mi(sual).com

‘ Mihringte hian ropui leh ropui lote, chak leh chak lote, hlu leh hlu lote hi engtin nge kan thliar thin le?’ tiin bul ka’n tan tawp teh ang; mi ropui kan tihte hi kan sawi vul chuk thina, kan hnaivaia mi tangkai zawkte hi kan hmusit leh si thina,tin, kan mi ngaihsan zawng, kan tana tangkai hlei lote hi kan ngaihsan em em laiin kan mi hmuhsih zawngte hi kan tan an lo tangkai leh lawisi thina.

He’ng zawng zawng hi kan zirchian a ngaia, tute nge ka tana tangkai a, tute nge ka tana hlute chu, ti-a len leh tette,ropui leh ropui lohte en lova, kan tana tha ber kan hriatthiam hunah leh ‘ Ka tling lo em mai’ ti-a mahni kan insita,mi tana kan tangkai tur anga kan tangkai theih lohnate hi kan bansana, kan nih ang anga kan dinchhuah ngam hunah chuan khawiah pawh awmin, eng dinhmunah pawh ding mah ila kan ding khawchhuak ngei ngei ang tih hi hriat a tha hle mai.

Thian dun pahnih, intia lo tak, mahse inkawmngaih tak mai hi an awma, an kal dun lai lo thlirtute reng reng hian an hmingin an lam tawh lova, a lian zawk tih leh a te zawk tih chu an hming aiah an hmang zawk thina.

Tin, chu mite thian dun chuan thian dang an nei ve vea, a pate zawk chuan a aia pate thian dang a neia,tin, a palian zawk pawh chuan a aia palian thian dang a kawm ve bawka; han ngaihtuah ve teh u, a pate zawk chu a lian zawk a lo ni tawh anga, a palian zawk chu a te zawk a lo ni leh mai dawn a ni.

Sai hi a chakin a hraw tha hle na-a thlaihnah leh theirah ringa khawsa ve mai a ni. Sakeibaknei pawh hi ha-hum khawk rum rum thin mahse a aia chak lo zawkte sa ringa inhrosa ve mai a ni. Hnim hring dawng tha tak takte hian kan rante an chawm thauva, tichuan keini’n buh khamkhawp kan lo khung thin.Tin, sazukte leh sakhite thau nalh tak taka an tualtlate hi pasalthate lawmna a lo ni a, sakeite tan ruai ropui an lo ni.

Kawngpui lun tak; motor,bike leh cycle an tlan chur churna, dawr changkang tak tak leh changtlung tak tak awmna, mamawh chakkhai engkim awmna; chutiang kawngpui anga mi zawng zawngte tana hlu tak i nih theih loh pawhin chu kawngpui rawn kal pawhna kawng penhleh te te zinga pakhat anga mite a tha lam kawng kawhhmuhtu ni mai ta che. Tin, chu mi i la ni thei lo cheu a nih pawhin kawng penhleh te te rawn kal pawhna,tlang kara kekawng bumboh tak, mite hriattham loh,mahse hlu tak si ang khi ni mai ang che.

Turnipui anga mite chunga roreltu i nih theih loh pawhin, chung chhawrthlapui anga mite rilru hlimna thlentu ni ang che; chu chhawrthlapui engmawi hnuaiah chuan lengtinte’n hlimna an hmu thin a sin. Amaherawhchu chawrthlapui ang i la ni thei lo cheu a nih pawhin beidawng suh la, chhawrthlapui en laia kan hriat mang loh, thla mang hnua vanzawla rawn eng tlep tuar thin chungsi-ar eng tak tak zinga pakhat ang khi ni ta mai che; chu mi i la ni thei lo a nih pawhin zanthim ril taka lo eng det det thin dumde ang khi ni hram ang che.

Mi, ramhla taka mite ropui i ti em ema, i tan an tangkai si lova, i bul lawkah khan nangmah tanpuitu tur che a awm reng si a; chu chu i hriat thin loh a vangin nangmahin i khawhar thin a nih kha. Ka hrilh ang che, Tlang sang ber berah khian far thing an to thina, an hnah hringte chu a mawi em ema, tin, a hnai pawh thil charna atan a tangkai hle thin a, khawvela thing zawng zawng zinga kan ngaihsan pawl a ni hial awm e.

Amaherawhchu phaizawla chengte chuan a zar kan zo hran lova, a thingther ringawt pawh meichhem na’n to tak takin kan lei thin a, kan lei zo mang lo chu a ni a. Tin, khawmual hniam berah ‘ Palm’ thing a lo to ve a, a lo to chhuahna a hniam hle na-in a hlu hle a sin; a hnai chu chithlum tui tak a ni a,tin, thal khawlum chhawlhal ti rehtu a ni asin.

Unau, i tana mi tangkai leh thil tangkai dik tak; ropui, len, hlawhtlin lam en lova i mamawh tak chu i thlan thiam theih nan leh,tling lo i intihna zawng zawng thiehnghilha, i nihna ang anga mitana i tangkai ve theihna turin he thu hi ka rawn hlan che a ni e. Ka lawm e.

Similar Posts:

• Nang Malsawmna Ni Ang Che
• Facebook Phonebook kan hman dan hi
• Thian nge ngaihzawng?
• Lunglei mi(sual)dotcommers Free Medical Clinic
• Sangpuiipa’n Rel Garage a sa

Recent Posts:

• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)
• Thianpa lr hlonchhing birthday lawmnan..

This entry was posted on Saturday, March 10th, 2012 at 2:02 pm and is filed under Advice. You can follow any responses to this entry through the RSS 2.0 feed. You can leave a response, or trackback from your own site.