Nunrawng Hmeltha

July 23rd, 2012 6:00 pm by saint sammoo

Up leh thup tuma rei tak ka lo hup tawh, An sawi an sel leh an sâwtna tawngkam chhe tinrengin bang lova min buak bawrh bawrh chung pawha sairil hnang ang maia ka lairil phuar tlat tu- Phuloh Tha hmingliani, ui tak chunga ka chân tak chanchin hi zêp lovin ka rawn zep ve leh mai mai ang e.

A tleirawl chhuah tirh atanga siphnip thana thang, a uar deuh te phei chuan Tlâng sum ti hiala an sawi duh kha a ni a. Kan Lal Isua khan Jakoba tuichhunchhuah bulah khan han hmu ve se la chuan, “Pasal pahnih I nei tawh, tun a mi hi I pasal tak a ni lo reng a ni..” a tih ve mai tur chi kha a ni reng lah tak a.

Mahse han en mai chuan pawisawi lo leh kimki cheih cheih awm tak hi a ni reuh a, a hmel te lah kha ti sen nei mang lo, Changkha lei dep kan tih ang chi, len deng ke thiah an sawi ang mai a dang var pap mai, mit meng lian leh chiang kak mai, “A pu hi vai a nia..” pawh ti se, “Ka ring reng a..” tih tur chi, nuthlawi sa pan leh fu ke zen thlarh mai a nih vang te pawh kha a ni fa hmiang, ka fin vangah ngai lui tlat mah ila, min lo bual â hneh hle zawng alo nih dawn kha.

Thian thate thurawn pawh ngaithla duh lovin, tawnhriat leh daihriat neih belh tumin hmangaihna hmaithinghawng vuah chunga hurna thlarau paipawn tel in, phuahchawp hmangaihna tuipui chu khup thleng chauha dai tumin ka lut lui ta kha a ni a.

A lo mak thei ngei mai.. A tak rama han luhchilh takah chuan, Pawn lam atanga kan lo ngaih ang a ni ta hauh lo mai le. A nihna leh a tlin lohna a hriat chian avanga zawr hnep mai, mi dang pawi sawi hlau ngawih ngawih, a ma dikna ngeiah pawh ‘ka thiam loh a ni’ ti thei khawp a tlawmna nun nei mi, nu in ngaitlawm em em mai hi a lo ni reuh a. Tuisik lo deuh han lem ve chang a, thlarau thianghlim vak lo in min pawl fuh tum phei chuan, mit siai meuh in kan en vang vang a, ‘Isua nu mari kha a ni thei mai ang a.. te ka tia…, a tih fuh tum chuan rei vak lo chhung chu min chhandam ve theih mai te ka ring rum rum thin.

Phuahchawp hmangaihna tuipui ah, ka lemchan na thuam nena lut kha ka ni nang in, ka tum dan a ni ta lo tawp mai. Kan nuthlawii chuan ka tai ah hlingin a duh na lam lamah min kai tan ta tlat mai le. Khup thleng chauh emaw ka tih laiin kawng thleng in ka lo inchiah hman a, ka kawng a thleng tih ka hriat chuan âwm, âwm thlenga daia ka in ngaih laiin a hleuh a hleuh turin min ti ta si.. A mal chunga sei liana a khumpui ka kai tak hnu phei chuan ka nu leh pa te chuan Fapa an nei ta lo.

Nu leh pa ten ‘Fapa’ ti a an lo chhal ve thin, hmathlir thui tak an lo neih pui ve thin chu chu tia nuthlawi kap kara phum bova a han awm mai tur chu ngai ngam lovin thlan kotlang tan chhana in ham tan tumin theih tawp chhuah ve thin mah ila, chak lohna in a phuar vel he mihring awngrawp tak hian a thei mawlh si lo.

Ka nu duhtak chuan chhung khat leh thian tha te phung bawmah sawmin vawi duai lo min kaih chhuah tum thin mah se, ka tai a min hling tu chuan ka chak lohna a hriatchian em avangin, zu leh sa tawktarh a hmangin a malpui pahnih inkarah chuan min chep bet hneh em mai a, tu han pawh chhuah theih zia zang ka ni lo.

Lungngaihna chirh dup atanga in hai chhuah tuma kan phek buai lai chuan kan nuthlawii lah chuan berh ve hlek lovin vaukam min kai san a, vaukam lungpui chunga thuin min chhiatkhum duh lek fang a ni ta si a..

Tukhum chhah chhawna min liam san hnuah pawh thlan khur thlenga um zui tuma ka puan ven ka sawi chhin sauh sauh dan leh chu mi hreng a ta ka chhauh tak dan, I’m a survivor ti a hnehna hla do ka chham khum leh theih tak dan a chhun zawm leh tum a ni.

22 Responses to “Nunrawng Hmeltha”

1
zualbonez Says:
July 23rd, 2012 at 6:06 pm
awke
Report this comment
2
drake Says:
July 23rd, 2012 at 6:16 pm
zahngai la chhun aawm lo mai rawh, chhunzawm lam hi chu @lusei_erh a ta nia, i nuthlawi saw tang tlan chhuak ve ngawt a mi akekeke
Report this comment
3
drake Says:
July 23rd, 2012 at 6:17 pm
zahngai la chhunzawm lo mai rawh, chhunzawm lam hi chu @lusei_erh a ta vnia, i nuthlawi saw tang tlan chhuak ve ngawt a mi akekeke
Report this comment
4
Kher Kher Says:
July 23rd, 2012 at 6:22 pm
Mut pah a chhiar atan ka khek mai ta nge ngaihnawm tak in.
Report this comment
5
saint sammoo Says:
July 23rd, 2012 at 6:34 pm
lo chhuak e.. Inkhawm banah ka rawn vil ang..haha..
Report this comment
6
Awmtea Khiangte Says:
July 23rd, 2012 at 6:47 pm
Ngaihnawm phian mai…
Report this comment
7
sheldon Says:
July 23rd, 2012 at 6:48 pm
I ziak thiam thin ngawt mai. Phuahchawp mai ani lo tih hi Kei Lalthachiangi pa ka chiang e (an tia mi khah?)an tih ang khan ka chiang. Thutak behchhan ngaihnawm tak ani. Chhunzawm leh ngei chi a ni. Hmangaihzuali kha khawiah tak awm tang maw???
Report this comment
8
Charice_mizo Says:
July 23rd, 2012 at 7:07 pm
Mak thin ve, rinloh deuh hian haha, khabe han sep te hi hnehsawh phiana, a ti lem tep zawk alawm tak tak ni mahse
Report this comment
9
PKfanai Says:
July 23rd, 2012 at 7:15 pm
Tawngkam te hi in thiam ang zel hlawm a, chhiar anuam phian mai.
Report this comment
10
CFL Says:
July 23rd, 2012 at 7:29 pm
Teh daih chuan a.Thu i thiam thin e.
Report this comment
11
Chhuaklinga Says:
July 23rd, 2012 at 7:41 pm
Tuisik lo deuh han lemve chang a, thlarau thianghlim vak lo in min pawl fuh tum pheichuan, mit siai meuh in kan en vang vang a,‘Isua nu mari kha a ni thei mai ang a.. te ka tia…, a tih fuh tum chuan rei vak lo chhung chu min chhandam ve theih mai te ka ring rum rum thin.
A va han tawngkam thiam thlak mai mai ve aw, hahaha.
A ngaihnawm phian.
tren tren
Report this comment
12
sisen Says:
July 23rd, 2012 at 7:48 pm
Chhiar hman ve ta e
Report this comment
13
kawlhawk Says:
July 23rd, 2012 at 8:01 pm
tawngkam i va rawn chhawp kual-kawi nalh ve le(h!…
Report this comment
14
sisen Says:
July 23rd, 2012 at 8:09 pm
Lungngaihna chirh dup atanga in hai chhuah tuma kan phek buai lai chuan kan nuthlawii lah chuan berh ve hlek lovin vaukam min kai san a, vaukam lungpui chunga thuin min chhiatkhum duh lek fang a ni ta si a..

I va thlawhnalh e
Report this comment
15
saint sammoo Says:
July 23rd, 2012 at 8:35 pm
Ku Sheldy hi i ti ve ziah..haha.. a tak a awm lo chiang bal..
Kan inpuang ang e.. a tir lam word play – thup, hup, bang lovin buak bawrh bawrh sairil, lairil… tih vel khi ka inban leh tir (twist) mai mai a.. ka tui chho zel a.. ti khian a lo chhuak ta mai a nih khi..
Report this comment
16
Nguntang Says:
July 23rd, 2012 at 9:40 pm
Hmelchhe nunrawng ai chuan hmeltha nunrawng chu a pawmthiam theih deuh ang chu…
Report this comment
17
Jacka Pi Says:
July 23rd, 2012 at 10:02 pm
Wooohoooo saint!
Report this comment
18
thachianga Says:
July 23rd, 2012 at 11:00 pm
Ngaihnawm hle mai. Ziah zawm tur lai han uluk lehzual phei la chu duhthusam ni mai tur anih hi.
Report this comment
19
H.Vangchhia Says:
July 24th, 2012 at 7:56 am
Hmmm, ṭawmkam ivan hnehsawh teh erh ve a, a ngaihnawm hle mai

Nunrawng hmelṭha tih hla ka ngaihtuah let a ka nui vun vun… an phuah chhan kha! hairehai
Report this comment
20
Lamji Says:
July 24th, 2012 at 9:20 am

Report this comment
21
Dr Mahminga Sailo Says:
July 24th, 2012 at 1:06 pm
Thu va’n thiam tak e aw…
Report this comment
22
ahooma_ Says:
August 3rd, 2012 at 4:20 pm
I thu han chhehkual dan vel chu(h). Comment tlai fu emaw….
Report this comment