“Naa… Vaivawm bawk chu. Savun ham puar pet a rawn khen leh loh takah…..” Vaivawm sawi hian mi tam tak chu in beng a lo thlep nghal leh pek ang chu. Tum tum chu infiamna khawvela a hlut zawng an teh a sang filawr zinga tel pha, Indian Premier League (IPL) hi chawhchawrawi deuhin in seprawtui teh ang.
IPL ka ha se ?
IPL-ah hian player te hi sal zawrh ang maiin, lilam in an in lilam ngat thin. An sal lei hi risk a nia, tih fuh loh pawh an nei nual ta ve ang. Player thenkhat an man phu tawka khel lo chu sawi loh, an zawrh leh hun a sarep uih zawrh taka zawrh zui tur pawh an awm nual ang. Tin, chutih laiin Tuikuk vawkte leia an lei, rin aia lo tha ta phian pawh an awm nual mai. India intodelh lohna lam nula hmaitlang tha leh mal mum lam lah chu foreign lama mi an chah lut hem hem mai bawk si a. Vaivawm hi a en chu sawi loh a sipel pawh hre ngai hauh lo tur, Katy Perry te hial an han chah lut ngawt mai te hi pawisa puk chawp chuan an tih a rinawm lem loh.
A en ve tum aia sawisel phet kan tum hi chu a ninawm deuh lo maw. Ram changkang khawi ram mah in an uar lo ti sang sawm mahse la, kei chu he thu hi sawi ve talh ka duh. US ah bak American football an uar na ram ka hre lova. Mahse, khawvel a player man to ber chu American footballer an ni e an ti. US ai fe a tam mipui awmna, India ramah thla hnih vel lek chhung a $ 2 million hlawh thei an awm hi engah nge sawi nawi kan tum ve phet. Hei mah mah a kahpaha an khelh mai mai leh nghal, an side income ve a nih hi.
A lar leh lar loh hian kan buai ve ziah bawk a. Kan sub-continent ram Bangladesh, Pakistan leh Sri Lanka te hi Poor nation, Terrorist Paradise leh Conflict Country mai nilo hian Cricketing Nation ram vek an ni a, an mahni pual in IPL ang hi Premire League an nei ve vek a sin. Khawvel hi han daidarh leh zual la Vaivawm lawm ram hi an lo kat nuk mai. Baseball hi US lo ram dang ngaisang ta ram hi South Korea leh Japan bak ka hre bik lo. US ah pawh an tual chhung inelna Basketball khel mai mai pawh kan thalai ten an thawhma pui peih a nia. A dik tak chuan khawvel pum puiah hian American football khel entu te, Baseball khel entu te ai hian IPL entu hi an tawm zawk in ka ring tlat. Keini aia entu nei thlem zawk pawh khi ti khawp khian an ropui chuan Vaibelchhe tel awmna ram mipui thawm hi khawvel hian bengkhawn loh pawh tum se an ngaithah thiang lo hrim hrim. Phun phun lo hian en ve mai mai teh….kha hman zan England rama an tualchhung inelna mai mai vangin inkhawm pawh i thulh thak a, i tan lam an chak loh avangin biak huphurh awm in i awm luau kha, football khel en vangin zing khat pawh i thawh hma peih der lo kha…
A vaw tu in ek a cheh.
IPL sawi tak chuan tum hma lam kha han thlir let tel lawk teh ang. India vaivawm a la awm ngai lo. Zee Entertainment Enterprises in Indian Cricket League tiin risk an lak hlawhtlin awt ve in, kha tih laia India Cricket Board (BCCI) in a ep turin IPL tih hming chawiin an rawn ti chhuak ve kha a nia. A fatu leader-ah Sikret hmang sumdawng lian, Lalit Modi, Punjab leh Rajasthan Cricket board a office bearer ni kawp thei khawpa thiltithei kha an han ruat a nih kha.
An fatu leader kha a mawng a zang roh bawka ballon lian tak ham puar tluk zetin IPL hi an hampuar a. A hampuar lian bawk a, khawvel mak tih khawp, management zirlaite zir luai luai thamin an hampuar a nih kha. A par tlan turin tuipui ral tangin mingo, mi hang, mi buangte leh a sir vel a lo lam kual tur nula mal var tha tha an chah lut ta hum hum a nih kha.
Bul an tan phat atangin abi-ling-aba-lang in an in vawm lut ve chawm a, team lei tu leh mipui beisei aiin an lo hlut zek a. Team siam belh zai an rel ta chuk chuk a. A bel-le-but-a thil ti anni bawka buaina a chhuak ta reng a. Contract siam leh neuh neuhah an buai a, team thar Kochi team an tal buai ta. India rama Minister of State for External Affairs, UN lamah pawh hun tam tak lo hmang tawh, Shashi Tharoor-a pawhin nuthlawi vangin a hna a bansan thak phah a nih kha. Thu kal kual vel karah Lalit Modi a pawh a kangkai ve ta a ‘a vaw tuin ek a cheh’ tih zawng zawng nei zovin tukhum lei vaw chawrin a tih hnawkah an in pal tlu ve a nih kha. IPL vawi thum kum, kum 2010 a nih meuh chuan final an khelh zawh atang a darkar rei lo teah a thiltitheihna zawng zawng hlihsak in a awm ta a nih kha.
A lal hun lai a, chibai an buk loh chauh kha, chhan tu nei lovin BCCI in a duh tawkin an han ching let ve mai chuh, lung in bang a zut lo chauh a nih kha maw. England lamah a tlanchhe daih a. India ram ah chuan Internet hmang lo chuan aw a rawn chhuah ngam ta lo. Vanduaina in a um zui a, khin a tawk a, a hnuah phei chuan pawisa nei lo mi chavai ang mai in ‘bankruptcy a file’ ta chuk chuk mai a ni. ICL luhchhuah a khai linglet tu kha khai lingletin an awm ve mai chu lam Minister nilai inthlan a tla ta ang mai in hmelhriat a van pharh mai a lawm le.
Rajasthan Royals leh kei :
“Nang hi Rajasthan Royals hi i tan ve em em a, a nih leh Jaipur i kal tawh a mi”
“Kal nang”
“Rajasthan tal i tlawh tawh hrim hrim em”
“Tlawh nang”
Cricketer zinga ka ngaihsan leh a bowler ropui Shane Warne khel thinna a nih avang khan Rajasthan Royals ruhkawl ka ni ve ngat a. IPL team an zawrh tir kha a team man tlawm ber an ni, player tha leh man to an lei khawm teh vak lo. Mahse, IPL Champion hmasa ber an ni tlat. Tun hnua ka in ngaituah pawh hian Rajasthan hi tan awm reng ka lo ni tih ka in hre chhuak ta. Kum 1974 leh kum 1998 khan India hian Rajasthan thlaler ramro, Prokhran-ah hian nuclear ralthuam a lo enchhin a. Chumi hmang chuan khawvel a lo barakhaih chiam mai a nih kha. Kum 1998 India in nuclear ralthuam a enchhin hnu atanga India in ralthuam nuaibo lama a sulhnu (Indian disarmament policy) chu ka buaipui ve khawp mai a. Rajasthan thlalerah pawh khawpui fahrah ve tak chu vawi za tam ka lam awl ta lo mai a. Lehkhabu leh internet lamah ‘Post-Prokhran II’ tih chu lunghlu zawn tak in kan zawng ta chiam mai a nih hi.
Kei hi sipaiah tang dawn ila, physical test-ah ka tla chiang a, medical test-ah ka tling bawk hek lo ang. Kan pu Vaiva te ang a, mawng khawihli pathum neia volleyball khel thei khawp tlangval harh ka nih ve loh avang hian ram venhimna leh a behbawmah hian sipai bel nawtah pawh ka tlak ka ring love. Kan ram tan silai keng a ram vemhim hna lam ai hian a thu hian lo venghim ve ta ila kan tangkai pui mial mahna le. Chu mi tur chuan Rajasthan thlaler Prokhran atang bawkin bul ka tan a ngai miau a. Chuvangin ka tan chuan Rajasthan Royals hi tan loh rual a ni lo in ka hre thin. Shane Warne a chhuak a, Yusuf Pathan a chhuak a, a team ang pawhin a che tha zui thei tawh meuh lo, mahse ka rilru erawh Rajathan Royals lamah a la awm reng a ni.
“Nang hi Shilpa Setty in Rajasthan Royals a lei avang hian ilo tan ve a ni lo maw”
“Teuh lo mai a, a lei hma fe in ka tan. Shilpa Setty te chu ka junior a nih saw, in tih lar nan lei vel mai mai ”
“ A nih leh Baichunga hian eng team nge a lei ve kha ? A mak ka ti ngawt mai, Footballer in IPL team han lei daih chu a”
“I mawl em mai a, sawi tawh suh Police in an man mai ang che. Baichunga te chuan Football club a lawm a neih Sikkim United kha”
“E a ni maw, a va han hriat loh theih hu hu ve aw”
“Kha ka tih reng kha. IPL en ve thin la, Mizo ho LG fakna ang khan i hawi hu hu tawh lovang a, i hawi hah hah mai dawn a lawm”.
Similar Posts:
- Ka SALE vek mai dawn e.
- Zin kawng thui: Kum 40 chhung zalenna sualna zin kawng chu
- Indian Football-ah Thil Thar? (Santosh Trophy-ah senior team-a mi tel phal lo)
- In Kan Nei ( Vaivawm lawmtu ten)
- Awi Karei Vaivawm
May 14th, 2012 at 8:13 pm
Vawm hmasa ber te’ng.
Report this comment
May 14th, 2012 at 8:16 pm
ILP dawh chiah ah IPL an awm vung a, an hawi lam lah chu a in ang lo rapthlak sia aw….
Report this comment
May 14th, 2012 at 8:42 pm
ILP leh IPL hi unau anni ngei2 ang. An thuken a in ang emai Vai tana siam ve2 niin ka hria
EPL hi awmlo ta se IPL tih hming hi an phuah/pu kher angem le?????
UCL hi awmlo bawk se… twenty-twenty Champions league hi a awm tho angem le??????
Report this comment
May 14th, 2012 at 8:56 pm
IPL hi chu a game ai mahin entertainment lam a hawi zawk mah in ka hria. Mumbai ah khan IPL team te hi ka thawhna thin ah khan an lo thleng thin a, player auction te pawh kan host bawk a, inkhelh zawh ah IPL night ( party) an hmang chu an bawn ve thei khawp mai, cheer leader leh firangi model ho an hmuhnawm e! Lalit Modi han khan model 5 vel nen presidential suite ah tawm kuk
Report this comment
May 14th, 2012 at 9:10 pm
Vaivawm hi hmuhnawm deuh ania. Hun a duh deuh a tih mai ani, ka en tui laklawh chuan keipawh ka en vak fo. Post BVT
Report this comment
May 14th, 2012 at 9:12 pm
Mizo zingah cricket fan kan tam ve viau ania. Vaivawm nita se Australian te, England te, South African te, West Indies te chu vai in tihna ani maw?
Report this comment
May 14th, 2012 at 9:18 pm
# Nastycool,Entertainment a ni ber a lawm keini tan pawh kan khel ve pha si lova. Chu nang chu IPL player hi i hmu fo dawn bik a ni maw…..#Sony, Vaivawm tih hi chu Mizo in kan sawina mai a nia, Australia te pawhin khel se la vai tihna ni kher love. Hnar bengbeh te pawh kan tih fiam ang deuh hi a ni ber e. GOlf pawh Putar Hockey an tia, thalai pawh in an khel tho a lawm, koh fiamna a ni ber hi maw…
Report this comment
May 14th, 2012 at 10:51 pm
Alo ni maw? Anih Mizo tawngin heng hi eng tin ngek kan sawi ang:
1. Water polo
2. Ice Hockey
3. Gymnastics
4. Kabadi.
Mizo tawnga dik ka tih deuh mai chu physical workout (exercise) sawi nana “Taksa sawizawi” hi. Muscle a flexible loh chuan sawizawi an ngai hle ani.
Report this comment
May 14th, 2012 at 10:58 pm
# sony,A khing khi chu a chanchin vel han ziak vak la, a hming tur chu an rawn phuah ve sap sap mai ang….. kei ai a mizo tawng thian vek an nih hi maw….
Report this comment
May 14th, 2012 at 11:38 pm
OT.loks..Santosh Trophy Orissa a khelh mek ah Mizoram Team in 12-0 in Rajasthan team an sawp!!lawmawm tawp..
Report this comment
May 14th, 2012 at 11:44 pm
Awkhe Mizoram chu ka ram a nia, Rajasthan a chuan ka tan ang Savun ham puar pet ah pawh ni se. Well done Mizoram team………
Report this comment
May 15th, 2012 at 2:12 am
IPL article hnuaiah ILP article a awm a ni maw…??
Report this comment
May 15th, 2012 at 3:04 am
Haha…vaivawm hi chu tactic a tlem e mai…F1 ngat le….!
Report this comment
May 15th, 2012 at 3:12 am
Ka vai thian te cricket atchilh ho pawh hian ‘Match fixing hlang,IPL te chu movie ang tho alawm,an khelh hma in a chak tur te chu an chak sa vek tawh,an chang vel mai mai alawm!’ an ti thin,tak tak ni maw. I post tawh ah chuan ka la chhiar tui ber leh I la ziah mam nalh ber ani’ang.
Report this comment
May 15th, 2012 at 3:44 am
Football ang hian khawvel hian khel se India chu ranking ah 100+ velah awm leh thovang
A game hian fitness a mamawh tam lo ve e…Football nen te in compare a zahthlak lutuk. Football ah te chuan pitch ah te players nunna chan te an awm a, injury a thleng nasa thei em em bawk…..
Inkawibah pawh kawi lirh na lamah tlan vang vang a ngaih chang te awm a, kah dan thiam te ngaia, Cricket ang tho ni…
Cricket hi chu in compare duh chuan inkawibah hi lar ta viau se a skill leh fitness ah in ang tawk vel chiah in ka ring
Report this comment
May 15th, 2012 at 4:03 am
A hot dawn e.
tren tren
Report this comment
May 15th, 2012 at 7:49 am
misual.com leh fb hian ka hun leh rilru vaivawm atangin a la peng zo ta. India team ah thil thar/revival a thlen phawt a ngai a ni.
Report this comment
May 15th, 2012 at 10:06 am
# Keimah thingtlangpa, hi i hre sual deuh a ni.Cricket hi game hausa tak mai a ni a. A chan dan (fielding)ringawt pawh chi hrang hrang 50 chuang a awm a. Vawm dan rigawt pawh hi, a chak deuh a vawm chi (fast bowler) tan chi 9 vel leh a vawm vir chi tan pawh chi 11 vel lai a awm a. In tih thih (out) dan hi chi 11 lai a awm a, ball tawk lo leh vaw miah lo pawh in run siam dan (extra) chi 5 a awm a. A hmanrua ringawt pawh hi lukhum (helmet), kut kawr, ban tuamna, ngalkawr leh sazu khuhna (groin protector) thleng in a ngai vek a ni. Bat hi thing pangai mai a siam a ni lova, willow thing tha chi hman ni ber a, a bikin English willow leh Kashmir willow an hmang uar deuh ber.
#Lamji, ka lawm e, ka thuziak hi a um elh thei viau a nih anih ka ring minduhsak tu min hau ngam hi ka ngah em mai a.
#asteric, India hi maw Footballah FIFA rankingah hian 163 na kan ni mek, kum 1993 khan 100 kan ni ve hram a, chawh rual hian 128 na ang vel reng kan ni e. In hliam tam hrim hrim i duh chuan Boxing hi a nia aw ropui…Inkawibah te chu i ti duh e.naupang lai a in nap ( thing tang hmanga khelh khelh kha) nen khan compare rawh, kha pawh kha an vuak kan dawn tum in kan lo chan thin kha.
#Pk, Vaivawm mai ni loh hian kan misual pawh hi fb hian a ei nasa khawp mai.
Report this comment
May 15th, 2012 at 11:15 am
EPL an tih luai luai laiin kei lah chuan vaivawm IPL chu hmuhnawm ti em emin ka lo en ve dauh dauh zel a
Report this comment
May 15th, 2012 at 11:28 am
In khelh lai mai piah lam ah Ronaldo te,Ronaldinho ten an football skill an han show vel hi chu a hmuh nawm hrim2 ka tia. Mahse cricketers ho hian show ve tur an nei em chu ka hre law. Midang aia an chungnung vak na bik leh ngaihsan awm na ka hre ve tlat lo kei chu. An ngaisang vak ringawta an ti hausa thlawn mai2 ni in ka hria, vai rethei ber pawh hian ngaihsan tur emaw an ti vek bawk sia.
Report this comment
May 15th, 2012 at 11:35 am
A hot dawn viau mai, HRIKET chungchangah chuan sawi tur ka hre ve tlat lo…
ILP hi kan thenawm state vai vangin kan buaipui a; IPL lah, Zoram atang hla deuh vai (changkang deuh) ho vang thovin kan buaipui a nih ber awm hi a…
Ka hriatthiam ve dan: IPL = ILP = Vai avanga buaina…
Report this comment
May 15th, 2012 at 11:44 am
#Mach 3, Ekhaih khaia, Vaivawm ber hi a lawm le hmuhnawm le, Shane Warne a vawm vir te, Muralitharan a spin te, McGrath afast bowling hmuhnawm dan hi ripui tak a ni, Sachin an a duh tawk a ball an vaw lai te hi ke a khawr tut a ball thai kual vel ai hian a hmuhnawm fe zawk mawle.
Report this comment
May 15th, 2012 at 12:20 pm
Cricket hi ka en peih lo, hmuhnawm ka ti thei lo a, a ho ka ti.;-(
Report this comment
May 15th, 2012 at 1:15 pm
#18@Chhingte….Savun hampuar pet nena compare thu hla ah chauh ania injury leh fitness chu ka sawi. A injury ang ngawr ngawr ah te chuan Boxing aiin UFC/MMA ah te a awlsam lehzual zawk lo maw….
hairehai. Comparable lo in compare thin vangin sawi ve mai mai nih khi..
Report this comment
May 15th, 2012 at 1:39 pm
Cricket te chu vawm tawrh leh lo vuak vak kha a ni mai a.. An lo vuak lo man tum a ni leh mai a. A ho e. F1 hi alawm ropui le…
Report this comment
May 15th, 2012 at 2:03 pm
#Thingtlangpa hi i game duh changkang riau mai a, kha hei Misual. com a ka dah tawh tho hi lo chhiar nawn nuap nuap chhin te aw,
F1 : Infiamna kawkalh (Paradox game)
F1 hi khawvela infiamna sum leh pai mamawh hnem ber pawl a ni hial awm e. Motor intlansiakna a nih vang hian sum leh tha a duh tam fal lo thei lo.
Petrol a hek in a ke thlak chhen a ngaih avang te, mihring hrim hrim in tam hneh a ngaih avang te, nawmchenna lama infiamnna (luxurious sport) rawng a kai deuh avangin he infiamna hian pawisa a mamawh hnem dan tur hi sawi in a siak love.
He infiamna hi han belchiang lawk ila, motor intlansiak a ni mai a. F1 hi a ho zawnga ngaihtuah chuan motor tlan chak deuh mai kha a ni mai a. Kawngpui pangai a chak deuha motor tlan chu kan haw ru fu a, kan an khum bawrh bawrh a, Mahse, a tlanna tur hmun a duh tawka an han tlan chak lai chu chiang takin hmulo mah ila, Vroom….. tiin rawn ving liam vut vut mahse, a enna boruak nen chuan thil hmuhnawm tak zawng a ni ve pakhat mahna le.
He infiamna hi mi lian infiamna, mi hausa leh nei nung te lawm chi a ni zawk mah a. He infiamna driver pangai tana tuipui ve ngawt chi a ni hauh lo. A hmun a entur chuan driver aiin driver ruai thei khawp leh driver dawng pha khawp a changkang leh hausa te en tur a ni leh tlat si.
An en ber, cheng sing chuang an senna kha driver ho inelna a ni si. Heng motor kalh entute hian driver nih an tum ngai lovang a. An tum lo mai nilo an driver te ngaisang tak leh kawm ngeih tak an tam ang em tih te min ngaihtuah tir mai mai a.
He infiamna tuipui a, atchilh ho hi la tlangval deuh tak tak te, pavalaitak leh hawklak rual, driver te pawh zah taka bia aia vin mai ching rual te an ni zawk mah in ka ring tlat a. He motor intlansiak an en zawh hian an driver leh driver hrim hrim te hi ngaihsan taka ruangin an iai leh zual sauh lo ang tih pawh ka sawi thei lo.
Mizo te hi changkang sa teh mah ila, F1 tuipui tur khawp a hawi zau leh hausa hi kan la tam em em lo. Thla khat hlawh lak loh a buai thin te hian nawmchenna sport hi kan han en ve chak tlat mai a. An advertisement pakhat man pawh thla khat a hlawh lo te hian a a mi lian sum pek belh zawnga kan mawng a za tlat mai te hi chu ngaituah a ti thui hle a ni. Sawi tawh angin F1 hi nawmchenna thil pakhat a ni kan tih tawh kha.
Vai ho zinga hian an neih chuang liam a tang en an nih deuh fur ka ring a, keini Mizoramah hian mi nawmchena hi neih thinglung khawng hian, insawi theih nan mai mai hian kan lo zuk en ve ngawt ang em le? Mi tih ang lo tih rim duhna, mi hmuh lo hmuh ve hrim hrim duhna vang hian rim taka kan thawh chhuah hi kan lo paih ral mai mai ang em le….a a thawk chhuak tu te thu a ni e, sawi thui lo mai ang aw.
Report this comment
May 15th, 2012 at 3:21 pm
IPL hi chu mizoram venhim nan a tangkai ngawt mai an hlip mai ang tih a hlauhawm ti ta ila posttupa chuan min rawn sit rem rem dawn mang e. game nep a ni lo a niang ngaisangtu an tam em mai
Report this comment
May 15th, 2012 at 5:20 pm
#chhingdailova, keichu vai ho in an ngaisang lutuka, cricketers an hausak tir vel lutuk hi ka haw tlat. Lar ve lem si lo thaim tak2 te hi an awm treuh ka ring. Sachina Rajya Sabha member tura an ruat te kha ka ngei teh ania. Cricketers kher2. Khawilai Proffersor kan hriat ngaih loh pawh dah se ka duh zok
Report this comment
July 22nd, 2012 at 12:44 pm
Chhingte-a chuan Asteric-a chu a va chhang fuh lo deuh ve aw.
Cricket hian FITNESS a mamawh sanzia hi i hre thui lo zawk nge ni? Football aimahin Fitness mamawh sang tura ngaih a ni. One day mai bakah Test match angte phei chu ni 5 chhung khelh a nih avangin taksa fit lo tan chuan tih chi rual a ni lo. Tin action hrang hrang Football team Striker, defender leh Keeper-in a tih thin zawng zawng bak hi cricket khel thinahte hian a awm a ni.
Heng ho:
Body Size and Composition
Muscle Strength
Muscular Endurance
Power
Speed / Quickness
Agility
Flexibility
Balance and Coordination
Cardiovascular Endurance leh a tawp berah
Mental ability (Rilru lam exercise) te hi pawimawh tak vek a ni.
Mizoram lama kan khelh ve lai pawh khan Football khel ho hian min lo khelh pui ve thin a. An chauh thu leh Football aia hahthlak an tih thu an sawi thin. Kei ngei pawh hian chu chu a takin ka hre chiang a ni. Hetia en ang ngawt hi a ni lo. Rilru inthlahdah a ngai thei lo hle a. Fimkhur, tihhram hram, rilru pek, dawhtheih leh a bak tamtak hi a mamawh em em a ni.
An sawi thin alawm NIlenga stamp ven(batting khelh tihna) leh zankhat over night (tlaivar) a inhnen reng an ti thin. Fitness hi a khela te pawh hian an ngaipawimawh thin em em bawk. Tling lo chu an tel ngai lo.
Report this comment