mi(sual).com

Road trip ber kher maw:
Kei hi zin chhuah hi ka uar lo khawp mai a. Zin nuam ti vaklo mi nih chuan zin lo hian a lo awm theih khawp mai a. Road trip kher kher phei hi chuan tun hi ka zin vawi khatna a ni dawn a. Ka zin ang hi chuan zin leh tur ni ila ka inngaihtuah nasa viau awm e.

Tun tum ka zin chhuak tur chu nidanga ka zin chhuak ang lo deuh a nih avangin rin aiin a lak pawh ka la ho lam phian a. Nidang ang lo takin zin dawn rilru kam el ul te pawh awm hman miah lovin ka chhuah hma tlaiah darkar tlemte a awm in kan zin tur hi tih fel niin min hrilh chiang chauh a.

Zin tur e ti lo chuan a in siam pawh ka in siam awlsam khawp mai. Ka puan lum (light banket), kut kawr, hmai hrukna leh tootbrush te ka racksack-ah ka vawm lut a, ka thawmhnaw in bel tur ka in hak fel chuan zin turin ka in peih fel chu a ni mai reng a.

 Tun tum ka zin chhuak chu zin satliah ka ni lo ka tih tawh kha. A saptawng takin “Road trip’ ngat a ni a. Raod trip kan tih kher na chhan pawh ka thianpa pakhatin a Motor neih thar (second hand) Zoram lamah a thawn haw dawn a. Motor a phurh tir chuan hun a duh rei deuh tiin driver khalh haw tir a tum a. A thawn haw hma hian “Hawh, Motor hian haw ila, Road trip kan nei chho dawn nia” tiin min sawm fiam a.

Amaherawhchu, kum thar lama haw chho tho ka ngaih dawn avangin thil ti fela haw ka duh zawk a, ka um e vak lem lova. A ni pawh chu a motor chuan a haw peih bik ta lova. Thlawhna in a chhoh san a, a motor chu Guwahati-ah a lo nghak a. Amaherawhchu, motor chuan vanduaithlak takin kalkawngah motor dang a su hlauh mai a. Chu motor han ngaihven a Delhi lam phur thla turin kan han kal dawn a ni. Chuvang chuan zin satliah kan ni lo, road trip dangdai tak a ni tlat a, mahse ka thianpa min sawnna road trip nen kha chuan in ang lo tak a ni thung.

Awi karei Barreilly:
Kan thianpa motor in chhiat a tawh na lai hi Bareilly (UP) bul a ni a. UP state ah hian Bareilly hi chi hnih a awm a. A pakhat zawk hi Rea bareili a ni a, a lar pawh a lar zawk nghe nghe a. Rae bareili hi tun dinhmuna India ram a thunei ber a sawi, Pi Sonia Gandhi-i MP constituency a ni a.

Kan kalna tur hi Barreily-ah pawha a lar lo zawk, Barreily tih a ni tawp a. Delhi atang chuan a hnaih zawnga hnai zawk teh meuh a, mahse Bareilly-ah pawha Bareilly chhe zawka nih duh hmel khawp mai. Tun hma lama Rel a kan haw uar lai khan kan rel chuanna in a tlawh loh khua a nih avangin tun tum kan road trip a kan kal tur hi a vawikhatna tur a ni dawn a ni.

Kan road trip neih dan tur pawh hi mi dang Road trip a motora nuam tawlh palha an zin khaw thawng anga ni lova, rel ngatin kan kal dawn a ni. Rel ah rau rau pawha changkang chi a ni lo leh nghal. Tin, ka road trip pui tur te hi nula pakhat mah an awm hauh lova, Mizo tlangval puanthuah khai lai leh hmang dang patling pathum (kan Pu-a te ) kan ni.

Road trip Introduction : Rel chuan nuihzatthlak chu :
Kan chhuahna rel station tur hi Delhi-a Rel station lar deuh deuh pathum, New Delhi, Old Delhi leh Nizamuddin railway station a ni lova. Shahdara railway station a ni e an rawn ti mauh mai a. Railway station kan kal hma atangin kan chiang lo nghal phawt a. Kan la hmelhriat vak loh avangin Internet lamah kan han zawng ngial a, internet lamah lah chuan a chiang vak lo leh nghal a. Shahdara kan hriat ve chhuna ah chuan rel station a awm ka hre ngai lova.

Metro rail (khawpui chhunga rel, lei hnuaiah te pawh tlan ang chi hi) station a a awm tih lo hre tawh mah ila, Railway station a awm tih chu Delhi kum 10 dawn ka awm hnu hian kan hre leh hnu hnawh a. Zan lam Dar 11:40 a kal tur kha min nawr hmanhmawh avangin nula thingpui lum pawh in hmang lo in bakleng in kan han phei ve ngawt a.

Kan rel station kal tur chu Yamuna lui uih kan meuhin kan han tlan a. Shahdara hi New Delhi area a ni pha lova, New Delhi ni pha lo rau rau pawh a New Delhi lohna a lang chiang bik hle mai. Delhi pawh a ang lo hial in a lang. Station lai vel te chu mi khawpui ni mai hian ka hria a, kan chetthlat ngai lohna rama a nih avangin kan tlangnel em em hran lo. Station kan han lut tur te chu kan nuih a za nghal pang mai a.

Station luhna aiin lei hnuai kawng (pedestrian subway) a ang ber a. Station han thleng chuan Rail station a ni e ti lo chuan rel pakhat mah an lo awm lova. Rail station ve lem si a rel pakhat tal pawh hmuh tur han awm lo mai chu a mak ang reng khawp mai. Kan kal hun kha dar 11:40 an ti a, dar 10:30 vel in kan thleng fel thei a. Darkar khat rel nghah pawha rei tih nak alaiin kan rel tur chu an tlai mauh mai a. Tum khat chu rel lu hi a lo kal a, kan kal pui tur pa chuan phur tawk hian a bungrua chu keng in a lo chang a, a lu (locomotive) chiah a lo kal chu nuih a ti za duh khawp mai.

Kan rel chhuanna tur zan dar 11:40 vel a chhuak tura sawi kha a hmel reng renga lo lang thei lova, zing dar 1:30 velah a lo thleng chauh a. Kan rel han chuang tur chu kan seat tur zawngin kan han tlan kual leh rih phawt a. Hmanhmawh takin kan kal hlawk hlawk a, kan han lut chu mutna awm lo chi hlir mai hi a ni a, an tawt khawp mai lehnghal a. Chutiang a han in ek chhe beng chunga darkar 6/7 vel hun han hman chu huphurhawm ru duh tak a ni.

Mahse, kan vannei a siam in chu lai chu kan chuanna tura nilo tih kan hre chhuak a. Kan chuanna tur chu a hma lama a nih vangin rel station a chuan kan han tlan leh chiam mai a. Kei hi Rel awm mai mai um vak hi ka ching hrim hrim a. Tun tum pawh hian a ding mai mai bulah chuan hmanhmawh deuh in kan tlan leh chiam a, nuiha za duh khawp mai.

Zing lamah ka har hnu pawh chuan ka la tho duh mai lova. Rel thleng tur hi chu zawh loh pawh hian a mi chuang a zir hian a hriat theih vek thin a. An bungrua an ti fel a, an in siam sang sang thin a. Tun tum chu inrinlawkna pawh awm miah lovin ka thleng thut mai a. Keini a chunga mi chu kan tho tawrh a pheikhawk kan bun a mawlh mawlh a, kan zuang thla a, kan puan lum kam tel tha mawlh mawlha kan chhuak ve a.

Rel atanga chhuak chu kan kal pui te chu ei tur dawrah an lo in tlar far tawh a. Zing thawh hlim han zun khaw muan chu sawi loh hmai pawh phih hlei lo chuan ei tur bulah chuan kan ding leh ta far a. Kan hnung lam han en let ila rel kal liam ta kal san tak ek a lo let ngut a hlawm a, mahse, thil ei lai chuan chu lam chu kan hawi duh bik ta lova, a ei ve theih tho mai.
Rela a mut hian lukhum leh pheikhawk eng ila hi a bo duh thin a.

Keini pawh kan thianpa pakhat chuan a pheikhawr Sneaker chu zan lamah a lo phelh kher kher emawni, mi tu ten emaw an lo kal pah hlauh mai a, Rail station atang chuan kelawngin a chhuak ta hnak hnak a. Rel station bul dawrah chuan Chapal chu kan han lei leh phawt a….

( Ni 19.12 hi kan road trip neih champha, a kum khatna tur a lo ni reng a, he mi pual hian kan rawn post ve a ni e)

Similar Posts:

• Bareilly Road Trip (Part II)
• MLA vengtuten police driver kut an thlak
• Kan Himna Kulh
• Mizofed in petrol nei chhe ber
• Aizawlah gas leh petrol awm lo!

Recent Posts:

• Cheng 4000-5000 an sem dawn an ti
• Breaking News: Lungdai Nu Vai bawngchaw zawngin pawngsualin a sat hlum
• Comedian Search 2012 Fiamthu-2 (Link dik leh thei thei tawh lo veeeee!)
• Ka Mit Laa, Ka Rilru Khawihtute
• mi(sual) member piancham!

This entry was posted on Monday, December 19th, 2011 at 12:00 pm and is filed under Travel. You can follow any responses to this entry through the RSS 2.0 feed. You can leave a response, or trackback from your own site.