mi(sual).com

Khatia dinhmun ralti leh khirh tak mai atanga Emperor berin a lo pawm takah chuan, Kristianna kha a lo thang duang ta hle mai a. An lo len hle tak hnu leh thil tithei tak anlo nih tak hnu khan, awmdan an lo thiam ta mang lova, Sawrkar zawkte khan an ngamlo dawn ta fo mai a, England-ah phei chuan an Lal Chhungkua te khan Church of England an din ta hial a nih kha. An sum(thawhlawm) duh luatah Chhandamnate kha Isua thisen vang lam nilovin a leia lei theih ang zawng te khan an han kalpui chho ta a. (sawi chipchiarlo mai ang, thenkhat rilru tihnat palh a hlauhawm a).

Chutah Lalpa Isua Krista tana thuhretu rinawm dik tak an lo langchhuak tan ta a. Chung zinga a meizang hlaptu ber pakhat chu German mi Martin Luther kha a ni. Khatih laia Kohhran kha sawrkar pawhin an hlauhtlawn, thu nei em em mai, an duhloh zawng chu tihhlum theihna hial nei kha anni a. An diklohna sawichhuah phiar phiar a, cho a, puanzar kha thil hlauhawm tawp a tling ngei ang. Mahse, Lalpa tan engpawh huamin Luther-a khan cho a tum ta tlat mai si.

An diklohna ni a a hriat zawng zawng point 90 zet mai a ziak chhuak a, Kohhran hruaitute kha cho a tum ta tlat mai si. A pindan rilah inkharkhipin tawngtaina nen uluk taka a duan lai chuan, inleng a nei ta tlat mai le! Kawngka kha a kalh vek ani lawm ni? A inleng pa chuan Lehkhabu pakhat hi a rawn pawm lut bawk a. Chutah aw hlauhawm tak mai hian, “Luther, Kohhran ka cho dawn e te I tia law? I zak lawm ni? En rawh hei, I piantirh atanga I thiltih sual zawng zawng kha ka record vek a, I ngaihtuahna sual zawng zawng nen; he Lehkhabuah hian a khat vek a sin. En rawh hei” tih pahin a han keu thuak thuak a.

Martin Luther-a sualna zawng zawng chu alo in record kimchang lah tak a, Setana pawh chu tifuh inti takin a hawi champ hle mai a. Luther-a chu a han ngawi vang vang a, “Khati zawng kha em ni?” a han ti a. Setana chuan, “la ni lo ve, a dang pawh ala awm” tiin a chhang a. Setana chuan Lehkhabu dang chu a rawn phawrhchhuak leh nghal zat a. Chutah pawh chuan kimchang em em maiin a lo inziak khat leh tlat mai a.

Luthera chu a han ngawi vang vang a, chutah thu pawimawh bik underline natur atana a tih a pen pakhat pentui sen a thun khah sa chu a han lachhuak a, Chu lehkhabu inkeu laiah chuan a han thing tla ta thawt thawt mai a. “Setan, Ka sualnate chu engzata tam pawh lo ni sela, Pathian Fapa Isua Krista thisenin a tlengfai vek tawh, min tibuai tawh suh, min kal bosan zawk rawh” a ti ta a, Setana pawh chu mak ti taka meng bial kul kul chungin a kalbo ta a ni an ti.

Nunhlui sim a, kalsan han tum a, chumai pawh duhtawk lova, Pathian rawngbawl han tum ve dawn te hian, Setana Ram kan thiat dawn tak tak leh, a ram zau zel tur kan lo dan ve tlat chuan, Setana hian min ngaimawh thin a, harsatna min siam sak te, kan nunhlui sualna rawn hai lang leh zawnga min tihhnual te a tum nasa hle thin. Mi tamtak chu, an hnual a, an inngaihtuah lungngai a, an inthiamlo a, rawngbawl tlaklovah an inngai a, Setana bumna thangah an awk thin a ni.
Martin Luther-a ang hian kan sual lo tih tawh zawng zawngte chu engzata tam pawh ni tawh mah sela, simna thinlung dik tak nen, Lal Isua hnen kan pan chuan, Lal Isua thisen chuan hneh takin a lo silfai thei reng a, Bungbel thianghlimah min lo siam thar thei thin a ni.

Ringtu hmasa te tihboral vek duh leh nasa taka beitu Saula kha Pathian tana mi tangkai ber alo ni thei a, Nicky Cruz te pawh Lalpa Isua tana mi thawhhlawk tak an lo nih theih chuan, nang leh kei hi kan nunhlui sualnate hi kan indelhbeh tir rengin, Lalpa rawngbawl tura penchhuak leh ka pawh ang ngam lova inkiltawih reng tur kanni bik dawn em ni le?
“Kei, keimah ngei hi, keimah leh keimah avang ngawta in bawhchhiatnate thai bo thintu chu ka ni; in sualnate pawh ka hre reng lo vang” (Isaia 43:25)

“A bawhchhiatna ngaihdama awm a, a sualna hliahkhuha awma chu, a eng a thawl e. Mi, Lalpan khawlohna neia a ruat lohva, A thlarauva tihderna reng reng awm lova chu, a eng a thawl e.” (Sam 32:1-2)

“Thil tha ti atan Krista Isuaah chuan siama awmin ama kutchhuak kan ni si a; chu thil tha tih chu kan awmna turin Pathianin a buatsaih lawk a ni”.(Ephesi 2:10).

Sunday hman nuam vek u le.

Similar Posts:

• Hun hnuhnung;
• PIANTHARNA
• Lalpa kan Himna Kulhpui nghet
• Tih nun kan ni (Easter pual)
• Lalpa Pathianin a mite a ngaihtuah thin.(Sunday Pual)

Recent Posts:

• Church Denomination leh Mizo Kristiante
• Chhungkaw tan thusawm pek.
• MILADY
• Mizo League (EPL)
• Niuh neuh!

This entry was posted on Sunday, June 10th, 2012 at 9:05 am and is filed under Event, Religion. You can follow any responses to this entry through the RSS 2.0 feed. You can leave a response, or trackback from your own site.