mi(sual).com

….Tin, Israel ram atangin China ramah kan chho tihna pawh a kawk bawk hek lo.

3. Pathumnaah chuan, zawlnei lehkhabu lam hi han thlur zel rih ila, hnam bo nia inruatte chang tlawhchhanah chuan a lar pawl tak a ni ve mai thei e. Krismas velah phei chuan chhiar zin pawl tak a ni ang:

“Lalpa chuan heti hian a ti,
Rama khuaah thawm an hria;
Mitthi ngaia tap tlawk tlawk,
Rakili’n a fate a tah a,

A fate an awm tawh loh avangin thlamuan theih a ni lo”(Jer.31:15) tih hi. He lai chang hi Mathaia chuan Isua lo piang chu Heroda khan duh loin thah ngei a tumna lamah Isua that si loin a vela nausen kum hnih chin hnuai lamin an thih phah teuh ta niin a sawi a(Matt.2:16). Chutianga Israel thlah nausen mipain an thih phah avanga lusunna lo awm chu Rakili pawhin suna tah ve angin a sawi chhuak a, hetiangin: ‘chutih lai chuan zawlnei Jeremia’n,
“Rama khuaah thawm an hria,
Tap te, mitthi ngaia chiau vawng vawng te; Rakili chuan a fate a tah a, An awm tawh loh avangin a thlamuan theih loh” tia a sawi kha a lo thleng ta(Matt.2:18),’ tiin, Jeremia sawi lawk thleng dik angin a puh hmiah mai a ni. Mahse Jeremia hian Israel-hote chu Assuria sala tang tura an chhuak chu a lainat leh khawngaih vel chuan Rakili hian a fate(a thlahte) sal tang tur chhuak ta chu khawngaiha tah angin sawi a ni ber a, Rakili thlarauin tah ang takin a suangtuah pawh a ni mahna.

Hmar lam lalram Israel-ho sal tang tur kal chhuak zingah hian Rakili fapa upa zawk Josefa thlah Manase leh Ephraim hnam an tel ve a. Tin, Rakili fapa naupang zawk Benjamina thlahte erawh chu chhim lam lalramah khan betin sal tang tura chhuak zingah hian an tel ve lo a ni. Amah Rakili tak phei chu Aigupta sala an tan hma daih khan Benjamina a hrin lai velin nau chung thi a ni tawh zawk a,a thlahte sal tang chhuak tah tur a awm tawh lo. Hei hian Mizote chu hnam bo an ni tih a kawk bawk hek lo a ni.

4. A palinaah chuan zawlnei lehkhabu bawk hi an chang tlawhchhan a nih angin han thlurbing leh ila.Zawlnei Jeremia bawkin,”Kawng chhinchhiahnate insiam la,I tan khawng kawhhmuhnate phun rawh;
I vah chhuahna lam kawng,
Kawngpui lam ngei chu chhinchhiah tlat rawh;
Aw, nula thianghlim Israel, lo kir leh rawh, Heng i khawpui lamahte hian(Jer.31:21).” tiin a lo sawi leh a. Israel-ho Assuria sala tang tura chhuak tate kha bopil hlen mai loa, anmahni ram ngeia an lo kir leh theihna turin a duhsak em em a, an lo kir lehna tur kawngte chu chhinchhiah chiang tura a fuihna niin a lang ani. Hei hian Mizote chu Israel hnam bo kan nih a tilang lo reng reng a ni. Tun laia Israel ram atanga Mizote kalna kawng, China pana an kalna ni awm tak chhinchhiahna lo phuahchawp kual vei hi chu a bet lo hle a ni. Israel hnahthlak zinga mi kan ni tih a kawk pha lo a ni.

5. A pangana atan chuan Saphoin, “Mizo chu ramhuai bia, thingbul leh lungbul bia,” min tih thinna chu changchawiin Mizo zinga mi engemaw zatte chuan Sapho min puhna hi dik tiin an pawm ni ngei tur a ni. Engemaw nikhuaa thu sawinaah te leh thuziak thenkhatah te pawh, ‘Keini pipute chu ramhuai bia, thingbul leh lungbul bia an ni a,’ tia sawi thawm hi ka lo hre fo mai. He tawngkam hian ka rilru a khawih danglam zar mai a, ka sawi hmaih phal hauh lo a ni. Hetiang a nih avang hian a ni ang, Israel hnam bo nia inchhalte pawh hian Mizo pipute chu thingbul leh lungbul te bia anga an sawi fo ni ka ti thin. An tanchhan remchang atan Bible ziak lak chhuah tur a lo awm ve zel bawk si nen. Zawlni lehkhabuah chuan,
“Thingbul hnenah, ‘Ka pa i ni’ ti a, Lungbul hnenah, ‘Mi hringtu i ni,’ titute chu: Hmachhawn loin an tukkhum chhah mi chhawn ta zawk a.

An mangan hunah erawh chuan, ‘Tho la, min chhandam ta che,’ an ti ang. I pathian, i siamte kha khawiah nge an awm tak ni.”(Jer.2:27)

tiin a lo ziak a. Tin, hmun dangah pawh, “Nangmahni leh in lal chawpin in pi leh pute chena in hriat ngai loh hnam hnenah Lalpa chuan a hruai ang che u a;chutah chuan pathian dang, thing leh lung rawng te in bawl ang,”(Deut.28:36) tih te leh, “Tin, Lalpa chuan kawlkil lehlam thlengin chitin zingah a tidarh ang che u a, chutah chuan thing leh lung, in pi leh pute chena inhriat ngai loh pathian dang rawng inbawl ang,”(Deut.28:64) tih te kan hmu bawk a ni.

Heng thute hi Israel hnam bote chungah a thleng lo e, dawt a ni e ka ti hauh lo. Mahse, Mizo hnam chunga hmehbel hi a dik lo chiang hle a ni ka ti zawk a ni. Helai thu chang tidik tur hian Israel hnam bote chuan an bona ramah chuan pathian dang, Jehova ni lo thingbul leh lungbulte chu biain siamchawp pathiante pawh an be mahna; ” I pathian, i siamte kha khawiah nge an awm tak?” tih ziak a ni reng si a. Bible ziak hi Pathian thu rinna leh thiltih tehna dik lo thei lo niin kan ring bur dawn a nih chuan a ziak angin Israel hote chuan bawng no lem pathian te pawh an siamchawp thute kan hmu reng a nih hi. Mizote erawh chuan milem siamchawp dina pathiana biak hi kan pi leh pute hunlai atang tawhin kan chin leh kan tihchhin zawk pawh ka la hre ngai lova, mi sawi rik pawh ka la hre hek lo.
(awmzel tur)

Similar Posts:

• Kan ram leh sakhua sap salah hruailuh a ni
• Mizo kungah Mizo nun a rah tur a ni
• Tute Nge Kan Nih!? Part 4
• Harhla, Fingla, Hre Ve Teh.
• Israel Hnam bo leh Mizote

Recent Posts:

• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)

This entry was posted on Sunday, July 15th, 2012 at 4:30 pm and is filed under Mizoram, Opinion, Religion. You can follow any responses to this entry through the RSS 2.0 feed. You can leave a response, or trackback from your own site.