Chhandamtu’n min hmangaihna chu,
Nitin zantin ka lo hre ta.
A thihnaah ka thih vangin,
Thawhlehnaah tih nun ka lo ni ta.
Dam reng si kha mitthiah min puang a, thi reng siin Pa Pathian lamah chuan mi nung kan lo ni ta zawk a. Hnathawk lova Pathian pawh ngaihsak lo, thiamchantirtu ring zawka rinna chu kan tan felnaah min ruatsak a, sual lam kawnga kan thihna chu Pathian lama kan nun lehna turin kan Lalpa chu A THO TA. Lalpa thawhlehna tawmpui tur chuan a thihna kha tawmpui zet a ngai a, a thihna tawmpuitute chuan Tholeh Krista nunna kan chang ta zawk a ni. Kraws lerah khan Pathian Fapa Isua Krista thi ringawt hmuh ringawt a tawk lo va, ‘ka thihna a ni a a thawhlehna pawh ka nunna a ni’ ti a pumkhata kan insiamna hi Nun Krista chu a lo ni.
‘Sual lam kawngah chuan thi tawhah inruat ula, Krista Isua thawhlehnaah chuan nungah inruat rawh u’ a tih a ni a. He laia ‘inruat’ hi a awmzia takah chuan Thawhlawm khawntu atana kan inruat ang ni lo, Cheng100 kan nei a, cheng 50-in thil kan lei a, cheng 50 a lo kir leh dawn a ni tih kan hriatchianna ang hian inhrechiang/rinna nei tur kan ni. Chu kan rinna chu kan nunna ‘mi fel chu rinna in a nung ang’ a ti si a. Chu Tholeh nunna chuan Van a zawm a, hneh theih loh hnehtu azara hnehna nun kan neih tawh avangin mi chak lo pawh ‘ka chak’ kan lo ti thei ta. Chuvang chuan a ni hmeichhe bawrhsawm tak Pi Lalruali paw’n ‘Hneh theih loh nun ka nei’ a lo tih theihna chhan chu!
Thawhlehna a zara lei nun leh chatuan nun thlun zawm tawhte tan chuan Pathian hmangaihna ata hi engmahin min then thei tawh lo, ropui taka ngamtu kan ni zawk. Chu mai a ni ne’m, Krista thawhlehna chuan beiseina nung min siam a Amah angin chatuana nung tawh turin kan tholeh dawn a ni tih kan lo hre ta; Krista chu thawhlehna hmahruaitu a nih avangin. Beisei nei lovin i awm suh ang u, kan beisei thurin hi a nghin lohna turin nghet takin i pawm tlat ang u- nakinah kan la chawl ve ang, luipui kam mawi takah chuan. Thihna lui ral, tholeh nun hi khawvel miten an hrethiam lo – he kan nunna lei In hi ral mahsela kan nunna chu Isuaah thuhrukin a awm tawh a ni, nakinah ropui takin a ma rualin a la inlar ve ang. Kan awmna lei in hi thiat mahse vanah, in kuta sak loh chatuana awm tur, Pathian hnen ata in nghet kan nei tih kan hre si a, Intawhkhawm hun tur chu nghakhlel takin kan thlir zawk tur a ni. Kan Lalpa Isua azara hnehna min petu hnenah chuan lawmthu awm rawh se. Amen.
Lei taksa ropuina a dang,
Van taksa ropuina a dang.
Lei taksa zawng boral mai tur,
Van taksa chu a ropui zual zel ang.
Similar Posts:
- THAWHLEHNAA TIHNUN KA LO NI TA
- Halleluiah! A Tho Leh Ta!
- NAZARETH ISUA KRAWS-A AN KHENBEH KHA A THO LEH TA (Easter Sunday Sermon)
- Because he Lives (Easter Sunday Pual)
- Beiseina siamtu thawhlehna
April 24th, 2011 at 9:32 am
A van tha em!!
Report this comment
April 24th, 2011 at 9:37 am
inkhawm banah chhiar tawh mai teh ang!
Report this comment
April 24th, 2011 at 9:55 am
Awi he hla hi a nalh in lung a van ti leng em! Ngaihthlak tur awm hial se ka ti.
Report this comment
April 24th, 2011 at 10:24 am
‘Sual lam kawngah chuan thi tawhah inruat ula, Krista Isua thawhlehnaah chuan nungah inruat rawh u’ a tih a ni a. Helai hi tlem kan sawi belh ve hlek. Pathianin kan nihna atana min ruatsak hi lo pawm ve mai angai, helai inruat tih hi mipa hi Pathianin mipa niturin a ruat a, mipa nia alo in ruat ve mai khan Pathian duhdan a ti famkim mai ani.Chutiang tho chuan, hmeichhia pawhin hmeichhia nia alo inruat ve maikhan, Pathian duhdan a famkim. Sual lam kawngah thi tawh ah in ruat ila, Krista Isua ah erawh chuan nungah in ruat ila, Krista chu kan nunna a ni a, he lei taksa hi lo thi mahse, keini chu chatuanin ama hnenah ama nunna ringin kan nung reng dawn ani !
Report this comment
April 24th, 2011 at 10:37 am
Khi hla khi ka va han duh tehlul em!
Report this comment
April 24th, 2011 at 10:46 am
“Christ died for our sins and he was raised for our justification,” Paul says in Romans 4:25.Ava nihlawhthlak em!!!
Thessalonika 4:14 leh 2 Korinth 4:14 kan en chuan Pu Vakula thuziak dikzia hi kan hmu thei a ni……
Pathian Thuthlungthar zawm nana a finishing lai tak Isua thawhlehna hian kan nun ah danglamna thlen mawlh rawh se!!!
Report this comment
April 24th, 2011 at 11:11 am
Khi hla khi a ropui asin.. Nun Krista i sawifiah dan khi i van thiam tak em.. Tawngkam i thiam hle mai, i kamliam changa lo thut pawh a manhla thei khawp mai..@vakul
Report this comment
April 24th, 2011 at 11:17 am
I hla rawn chhawp chhuah khi han sak mai ka tum a, a chang ka hre chhuak zo ta hauhlo mai, sak lohna lo rei ta deuh niang..
Report this comment
April 24th, 2011 at 11:41 am
Vakul chu i va rawn phawrh tha ve….’thu-tak’ phawrh pha chin i ni tlat mai. Khi nun khi a pawimawh khawp a ni.
‘Mihringhlui thihna'(Kraws thihna) kal tlanglo ‘piantharna’ hian Kristian nun a pawt thuam-awp thin.
Thawhlehna hmahruai ‘Krista Isua’ ah hian beiseina nung nei theuh turin, Isua thawhlehi atan a anlo vuah rem tak he “Easter” ah hian Pathian malsawmna ka hlan a che u. Blessing.
Good post
Report this comment
April 24th, 2011 at 11:51 am
a va tha em… kan sualna zawng zawngte tleng faia, thihna hneha a thawhlehna niah hian kan tan a inpekna hlut zia hria a, thlarauah hlawkna pakhat tal kan chan theuh a va tha em.. chumi chang turin duhsakna ka hlan vek a che u…
Report this comment
April 24th, 2011 at 11:54 am
A tha lutuk tlat mai. Vakul nge nge..
Report this comment
April 24th, 2011 at 11:57 am
Buh chi a thi zet a a lo tiak leh ta a tam takin a vui a chungleng savate leh mihringte chuan ei tur an lo nei ta a. mi dangin ei tur keimahniah an hmuh loh hian Buhsi kan lo ni mai dawn a. Tiak tur chuan thih zet a ngai; vui tur chuan thawhleh a ngai.
Report this comment
April 24th, 2011 at 11:59 am
Cyber i inkhawm em? Inkhawm ban hun awm velah i comment ka’n hmuh chu. Kei ni kan la inkhawm ve lo. Ka chhuak tep.
Report this comment
April 24th, 2011 at 12:09 pm
Inkhawm ve tehreng mai. Kan bang chiah e. Malsawm ruah a sur reng mai lehnghal
Report this comment
April 24th, 2011 at 1:02 pm
Ka Easter hman ve dan chu ava easter lo em! Work an ngaih chu le…. Fianrial nei mai ang.
Report this comment
April 24th, 2011 at 1:41 pm
Chhiar a nuam dap dap khawp mai
Report this comment
April 24th, 2011 at 5:25 pm
A tha hle mai. Isua Krista thih ruala thi te hi a thawhleh rual hian kan tho velo ang tih erawh a hlauhawm khawp mai. Mahni dinhmun theuh kan in en a ngai ang, ‘He lei In hi ral mah sela, ka nunna chu Isua a ni.’ ti thei turin.
Report this comment
April 24th, 2011 at 7:28 pm
A van tha thin tak em Vakul nge nge!
Report this comment