mi(sual).com

Corruption hi a hlawkin mitin tan hian a tangkai em em mai a. Amaherawhchu a hmang tangkaitu te hian kan hausak pui hauh si lo va. Mi tlemte in an lo hausak pui lai hian mi tam tak erawh chuan kan lo hlawkpui ve em em thung a ni.

I in hmun i LSC dawn a, Revenue office (entirnan) i dawr tluk tluk mai a. File a tang tlat mai bawk si a. Mi dik tak i ni a, sum pek lah chu i tum der si lo va. Dan ang tak pawhin mail luh chhung, distribution chhung, pu in note a lo siam chhung, verify chhung, type hun chhung, Pu thingpui in chhung leh meeting neih chhungte chhut chuan office kalphung ve mai a ni a. Mahse, i thenawmpa chuan a tuk thum tuk velah a rawn hum lut ve a, thingpui an theh ham ham a, dan aia rang zawkin a in hmun a LSC ta daih mai a.

Nang chuan nitin kar khat chhung i kal hah man, i bus fare, i thingpui man leh hun khawhral chhut a i sen teuh lai khan i thenawm pa chuan reilo te chhungin i bus fare sen ral ang vel khan a ti fel ta mai a. Hlawk tak a ni.

Driving Licence i siam tir dawn a. Form i va la chhuak a, i theh lut ta a. Dan ang thlapin an lo check a, tih sual a awm avangin ni thum hnu velah an pe kir leh che a, in thehlut tha leh a. Zirlai Licence an lo pe che a. Chutih chhung chuan police ah file thawnin i address te verify turin an va ngen a. An nin lehkha dang te zingah a indawtin an lo sem zat zat a. A tawp ah constable pakhat an rawn tir ta a. I address a lo dik ngei a. A pute hnenah a va thlen leh ta a.

A ni chuan a chhanna an ziak a, LDC/UDC hnenah peon a pek tir a. A ni chuan a lo type rang khawp mai a. Tichuan pu ber chuan a lo sign a, dakah an thawn chhuak leh ta a. Ni rei vak lo ah RTO lam in an lo hmu ve leh mai a. Angai te bawkin an han sem kual leh dan dan a. A tawpah chuan an peih fel ve ta. Driving test a lo ngai ta a.

Hetih chhung hian thlakhat chu a lo pel a, pakka a licence neih ve tawh i duh si, ofiice i va thleng a an lo in tlar put reng bawk si. A tawp a tawpah chuan thlansa phul kaiin licence i hmu chhuak ve ta a. Kha tih lai khan i thianpa ve thung chuan khawilai driving sikul ah emaw tlem a zawng a pe a, ni 2/1 ah a leh lan mai lawi bawk si a. In va han in hlawk hleih em! A hna dang thulh hauh lo in driving test pawh pe lem lo in biometric/ retina scan vel turin darkar chanve vel office a va hmu ve zuai ringawt dawn tihna a nih chu! I thianpa chuan a eiru lo, driving sikul pawhin service charge an la mai a ni. A va han in awlsam hleih tak em!

Ti hian ti leh teh ang, vai ram ah lehkha i zir a, rel ticket la turin zing tawkah i in tlar ve a, thlansa phul kaiin nilengin tlai lamah waiting list ticket i chang ve tawk a. I piah a vaipa chu a tho thurh a, a chuan man bakah 50/100 vel a pek belh a awlsam tak maiin seat confirmed lehnghal a rawn hum chhuak va va thung a. A ni khat hlawh tur kha ti buai miah lo in a kal nal nal mai a. In in hlawk hleih leh ta.

Chutiang zelin college admission ah te, gas bur la tura in tlarna ah te, dawrkai CST registration ti tur te, way bill siam tir tur te leh BPL card siam tir tur thleng hian kan hlawk em em vek mai zawk a lo ni a.

India ramah hian mipui hi kan han tam lai leng khawp a, hna i dil a ni emaw, bill i pe dawn emaw, dawr hawn i tum emaw pawh ni se in line put put ngai khawp zel hian mihring kan indaih zai tawh si a. Tunlai ah hun a hlu tawh bawk si a. Tlem sen belh a hun hek miah loh a tih dan kawng zawng te hi kan indang zo ang em?

Chuti a nih loh chuan kan pisa pui te hi automated, paperless a kan siam hun nghah a la ngai ngei ang. Chutih hun thleng tur chuan computer literacy za ah 80 tal kan nih ve a ngai ang a. Zirna lamah lah hma kan sawn rih si lo.

A eiru kan tih leh diklo ni a kan hriat faten thiamna sang tak tak sum nen an lei tawh laiin keini ramah ve chuan sikul kaikim lo hi rethei berh ve tak tak te zingah kan la tam zawk bawk si.

Chuvangin corruption hian meter a neih a ngai a ni. Tehna (Unit) hi a pawimawh em em a. Buhfai rih zawngte, hlam sei zawng te chu kan sawi nalh nalh thei a. Chutih laiin hlemhletna/eirukna/diklohna erawh kan nei si lo. Eiru-to-meter hi siam i la, 1-10 in kan daidang ang a.5 hnuai lam a nih chuan kan pawm ang a, panga a pelh vaih chuan meter kha rawn sen vat vat se la. Tichuan eirukna hi kan do thei deuh lo maw?

Kei chuan ka eiru ngai lo vang ti, midangte eiruk erawh tha ti viau zawng ban phar ru le!

Similar Posts:

• Man drives drunk to protest drink-drive charge
• Mizoram Drivers Licence?
• ZOO hi ransa te tan Jail chikhat a ni
• Mau
• Driving License Lem tih kiam nan

Recent Posts:

• Thianpa lr hlonchhing birthday lawmnan..
• Paula Pawla
• Hmangaih CFL
• MIZO SAKHAW BIAK DÂN LEH A TOBUL ~ 2
• Burma-ah ka zin Part – III

This entry was posted on Monday, August 29th, 2011 at 2:30 pm and is filed under Corruption, Opinion. You can follow any responses to this entry through the RSS 2.0 feed. You can leave a response, or trackback from your own site.