mi(sual).com

Lan khatna:

 (Aizawl Police Station a room pakhat a lo lang a, chutah chuan Police Officer Uniform famkim a inthuam leh Chhuaklinga chu in hma tawnin an thu a. Police chuan penin paper-ah thil a ziak mawlh mawlh a. Chhuaklinga chu zan lamah a mu tlem tih hriat takin a meng sen ram a)

Officer:                 I Hming

Chhuaklinga:      Chhuaklinga

Officer:                 Pa hming

Chhuaklinga:      Chh………

Officer:                 Pawl engzat ngei nih?

Chhuaklinga:      …………….

Officer:                Handyman maw i nih a?

Chhuaklinga:      Aw, ni e.

Officer:                Vairengte kudam atang chuan in motor MZ-… chuan buhfai chu in phur chhuak ngei a maw?

Chhuaklinga:      Aw.

Officer:                Quintal engzat nge?

Chhuaklinga:      Ka……

Officer:                Khawi hmunah nge in un-load?

Chhuaklinga:      Zemabawk Puspak-ah.

Kum sawm chuang zen zawn a liam ta, BA final year result nghak lai ka ni a. Kan awmna khua chu Mizoram a khaw lian ve pawl tak nimahse kan khawpui nun hrim hrim chu a la thingtlang ve hle mai a. Thal laia kan ti ti duh zawng pawh “Hrangmana te thingai lak chu Hlai, Thil leh Fah thing hlir a ni a, a tha hlawm khawp mai” tih te, “Hydel kawng tur an lai a, chu lamah chuan thingai lak tur a tha hlawm ngang mai” tih te a ni mai a. Tlem a ti ti changkang deuh ho chuan Rx-100 bike mawi zia leh kan khaw SDO fapain a neih thar thu te, Aizawlah chuan Splendor bike nei an awm tawh thu te leh kan khua a Roman Catholic Father bike Kbx(an ti a maw ni ta) chu a khan a hniam a, tleirawl tan pawh khalh a har hmel loh thu te, PWD JE (a hming ka hre ta lo) Bullet chu pa an tih zia thu te leh U sawmpuia Rajdoot-in petrol a heh zia thu te a ni deuh ber a. Khang hunlai kha chuan TMB te pawh hi tlema changkang leh thil hre deuh te kha chuan ‘TRUCK’ tiin an lo ko ve tawh reng a. Chutiang dinhmuna ding kan nih avang chuan keini tan chuan kan feh leh kan ram kal hawng MST leh TMB driver fel deuh te’n min han phur haw thin te kha a hluin a lawmawm thin em em a ni.

A ni reng a ni, High School kan kal lai atang tawhin kha tih hun lai kha chuan, a bik takin  thlasik chawlh a lo thlen tawh hi chuan keini thian ho hi chuan, thingai la a ram riah kha kan thil tum ber leh chhungte kan tanpui ve na ber a ni a. Thingai la a ram riak tur tih takah Chempui, Hreipui, Ara lian mahni thiam ang tawkin kan han tat hriam a. Kan chhungte’n Dal Kg khat leh Lifeboy (sahbawnsen) dawrte a mi an va la ba thak mai a, Dal chu hmun hnihah an han then a, a tam lam deuh zawk ramriah bagah an han khung a. Lifeboy(sahbawnsen) chu a lai takah an han bung leh hmawk mai a,LIFE lam inah an han dah tha a, a BOY lam kan han pai chhuak ngei mai bawk a. Dawr kawna Pitari dawrah vaihlo zial(mizo zial) thingai hralh hun a rulh turin cheng nga man kan han ba bawk a. Ramriah puan nen thingai lakna thuam famkim sinin, Lothazawl kawngah ‘Ka thai mampui’ tih hla kha kan sa thla liah liah tawh mai thin a ni.

Awle, kan thupuiah lut tawh ang. Khitiang a hun leh ni te ka lo chhiar ve mai mai lai khian, tlaikhat ka leng haw chu ka pu(ka nu nuta), kum li nga vel kal ta a Aizawl a pem ta chu kan inah chuan a lo thu ran mai a. Ka chawlh lai a ni tih a hriat thu te, Loan a TMB (truck) a lak thu te, a theih hram chuan a motor chu enkawl pui tur a min duh thu chu a sawi tlang nghal vek a. Kei thingtlang tlangval motor chuan nuam ti em em tan chuan thil chakawm tawp hi a ni ri ngawt (class-ix kan nih laiin kanutei te handyman a tan ka ngen tawh ). “Aw… teh reng mai” ti a han chhan nghal mai hi ka duh a, mahse “Ka nu thu thu a ni mai” tiin ka chhang thei ta hram a. Ka nu pawh chu a hmain a lo kawm fel vek tawh ni hmiang, keiman ka peih phawt chuan rem a tih thu chu a sawi ve mai bawk a. Tichuan, a tuk tukthuan eikham chuan ka pu maruti 800 var chuan Aizawl lam pan chuan kan inphur chhuak ta a. Car-ah te phei chuan thian kawm fuh deuh tuma taxi a inchhung dung chen awrh kan chuang thin tih loh la chuang tha thum lo ka ni bawk a. Aizawl thleng mai car a kan chuang bik tur ka ngaihtuah chuan ka phurin ka thiante motor chuang khat ve tak tak Lalsena te, Chhuanawma te, Lungmuana te, Lalhuala te, Lallana te leh adt ho chuan ve nan ka it hle mai bawk a. Ka puin, “Mama theihtawp kan chhuah ang a, tuna tang a kum sawmah chuan car var hi chu i la nei ve dawn khawp, lehkha thiam hi chu a tha a, sorkar hna thawh kher tum hi a tha ber lo, thianghlim taka hausak duh chuan private bussiness hi a fuh ber, sorkar hnathawk eizawna dang nei chuang si lo, hausa hi chu thil nithei a ni lo bur mai” a tih te chuan mi hneh hle mai bawk a. BA final result nghak ka ni tih hi ka theihnghilh mai pawh ni lovin ka hre tawh lo hrim hrim a ni ber mai. Ka tum ber chu TMB handyman nih a, kum khat hnuah chuan TMB driver, kum sawm hnuah chuan private car var nei pha chin,  hmalam hun hi a eng hliah hliah a ni ber e.

Ka hnathawh tur ber chu handyman cum owner a ni ber mai a, ka vawikhat zin chhuahna a Silchar-a sawhthing kan zu dah, kan unload thei lawk si lo, thosi tam zia te tak kha aw..  Thla hnih dawn lai Handy man hna chu ka thawk ta a, nuam pawh ka ti khawp mai. Vawi khat Champhai kan kalin tumin vanduaithlak takin a khalhtupa a inhliam hlauh mai a, a aiah a thianpa night bus driver a kal tir a, Aizawl lam kan pan thla leh ta a. Aizawl kan thlen hnu chuan Sairang road-ah load kan va chang dun ta a, hetah chiah hian a ni he ka thawnthu pawh ziah tur a lo awm phahna chu. Ka partner thar nen chuan kan la in nel vak lo hle a, a chanchin ka hriat chu a hming leh night bus a khalh thin tih zawng a ni mai. A ni pawhin ka chanchin a hriat chu he motor handyman leh neitute nau ka ni tih chu a ni mai. Driver ho chuan an thil tawn mak tak tak leh fiamthu te thawh a an nuih ho dar dar lai chuan, kan motor lam pan chuan tlangval rawlthar pakhat hi a lokal a. Vairengteah buhfai kan phurh hman leh hman loh thu min rawn zawt a, keini load chang na na na chuan kan hman thuin kan lo chhang a, a ni chuan nakinah min hmangtu turte chu an lokal tur thu leh longhak turin min hrilh a, a kal leh ta a. Chutia long run-na tur hmu ta chu PCO hnai ber atangin in lam ka va hrilh a, kar lovah ka pu chuan kan road ration tur Rs. 250/- min rawn pe a, kan daih loh chuan min hmangtute dil mai turin min hrilh a, min hawnsan leh ta a.

Fehrehsan chho zet zawtah chuan min hmangtu turte pawh an lo thleng ta a, pahnih an ni a, an pian hmang chu a inpersan hle mai, a thu deuh zawk(ti mai ila) chu cher hang deuh tak a ni a, pakhat zawk erawh chu thau ngo lam lek lek hi a ni thung a. Kan kal lam chuan mizia kan la in hre lo tlang bawk a, kan tawng tlem khawp mai. Motor ruak a kal kan ni bawk a, Vairengte chu zan tir lamah kan thleng a. Min hmangtute chuan buhfai chu kudam a mi phurh tur a nih thu leh kan tih tur chu min koh hun a zu dawh tawp a ni mai tih min hrih a, ngaihtha tak chuan kan mu ta a. Kawngpui dunga motor a riak mai kan nih avangin mut a tui lem lo hle a, zing dar riat velah thovin motor oil leh thil dang te kan enfel hnuin chawei turin hotel lam kan pan san ta a. Buhfai phurh tum motor a tam hle mai a, amaherawhchu fur tui tlak nat lai a nih avangin driver tam ber te chuan chhim lam load phurh chu leimin a nasat avangin an duh hlawm lova. Chawhma dar sawmpakhat velah chuan apa cher/a thu zawk chuan min rawn ko ta a, “Rawn back lut rawh u, a load theih ta e” a ti a. Load te kan lak fel hnu chuan chhun dar sawmpahnih pelh hret chuan Vairengte chu kan chhuahsan ta a.

Bilkhawthlir khaw tawntirh kan han thleng chho a, “helaiah hian kan chhungte buhfai pek an ngai” an ti a, bag li nga vel chu an hlang thla a, pe lovin an hralh a ni tih chu ka hre reng, mahse an buhfai a nia an duh leh an paih thei, ka lo buai ve na tur a awm lo, a phurh chiah kan hna a ni tlat. An buhfai hralh zo lo lawn leh chu an boruak a rawn dang chho ta khawp mai a, an tawng pawh a tuiin fiamthu te thawhin an  nui deuh sang reng tawh a. Hotel chawei nan pawh Gurkhali hotel-ah kel-sa an ti chho ham ham tawh mai a. Khaw tin deuhthawah buhfai an hralh chho reng bawk a, kal pawh a sawt lo hle mai a. An ni pawh chuan polite takin “Kan tikhawtlai nasa si che u a, hire man pawh Rs, 8000/- ni lovin Rs, 10000/- kan pe ang che u” an ti a, a tam lam chu pawi ti bik hek lo le “ni e” kan ti ve mai bawk a. Kawng lakah zan khat riakin a tuk tuk leh zan dar hnih velah Aizawl khawchhung kan lut ta a. Kanin hman tanna sairang road-ah khan midang pakhatin min lo changin, min hmangtute pahnih chu an chhuk ta a. Min lo hmuaktupa chuan Zemabawk Pushpak-ah min hruai pheiin, motor hman man te min pe a, chu lai hmunah chuan lo nghak a, zingah motor dang a an rawn thiar tur thu min hrilh a, chu lai hmunah chuan zan kan riak ta a.

A tuk khua a lovar a, dar sarih vel bawr atang chuan motortein an rawn thiar ta a, lo ngaihthat loh rukna ka neih tawh avangin mutia ho chu khawi hmunah nge an dah tih ka zawt ta a. An ni chuan zep nei hauh lovin min hrilh ve mai a. Ka’n ngaihtuah thin a, ka ngaih a that thei ngang loh avangin Zemabawkah pheiin PCO atangin ka pu hnenah thil awm dan zawng zawng ka va hrilh fai ta kelh a. A ni chuan “In in-unload zawh ve leh lo haw phei ula, kan ngaihtuah tha dawn nia” tiin min chhang a. A tuk chiah hi Sunday zing a ni a, hma takah thoin ka pu nen chuan buhfai leitute ho inah chuan kan va leng kual ta a, anni chuan hlauthawng lo tur leh a hma pawhin an lo lei fo thu tein min lo chhang mai a. <b>Ka pu erawh chuan kan motor number hmang lo hian eng ti kawng mahin sorkar kudam a mi buhfai an phurh chhuah theih loh thu leh, a challan ni sawm chhung a an rawn tifel lo a nih chuan thuneitute hnena a report tur thuin a vau a.</b> An ni chuan an lo hrih tur thu leh challan pawh an mahni hnen atang a lam mai turin min hrilh ve bawk a. Ngaihtha takin kan haw ta a.

Tlanna remchang apiang a tlanin, khaw hran hran fang kualin, bungraw chi hran hran phurin, a changin kawrte bulah riakin a changin hotelah, nun a zalenin a hahdam phian mai, nuam ka tih zawng tak a ni. Ni sawm chu a ral mai a, ka pu chuan challan chu a lo va lam a, an la tihfel loh thu hrilhin, ni thum hun pe leh turin an lo dil a, a ni chuan remtiin a rawn hawn san ve leh mai a. Nithum a liam leh ta, ni lina zing a va leng leh lo haw chuan “Mama, vawin chu Supply Directorate-ah kan kal  a ngai dawn a ni” a ti ta mai a, ngaituahna a kal thui duh ngei mai. Chumi ni dar sawmah chuan Director hnenah chuan thil awmdan engkim kan hrilh a, a bengverh zawng tak mai a lo ni a. A staff tu tute emawni ko khawmin kan awm lai la la chuan buhfai chu va man a, an kudam pawh kalh vek turin a tir ta nghal a. Kan tan chuan engmah hlauhthawn tawh tur a awm tawh loh thu leh, a tul a nih tak thut leh koh leh inhuam turin min chah a, kan inthen ta a, ngaihtha takin kan haw ta a.

Directorate a kan kal tlai lam hian Champhai lam load (maida) kan hmu hlauh mai a, Champhai lam panin kan tlai chhuah ta a. Kawng lakah riak chhoin a tuk chawhmaah Champhai kan theng a. Foreing bungrua phurh tur a awm dawn a vangin a zan chu kan riak ta a. A tuk khua a lo var a tlai lama in-load tur kan nih avangin kan leng khawthawng vel mai mai a. Mahse, in-load a hun meuh chuan Aizawl lam atanga lo thleng thar kan thiante chuan “I puin, a rangthei ang berin lo haw thla rawh u, Police-in in buhfai phurh chungchangah khan man che u tumin an rawn zawng che u, a ti” an rawn ti ta mai, rilru a buai ve map  mai le. Laklawh pawh sawi lovin Aizawl lam pan chuan kan tlai chhuah leh ta vau vau mai a. A tuk dar sawm velah chuan ka pu nen, driver nen Police Station-ah chuan kan thu ran tawh a, buhfai trip khat bo case-ah police-in min ko a nia le(h), ngaihtuah a thuiin a tawi tuk lawi si, nuam lo ve tak chu a ni. Buhfai lei chhawngtute khan an buhfai supply hovin an va man tak si-ah khan an thinrimin Police hnenah FIR an tia maw ni theh lutin kan motor number tarlangin, ‘hemi motor Driver leh Handyman hnen atang hian buhfai kan lei a, phurh ruk a lo ni a’ tih hawi zawng deuhin a ni awm e. Hemi tum hian a ni a tir a mi khi min zawh tak ni.

Kan hma a thu Police hmel ngainatawm tehchiam lo, arsi pahnih bel, pistol paiin ‘Tunah chuan he thil sual tihna a mawhphurtu tak hi man chhuah a nih si loh chuan, a mawhphurtu chu nangmahni Driver leh handyman te hi in ni a. Chuvangin he thil tisualtu a in puh te hi in zawn chhuah ngei a ngai a ni. Keini chuan an hmel leh pian hmang kan hre ve lova, karkhat chhung hun ka pe ang che u ang a, chu mi chhung chuan in zawn chhuah ngei a ngai dawn a ni, in zawng chhuak hman lo a nih chuan he case hi in awrh a ngai dawn a ni’ ti a min han thlah mai kha chu aw. Aizawl khaw chhung heti zozai mipui karah kan hriat than pawh nilo, ni hnih emaw vel innel lutuk lo, an hming pawh a phel chauh, an mahni leh mahni inkohna mai bak kan hriat loh han zawn hmuh huphurh awm zia kha.

Chuti chuan Detective Jail tan hlau tak mai pahnihte chuan Aizawl khawpuiah chuan hnu chhui hna chu kan tan chu a ni chho chawp chilh ta mai a. Experince kan la nei lo dun bawk nen rilru hah nen kan va han chhui sawt lo ber mai, kan vak chau ve em em nitin ringawt mai a ni. Hemi tuma ka thil hriat chhuah thar/chian em em mai chu ‘Aizawl hi a lo va han zauin mihring hi an lova tam em!’ tih leh ‘Queens Ice creem hi thil tui tak a ni’ tih hi a ni deuh ber mai. Inrinni tlai a ni a, tlai dang ang bawkin khawthim dawn hnaihah chuan phur fahran lovin ka pute in lam chu kan pan leh ta hnak hnak a. Ngawiteh, ka mitvai em ni? Ka hmu tlat mai le..! A thau zawk(a thu lo zawk kha) . Kan zui ru ta, min hmuh kan hlau si, kan hloh/bo kan hlau si, a va hahthlakin a va thawventhlak lawi si tak em. Kawi nga zet kan zui hnu chuan in pakhatah, a hnuai zawkah a lut ta, an in ani ang em? A leng kawi zawk mai mai em ni? Rinhlelhna nen rinna nen zan dar riat pelh thleng rawk mai a lo chhuah leh chhuah leh loh kan nghah hnuin, an in ngei a nih hi tiin ngaihtha takin kan haw san ta a. (Police phone mai awm in lo ti palh ang e, a veng a kil deuh a, PCO a awm mai lo a, landline pawh kha han hawh mai turin mi nazawngin an la nei lo)

A tuk hi Sunday bawk a ni lehpek a, Ka pu ho chuan police station-ah kan va report ta a, Police pathum nen a man turin kan va kal ta a, a luhna in kan kawh hmuh a, an zu man tur chu an zu hmu ta awzawng lo mai le. Chumai a ni lo, a in neitute lah chuan chutiang hming reng reng an hriat loh thuin an lo chhang zui lehnghal. Police pathumte kha an lo fel hlauh a, a awm lo a nih hi ti mai duh bik lovin, a veng pum dapin kan dap ta a ni ber mai a. A tawpah chuan kan chhui tawpna kawmthlang lawkah chuan an zu man ta hlauh a nih kha, a va lawmawm tak em(ahnu a ka hriat leh danin, a luhna hmasa kha a nei thlum chi an lo ni awm e).  An rawn kai chho kan han inhmachhawn chu a nuam lo duh khawp mai, Iskariota dinhmun te pawh kan in chan rum rum a lawm le. (A hnua ka hriat lehdanin heta an man zawk hi chu a lo inrawlh thuk vak lova, a zing zuin a thu zawk ka tih khan a sawm a, zin khawthawng satliah ang mai mai a zui ve ta mai a. A thu zawk ka tih kha a kawh hmuh hnuah an chhuah ve leh mai a ni awm e, hei bak an thu kal zel dan hriat ka nei ta lo).

A kaikuang ta ber mai chu hriat lohna hi a ni e. Sorkar kudam atang a buhfai phurh chhuah dan chinchang kha lo hria ni ila, khitiang pherh hrep khian kan buai awm tawp si lova. Kei khi chuan lo hre lo pawh ni ila Handyman junior tak kha ka ni ve mai a, a driver lah night bus chauh khalh thin, truck la khalh ngai lo a lo ni leh kher kher nen, a bum nuam tawk chuah khan kan fing a lo ni e.

{Post sei ber of the misual.com ni raw pip }

tren tren

Similar Posts:

• Champhai ah kan misual
• Thamna hrim hrim
• Buhfai tlakchham a hlauhawm
• Kawnpui-a Gypsy Chesual-ah 2 hliam,thi awmlo
• Bairabi khawdai Police Checkgate bulah buhfai dan lo a phurh a ni

Recent Posts:

• Lumettu Nen(Sunday pual)
• Tu nge/Eng nge?
• KAN HLIAM CHHAR KHA AW!!!
• January 2013, Mizo(ram) Diary
• EIZAWNNA

This entry was posted on Saturday, June 23rd, 2012 at 12:30 pm and is filed under Fiction, Mizoram, Travel. You can follow any responses to this entry through the RSS 2.0 feed. You can leave a response, or trackback from your own site.