mi(sual).com

THUHMA: Tawi te in a story lo pian dan leh ka ngaih pawimawh te kan zep ve khanglang teh ang. He story hi a tak a thleng (True Story) a ni lova, phuahchawp (fiction) mai a ni. Chuvangin Hming leh Nihna te hi phuahchawp vek a ni a, Khaw Hming te erawh a tak a awm a ni a, amaherawhchu ka duhdan angin ka hmang chawp ve mai a ni, thutak khuk a khuk pui chi a ni lo. He ka thuziak ah hian mi rilru hliam palh theihna thil thailan ka nei anih chuan in mi ngaihdamna ka ngen nghal e. . . Tukin zing dar1 ah mut tum a laikhum thlehnem ka belh laiin he thu hi ka ngaihtuahna ah a rawn lang ve a.

Engpawh nise tiin thuziak mite angin thiam ve lo mah ila a thawnthu kalhmang leh ruangam tur te chu ka suangtuahna khawvel in a tin-zawn thiam dan ang tawkin ka’n duang ve khanglang a, a chanve vel ka thlen chuan mutsan mai ka tum a, mahse mutmawh-hnarmawh ah ka hmang ta tlat mai, dar5:40 vel thleng ka thiam ang tawk a ka suangtuahna hmang a ka cheibawl hnu chuan a tawp chu engngemaw ti ti in ka thleng ve ta hram a.

Ka tuihal in fridge kawngkhar ban pah a tukverh lam ka hawichhuak chu khua a lo var der tawh.. He sentence ka ziah mek lai hian dar6:30 a ri tawh. Awle, thuhma ah ringawt pawh kan tui dawn tlat, thupui lamah zuang lut nghal ang aw. . .

United States of America(USA) khawchhak lam a New York khua ah chuan Central Intelligence Agency (CIA) Director te zing a an chhuanvawr em em Jason Hankinson a awm a, a fanu Natalie Hankinson leh a thiannu Joanne Moore te chu United States khawthlang lam a Nevada khua ah chuan lehkha zir in an awm a, In 1 ah an cheng dun a. Natalie hi a pa ang bawk in politics ah a tui hle a, University Of Nevada ah Political Science a zir mek a ni.

A thiannu Joanne erawh hi chuan Art Institute of Las Vegas ah designing a zir mek a. February Ni 24, 1991 zan dar11 a ni a. Natalie chuan a Diary a ziah zawh hnu chuan Nepnawi Dawr ah cold-drinks leh snacks lei turin a chhuak thla a, Joanne erawh a tuk a test tur a neih avangin a lehkhabu a bih deuh chawt tawh mai a ni.

Natalie chu footpath a a kal lai chuan kawngpui lehlam atang hian midum(negro) 3, sa tha nelh nawlh te hian an lo au va, a hlauh avangin tlanchhiat a han tum a, mahse a bul an lo thleng hman tawh. Heng midumte zing a upa ber hi Thomas Campbell a ni a, Kum 24 a upa a ni a, a nau William Campbell chu kum 22 mi a ni thung; 1 leh chu Richard Young a ni a, Kum 23 a upa a ni. Kawtthler thawm rehna lai deuh ah chuan Natalie chu an hnuk/pawt phei a, a hmui an hup beh sak a, an sual rawn ta a, Natalie chuan a ke lehlam lehlam chuan tlawhin eng angin a kut pawh thawh ve mahse mipa3 chu ani hmeichhe awm nem 1 chauh chuan han hneh chi ziazang an ni lo.

An duhtawk a an khawih hnu chuan thah nghal mai an tum ta a, mahse an thiante In a an leng haw lam lo ni bawk nen a thahna tur silai emaw hmanrua engmah an lo inring lawk bawk si lo, an theih ang a na in kut an thlak ta ringawt a, an pet zui bawk a. Minute 5 vel an sawisak hnu chuan a thisen a chhuah nasat avang leh a chet tak lo ah chuan a damkhawchhuah zawh an ring tawh lova, an kalsan ta a.

Joanne chu a thiannu, Natalie, thil lei tur a a chhuak chu a lo let leh har tak em avangin a ngaih a tha lova, In pawh kalh hman tawh lovin step ah chuan a tlan thla a, hmanhmawh takin footpath ah chuan a tlan thla zel a, kawtthler a thichhawng a a thiannu, thawmhnaw tet hrep hrup nen a lo let reng chu a zuk hmu ta a. An thenawm khawveng te a pun nghal vat a, Damdawi In lam chu hmanhmawh takin an panpui nghal a.

Natalie pa, Jason pawh chuan a hriat veleh a nupui nen hmanhmawh takin Nevada lam pan chuan rawn thlawk nghal vat a. Natalie chu an sawisak nat em vangin thla 1 dawn lai harh lovin khum ah chuan a mu reng a. Zan 23na, dar 9 a ri tep tih ah chuan a mit a rawn meng tan ta a, a thiannu Joanne leh a nu leh pa te a khum bul a lo ding chu a hmu a. Thei leh thei lovin “Ka pa, engnge in lo tih a?? Khawnge ka awm?” a rawn ti a. A pa chuan “Bawihi, Damdawi In ah I awm a, tawhsual I tawk a ni” ti in a chhang a.

Chu veleh, Natalie chuan a chung a thilthleng chu a hrechhuak ta, a biang a a mittui luang a hrukfai lai chuan a pa chuan “Bawihi, I tihtlak mai a ngai ang, I hreawmna tizualtu mai a ni dawn si a” ti a a sawi lai mek chuan Natalie chuan “Ka pa, ka titla thei lovang, ka pawi an sawi hleinem, min khawihtu te zawk khan alawm ka pawi sawi, min tur lui lo hram rawh, ka hring ngei tur a ni” ti in a lo chhang let a. A pa chu a hmel en chuan a lungawi lo hle tih a hriat, mahse an fanu neihchhun ber in chutia a tih tak tlat si ah chuan a fanu thutlukna siam chu a pawmpui ve ta hram a.

Jason chuan a fanu khawihtute chu a huat em avang leh sawisak let ve a chak em avangin CIA Agent tha leh lar thlan chhuah mi 10 te chu chu’ng misualho zawng tur leh ama hnenah ngei rawn thlen turin North leh South America pumpui ah chuan an za in a tirchhuak ta a.

Mahse, chu’ng midum te chu smuggler turu tak vek an lo ni, police te paw’n man tum a an veh lai mek an ni hlawm a. Chu’ng smuggler lar tak te tan chuan sum leh pai ah buaina awm hek lo, chu khawpui chu chhuahsan in hmun hla takah an bi-bo tih an hrechhuak ta a. Jason pawh chu a thiltum ah chuan beidawng duh mai lovin a Agent te ho chu ram hrang hrang ah, chu’ng midum te zawng tur chuan a tirchhuak leh ta a.

Thla a liam zel a, November Ni 25 tlai lam dar3 ah chuan Natalie chuan nau chu a vei tan ta a. Dar6 bawr vel ah chuan him takin phir(twins) hringin kei, Hugh Hankinson leh ka unaupa Harold Hankinson chu khawvel eng hmu turin kan lo piang ta a ni. Kan lo thanglian chho ve zel a, school kal rual kan ni ve ta. Mahse ka nu hnen a “school kan kal ve dawn lo ami?” ti a ka zawh chuan ka nu chuan “Bawiha, home tutor ka laksak che u a, In ah lehkha in zir dawn alawm, a nuam daih zawk ang” tiin min chhang a. (School kan kal ve an phal loh chhan chu kan classmate te’n ka nu thiltawn chu min hrilh palh ang tih an hlauh vang a ni, kan khua ah chuan ka nu thiltawn hi hre lo pawh an awm mang lo.)

Mak ka ti khawp mai, kan pian tirh atangin ka pu In ah hian kan la awm reng a, a compound hi Sunday inkhawm a kan chhuah bak chu kan chhuahsan ngai ka hrelo. Ka nau, Harold chu ka thian neihchhun a ni mai. Ka nau nen hian phir kan ni e ti ta lo chuan kan mizia inanna lai a awm tho nachungin inan lohna lai kan nei ve nual a. Kei hi mi thinchhe ve tak ka nih rualin fiamthu erawh ka duh hle a, music leh zai lam ah ka tui hle bawk. Ka nau ve thung hi chu a zaidam in a tawng tlem em em a, lam a thiam in painting a thiam hle bawk.

Ka pu chuan misualte chu a la man theih mai loh avang chuan a beidawng tan hle tawh a, kum 12 dawn lai a lo liam ta bawk nen. Chumi hun lai vel chuan ka nu hi a room a tap thawm ka hre fo thin a, ka ngaih a tha vak tawh lo, ka pu nen hian intihthiamlohna an nei emaw ni le te ka ti rilru a. School kan kal an phal ve loh chhan te chu engnge ni ta ang le tiin ka ngaihtuah fo thin.

Ni khat chu ka rilru ah hian min mawlhtu a awm tlat mai, thudik haichhuah ka chak ta tlat. Ka pu in a compound chhuahsan a phal loh te, school kal ve a phal loh avang te, ka nu bul a kan awm tam a phal ve thin loh avang leh ka nu tap thawm ka hriat tak fo avang chuan thil felhlel awm hian ka hre ta tlat a. Ka pu damlo incheck-up tur a ka nu in a hruai hlan chuan ka nu room ah chuan ka lut chho va, wardrobe ka hawng a, ka hai lep-se hneh hle, save chu a inkalh ka ring tho nachungin pawh hawn ka’n tum talh a, mahse ka rin loh tak maiin a lo inkalh lo hlauh mai, phur takin ka hai leh nghal char char a, mahse ka duh ka hmu lo.

Dressing table a drawer 3 chu ka pawt hawng a, ka duh ka la hmu chuang lo, dawhkan a drawer ka pawh hawn ah pawh chuan engmah ka duh ka hmu lo. Khum lam ah ka phei a, lukham hnuai leh Dunlop hnuai ka check vek a, engmah ka la hmu chuang lo, ka beidawng lutuk chuan room chu chhuahsan mai ka tum a, mahse dawhkan leh khum inkar chhuat ka rap chu kawngkhar inhawng ri ang hian a ri ta rEt mai a. Kan In hi a chhuat marble plate phah vek a ni a, ka nu room pawh hi chutiang tur chu a nih ka ring ngawt a.

Mahse hemi Ni hian woolen carpet hnuai ah chuan ka nu chuan a Diary chu a lo thukru reng a ni tih ka hmuchhuak ta. Phur takin carpet chu ka keu va; thingphel te reuh te hi ka zuk hmu a, ka la sawn a; bawm te reuh te, kut lehlam-lehlam leng tawk vel lek a te ah hian ka nu Diary chu ka zuk hmu ta a. Rang takin ka phawrh a, a kawm ah chuan lian kelh kawlh hian rangkachak rawng in ‘1991’ tih a inziak a, ka keu nghal a, a phek hma ber ah chuan ka nu hming, Natalie Hankinson leh a chenna (lehkha zirna hmun, Nevada) Address kimchang takin a inziak a. January Ni 1 atang chuan ka chhiar tan ta a, February Ni 24 ka chhiar thlen meuh chuan ka phu chiang kher mai.

Ka kut a khur a, ka zam tan der mai. Mahse, chhiar zawh hram ka duh avangin ka intipachang a, ka chhiar lui leh char char a. November Ni 25 ah chuan ka nau nen a kan pian thu leh, ka nu’n min tihtlak duh lova ka pu in titla tur a a tih pawh a a hnial tlat thu te chu a inziak a. Chutah chuan, ka nu chu ka mitthla ah a rawn lang nghal a, kan unau tan a heti chen a ruk a hreawm a lo tawrh te chu ka ngaihtuah a, ka khawngaih hle. Ka mittui a sur zung zung a, ka khawhmuh pawh a fiah thei tawh meuh lo, harsa tak a Diary chu ka chhiar zawh hnu chuan a awmna ngai ah chuan dah leh in, ka nu room chu ka chhuahsan ta a.

Zanriah kan ei lai chuan ka nu hi ka en leh zeuh thin, hlim hmel put a tum hram hram thin a, mahse a chhungril ah lungngaihna in a khat a ni tih ka hre tawh. Ka nu chu ka lainat em avangin ka chaw ei pawh chu a tui thlawt lova; spoon nga vel ka ei a, ka tho a, ka thleng kalsan a ka room lam a chhoh ka tum lai tak chuan ka nu chuan “Bawiha, ngatinge I va ei tlem ve? I dam tha lo ami?” a rawn ti a, ka mittui chu ka biang ah a rawn luang nghal a, min hmuh ka hlauh avangin ka nu lam chu ka hawi ngam lo, “Ka nuamsam vak lo a” tih pahin ka room lam ah chuan ka chho ta a.

Ka pu chuan a thiltum ah chuan hmasawnna engmah a hmuh loh avangin a Agent te ho chu a ko kir leh ta a, mahse China a kal, Agent Clyde Walker erawh an koh lawm lawm hnu paw’n a beidawng duh thak lova, a awm zui zel a. Ni khat chu ka nu hreawm tawrh chu na ka tihpui em avang leh ka khawngaih em avangin ka thil hriat chu ka zep thei ta lova, lawn (grass tona tual zawl) a thutthleng sei a ka pu thu chu ka hmu a, ka va pan nghal a, ka thilhriat chu ka sawipui ta a, “Ka pu, ka nu chung a thilthleng zawng zawng kha ka hre vek tawh asin, kan hriatchhuah in hlauh avangin school kan kal ve in phal lova, pawn a kan chhuah I phal lo bawk a, mahse ka dem lo che, a chhan chu kha’ng hun lai zawng khan lo hre ta ila, i In a awm kan duhlo emaw a ni ang a, tun dinhmun hi kan thleng pha hauh lovang.

Ka nu pawh ka dem chuanglo, a tihtur diktak a ti a ni. Min hmangaih a, duat takin min enkawl seilian a, amah khawihtute lak a phuba lak hi chu kan unau kut ah min hlan mai rawh” tiin ka ngen a. Ka pu chuan mak ti tak hian, mit pawh khap lovin minute 1 vel chu min en reng a, a mak ve dawn bawk em a ni. He tih lai hian kum 19 chauh a upa ka la ni. Chutiang rilru ka pu ta mai chu ka pu chuan mak a ti hle mai a, “Bawiha, I thil tih duh ah hian I chiang chiah maw?” tiin min zawt a, keichuan confi takin “Ka pu, ka chiang e, ka nau nen hian ka nu phuba hi chu kan la ngei tur a ni” tiin ka chhang a. Ka pu chuan “ Awle, min dilna chu ka pawm e. Mahse, tunah mai chuan in kal thei lovang. In zawn tur te hi suamhmang, rukru, ruihhlo lam a che nasa ve tak an ni a, gang lian tak lo hruai tawhtu te an ni, chuvangin insual leh silai kah te in zir ve phawt loh chuan thiam engmah nei lova hmachhawn ve tawp mai chi an ni lo” tiin min chhang a.

Ka pu rawtna chu dik ka ti hle a, ka ‘Aw’ ve mai a. Ka nau chu thil awmzia engkim ka hrilhhriat hnu chuan phuba lak chu a duh ve ta a. Tichuan, thla 3 vel chu lehkha zir zawh apiangin tlai lam dar6 atang a dar8 inkar ah silai kah chu kan zir ta ngat ngat a. Thla 4na atangin Chinese Shaolin kungfu master ropui, a vanglai pawh a khawvel pumpui hriathlawh em em, Master Shi Xing Qing chuan kungfu leh insual te chu min zirtir tan ta a.

Kum 1 a ral hnu chuan ka pu hnen ah chuan, “Ka pu, kan kal tawh ange, rem min tihsak thei angem?” tiin ka zawt a, ka pu chuan bul fel tak in “Kum 1 nghak leh phawt ang” tih ringawt hian min chhang a. A ngaihna ka hrelo hle. Mahse, engkim min ngaihtuahsaktu, insual, silai kah zir chen a min buaipuitu a ni bawk si, upa zawk a ni bawk nen, a thu chu ka hnial ngam ta lo a, kum 1 chu kan nghak leh ta a.

Infit tawk leh Confi ve tawk ni a ka inhriat atangin Kum 1 a liam leh ta. Kha mi tum nen a khaikhin chuan tun tum hi chu inringtawk veh vawh tak ka ni ringawt mai, ka over-confi mah mah em aw tih tur khawpin ka inringtawk a ni, ngaihtuah mah teh, kum 20 ka nih lai pawh khan khatiang kha ka lo ni tawh a nia. Ka phur in ka chak zek zek tawh hle mai, misualho chu hmuh thuai thuai a sawisak chu ka thlakhlelh ber a ni. Ka nau erawh, a ngawi reng a, engmah a sawi ngailo.

contd..

Similar Posts:

• Class room-ah inawkhlum
• Phuba Latu Phir Unau – II
• An fimkhur tawk lo em ni?
• Mizo hmeichhia ah an awm ve angem?
• MAWII TAN

Recent Posts:

• Paula Pawla
• Hmangaih CFL
• MIZO SAKHAW BIAK DÂN LEH A TOBUL ~ 2
• Burma-ah ka zin Part – III
• Mizo Technical Graduates (Architects)

This entry was posted on Thursday, July 26th, 2012 at 1:32 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.