mi(sual).com

Keimah Millionaire pa :

Road trip a kal Mizo tlangval pathum te hi kal chhan nei vek  kan ni a. Kei hi a neitu chanchang a kal ka ni a, kan thianpa pakhat hi a Motor registration a hming in an tih avangin a registration holder ang in a kal a, pakhat  hi Hindi thiamtha deuh ber a, tawng let tu  ang deuh a kal a ni  thung a.

A neitu quota a kal ka nih avangin pawisa kawl tu ber ka ni a. Pawisa hi kan keng tam lem lo khawp mai a, cheng sing khat erh awrh chiah ka pai chhuak a.  A pawisa kawl tu ber ka nih avangin kan senso leh pawisa hmanna chi tul reng reng kha ka pe ta char char a.

A nei ber ang zia zangin ka pawisa kawl lai sing khat ken atang chuan kan theh chhuak ve zung zung thin a. Kan kal hma atang thingpui leh eng ila hmawhsawm atanga kan kal puipa pheikhawk bo chapal man tur te, motor hlankaina tur thing hawh man te, motor hman man leh motor hlangtu tur labour rawih man te, kan motor lo veng tute lawmman atanga handyman tips ve tur thleng in ka pek vek a ngaih avangin a man tlawm ber chi a che mah ni ila a nei ber angin ka pawisa bawm atang chuan a chhuak zawih zawih mai a ni. A chhuak zat hlutna tam lem lo mahse la,a chhuak zing ve thei khawp mai. Kha mi ni na na kha chuan millionaire chet in ka che a ni ber e.

Ek in chep leh a behbawm :

Kan driver hliam tuar kha damdawiinah kan han kan ve a. Ka tih dan te te in  ka ek a chhuak leh mauh mai a. An damdawiin ekin ve lah kha a chep em em khawp a. A chep viau danah hian a tawp dan tur chu in hrethiam mai ang a. Chep viau mahse ek a chhuah tawh chuan a ek lo theih silova, ka e ve teuh tho mai. Ka thianpa pakhat phei chu a e duh lo vel phawt a, ek chhuak a dan ngawt theih silova a han ti lui ve ta hram bawk a.

Kan motor hawnna tur tur chu kan han dap a.  Motor chhehnuk chi (Craine) a kan hnuh tir chuan a to bakah Delhi thleng an phur thei loh avangin Motor a phur kan tum ta a. Vai ho han in dawr tak tak hi nuihzatthlak thin ngawt mai. A chang leh an han in ko hrang vel thul.

Kan hmuh lai leh hmuh loh ah pawh an in koh hrang mawlh mawlh reng mai a ni. Eng tin tin emaw kan motor phur thei tur chuan Eicher Mini truck, man to lutuk lovin kan hmu thei mai a. Kan motor chetsualna hi Barreily atanga km 25 vel nih avangin motor hlangkai tur labour nen motor chuan kan in phur phei ta a. A hnunga chuan kan in hnawh khawm ta ruih mai a.  A neitu leh nei tu lo a thlair theih lova, thutna  lah awm ve hek lo kan in hnawk khawm phei ta ruih mai a.

Kan motor dahna kan han thleng chu kan motor pawha kan beisei aiin chhia a. An chhiat tawh thu min hril lai a chhe nual an rawn tih nen chuan in ang lo tak a ni.  Kawngpui kam thingpui dawr bulah a lo ner kawisawi nasa mai a. Mihring chu nise a rum pui ve nasa khawp ang le.

A ngam loh  tawngah rau rau chuan a hmel hmanga  pe chhe  ber chi ang hi a ni a. Thla kan han lak sak malh malh hnu chuan kan labour hruai te khan  thing hmanga chawi kan an han tum a. An rin anga lo ni hauh lo mai a, lo theih mai hauh lova. An han chai laih laih a, a tih dan tur an han dap khawp ngial hnu in kawng sir awih lai deuhah a phurtu tur Motor dinna tur an laih khuar belh a, eng tin tin emaw kan inhlang fel thei hram a. Thil tih fel tur te kan tih fel hnu chuan Road trip part II chu kan tan leh ta a.

Kan motor chhiat dan chipchiar hi a neitu pa kan hrilh vek duh lem lova. Min rawn zawh pawhin siam a ngai nual ang tin kan sawi mai a, a thlalak pawh thawn lawk loh tha in kan hria a. Krismas te lungmuang in hmang phawt sela kan la hril dawn nia tiin thuthlukna kan siam reng a ni.

 Road trip tak tak : Haw kawng lam

Kan motor han lam chu a phurtu tur Motor a kan hlang fel chiah hnu chuan. Kan haw lam a kan thut dan tur kan kalpui kan pute ho chuan an rem dan dan a. A vai tawng thiam ho zawng  kan pu-a te leh kan translator chu kan motor chhia  chhungah an chuang ang a, a tawng thiam lo pahnih chu driver leh handyman  nen Motor hma lamah chuang turin min ti a. Eng vanga keini pahnih kher kher nge min thut dun tir tih chu kan hre lem lova. Kan vai tawng thiam vak lo min be sawm vel thei loh vang emaw ni dawn aw ka ti rilru mai a.

Kan thutna lah kha an nuam lo em em khawp a. Mi pahnih thutna turah mi pathum kan han in hnawh a, a hnung nghenchhan kha a awm mumal lova. Han nghen luih lah khan thir pawng awm in dar a do ul mai bawk si a. Kan driver lah khan vai hla hlir mai a zai tir a. Vai hla lo hriat loh nak alaiin kan thiam lo chi hlir mai a ni deuh vek a. A then chu vai ‘rap’ tih dawn a, rap ni chiah lo, a sa tih dawn a sa ni em em silo te kha a ni a, lunga zing lo thei lo.

A hla a zai tir loh karin kan thianpa hian a mobile a mi krisamas hla an zai tir ve bawk a, krismas a hnai tawh teh lul nen krismas lung len a kai tho lo reng reng nia mawle. Ka thianpa, ka thutpui tur pa lah chuan  motor hma lamah ka thu peih lo e tiin a hnung a  chuh lui tlat a. Mahse, eng tin tin emaw an rawn hnawt let leh a. A hnu ah chuan kan translator pa khan chuan “Driver kha mutthluk a hrata nia aw” tiin a hnung atang chuan sms min rawn thawn a. Vaipa a tir lama driver bula chuang duh lo khaw hei vang hi a ni maw a hnung a chuan a chuh tlat tiin kan in hnem vel ta mai mai a.

National Highway tawih tak chu :

Kan road trip-na kawng hi National Highway no 24 a ni. Sawi tawh angin haw lam chu rela chuan san daih theih a nih loh avangin kawngpui pangaiah kan rawn haw ve a. Kan haw lam hi thui kan tlan hma lo, darkar khat erh awrh kan tlan hnu in traffic jam a vangin kan han ding tan phawt a.

Eng vanga chutianga National Highway ding nghuk mai nge maw kan nih chu tiin ka ngaituah a. Rel kawng kan tur kan lo nghak ni awm tak a ni. National Highway te rel in a tan tlang zel chuan a va buaithlak duh awm ve le aw….tia in sawh in sawh chung chuan kan tawlh ve bek bek a. A kawng pui thawl lai deuh kan han tlan te kha chuan kan motor pawha duk ve pur pur a, kan hma lama mi te kan pel ve zung zung a, mahse, kan tlan chak rei thei lo kha a buaithlakna lai ber chu a ni.

Thui tak chak tak a tlan na hun kan nei hman meuh lo. A chang chuan kan han ding leh nghuk kha Rel vang  bawk emawni dawn aw tiin “A hrim hrim in rel pawh hi a a hnuaiah kal tir tur a lawm” tiin ka ang bawrh bawrh hman a. Mahse, kan han enchian chuan kan tan chhan kha rel vang a lo ni i khaw lo. Rel chu lei hnuai lamah a lo tlan liam zung zung a. Keini lah kha kan lo la intlar thup mai si te kha eng vang tak niang maw le?

Kan kawngpui zawh kha National Highway pu ve lem si ah chuan vai ram National Highway a ang lo khawp mai. A kawngpui hrim hrim kha a te in a kawng a mam tha lo hle a, a bawl pawha bawl ve nasa khawp mai. Mi ram kawng pui te chu a tha an tih kan hre fova. Kawng pui tha thlalak te pawh kan hmu ve fo thin a. Ka kalpuipa phei chuan ‘mi ram kawngpui te chu a tha a tha an ti ve si a’ a ti bai bai reng a.

India ram kawngpui tha khawpui lian pali (4) thlawh tu ‘Golden Quadrilateral’ an tih kha khawiah nge maw ni le kan ti chul mai a ni. Kan driver te hnehah chuan “hei National highway a ni meuh a maw?” kan ti sek mai a. Khatiang kawngpui kha chu National Highway Authority of India hovin an hnu chhawn kawngpui a ni hial ta ve ang ti ngawt dawn ila motor a tam dan ah khan hnuchhawn kawngpui ngawt zawng a nih a rinawm si loh a.

Tin, kha kawngpui kha a kawnga chhiat leh tet chu thuhran nise man chawia kalna chi (toll road) a tam em em kha a buaithlak lehna chu a ni. A pawisa pe tu ka ni tawh lo na a, ka lo ning hmang khawp mai. An toll road te lah kha toll road tih pawha hriat loh a, a kawngpui a zau in a that teh vak pawhin ka hre silova, kan toll road hriat thin te nen a in ang lo thei khawp mai. A then te chu leh lam leh chhuah lam te khan an la te in ka hria a, a awmzia pawh ka hre thiam vak lo a ni. Eng vanga kha tia man chawi a kal tir vak nge maw an nih le ?

Kal man an lak na chhan kha a kawng that aiin a tawi zawk (short cut) vang ni maw ? Amaherawhchu, tun thleng ka hriat thiam theih loh chu Agra hi Delhi atangin 253  km vel a ni a. Bareilly hi  265 km vel lek a ni thung a. Agra kal na hian rel in darkar thum leh a chanve vel kan hmang a, Bareilly Agra aia km 10 awrha hla kal nan a darkar 9 dawn kan hmang leh si hi eng vang nge tih hi keini mi mawl mai tan a hriatthiam chi a ni lo ang e…..

Delhi khawpui mawi leh ropui chu :

Kan road trip kha kawng tha lo taka darkar 12 dawn kan in sawh bauh bauh hnu in Delhi khaw  per, Ghaziabad kan lut a. Delhi chhung kan la lut lo na in Delhi khawpui rim a nam ta chak chak mai a. Delhi rim a nam tawh bawk a kawngpui pawh a zau in a khawpui pawh khawpui dang kan paltlang ai chuan a ziaawm ta deuh a. Delhi Police duty te hmel pawh hmu tur a awm thuai a. Delhi a MCD toll road kan han lut te chu a hma lama kan toll road paltlang nen chuan dang tak a ni hlawm a. A kawng pui len leh fai dan en chuan UP a kan toll road kal pelh te nen chuan khaikhin chi pawh a nilo.

Delhi khawpui kan han lut a, mahni khawpui lut kan ni ve tawha thla te pawha muang ve deuh a. Ring  road kan han thleng te chu khawpui hrehawm leh ninawm ti a ka lo iak pui ka lo iak pui thin kha a ni ta lo emaw ka ti hial a. Commomwealth Games avanga khawpui an chei na a  la rei loh avangin ka khawpui pawha lo mawi hle a ni tih min hriat chhuah tir hial a. Khawvel khawpui dang nen a khaikhin pawhin  a lo zahpuiawm lo hle mai tih te ka hmuchhuak thar a.

Kawtthler leh a street light han en te chuan mi ram khawpui emaw tih mai tur a ni ve tlat mai. Rail station bul hmun lai a Hotel in tlarna lai te phei chu kan khawpui a nilo emaw tih turin a lo eng ve sup sup a, Hotel ho in an tar mawi (hoarding) han hmuh pei chuan  Delhi khawpui a tana mawi lo khawpin mit a ti tlai a lawm le.

Kan motor kha zan lai dar 12: 30 velah kan thlen pui ang a, kan hlang thla ang chu tih nak a laiin  kan thleng fela kan chuanna  atanga kan zuang thla chuan zing lam dar 4:30 a ri fel der a. A hlang thla tur an an chah ho pawh an lo haw darh zo tawh a, keini mi pariat (driver leh handyman telin) han hlan thlak rual a nih loh avangin a tuk lama hlang thla turin kan in mangtha ta rih a. Keimah Millionaire pa bawk chuan kan kal pui kan pute ho auto fair tur kan sem leh dan dan hnu chuan Delhi khawvawt tak hnuaiah kan khur phei ve ta bauh bauh a.

A motor neitu leh Delhi lama lo ngaihven tur a kan ruat pa hnehah kan thleng thu report pe fel bawka ka hna chu ka zo ta. An duh leh chanchinbu chhia hralhna rate in lo ti ral se la, an duh leh a part thlawn darh in hralh zawk se….an thu thu a ni tawh e. Khum in ka mut nghakhlel tak a min lo nghahna a rei ta bawk a thlasik laiin a balh tak tak theih hlei nem le, eng nge inbual kher angaih ang…..

This entry was posted on Tuesday, December 20th, 2011 at 10:30 am and is filed under Travel. You can follow any responses to this entry through the RSS 2.0 feed. Both comments and pings are currently closed.