mi(sual).com

Kum tam tak a lo liam ve ta reng mai, mahse chung hun lai han ngaituah let chuan mitthlaah erawh a la chiang hle thung a ni. Sikul lama ka result-ah chuan a vannei pawlah ka tang ve mial a. Ka pa in ka pass lawm nan a Ramthar (Ringthar khua) ah Krismas hmang ila a ti pawh chu chak em em lem mah ila ka aw ve mai bawk a. Khang hun lai khan tleirawl tuaitir te rilrua a lo lan ve reng lai a nia, mahse amah vanga thulh leh mai erawh a chi bik tawh silo. Chu mi hma kum te chuan Krismas hnaih hian Rangvamual kan tlawh fo thin a. Mahse, an siktui thiang dawn tur nilovin kawng dung a, hnim hnah tur vawk chaw, Japan hlo par kan zut thin a. Thlasik sikul chawlh a kan hna ber kha ni a, hrehawm kan ti lutuk hran bik lo.

Chu mi tuma Ramthar zin a kal pawh chu kan thahnem phian a, kan kohran upa chhuanvawrin min hova, thla a muangin nuam kan ti tlang khawp mai. Kan zinna khua kan thlen tuk chuan kohhran hnatlang in kawng laia inhlawhnaah kan kal vek a. Tlai lamah kan cham chhunga kan rin tur vawk kan talh a. Kan vawk talh lah chu a nu ah mah chuan a no pai lai a a ni kher a. Kan Leader chu an va rawn a, a ni lah chuan ‘ar pawh a tui lai te chu a tui hlei hlei a, a pawi lo’ a lo tih avangin kan talh kha a ni a. A note zawng chu kan phum a, kan vawk talh thawnthu chu hmeichhe ho kan hrilh lem lova. Anni pawh chuan tui ti tak chuan an ei ve mai a.

Urlawk zan a lo thleng a, ar kan a interek hran tih vel a lang lo hrim hrim. Krismas inah kan zai tluk tluk mai a. Kan kal hma khan kan zinna mi te ho chu urlawk zan hi zai tlaivar tur emaw ti thin tih min hrilh lawk ve pan pan a, mahse, kan zai tlai var ta em lova. Ramthar a masi hman chu a hahdam thlak khawp mai, urlawk zan a zu check leh zurui man, chat thla buai pui tih ang vel kha chu a rim a ra pawh kan hre lova. Nuam dang dai ve tak chu a ni. Kha mi ramthar zinah khan kan veng tleirawl nulat hre tan te kha tel phei se la chu a nuam tiin ka kua a puar zan khua thak thei hial ang.

Kha zan a nawm lohna chhan khan Siampuii hla kan ngaihtlak loh avang leh a tel lova krisamas ho vek a kan ngaih Boney M hla nen a urlawk kan hman avang a ni hauh lova. Lenkhawm kan tui lo em em pawh a ni lova. Nula hman pui thu hlaah chuan ka dam chhunga nula ka la hmanpui hnem ber a ni hial awm e. Tlangval pawh kan tam, pa pawh an awm a. Harh lah kan harhfima, eng vang a kha mi zan khan nuam ti vaklo nge ka ni tih hi chu i chhiar ang i hre zel mai ang.

Krismas ni a lo thleng a, Pathian zarah ka khua pawh a har em em hran lo. Kan zinna khua mite tawng te in Krismas hla te kan sa a. A nuam chu kan ti phian a. Mahse, lung erawh a leng ru veng veng thin. Kan venga tleirawl pakhat ngaituah chuan rilru chu a lum let but but reng a. Suangtuahna mitthla bak kawm tur leh han sawi pui tur ka neih loh avangin lunglen chu keimah in ka sepui ruah tuar tlawk tlawk a ni ber. A nihna takah chuan kan vela hnim hnah thlasik khawvawtin a hmeh khaw ro ang ri re khan kei pawh ka nun ram kha kha tleitir i zun khan min hmet ro a ni si a. Krismas chu dam takin kan hmang zova. Krismas tuk ruaitheh ni a lo thleng ta a. Chu mi ni tak chu a ni hreawm ta chu.

Ruai kan theh zo, tlai lamah tlangah kan leng thawveng a, mahse kei zawng ka kim thei tlat lo mai. Ruak keimah ah hian a awm tlat. Kan riahna run lam panin ka haw ta hnak hnak a. Kan riahna lam khan eng vanga haw ve ngawt nge maw ka nih le. Tlang a kal ve te hlim nuih bawk bawk kha ka hmu thei lo nge ni, ka lungleng kha kan riakna tang khan kan veng lam thlir ka duh tih hi ka hre chiang thei tawh lo. Kan riahna run atangin kan veng lam chu suangtuahna mit mai nilo hian ka chhing mit ngei hian ka thir vawng vawng a. A khawi lai ber nge kan veng tih phei chu ka hre hauh lo, ka rin thlir vel mai mai na a ka suangtuahna mit erawh chuan a thlir dik chuan ka hria…

Tleirawl tuaitir te nulat hre tan tawh ngei mai kha.. chiang takin ka suangtuahna mit chuan a thlir reng a, ruaitheh hun vel bawr laia biak in bul a ruaitheh tura lo kal ngei mai te kha. Kan kohhranah chuan hmang ila chu ka chhing mit ngei hian hmu turin a zawng ru leh daw daw dawn si a. A nihna takah chuan a bulah ruai phei chu ka theh ve ngam hauh lo ang tih ka hria a, mahse ka ruai theh tluk zet chuan amah chu ka puar pui ve ngei awm si a…mahse, chu kan zinna hmun atang chuan tawngkam biak rual a ni silo, chu suangtuahna mit chuan a tak min thlen se ka va ti tak em.
A dik a dik chuan zin kha kan tam em vang leh thiante tha te, chhungte an tam avang khan khua a chu a har em em hran lo. Mahse, lunglen hi chu chhugte leh thenrual tha te in hnem theih a ni hauh lova. Kan ngaih a ber chauh khan min lo hnem thei hi a lo ni a. Lenkhawmna hun kan hman te chu a nuam ka ti lo ani hran lo. A zai uar uar ah kan tang in ka hria, Mahse, kha tleitir tuai te kha awm ve se chu a nuam leh zual ngei ang tih ka hria. Zing a kan haw dawn thlalaka tel khan tel ve se chu kha mi tum a kan thlalak kha ka roh hle tur hi a ni a. Tunah khang thlak te kha khawi lam nge a awm zawh tak ni le….

Krismas hmang tur chauh a kal kan nih avangin ruai theh tuk chuan haw leh mai tum kan ni a. Kan tlawh kohhran chuan min chelh an chak khawp mai a. Aw… chu mi tum chuan mihring lam thlirna chuan kan haw lo mai ang tih ka van hlau tak em. Chungtiang hun karah chuan haw chak thu lo sawi ve rual lah kan ni si lo. A nihnaa tak chuan keini pawh chuan min thlamuan pui ve em avang chuan cham leh pawh kan hreh lutuk lem lo in ka hria. Tun lai anga mobile awm ve ta lo chu kan haw lehna tur motor chah lawk kan nih vangin hi lo thei lo kan nih avangin kan haw ta a….ka thaw huai mai.

Kan motor chah a lo thlen chuan kan kohhran chuan Krismas ruai an nawn dawn tih chanchin lawmawm tak chu min rawn hrilh a, a va nuam tak em. Dam takin Pathian zarah kan kohhran biak in ngei mai kan han thleng leh ta vah mai a, ka hlim tak zet ta. Chumi tum chuan a lawm ka mit vai emaw tih hial tur Angel te pakhat ka hmu ta tlat mai le. Ka mitvai emaw tiin ka mit erawh ka nuai duh ning nel ta bik lova. Chu Angel te chuan Ramthar zin haw ei tur vel buaipui chuan a lo awm ta reng mai….Ka in sum zo bik lova “I dam maw” tiin kan biak ve kha… Tun hnu Lalnunsanga hla ‘Ka vei thin che’ tih hla a “ Kum pui sul lo vei a, dar ang tawn leh ni chuan, ka vei ber chibai ka buk ang a, ‘I dam maw ?’ tiin a ban ka vuan ang” tih hla ka ngaithlak te hian khang hun lai kha fiah vak lo hian ka mit thlaah ka hmu fo thin.
Ei tur ringawt hian mi ti puar lova, ei tur tui tak kher hian hah a tidam hek lo. Ramthar zin hah, ngui leh chauh awm hauh lovin phur tak chuan chaw kan han dawh a. Chaw dawh pah chuan kei leh kei lo ang takin ka be hmasa tlat nia maw le…ka be sathliah mai ni lovin ka chibai hial nia. Mahse, ani khan ka chibai lai a ka rilru leh a mah kher a lo ang, a lo fatu avangin tleirawl pakhat a harh phah hawk tih lah kha a hre awm der si lova aw.

Chaw kan ei pah chuan kan zinna a mite tawng thenkhat chu inti Ramthar zin tak chuan kan thiam ang ang lah chu kan hmang ang tak nauh nauh a. Chaw ei kham chuan in lamah ka haw thuai a, inbual pawh ka in bual hman lo, ka angel te chu lengkhawmna lama ka hmuh beiseiin zin hah pawh sawi lovin ka chhuak leh nghal a, ka chhungte khan engtin tak ngai ang maw. Ka chau lo a ni bik hauh lova, chau chung pawha chakna erawh ka hmu tlat a ni. Chu ka chakna thlarau dawn chu han lam pui chi lah a ni der lova. Lengkhawmna a kalte tan lah thlarau lama sawt puina tur atan han din chhuah pui (sharing neih) chi lah a ni hek lo.

Amaherawhchu, beisei anga ni ta hauh lo mai le. Ka angel te chu a lo tlawk bo ta tlat mai. Bei erawh a la dawng hauh lo. Hun tha zawk a awm ngei ka la beisei tlat a. Chu beiseina ka zawnna pawh chu thil nuam leh awlsam tak a ni chuang lo. Chu beiseina hun remchang ka hmuh a chu a tuka Krismas ruai thehna vel seng hawi a hnatlang a ni tlat a. Zin chauh avang zing thawh tlai tih velin min chelh zo tlat lo. Hnatlanna ah Angel te hmu beiseiin ka kal leh a mahse…ka hmu tlat ta lo mai le…..a va pawi tak em.

Ramthar a Krismas hmang inti, in thawk tha ka in ti ve tehlul nen thil dang ka ngaihtuah a talangin krismas pawl ka hman phah ngawt a ni ber a, zia lo tak a ni….

Similar Posts:

• Kan ‘Puak’ dawn em?
• Christmas 2010 Revisited
• Kan khuaa krismas
• Ruai theh
• Krismas leh kumthar vuakvet hlimthla…

Recent Posts:

• News tawi-II
• misualdotcommer lehkhabu release: The Mizo Uprising
• A hlet
• Misual lo thleng
• A hun leh a hmun (When in Rome)

This entry was posted on Sunday, December 25th, 2011 at 1:00 pm and is filed under Christmas, Luangliam. You can follow any responses to this entry through the RSS 2.0 feed. You can leave a response, or trackback from your own site.