Ka Nu, ka ngai bang thei lo che…
Sahmulphah thla tir a ni a. Ka in luah chung zawlah khawhar taka thuin ka hawikual vel a. Van thiang ruih mai, khawimaw lai a thlasik kawng in a bawh pet chuai te chuan nunhlui bawk min ngaih tir leh ta. Ngai teh, Chhohreivung paw’n an zinkawng ngai zawhin vanlaizawl min lo kai san leh der tawh in, Siruk-i te unau paw’n Chhohreivung um phak nih hlau ni awm fahranin hmatiang sawn relin an de sep sep bawk. Aw.., heng siar te hi keiin ka hriat ve hnu ah danglam lo leh, in peih loh san awm miah loin, lungrual takin an awmna hmun theuh ah an eng zan tin a. Kei erawh chu thian leh rual tam takin min awm loh san a, tin ka Nu ngei paw’n he lei anchhedawnga min cham pui peih lo in pialral min kaisan tawh bawk.
Durga pooja lawm reh lam a ni bawk a, phur chang a halpuah ralkhat a puak leh zauh zauh tih loh chuan ka khawhar min hriatthiam pui ni awm takin a reh hian an reh tlawk tlawk a. Arsi ka sawi tak te kawk diat diat pah a ka Nu in zan thiang reh hnuai a’n hmangaih takin a kut lum thar thar a min kuah a; an behchhan thawnthu min hrilh lai te ka ngaihtuah let zel a. Chu mai a ni lo; khawchhak mifing te’n arsi mak tak an zui a; a tawp a Isua Krista pianna khua Bethlehem an thlen tak thu min hrilh te; mitin nghahhleh em em thin; zirlai te tan a exam zawh chakawm chhan te, mahni khua a haw nghahhlehawm chhan te, bialnu/bialpa nei te tan a a nawm bik zia te, tin nei lem lo tan pawh a lem bik chuang loh zia thleng a Lal pian hun lawmawm Krismas chanchin min hrilh thin te ka ngaihtuah ta zel a. Duat leh thlahlel tak a ‘Mampui/Mahming’ ti a min ko lai hmel mitthla a’n a lang thar leh a. A ngai te in ka Nu ka ngai vawng vawng.
Kum thum liam ta khan…
Rilru in ‘ka Nu chu eng nge a an tawh ang aw?‘, engtikah nge ‘a dam‘ emaw ‘a chawl ta‘ tih ka hriat ang tih ngaihtuah reng reng nitin hun ka hmang thin. Bangalore-a awm tir ka ni bawk nen; Krismas thleng mai tur boruak ah phei chuan kan in ka ngai em em thin a, haw na hun remchang erawh a awm hauh lo.
Tin heti hi a ni a, Bangalore ka awm hnu a, exam hmasa ber ka neih dawn zan chuan thahnemngai takin lehkha ka zir a. Chutah ka phone a khur (vibrate) char char a, ka thudawn ka chhiar zawh meuh chuan ka bing mup! Eng dang a ni law: ‘zanin kan tlai var theih hmel ta lo‘ ti a ka u in ka nu dinhmun thu min thawn a ni. Ngaihtuah a tawi tuk mai! Tih theih dang awm heklo le, a tuka exam tur chu theih ang tawkin ka in puahchah ve a, rilru ah erawh a lut mawh khawp!
A tukah rilru nuam lo taka exam ka zawh in chanchin ka zawt leh vat a. Hun reilo te ah thuthawn (sms) tawite ka dawn chhun zawm… ‘ka nu chu a chawl ta‘
Mak ka tiin awih har ka ti, awih loh chi lah ni silo. Eng ber nge ka tih dawn ka hre lo. Kha hun kher kher kha chu siam that leh theih nise thleng ngai miah lo tur in siamthat ka duh ngawih ngawih. Nu ka nei ta lo tiin hrehawm ka ti a, mal em em in ka in hre bawk. Ka room-ah ka kir vat a, Bible ka keu a, tum bik pawh neilo a ka chhiar fuh tak chu: ‘A mi thianghlimte thihna chu Lalpa ngaih chuan hlu tak a ni‘ (Sam116:15) tih ngei mai hi. Ka chhiar zawh chiah chuan lawm avangin ka mittui ka dang zo lo!
Krismas kan nghah dan hi…
Hun a kal zel a, a dang ta hret hret zel ti ila kan tisual awm lo e. Thildang in a pawlh dal tial tial a. Mi phunchiar apiang an vanduai a ni kan ti thei hial zawk ang chu. Kawng lehlam ah chuan Krismas kan nghahhlelh chhan ber thin thawmhnaw thar neih na hun te, exam zawh leh, kut hnathawk te tan lah an tuh rah an seng zawh hun te, duh tawk a Krismas ruai theh na hun te leh thil dang tam tak a awm ang. Keima nun kal dan te ka in en ngei pawhin danglam tak a ni. Krismas hma a chawlh nei thin kha kum sarih chhung Krismas lai in exam ka nei thin a. High school kan kal lai hun ang a ka nghahhlelh thin dan nen chuan danglam tak a ni.
Hei vang hian Krismas hi a nep ta ka ti miah lo, tin ngainep lo a a hlutzia kan hriat chian zel a tul zawk. Krismas kan nghalhlelh chhan ka sawi tak zawng zawng hi hlimhlawpna leh kan hma kan sial na kawng a kawk vek zawk a. Hun nei tam lo in, chawlh nei tlem mah ila, hun kal zel hian Krismas pawimawhzia min hriatchhuah tir zawk se. Kan tan a nun min hlan tu hmangaihna leh kawng harsa zawh tur a he lei a lo pianna champhaphak ah hian kan mihring puite tan a malsawmna ni thei zawk tur leh, kan thlarau nun ah pawh puitling zawk zel a kan hman a pawimawh hle in ka hria.
Mitin tan hlimna…
A ni teh meuh maw..?
Aw Ni chiang e. He hlimna ni ropui, khawvel piantirh atang a Krista ringtute tan a hun lawmawm leh ropui hi a hlut em vangin hlim chak si, an ngaih leh hmangaih em em te nen a hman ho chak, hmang thei silo te tan chuan hlim taka hman chu a har reng a ni. Mahse.., ka ti lek pek thin ang; luaithli an nul chhan erawh hlimna hun ropui leh nuam an hman pui duh te nen a an hman theih loh vang mai a ni zawk e.
Mi tam tak in (kei ngei pawh in), ‘kan upa tial tial a, Krismas hi a ho/hlu lo tual tual‘ kan ti fo mai hi a dik berin ka hre ta tlat lo. Ngun tak a ngaituah chian zawk chuan kan kum upa zel hian Pathian min hmangaihna thukzia leh ropuizia, mihring tawng a sawifiah theih lo hi kan phu lohzia hrechiang zel zawk tur kan ni a. Chuvangin kan sawi tak, kan nun a kan beisei ang te hi kalsan vek ang ka tilo, chutih laiin awmze nei zawk leh kan nun a tangkai leh hlimna nasa zawk kan chhar zel zawk hi a tul hle in ka hria. Hlimna dik tak, chatuan nunna min petu, Isua Krista min hmangaihna hrechiang thar zel zawk in; phur vak lo chung pawh a kan fak a, A tana inhlanthar hi kan tih tur zawk a ni. Lusun kan ngaihna te hian Isua nen a kan inkar lo ti hnai zel zawk se, khawhar tak a kan awm lai paw’n Muanna Lal fapa chuan kan thinlung luahkhat mawlh teh se.
‘Awmlai vei leh lusun fate chantawk hi dawn ve teh, hnutiang mual liam hnu ngaiin an tap e…’tih hla changin lusun fate min vel fo hi in dem thei kan ni lo. Kei zawng, mitin tana hlimna min thlen tu pianchamphphak ah hian ka Nu ngai tak chung in Isua nen hlim ka tum ta zawk. Ka Nu min hmangaih na ka sawifiah thiam loh aia let tam tak a min hmangaih a, chatuan nunna min petu, Lal Isua fak in, hlim tak a A pianchamphaphak hi hman ngei ka tum.
Similar Posts:
- Nausen Lal Isua hi engtin nge kan lo lawm ang?
- Krismas a lo hnai leh ta
- Pu Rokunga leh Krismas..
- Christmas hlathu diklo ka tih thenkhat
- Krismas Thuchah
(L)...
December 22nd, 2011 at 5:02 pm
When memory is all that remains…
Report this comment
December 22nd, 2011 at 5:07 pm
ngaihnawm phian.
Report this comment
December 22nd, 2011 at 5:32 pm
Ngaihnawm hle laiin a Lungchhiat thlak ang reng bawk si. I lusun khawharna in delh beh tir tlat lova, Pathian a hlimna leh Lawmna thar i chhar thar zel avangin ka lawmpui che. Fa ten nu leh pa te an sun thin hi khawvel kalphung dik tak tur ni a a lan laiin nu leh pa ten an fa te an sun thin hi an lainatawm tak zetin ka hria.
Report this comment
December 22nd, 2011 at 5:51 pm
Post tu pa, ka hrethiam bawn tawp che..mahse nangmah ang bawkin keipawh ka nu leh ka pa, ka pi leh ka pu te ngai em em chungin Krismasah hi chuan ‘Hlimna ni ropui chu a eng’ tih hi kan thlang nawn ve ang e.
Report this comment
December 22nd, 2011 at 6:06 pm
Rawn dak ve zuai mahse ka la chhiar hman lo deuh nakin ah uluk deuhin ka la chhiar ang
Report this comment
December 22nd, 2011 at 6:07 pm
Rilru a khoih khop mai, mahming. I dinhmunah hian ding ila, nang aiin ka tuar thiamlo zok ngei ang. Mahse kan trahna tr, lungngaihna te hi kumhlui laim hian liampui se, kumtharah rilru thar nen bul i tran thra leh zok ang u.
Report this comment
December 22nd, 2011 at 6:12 pm
Thianpa ziah anih manah ka chhiar hman rihlo na in ka’n rawn like ve zuai ange.
Report this comment
December 22nd, 2011 at 6:17 pm
Mahming i thuziak chuan rilru a tithar. Ka nu leh pa thih in an kiangah ka awm lo ve ve.. Mahse Pathian hnenah nu leh pa min hmangaihtu puitling kan nih thlenga min pek avang erawh chuan lawmthu harsa ti chungin ka sawi hmasa.
I nu i ngaihna hi kei nu leh pa nei tawh lo hian ka hrethiam pha. A chang chuan an mahni ngai hian ka la tap fo mai…
Fam ngai, khawhar, mangang te Lalpa,
Min hnemin min awmpui ang che.
Report this comment
December 22nd, 2011 at 6:27 pm
Pathian malsawmna hi ka dawng nasa hle ni hian ka hre thina, tin tlinglo hle mahila amah ka mamawh lai te, ka chakloh lai te tanpui ka ngaih lai tehian min hrereng thin ni hian ka hria a ka hlim em em ani.
A chang hi chuan thil min zirtir duh a neih vang ten chhum a rawn zin tir thin niin ka hria, mahse chutiang hunah pawh ka chakloh lutuk chuan amah bawk hian min rawn tanpui leh thin ni hian ka hria, ka kal theih dawnloh pawhin chakna te min pe in ka phur rit te min rawn chhawk a, chuti chung pawha keimah a kal harsa ka tih chang pawhin aman min rawn kalpui thin ni hian ka hria. Hetiang zawng zawng te avang hian ka hlim in ka lawm em em ani.
Chakna leh hlimna te bakah kan mamawh zawng min pe tu Pathian hi fakin awm sela, tuna hun lawmawm kanlo tawn tur ah hian amah hi fak ila ama tan i hlan ang u. Christmas chibai vek u le.
Report this comment
December 22nd, 2011 at 6:27 pm
Ka hnuk ati ulh
Report this comment
December 22nd, 2011 at 6:30 pm
Dr. Mahminga Sailo, i thu ziak a ngaihnawmin rilru a khawih e. I Bible chang tarlan hian ka rilru a khawih thar khawp mai. Misual thihnaa lawmna reng nei lo kan Pathian chuan, A mithianghlimte thihna chu a ngaihlu em em thin a ni si tak a! He thu hian rilru a khawih thar tak zet a ni. Lalpan vengin awmpui che rawh se.
Report this comment
December 22nd, 2011 at 6:58 pm
Ka lehkhazirna avang nge Sandman a thu ka awih vang pawh ka hre law… Post te hi ka chhiar chhuak khat khawp mai.. mahse, he post chu intro ka en a, hlah phal chi a ni ngang lo mai..
Hmannia kan khuaa i rawn zin tuma keiniho min rawn hmu lova nula ina chaw i ei erawh kan lung a la awi kim theilo a chha chu anih hi aw.. A thawidam tura vawikhat tal chu i rawn tleh thlak leh angai ngei ang..
Report this comment
December 22nd, 2011 at 7:14 pm
E, ka post ah comment a lo tlar duah tawh mai! In comment chhiar a va nuam hlawm tak em! Misual-ho fel thin zia hi chu aw.. Nakinah a mal te te in ka rawn chhang ang che u.
Report this comment
December 22nd, 2011 at 8:31 pm
Nu te hlut zia hi trawngkam a sawi fiah theih anih pawhin ka hre lo… Pathian zarah vanneih thlak takin ‘Ka Nu, ka hmangaih a min hmangaih em em tu, ka tana bang lova min tawngtai saktu ka la nei hi Pathian hnenah lawmthu ka sawi thin’
Ka nu, KA HMANGAIH CHE… Khawngaih takin min kalsan suh o.. Lalpa, ka nu hi veng himin hlim takin awm tir reng ang che ooo… Mom, I LOVE YOU SO MUCH…
Ka OT viau a, min lo hrethiam mai… Krismas a hnai ta bawk a… :wink:
Report this comment
December 22nd, 2011 at 9:29 pm
Nu leh pa te hmangaihna hi chu i sawi fo teh ang u. I thuziakin rilru a khawih khawp mai. Keipawh nu nei tawhlo ka nia, ka hrethiam lutuk che.
Christmas a lo thlen hian lunglen a thar leh thin anih hi. Keini pawh kumin chu Hospital ah Masi kan hman hmel a. Engkim mai hi kan tana ruat anih pawm thiam ka zir mek e.
Report this comment
December 22nd, 2011 at 9:41 pm
@ Maverick… I OT miah lo, nu hlutna sawi tluk a awm lo.
@ Sheldon… Ka lawm e. Nu leh pa te chawimawi hi Pathian duh zawng a ni ngei ang. Damdawi in a in awm chu a va pawi ve aw. Lalpa’n awmpui che rawh se.
@ Chemtatrawta… Ka hmuh chak che nen, i haw lai a lo ni a. Nia, in veng nula kha a fel khawp mai, min duat a..
Report this comment
December 22nd, 2011 at 9:47 pm
@ Rempy… Ka lawm e. Nu leh pa i la nei a, a nuam ngawt ang. Mi ropui nilo mah se, min dampui hian a dan a dang
@ Mamboihi.. I sawi dik lutuk. Kei aiin i tuar nasa, ka pa hian min la dampui a. Ka nu awm loh hnu hian kan inbe tam khawp mai.
Report this comment
December 22nd, 2011 at 9:54 pm
Urlawk zan ami tur skit kan area-in kan zir a, phone atangin misual a ngai a. Comment a bung nuai mai…
@ Pu Pkfanai, Jacka pi & Boiha pa.. Ka thuziak min hlutsak avangin ka lawm e. Hlim takin he hun hi in hman ka duhsak a che u.
Report this comment
December 22nd, 2011 at 10:11 pm
Pathianin awmpui zel che rawh se.
Report this comment
December 22nd, 2011 at 10:35 pm
‘Awmlai vei leh lusun fate chantawk hi dawn ve teh,
Hnutiang mualliam hnu ngaiin an tap e,’
Rilru a khawih khawp mai a…
Report this comment
December 22nd, 2011 at 11:16 pm
Misual active members ah hian Nu sun tawh te hi kan lo tam phian maia….
Thihna hi Lal Isuan a ai a awhzo tih hria ila lungngaia in dawm kun reng tur pawh a ni lo ania. Pathian min hnaih tir tu ah hmang thiam ila, chu chu thihna pawh malsawmnaa chantir dan chu a ni.
Report this comment
December 23rd, 2011 at 12:50 am
Ka Nu hi boral anga ka suangtuah hian ka mittui a tla fo.. Tlangval senior ni dawn tawh mah ila, ka mu lai ka tahchhuahna chhan tam ber chu Ka Nu a boral anga kalo mang hian ani..
Vangkhua chuanin leng mah ila
An awm nem maw, chhing zo tu
Mi tan zawng hlutna neilo mah nise
An awm nem maw chhing zo tu
Zirna run bello zirtirtu mah nise
An awm nem maw chhing zotu
Khawvel thiamna nei mah suh se
An awm nem maw chhing zotu
Aw ka Nu, ka chun nunnem
I hraileng lungmawl kei val hi
Zirtir loh i nei hlei nem le
Zirna run sang bel mah suh la
Awmdan mawi i sawi thin zawngte
A chuang si lo, eng bu ah mah
Kawppui neih hun lo thleng mahse
Mo sual hrawn turan ka phal lo che
Pitar phunchhiar ti a seltu Lanu
An lawi tawp lo’ang ka Run chhung ah
Report this comment
December 23rd, 2011 at 4:01 am
Office a, hnathawk paha ka lo thlir thuak khan,” He post chu a va nu deiii duai ve o..”, ka lo ti rilru hman a. Mahse, ka han chhiar chhuah dap chuan, a tha ka ti leh ta em em a. Tunlai chu Zoram ngaih a na bawk aniang, kei silent reader meuh pawhin ka rawn comment ta sek mai!
Report this comment