buh phun a lo hun a, buh phun tur an han intlar pat mai a, kut lehlama buh phun tur kengin an kut lehlamin leilet tui tlin liauna-ah chuan an phun ta zung zung mai a, chutianga buh an han phun mar mar laia an zinga pakhatin “Khawnge … keimah a par sen” a rawn tih tawh chuan a buhtiak kenna lam leh a phunna lam kut inkarah chuan tui hi a inthlar pat mai tawh thin a, tui an pawt fan ta emaw tih mai tur a ni.

Mahse an pawtfan lova, rang taka buh an phun avang khan  an kut lehlam atanga tui far leh kut lakchhoh zawnga tui far kha inzawm pat anga hmuh a ni tlat thin a ni. An intehkhin chhan ber pawh Singer puanthui khawlin rang taka puan an thui char char mai kha a ni. Singer khawl a ni satliah mai lova, a par sen a ni kher tur a ni. He puanthui khawl ngei hian alawm Ka pu kekawr pawh an thui.

Ka Pu Kekawr hi a mawi leh mawi loh sawi turin ka hmu miau lova, mahse ka pute hunlai chuan an intihtheih phah hle a ni awm e. Tin, he kekawr hian rau hran nei ve hrim hrimin an sawi tlat. He kekawr hi ka pu in a hak tawh chuan a pa deuh sawtin a in hre thin a, tunlaia ‘ a “man” riau’ an tih ang hi a ni mai thei. Tin, thawmhnaw dang pawh chawih bik riau neiin an ngai a. He kekawr a han hak tawh hi chuan Cowboy Boot leh a Kamis rang, nghawng hlai hlep hlawp chu a inbel tel deuh ngei thin.

Hetiang ang taka a han inthuam tawh chuan chawlhni tlaia tlanga a leng te hi a sawi uar deuh phei chuan “a rum ngal ngal e” an ti. Ka Pu zia nen a inmil ngawt awm e. A han pen zawnga a kekawr tlang han innawt te chu a ri hraih hraih mai a. Chu tak pawh chu a ri hriatna beng titlaitu a ni tlat a ni. Kekawr atana an thui hma hian chingal firin Zo tuikhurah nasa takin an su phawt a, suk satliah pawh a ni lova, Ar bawm tiat zet tur lung pian tha takah an hrut zawi thin a. Tlem lai deuhva ‘Stone Washed’ an tih te pawh min ti hre chhuak rum rum mai. Chutianga nasa fe a an sawisak hnu chuan thui tlak leh hak tlak a lo ni thin a ni.

Ka Pu kekawr ang kher kher hi chu tuarchhel deuh tan lo chuan hak mai mai chi pawh a ni lo, Dak Ip phelh darh a kekawr atana thui kha a ni a. Jeans kekawr hmu ve si, nei zo lo/ lei tur awm loh laia hun kha a ni a.   Tunlai thangthar ho phei hi chuan hmanlai Dak ip kekawra thui chu kan ha lo chiang ngawt ang le. Hring nun hi hunin a liampui zel a, vawiin hi a tuk a lo thlen chuan a hlui a “nimin” a lo ni mai thin. Kan mawi tih leh duhdan te pawh hun inher rualin a inher danglam ve zel a, chutih rual chuan thil tha ziktluak pangngai chhawm nun leh chin zui zel chi pawh a awm bawk.

Tunlaia kan kekawr dawr tawi, kan nula thenkhat ten laibu langa an hak leh kan tlangval thenkhat ten ngum sit langa an hak thin kekawr kawng fual te hi chu ka pu te hunlai kha chuan hak chi-ah pawh an ngai kher lovang.

Similar Posts:

• “Masi” ka nghahhlelh thin kha
• Puan thui khawl
• Haihawt!
• Thikthu chhia
• Krismas Thing

Recent Posts:

• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)
• Thianpa lr hlonchhing birthday lawmnan..

This entry was posted on Sunday, March 6th, 2011 at 9:31 am and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.