mi(sual).com

Kan ramah hian ‘hna a vang, eizawnna avang’ hi kan tih teh fo mai a hei hi enge a chhan, a lo vang reng em ni i lo bihchiang dawn chhin teh  ang…

Mizo te hi lehkha zir uar tak mai kan ni a, a nei pawn nei lo pawh zirna in tha leh phai lamah kan fa te zirna leh thiamna sang zawk an rawn puak chhuah beiseiin kan in dah a, tichuan kan han zir chhuak ta cheng a, sawrkar ah hna kan beisei ngei a, mahse sawrkar hna hian mi zawng zawng a lo daih vek seng si lova , tichuan hna avang, eizawnna a vang tiin kan lo phun kan lo phun ta thin a lo ni a. Lehkhathiam hna hmulo pawl te hial kan lo din phah a, a zialo khawp mai a. Lehkha thiam nih chuan kan lehkha thiamna kha sawrkar hna chauh nilo a mahni a eizawnna kawng a in hai kuak nan te hman mai awm hi a ni hian ka hre ve thin a, nge ni kan lehkha thiam dan hi a lo la ziktluak chiah lo zawk.

BA, MA ilo kan han pass chho a, sawrkar hna in a lo daih vek si lo a, kut hnathawh kan lo hreh tumhrang tawh si a, hetiang tan chuan hna chu avang duh khawp ang le. Kan ramah hian hnamdang kan tih, Vai leh Burma mi kan tih te kan state chhehvel ami hnam dang an mahni chhungte kalsana ei rawn zawng an tam em em a, kan rama hnamdang tam lutuk hi a sawrkar leh khawtlang ang zawng te pawhin kan buaipui nasa tawh ani a. Heng ho hian eng dang an ti a ni lo a, kan ramah ngei hian ei an rawn zawng ani a. Hnamdang heti zat in kan ramah  ei an rawn zawn a , an khuaah an chhung te an chawm theih laia keini a hmuna awm ten ‘Hna a vang, eizawnna avang,’ kan ti kan ti ta mai hi enge a chhan ni ta ang le???

A chhan bulpui ber ni a lang chu keini a ram leilung fa te hian heng hnamdang kan tih ho thawh ang hi kan thawk peih lova, kan thawk duh lo a, keimahni thawh ve turah kan ruat  tlat loh vang hi niin a lang. Heng hnamdang kan tih ho in an thawh ang hi thawk duh in thawk peih ta ila kan ramah hian hna/eizawnna avang kan ti fo lo anga, tin kan ramah hnamdang an tam kan ti kan ti lo bawk ang. Cement mistiri leh helper te hi heti zat Vai ho an awm a, Mizovin kan thawk ve duh tlat lo mai te hi a mak ka lo ti ve mai mai thin. Tin sumdanna kawngah pawh dawrkai a, dawr chhete chhungah dawhkan a calculator nena inchhawp deuh rap a bawp khawkherh a chair vir thei a thut loh  hi chu sumdawngah kan ngai lo emawni tehreng ni, hnamdang heti zat hian dawr luah lovin a kala kal kualin kan ramah ei an zawng a ni a, hetiang te hi lehkha thiam pawh thiam lo pawhin a kan tih ve theih vek ani a, dawr luah man chawi a ngaihloh mai bakah customer ten min rawn pan hun nghah kher ngai lovin mahniin kan pan mai dawn tihna a  ni a.

Sawrkar hna hi chuan engtik khawtikah mah hian min daih dawnlo hrim hrim a , chuvangin rilru nei taka kuthnathawh te pawh hi kan uar a ngai viau tawh ani. Eizawnna mawlmang te te mitinin kan tih theih entirna tlem han sawi chho dawn ila: Mizo te hi kuhva ei nasa tak mai, mei pawh zu nasa tak mai kan ni a, heng kuhva leh cigrette vel ak a in leh dawr vela zuar kual ringawt pawh hian mi tamtak tan chuan eizawnna tur a awm in ka hre ve thin. Hman deuh a thingpui sen hang bazar vela zuar kual thin te pawh kha tunah chuan USA ah an awm dai tawh an tih chu. Mi ina hna thawh tur  a tul tul zawng kual a, rawng hnawih, gas tih fai leh thil dang dang , thil chhe thawm that tih te zawn kual a, ‘Odd-Job Man’ an tih ang chi ringawt pawh hian ei hmuh na tham a awm ve tih hi kan hriat a tha a, mahse thiamthil chihrang hrang nei tura mahni intuai hriam erawh a pawimawh viau thung ani. Vawk vulh te pawh hi, Mizo kan awm chhung chu kan ramah hian vawk sa market hi a chhe dawn lo hrim hrima, thalai vawk 3 vulh peih awm se, vawknote thla 3 kar dan velah a indawt in la sela, tichuan a hmasa ber hralh a lo huna a hrallhna in a note lak lehna leh a dang chaw man tur vel a lo tum anga, pahnih an talh leh atang chuan hlep a inpha man chho zut tawh mai a, sawrkar hna thawk kher loh pawhin eizawnna a tling em em ani tih pawh hi hriat a tha awm e. A chaw chhum a buaithlak kan ti a nih pawh in a chaw tur hnimhnah vel leh thildang ho kha Brite lian a chhin phui tha takah hian han dah khawm ila, chu chu dawidim ‘yeast’ hian han phul thawt thawt ila, ni thum ni li vek up chuan a lo tawih kawi zaih mai a, chu chu wheatvai leh atta te, pigfed te  nen chawhpawlh a pek  mai tur, an ngeih lutuk. A buaithlak harsa zawng hian thil hi kan ngai mai mai thin alawm.

Mahni inbulah ram awl chhete neih phei chuan han cheibawl deuh a leitha te nen a han tih chuan a hun lai a chin chi ang zel thlai chin hian mahni ei tur bakah hralh then tur thlengin a thar theih a. Hralh tur em thar theih loh pawhin mahni eitur thar chuan thlai leinana pawisa tamtak kan sen kha kan save daih mai ani tih te pawh hi lo hre tel ila. Hman a Japannese mi ka thianpa pakhat chuan, “Mizote chu in thatchhe em mai, in inbul a awl dei duai a, heng in ram awl neih ang tiat hi chu kan ramah hian ram nei ve ila, hna dang tawk lova nuamsa pangngai taka kan chhungkua kan khawsak theihan tur hi chu kumtin ka thar thei ang,” a ti tlat a ni.  Mahni in bulah 20ft bial vel lek pawh ram awl i neih chuan 6ft bial vel zel in lai zawl la, chuchu a bial in ban phun kual in, dap velin 1 ft vel lek a sangin khuap bial vek la, chumi chungah chuan leivung dah in chu leivungah chuan kawlbahra in bit tak maiin han phun la, tichuan a lo chawr a, 1 ft vela sang a lo than hnu ah a khuahna chu tih san belhin leiin vur hnan leh la, a hma ang bawk in kawlbahra bawk chu bit tak bawk in han phun leh la, a lo chawr hnuah chutiang zel chuan vawi 4- vawi 5 vel ti nawn la ti chuan i duh leh awm mai mai tawh rawh. Kawlbahra chawh hun pangngaiah i zem siam chu han phelh teh le…20ft bial lekah kawlbahra hralh fee tham i thar teuh maia ang.

Mihring kan nih chhung chuan ei hmu tur chuan rilru neih leh taimak te hi a ngai ve a. Han ti ve ta mai mai ila, kei pawh ka ke te a nat hma a, duh duh a ka tual lim theih lai chuan Pa(mushroom) te ka khawi a, khatih hun lai kha chuan a hlawmin 1kg cheng 80 hisapin ka pe ve thin a. Mahni inhnuaiah tih tak tak a tih chuan nitin 10 kg atanga 20 kg inkar hi pa hralh tur hi ka thar ve reng thei ani. Hlawk ve deuh mai ania. Pickle te hi ka siam a, ka zuar kual ve lawp lawp a, a bawlhlo man atana 500 vel senna ah chuan 1200 man vel a lo chhuak a, 700 vel chu kan lo hlep pha daih mai a, zawrh kual taimak deuh chuan nikhatah kan hralh zo vek a, thil har ani lo a, pawl 3 pawh pass lo leh MA val pawhin a an tih ve theih vek ani a, heng te pawh hi mi tamtak tan chuan eizawnna a tling em em ani. Mahse kan tih hreh a kan zah tlat a ka thiam lo ka timi lo kan tih tlat chuan awmzia a awm chuang lo. Retheih kan phu hliah hliah tihna ani mai.

Computer mawlh mai hi. Hei intin deuhthaw ah khawpuiah phei chuan kan hung tawh ani a. Games khelh nan te, Facebook a thian kawm nan nan te, hla ngaihthlak nan leh film en nan te, eng engemaw ho mai maiah kan hmang nasa em em mai a. Computer te hi mahni inchhung lum atanga eizawnna tha tak ani tih te hi kan hriat atha viau awm e. A tul lo eng engemaw thiam zul ai chuan DTP(Desk Top Printing) lam te hi a harsa lo a, thiam chuan press ah te leh office velah te thil chhut hlawh tur zawn kual hian hna thawh tur pawisa lakluhna tawk hi chu a awm reng ani tih te hriat a tha a. Tin internet lam khawih thin tan phei chuan internet through a in hlawhna tur hi company rintlak tak tak a tam tawh ani tih te pawh hriat tel a tha awm e.

Chuvangin ka ti ve mai mai thin a, a thawk peih tan chuan kan ramah hian hna hi a la vang lova, a tam lutuk ringawt mai a mahse thawh duh bik kan neih avang te, thawh peih leh peih loh kan neih avang te leh, mahni kan in dah san lutuk avang te, kan thatchhiat lutuk avang te hian hna/eizawnna hi a vang kan ti mai mai zawk a lo ni thin. Mihring te chu hna thawk a ei hmu chauh tur a Pathianin min siam kan ni a, kan Bible meuh pawhin ‘Thawk lo chuan ei pawh ei suh se’ a lo ti hial ani a. engkimah, khawi hmunah pawh awm ila, kan taimak a, thawh hreh kan neih loh phawt chuan hna leh eizawnna tur hi chu a la vamh lo reng reng a, mahse thawh duh bik, thawh peih zawng bik kan nei anih erawh chuan hetiang mi te tan hi chuan eizawnna chu keini ram zim te ah hi chuan a vang tawh khawp ang le.

Tichuan keini Zoram thalai, thang leh thar te hian kan puanven te sawi chhingin chhungte thawh chhuah sa a inti changkang a inti milian mai lovin, kan hma a awm hna thawh tur eng pawh thawk hreh lo a thawk peih zel turin kan rilru te ti paukhauh thar leh ila. Lehkhathiam hna hmu lo chhungte chawmhlawm, hawi sang tak inchei ve zuar si nih ai chuan, zir sang vak lo mahse mahni intodelh tak nih te hi a zahawmin a ropui daih zawk tih te hi hre thar leh ila. A tu a te pawh hian taima taka hna thawh hreh nei miah lova hna kan thawh phawt chuan tun ai hian kan ram hian hma a sawn in keimahni pawh kan changkang zawk ngei ang tih hi  Zofa te hian i lo hre thar leh mawlh teh ang u khai.

KAM LIAM:   Ram leh hnam hi i hmangaih tak tak anih chuan i ram in a tihsak theih che ringawt ngaihtuah a, sawrkar sum a thlawna hmuh theih dan ringawt ngaihtuah a phe buai phe buai lovin, i ram leh hnam tan hian enge i tih sak theih ti zawk i ngaihtuah hmasa ngei ang. Hetiang ngiahtuahna chang pawh hrelo hi chuan ram leh hnam ka hmangaih ti in iak iak thin mahse dawt chiang tak an sawi tihna a lo ni zawk.

BigDaddy Hmahmatea
(R.Lalhmangaiha)
Kulikawn

Similar Posts:

• Eizawnna
• Mizoramah hian hna a vang tak tak em?
• Entawntlak a eizawngtute
• Mizote leh kuthnathawh
• MIHRING A

Recent Posts:

• How to locate your misplaced Android phone
• KUT HNATHAWKTU TE TANA HAMTHATNA
• Mizoram Electric Power Dinhmun Leh Hmalakna Te:
• YMA
• Hringnun thim lam

This entry was posted on Friday, February 15th, 2013 at 3:32 pm and is filed under Lifestyle, Luangliam, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.