Tunlai chu ka dan pangai te bawkin thu leh hla lamah ka dang a char kher mai; thu ziak tur reng ka hre lo va, thiante thuziaksa meuh pawh comment ngaihna reng reng ka hre hek lo. Ziak ve hram ka duh si, ziak tur reng ka hre bawk si lo, tihian ka blog lama ka ziak hlui tawh tak haichhuakin ka rawn chhawp chhuak ve ngawt anih hi……
Finna leh keimah
Mahni tawka fing intih ve tawh naka laiin nitin ka atzia leh ka lo fin tawk loh zia ka hrechhuak fo thin. Mahni tawkah lehkha hi ka chhiar tam ve thawkhat a, finna pawh tam tak ka chhar chhuak; ka finna chhar chhuah te erawh ka hmang tangkai thiam chuang si lo anih hi.
He hringnun ah hian tihtur ka intuk ve a, chung ka tihtur nia ka ngaih te chu tihhlawhtlin tumin hma ka han la ve bawk thin, mahse engmah tak tak tihpuitlin theih ka nei chuang si lo. He khawvel ropuina leh hausakna te hi ka chanpual tur an ni ve lo a niang e. A tawng tam apiang hi fing tur ni ta se, ka va’n lo fing dawn tak em. “Fing viau” nia inngaih hi ka tan a tha lo va, chutihlaiin “a hle” anga inngaih tlat erawh ka tan a hlauhawm hle tho si.
Hmangaihna lampang tlem
Hmangaihna lampang hi tawite tal sawi tel ang. Sawisepna leh tlangrel ina a pawh thena a kaihhran theih hmangaihna chu hmangaihna der mai a lo ni. Hmangaih tak tak te chu danglam tak a ni, miin sawi chhe mahse khawngaihna a lo piang thuai thin a, mi in hnunglam atanga an rel pharna te, an tlin tawk loh nia an sawi te chuan khawngaihna a pianchhuah a pian chhuah tir a, chu khawngaihna leh hmangaihna inbelhbawm chu a nasain chatuan lungpui ang tluta nghet a ni tawh thin.
He hringnun hi hmangaihte inthenna ram a ni a. Inhmangaih ngawih ngawih, inthlahlel ngawih ngawihte pawh, an inpumkhat kher lo thin. First love ngat nupui/pasal atana nei thei te hi mi vannei an va’n ni chiang tak em. Nupa inhmangaih ngawih ngawih te karah pawh inthenni a lo herchhuah chang a awm a, inthen miah lo te lah thihna talin a then hrang tho thin si a. He khawvel hi zawng lungduh inthenna ram a ni miau si a le.
Thinurna
Thinurna hi thlai chi ang mai a ni a. Chawm that anih chuan nasataka thinurna leh rahchhuah chhe tak a thlen thei thin. Nupa tangthenna hial thlentu intihthinrimna tam tak bul intanna chu thil ho te a ni thin. Chu thu ho te chuan inhnialna a thlen a, thu dang dangah an pakai a, an sawi zau tawlh tawlh a, thinurna a zual tulh tulh a; an inchhan dan ang tawk te tein thu a kal diklo chho tulh tulh thin a. A hnu lamah phei chuan anmahni mimal tlinlohna thlengin an inhaichhuah sak a. A tawpah chuan namenlova thinurna nen nupa inthenna a lo thleng ta mai thin. Thu ho mai mai avanga ngam taka nupa inthenna lah hi a tuartu diktakte chu an fate an ni daih thung si. Hei mah mah, thinurna kawng khat chauh lehnghal.
Long-term project
Kan ramah hian long term plan ropui tham tak a vang thin khawp mai. Chu ai chuan Short term plan leh tih hups hups lam kan uar hle a. Long term vision kan neih loh vangin kan khawpui a chep hle a, bang intawm neih hialte a ngaih phah ta; kan kawngpui neih ve te lah a zim em em hlawm bawk si.
Kan luipui te lah khuaptu nei lovin a thlawnin a luang hum hum a, thenawm State te’n an lui lian neih te an khuap li leng lung a, keini ve chu a khuaptu tur sorkar chak tak kan nei thin lo. Kan sorkar reng reng hian a rampum huapa tangkaipui theih tur luipui khuah ai chuan luite tui khuah an duh zawk zel a.
Hlawk tham law law buaipui ai chuan kum reilote chhunga zawh theih mai tur mini-hydel project buaipui a, mahni ngeiin ropui taka hawn theih ngei tur kha an duh zawk thin. An duh leh an thlakhlelh ang ngeiin an ti a, ropui takin an hawng ta ngei a, chu chu an tan chawimawina ropui ber a ni. Heng ho hian Mizoram ka hmangaih an ti thin si a maw. Mipui lah hian ram hmangaihtu ai chuan hlawkna min pe theitu kan duh zawk bawk si.
Hausak thut a chakawm
Zoramah hausa, mahni thawhchhuah hmanga hausa te, mipui chanai thaibova inla hausa te an tam em em laiin, mirethei berh tak tak, a dawma dawm kan hleih theih loh khawpa berh leh chhiava an tam. Hengte hian engtikah nge mual eng an kil ve phak ang a, engtikah nge an tan khua a var ve ang le……. Dinhmun a tleu laklawh tawh chuan retheihna atanga zuan chhuah hi a harsa a nia aw.
Retheihna tlansana dinhmun thaa chuan chhuah a, hausak ve tawh hi a chakawm thin mang e. Chutihlaiin hausak chak viauna hian kawng thalo ah min hruai lut thei si. Hausak thut chakna hi mihring tichhe tu a ni a, hausakna chu mahni thawhchhuah atanga zawi zawia lo awm turah ka ngai. Kei zawng ka thatchhe em a, ka tan hausakna kawng a inhawng ve ngai dawn lo anih hi. Hausak thut erawh ka chak ve thin khawp mai.
Hlimna te zawngin…
Thil hlui leh nunhlui hi chu hun in a liampui mai a, tun hun kan hman lai mek hi a lo pawimawh ber mai. Hlimna te hi a hranpaa zawn chawp pawh a lo ngai lem lo, ka thil tawn ang ang te kan dawn sawn thiam chuan hlimna kan tawng mai thinin ka hre thin. Mahni kiang, mahni sir, kan ban phak maiah hian hlimna a lo awm reng alawm le. Nitina kan chunga thil lo thleng thinte, tha taka lo dawngsawng a, mahni chantawk te te lo hlimpui thiam thintu te hi mivannei an va ni em.
Kan ropui tawh vei nen
Keimahni kutkawih ngeia artui mum khat pawh kan la siam chhuah theih hma leh, atom molecule pakhat te pawh kan la siam chhuah theih hma hi chuan mihring hi ropui leh sang ta luaa inngai tur kan lo ni nek lo ve. ‘Gene cloning’ kan ti, ‘cell cloning’ kan ti, ‘human cloning’ kan ti, a engamah hi a lo ropui reng reng hleinem. Pathian siamsa tlem tlemin kan kuaiher danglam hlek hlek mai chauh a ni si a.
Thla leilung kan rap pha ve dek dek a, ropui kan inti em em a; chutihlaiin thla leilung leh thangvansanga thil awm zawng zawng siamtu erawh Pathian a ni. A hre ril leh a zir ril apiangin engkim siamtu Pathian lo ropui zia hi an hrechiang tulh tulh thin.
Mihring hi chu a chapo hma em mai a, engkim siamtu leh dintu, hmangaihnaa khat Pathian meuh ngaihsanna chang kan hriat loh hun hi a lo la thleng thuai ngei ang le.
July 23rd, 2012 at 9:06 pm
chhiar ang
Report this comment
July 23rd, 2012 at 9:22 pm
nepnawi dawr ah khai a, hralh tur nih hi
Report this comment
July 23rd, 2012 at 9:23 pm
A va sei e! @sisena chhiar zawhah chhiar ve ang!
Report this comment
July 23rd, 2012 at 9:24 pm
A va dik hlawm em, a khat tawk a chhiar chhuah fo tur a nih hi.
tren tren
Report this comment
July 23rd, 2012 at 10:33 pm
Pu caribou-a fan ruh kawl ka nihna a la kiam lo chu a inchhirawm loh leh ngei e. Lal Solomon-a thufing aia a nepna a awm kher lovang a. A dik hlawm kher mai. Hlimna zawngin tih mawlh khian mi khawih nasa mai.
Report this comment
July 23rd, 2012 at 11:47 pm
Hepa hi ala chhangchhe em mai pawh a, kei anga nau awmtur nei tawh lo anih ve hunah phei chuan a thuziak tha tak2 min la hlui fo ang
Report this comment
July 23rd, 2012 at 11:54 pm
A rilh raih mai a! Sir KL-a thukhawchang ang chiah a ni. Hetiang hi a ziak hun chhung a rei lo mai thei a mahse ngaihtuah hun chhung chu rei tak a ni thin. A thu hlawm zawng zawng khi a awmzia vek mai.
Finna leh keimah tih pawh khi i la fuh hle mai. Mahse hre chiang tu berte zing ami ka nih che ka ring. I thu lak dan leh kan zinga i lo comment hun ka thlir hian i che fuh ka ti a, i fing ka lo ti hle thin che a nia. Sualna hi DNA lam atanga inhlanchhawn chi tih i hnial fi thlak thak laite khan i che turu ka ti khawp mai. Thiam pawh i thiam reng a ni, i specialnaah hian.
Hausak thut i chak dan leh a chhante pawh khi a ngaihnawm khawp mai. Hei hi heti zawng hian ka lo sawi ve daih thung teh ang, i thuziak a tihpuisuih takin. India chhulchhuak – Bengoli chuam Amartya Sen khan heti hian a tia lawm, ” Khawvela pawisa awm zawng zawng hi mihring tinte hnenah inzat theuhin sem ta ila. Kan sem atanga kum 20 velah chuan a ngaite bawk hi an hausa leh ang” tiin thu belchian ngai tak a sawi a ni. A sawi tum tak chu management thiam lam kha a ni. Rethei apiang inren thiam dan hre lo leh mi neih ang neih ve tum ngawt mizo kan tam lutuk a, ka lo hawn khan he thil hi ka rilruah a awm char char a ni.
A tawp nalh khawp mai. Genetic lam hawi pawh i lo sawi lang leh zauh a. A dik a ni, i sawi khi. A thilsiam kan her danglam ve mai mai chauh a ni si a.
Tun hnaiah pawh Higgs Field awm leh awm loh hriat theihna turin Higgs Boson an hmuchhuak a. Hei hian nghawng mak tak tak a nei thar leh nasa a nih hi… ” A ni ve thei tho mai a” tiin kan LIBERAL ve viau ang tih ringawt pawh hi a hlauhawm thin e.
Report this comment
July 24th, 2012 at 12:15 am
@sisen, drake & Saitawk: In comment hlu tak avangin ka lawm e.
@Chhuaklinga: I tilawmawm hle mai.
@CFL: I comment hlu tak hian min tilawm khawp mai.
@kawlhawk: Tunlai chu a chhangchhiat theih rem rem khawp mai. Zing thawh hlim atanga zantir lam thleng hi chuan hun thawl tha a neih theih miah loh. Kan inawm, kanpua, kanfiam, kan inhau, kanvel, kan inthlem….etc…. Thuziak lampang phei chu a lang hlei thei meuh lo a ni e.
@Ignatia (33-115 AD): Khai a…. min fak chiam mai a, min tizak mai dawn alawm le. I comment a ngaihnawm hle mai.
I comment khi a dik ka ti. Kan rama mirethei tam takte hian vawi duai lo tanpuina an dawng tawh thin, mahse chu an tanpuina dawn chu chhungkaw inkhaichhuah nana hmang lovin thil ho mai mai atan an tlakral leh mai thin. NLUP an sem hmasak zawk tum pawh khan hlawhtlinpui an vang asin aw….. tape deck leh TV an lei chur chur mai maw le.. Thenkhatin hausak an phu ngawih ngawih laiin thenkhat chuan retheih an phu ngawih ngawih thung si hi, thil mak tak anih rualin a lo mak lo viau thei dawn niin a lang.
Higgs Field chungchang hi chipchiar takin lo post teh. A ngaihnawm dawn mai.
Report this comment
July 24th, 2012 at 12:24 am
Report this comment
July 24th, 2012 at 12:46 am
A ngaihnawm vel vek mai.
ignatia comment khian a tingaihnawm zual. Mahse, Francis Crick te, Darwin te hi chuan an hun hmasa lama an rinna chu an puitlin hnuah an paih ni berin ka hria. Scientist ropui kan tihho reng reng hian Sakhaw lam an ngaihsak lo tlangpui bawk. 
Report this comment
July 24th, 2012 at 7:37 am
Caribou hi chu thu leh hla lam hi a thiam a nia, a ziak ngaihnawm thei thin em mai.
Hausa leh rethei chungchang ah chuan ngaihdan mawlmang deuh ka neih ve chu. Mercedes, BMW, Ferrari duh tawk a hawl kual thei ni loin, mitaima, mirilru ngil, kohhran bel tlat mi hi Pathian in an chantawk theuh ah malsawmna in a vur tlat tih hi a ni. Kohhran bel lo, piangthar bawk si lo te hi Sum leh pai ngah viau mahse an tawp na hi a rapthlak tlang pui.
Report this comment
July 24th, 2012 at 8:06 am
A ngaihnawm mai piahlam a ni. Thil tam tak min ngaihtuah tir.
hairehai 
Report this comment
July 24th, 2012 at 8:11 am
Tukchhuah nuam vek u la
Post tha tak anih ka ring. Ka hman ve leh ka chhiar ang.
Report this comment
July 24th, 2012 at 8:38 am
@Admins: Ka lawm e.
@Mx:
@Kawhterenga: Scientists tam takte hian science thiamna phena Pathian ropui zia an hmu thei tlat lo leh an mit tihdelsaka an awm tlat hi mak tak a ni.
@Maawma: I comment a tha hle mai. Rilru leh thlarau lam hausakna hi a hlu, vanram min thlen theitu a ni bawk. Mahse khawvela ka cham chhung hian han hausak ve hi chu ka chak thin.
@H.V.: Ka lawm lutuk e.
@Sheldon: Nang pawh tukchhuah nuam le. Chhiartu awm lo thuziak hian hlutna reng a nei si lova, chuvangin tlawmngaih chhuahin min la chhiar sak ve hram dawn nia.
Report this comment
July 24th, 2012 at 12:05 pm
Pu Caribou: Ka tum zeta mahse popular science article ziak hi thil awl a ni hauh lo tih i hriat kha. Ka la puitlin thei lo. Mizoram Science Journal lamah mi pakatin Higgs Boson chungchang thuziak a lo submit tawh e an lo tia ka chawlhsan leh rih ta mai.
I blog lama thuziak thenkhat saw post atan lo suan phei rawh.
Report this comment
July 24th, 2012 at 1:03 pm
Thuziak belhchìandawl tak ani e. ‘Hmangaihna lampang tlem’ leh Thinurna’ te khi tha ka ti zual.
Report this comment
July 24th, 2012 at 3:49 pm
van tha ve..
thu nepnawi a ni miah lo ve… 
Report this comment