mi(sual).com

Isu, I piancham kan thleng leh ta. Piancham chibai bukna tha ber ka hlan a che. Biakin te pawh a mawi thei ang berin chei a ni a, zaipawl te pawh I piancham lawmnaa zai turin an inbuatsaiha, hla an zir tlat tlat mai. Kawngpui tuak sira thingkungte chu mawi taka chei an ni, hengte pawh hi I piancham lawmna tur atana tih vek an ni asin. Pawnah ka han dak chhuaka, boruak vawt var mai te chuan I pian zana brampute beram ven hun laite min ngaihtuah tira, an chanvo chan kha chanvo a zawnga ropui ber leh hlu ber a niin ka hria. Mi tam tak hmuh ve phak loh tur, lei leh vana lal ber piang an hmu bik si che a.

Berampute chanvo chan ang chang pha lo mah I la, chanvo ropui tak I piancham lawm tura ka awm hi lawm namen lovin ka lawm asin. Mi tam tak chuan he hun hlu tak hi hmu phak loh leh thleng hman lo in mual an liama, mahse kei erawh chu harsatna leh buaina awm lovin piancham a zawnga ropui ber leh chatuan nunna hawlh tlang piancham ka thleng thei bika, vannei ka in ti a, malsawmna a zawnga malsawmna sang ber a ni ka ti lo thei lo.

I hruaina tello chuan thleng thei ziazang ka ni lo. Arte khawlai leng pawh tluk lo hi I khawngaihna kutin min chelha, hmangaihna a zawnga hmangaihna tha berin nangin min kuangkuaha, harsatna leh buaina karah pawh nang chuan min phen tlata, buaina chhumpui lo thleng se, nang chuan min thlahthlam ngai lo. Tahna ruamah pawh mittui min hruk hul saka, mahni chakna a thleng tur ni I la ka thleng hauh lo ang, nangma min hruaina avang liau liaua I piancham thleng thei ka ni hi thil dang zawng aiin ka lawmna ti zualtu ber a ni.

Khawi ram lal mah hi ran chawpekna thlenga piang an awm lo. Nang erawh chu lei leh van lal ber ni mah la, I mite, a chhe ber atanga tha ber , a te ber atanga lian ber, mi eng ang pawh chhandam tur leh tlan tura lokal I nih miau avangin mi tu pawh maiin an pawm theih dan tur chein, I din leh I siam ngei mai he khawvelah hian I lo piang si. Hetiang khawpa tlawmnaa ropuina a zawnga ropui ber lo lang chhuak hi a sang em a, hla siamtuin “Mihring mihrinna hian a ngaihtuah chhuak zo lova che” tia a sawi hian a hrilhfiah mawi berin ka hria.

I pian zana nangmah chibai buk tura lokal khawchhak mifingte inpekna kha a thuk hlein ka hre thin. Thlasik khawvawh laiin inkal pawhna mumal tak a la awm hma lehnghal khan khawchhak lam ram hla tak atangin an rawn kal vang vang a ni a. TS Elliot a poem The three Magi tihah phei chuan heng khawchhak mifingte hi an chhung leh khatte chuan an nuihzata, an thiltum avang hian an hmusit hle niin a ziak a ni. Ni e, an thil tih kha a hunlai chuan a van atthlak awm e aw ka ti. Arsi pakhat an hmuh zui ringawt kha chu atthlak tak tur chu a ni. Mahse an rinna khan a hruai tlat si a, hei vang hian khawvel mihring piang tawh zinga mi nihlawh ber dinhmunah a din tir ta a nih hi. I piancham a lo thlen hian, nangmah ringtute chu mi nihlawh ber an ni thin tih min hriattir nawn chiang hle a ni.

I piancham kan lawm dan leh hman dan ka han thlir hian a chang chuan a hlutna leh ropuina hmuh kan hian kan hmang liam mai mai niin ka hre thin. A beh bawmah hian nasa takin kan kal ral vel mai mai chang hi a tamin hlein a lang. I duhzawng leh i ngaihpawimawh zawk ti lo hian keimahni duhzawng leh tha tih zawng lamah kan inhmang nasa zawk fo thin, materialism lamah kan tlan nasa a, heng hian I piancham awmzia leh a nihna hi hmuh fiah zo lovin min awm tir fo thin.

I pian zana van zaipawl te khan “lei chungah rem leng rawh se” tiin hla an rawn sa a. Hei hian remna hi I lo piannain a kentel a ni tih chiang takin a ti lang a ni. Keini erawh chuan rem thu len tir tura I lo piannniah hian kan hmelma te nena kan inkarah rem thu len tir kan harsata, kan thenawmte nena kan inrem lohna ah te inrem kan la harsat asin. I din leh I siam mirhingte zingah hian Inhmangaih tawnna chi tuh turin mihring angin I lo pianga, mahse I rawn kal chhan keini mihringte hian mahni hma kan siala, Mahni kan inhmangaih angin kan vengte hmangaih te hi kan la harsat tlat nia. Heng hian I pianchamte hi dan ang ve renga hmang tura ngaihna rilru te hial min pe a. Khawthlang ram lamah phei chuan Krismas season ti lovin Holiday season te an ti ta hial mai.

Keimahni duh dan zawk kan kalpui nasat luatah hian I chen duhna ber kan thinlung chei fai lo hian keimahni chenna zawkte hi kan ngaipawimawha. A ni neitu nangmah leh, kan ngaihpawimawh ber tur zawk che ngai pawimawh lo leh dah pawimawh lo hian mahni duhzawng leh chak zawng umin kan tlana, I piancham ni ropui takte hi kan hmang thin. I piancham hmuahna lamahte hian kan nawmsakna um zawkin kan tlan liam zawk thin a nih hi. Khawngaih takin min ngaidam dawn nia.

Nang chuan kan ngaihsak loh lei ber che pawhin min dah pawimawh ber renga, I lak ata kan vah bo lai pawhin nang chuan hmangaihna nen min lo nghak reng thin, I piancham a lo thlen hian lawmthu sawi sen lo ka ba nasa hle asin. I tan hian tih theih ka nei lo. I piancham a lo thlen hian ka tih ve theih tawk I tan he thu hi ka ziak ta a ni. Hlu lem lo mahse a nihna ang ang hian min lo pawmsak dawn nia.

HAPPY BIRTHDAY JESUS

Similar Posts:

• Hunpui kan ur khuang ruah chiar nghian e……..
• Nang leh Kei
• A hnai ta hle mai!
• Krismas Thuchah
• Human Rights, Aizawl Press Release

Recent Posts:

• Burma-ah ka zin Part – IV (Tuingo khuaa lung satel mak an tih kha)
• Thianpa lr hlonchhing birthday lawmnan..
• Paula Pawla
• Hmangaih CFL
• MIZO SAKHAW BIAK DÂN LEH A TOBUL ~ 2

This entry was posted on Sunday, December 25th, 2011 at 9:30 am and is filed under Christmas. You can follow any responses to this entry through the RSS 2.0 feed. You can leave a response, or trackback from your own site.